شركة Vivo التابعة لـBBK نزلت أحدث موبايل ليها في السوق المصري في الفئة المتوسطة وهو Vivo V21 .. وده يعتبر الأخ المنافس لـRealme 8 Pro و Reno5 4G، لكن هل كالعادة الموبايلات كلها واحد والفروقات بسيطة ؟ ولا المرادي هنلاقي في فرق في التجربة لصالح الـV21 ؟ ده اللي هنعرفه في مراجعة Vivo V21 النهارده.
التصميم :-
تصميم V21 مختلفش كتير عن Vivo V20 .. التصميم شكله مختلف تمامًا عن اي موبايل فئة متوسطة تاني .. اللون مط معمول بشياكة علشان الموبايل ميظهرش فيه بصمات .. وملمسه حلو جدًا وشكل الموبايل عمومًا في الايد يحسسك انك ماشي بموبايل محترم بعيدًا عن بهرجة التصميمات اللي موجودة حاليًا في الموبايلات.
اللي عاجبني اوي في الموبايل ده الخامات .. الموبايل جاي بظهر زجاجي محترم جدًا .. خلاص ولا ريلمي ولا اوبو ولا سامسونج عندهم خامات محترمة في الفئة دي .. ولكن الفريم بلاستيك .. وده المعتاد مش هتلاقي زجاج ومعدن بالسعر ده .. ووزن الموبايل حلو جدًا 176 جرام والتخانة 7.3 ملم .. موبايل خفيف وسهل الإستخدام بإيد واحدة.
شكل الكاميرا الخلفية غريب شوية معرفش هتحبه ولا .. دي النقطة اللي ممكن نختلف عليها في جزئية التصميم .. المهم بروز الكاميرات في المعقول خالص .. والجراب المرفق في العلبة بيغطي البروز بالكامل.
الشاشة :-
الشاشة AMOLED بحجم 6.44 بوصة بدقة FHD+ بتردد بيوصل لـ90 هيرتز .. وبتيجي للأسف بتصميم النوتش القديم .. والنوتش ده موجود علشان المثبت البصري والـAutoFocus اللي موجودين في الكاميرا السيلفي .. حجمهم كبير ومكانش ينفع يتحطوا في ثُقب، عمومًا هنشوف هل فعلًا الموضوع فارق ولا لأ في فقرة الكاميرات.
بالنسبة بقى للشاشة فا هي واحدة من أفضل الشاشات من ناحية الألوان والتفاصيل والسطوع في الفئة المتوسطة، والشاشة بتدعم الـHDR10 Plus ودي حاجه ممتازة جدًا في الفئة دي.
جربت الـVivo V21 جنب Galaxy A52 واللي هو يعتبر أفضل شاشة في الفئة المتوسطة، والفروقات بينهم تكاد تكون مش موجودة فعلًا .. دي حاجه بتوضحلك قد ايه شاشة الـV21 ممتازة في الفئة دي .. وبنجهز لكم فيديو قريب فيه أفضل موبايلات الفئة المتوسطة وأحب أقولك ان شاشة الـV21 كسبت معظم الموبايلات.
الأداء :-
معالج ميدياتك Dimensity U800 بتكنولوجيا 7 نانو ميتر .. معالج أنشط شوية من SD720G في الإستخدام اليومي العادي .. المعالج مع واجهة فيفو المستقرة جدًا واللي الـAnimations فيها ممتازة مع الـ90 هيرتز في الشاشة هتاخد تجربة أداء حلوه جدًا، أحسن من باقي الموبايلات في الفئة دي ومنهم Mi 11 Lite.
مبسوط بصراحة من فيفو انها بعد ما اتاخرت نزلت موبايل محترم مش موبايل بيكرر نفسه .. ولكن اللي مش لطيف هو الأداء الرسومي واللي يعتبر أقل حوالي 20% عن SD720G.
ببجي بتشتغل على High HD وبتشتغل كويس بس مش بنفس سلاسة SD720G بتشتغل بأداء أقل .. وكول اوف ديوتي بتشتغل على Medium Graphic ومفيش إعدادات أعلى من كده للأسف.
ولكن الحلو جدًا ان الموبايل ده حرفيًا مش بيسخن .. السخونية بتاعته قليلة أوي والمعالج مش بيحصله إختناق كبير بعد فترة من الضغط عليه .. من الأخر الموبايل ده مش معمول للـGamers .. لو عايز أداء يومي عادي قوي وإستخدامك سوشيال ميديا وفيديوهات وكده الموبايل ده هيكون ممتاز جدًا معاك.
البصمة تحت الشاشة .. واحدة من أسرع البصمات اللي ممكن تجربها .. والـFace Unlock صاروخ مفيهوش ولا غلطة .. الموبايل جاي بـAndroid 11 بواجهة فيفو المستقرة جدًا .. هتلاقي Always On Display فيه اشكال كتير.
الموبايل جاي بـ128 جيجا من نوع UFS 2.2 بيدولك سرعة قراءة وكتابة محترمة جدًا مع 8 جيجا رام والمُميز في الواجهة انها بتقدر تاخد 3 جيجا رام من مساحة التخزين علشان تخلي الرام الإجمالي يوصل لـ 11 جيجا رام وتفتح تطبيقات أكتر في الخلفية .. ميزة لطيفة جدا .. والواجهة شاطرة اوي في انها تحافظ على البرامج المفتوحة في الخلفية.
للأسف الموبايل مفهوش NFC ودي حاجة من الحاجات اللي معجبتنيش .. واللي معجبنيش برده الصوت .. الموبايل جاي بصوت Mono زيه زي Realme 8 Pro و Oppo Reno 5 4G وبالتالي صوته أقل شوية من اي موبايل صوته Stereo .. ولكن الصوت هنا كصوت Mono فا هو كويس.
والموبايل واخد ستايل الفلاج شيب ومدخل الـ3.5 ملم متشال منه .. وأنا شايف ده تنازل سخيف برده .. وكده كده معاك وصلة تحويل في العلبة .. وسماعة كمان .. بس برده كنتوا تخلوا المدخل.
مستشعر التقارب المسؤول عن قفل الشاشة اثناء المكالمات سوفت وير للأسف فساعات بيغلط .. كان الافضل يكون هارد وير وملقتش كمان ميزة تسجيل المكالمات موجودة .. اما بالنسبة للشبكات فا الموبايل ده ياخد 10 من 10، ممتاز جدًا !
البطارية :-
البطارية 4000 مللي امبير .. تحسها صغيرة ولكن مع تشغيل الـ90 هيرتز علطول حتى مش وضع الـAuto Select .. البطارية بتوصل بسهولة لـ7 ~ 8 ساعات شاشة مفتوحة .. زيها زي المنافسين من غير اي مشكلة.
الشاحن المرفق 33 واط بيشحن البطارية في ساعة .. شغال كويس جدا .. كان نفسي في شاحن أسرع طبعا زي اوبو رينو 5 .. ولكن برده زمن الشحن معقول.
الكاميرات :-
الموبايل جاي بـ3 كاميرات في الظهر .. الأساسية 64 ميجا بيكسل فتحة عدسة F/1.8 بمثبت بصري حقيقي .. والتانية 8 ميجا بيكسل للتصوير الواسع F/2.2 .. والتالتة 5 ميجا بيكسل ماكرو فتحة عدسة F/2.4 .. والسيلفي 44 ميجا بيكسل F/2.0 بيدعم مثبت بصري حقيقي وفيه Dual Soft Flash Light علشان تقدر حتى تصور سيلفي في الظلمة.
بص يا سيدي .. خلينا نبدأ بالكاميرا الخلفية .. الموبايل ده غريب اوي .. اداءه في الإضاءات العالية عادي .. او تقدر تقول كويس .. ولكن أداءة في الـNight Mode تحفه .. علشان المثبت البصري طبعا .. الأداء متوازن ومعقول بس في الإضاءات الداخلية العالية الصور بتبقى فاتحة زيادة عن الطبيعي حاجة بسيطة وده المعتاد من معالجة مجموعة BBK.
ولكن الـNight Mode زي ما قولتلك عجيب وغريب .. الموبايل بياخد وقته في معالجه الصورة بس بتطلع متعالجة زي ما قال الكتاب .. تقدر تعملها Upload زي ما هي كده من غير اي تعديل .. تفاصيل محترمة وحدة معقوله جدًا وألوان مظبوطة وسيطرة على الإضاءات بشكل محترم اوي.
لما جربت مع الـA52 لاقيت ان الأداء مُتقارب في الإضاءه الخارجية، بس الفرق ان فيفو زود اللون الأسود شوية .. في الإضاءه الداخلية العالية A52 بيقدر يظبط الألوان أكتر لكن V21 بيفتحها زيادة عن الطبيعي.
ولكن الـNight Mode بقى الاتنين فيهم مثبت بصري، والإتنين 64 ميجا بيكسل .. ولكن عجبني أكتر اداء الـV21.
بالنسبة بقى للسيلفي فا هو موجود في نوتش علشان المثبت البصري زي ما وضحتلكم، التصوير في الإضاءات العالية والداخلية كويس، لكن المختلف هو التصوير الليلي واللي هو جامد جدًا بفضل المثبت البصري في السيلفي.
بالنسبة بقى لتصوير الفيديوهات فالموبايل بيدعم تصوير بجودة 4K مع 30 فريم او 60 فريم في الثانية .. بس للأسف المثبت البصري بيشتغل في الـ1080p بس .. وممكن تشغل اوبشن الـAnti-Shake اللي بيقلل الإهتزازات وبيديك نوع غير مباشر من انواع الثبات.
سعر Vivo V21 :-
- نسخة واحدة 128 جيجا مع 8 جيجا رام بسعر 5690 جنية مصري
بينفع تركب شريحتين إتصال او شريحة واحدة مع كارت ميموري بحجم 512 جيجا.
الرأي النهائي :-
مميزات Vivo V21 :-
- كاميرات ممتازة بمثبت بصري
- معالج مميز في الأداء اليومي
- بطارية إستهلاكها كويس بالرغم من ان حجم البطارية صغير
- شاشة ممتازة جدًا بمعدل تحديث 90 هيرتز داعمة للـ HDR10+
- عوامل أمان سريعة
- أفضل شبكات في الفئة دي
- تصميم شيك راقي وخامات ممتازة ووزن خفيف
- سوفت وير مستقر
عيوب Vivo V21 :-
- الصوت مش Stereo
- مفيش مدخل الـ3.5 مللي
- مفيش الـNFC
- مستشعر التقارب مش الأفضل
- مفيش تثبيت في تصوير الـ4K
- الشاشة بتصميم النوتش القديم
Comments