مراجعة Vivo Y30 و Vivo Y50 – مواصفات غريبة على الفئة المتوسطة !

في موبايلات ساعات بتبقى غريبة شوية في مواصفاتها .. وتلاقيها كده مش مُتميزة في أي حاجة .. الموضوع ده بدأ يتكرر كتير .. ساعات كنت تلاقيني متحمس للموبايلات دي .. وساعات تانيه لا مش ببقى متحمس .. إحنا على معاد مع مراجعة موبايلات فيفو المتوسطة الجديدة Y30 و Y50.

والموبايلات دي على الورق مش بيقدموا أي حاجة قوية .. ولكن هل الأداء الفعلي كويس .. طب نعرف منين الأداء الفعلي ؟ .. أكيد هنقارن مع المنافسين اللي في نفس الفئات السعرية زي ما انتوا متعودين .. علشان في النهاية الحكم يبقى واضح ومنطقي وبدون تحيز.

التصميم :-

الموبايلين بخامات خارجية بالكامل من البلاستيك .. الهاتف الأرخص Y30 اللي في فئة الـ3000 الاف جنية ممكن أتقبل إنه من البلاستيك عادي .. لإن معظم المنافسين بلاستيك.

الهاتف الأغلى اللي في فئة الـ4000 جنية اللي هو الـY50 .. كنت أفضل يكون من الزجاج .. ولكن هما خدوا نفس نهج سامسونج وهواوي وريلمي واوبو وإستخدموا البلاستيك.

عمومًا التصميمات لذيذة مش سخيفة .. الـY50 واخد نفس شكل الـOppo A92 .. والـY30 واخد شكل برده مش بطال خالص .. وبيحصل إنعكاسات على ظهر الموبايلين مع تغير الإضاءة عليهم.

مفيش بروز كبير في الموبايلين في الكاميرا الخلفية .. وفي جرابات شفافة في علب الموبايلات ديه علشان تغطي البروز الصغير ده.

الموبايلين وزنهم الطبيعي في الفئة ديه دلوقتي حوالي 197 جرام .. مش هتحس بالوزن اوي .. متوزع صح في الموبايلين .. ومن الأخر تصميمات شيك سمبل لطيفة ولكن بخامات بلاستيك تقليدية مفهاش عنصر ابهار.

الشاشة :-

شاشة الـY50 بحجم 6.53 بوصة IPS LCD بدقة FHD+ .. شاشة الـY30 بحجم 6.47 بوصة IPS LCD برده بس بدقة أقل HD+ .. والشاشتين واخدين شكل الثقب للسيلفي على الشمال.

ولما نيجي نبص على الشاشتين من ناحية Quality الألوان هنلاقيهم أخوات تقريبا .. مفيش اي اختلافات وبرده الإتنين نفس السطوع تحت الشمس تقريبًا واللي هو مقبول جدًا بالمناسبة.

طيب هل الشاشات ديه حلوة في الفئة السعرية ديه ؟

خلينا نبدأ بالأصغر الـY30 ونقارنه مع Redmi Note 9 .. هنلاقي الفيفو متفوق في ألوان شاشة احسن بفرق ملحوظ بس أقل بشكل واضح في دقة الشاشة من النوت 9.

أما ندخل على الاكبر Y50 ونقارنه مع الـRealme 6 .. هنلاقي هنا لا شاشة الريلمي 6 ألوانها أحسن بفرق واضح .. وكمان شاشة الريلمي ترددها أعلى 90 هيرتز مش 60 هيرتز زي الـY50 .. وكمان في بدايل منافسة زي M31 بشاشة أموليد.

فأنا مش شايف أي عنصر إبهار في الشاشات اللي هنا في الـY30 والـY50 .. ومفيش إعلان رسمي عن طبقة الحماية والموبايلين بيجوا في العلبة متركب عليهم سكرينة.

الأداء :-

الـY50 بيجي بمعالج سناب دراجون 665 زي Oppo A92 .. اما الـY30 فا هو بيجي بمعالج ميدياتك Helio P35 وهو معالج قديم نسبيًا.

الموبايلين بيجوا بمساحة 128 جيجا ولكن الـY50 بنوع ذاكرة اسرع UFS 2.1 والـY30 نوع ذاكرة eMMC5.1 .. وعمومًا الموبايلين نوع الذاكرة طبيعي جدًا في فئتهم السعريه مش ميزة ومش عيب.

ولو عاوز الحق بقى .. الموبايلين مش بيقدموا أفضل معالج في فئتهم السعرية .. يعني الـY50 بنفس سعره هتلاقي الوحش ريلمي 6 بمعالج ميدياتيك G90T الأقوى في الأداء بفرق كبير.

والـY30 بيجي بنفس سعره الـRedmi Note 9 او الـRealme 6i واللي بيجوا بمعالجات ميدياتيك.

ولكن لما نيجي نجرب الموبايلين هنلاقي سوفت وير فيفو الـFun Touch بيحاول يخلي الدنيا مستقرة شوية .. بيحاول يديك أداء ميحسسكش بعجز المعالجات اللي هنا وأكيد طبعا أداء الـY50 أحسن من Y30.

ولكن أنا تقييمي الشخصي إن المعالجات اللي هنا بعيده شوية في أدائها عن المنافسين وبالتالي مهما كان تجربة السوفت وير مستقرة جدًا بس مش هتوصل للأداء المطلوب الموجود بالفعل في الهواتف المنافسة خصوصًا في تشغيل الألعاب.

الـY50 بيشغل ببجي على اعدادات جرافيك Medium .. وكول اوف ديوتي بتشتغل على فيري هاي جرافيك .. اما الـY30 بيشغل ببجي على Medium برده وكول اوف ديوتي بتشتغل على Low جرافيك اللي هي أقل اعدادات.

تجربة الألعاب هنا ودرجات الجرافيك اللي بتقدر تشغل عليها مش أفضل تجربة في الفئات السعرية للموبايلين .. من الأخر لو إنت حد Gamer وبيلعب ألعاب تقيلة فأكيد منصحكش بالموبايلات دي .. ولكن لو إنت مش جيمر ومش بتلعب العاب تقيلة ممكن ساعتها تفكر فيهم.

عوامل الأمان وعناصر اخرى :-

الموبايلات بتيجي ببصمة في الظهر .. مش عارف ليه محطوش بصمة الـY50 على زرار الباور .. الـY50 بيقدملك بصمة سريعة مفهاش مشاكل وكذلك الحال الـFace Unlock.

والـY30 برده يعتبر مُميز في بصمته السريعه والـFace Unlock السريع اللي بالنسبة لسعره فدي ميزه قوية.

الموبايلين جايين باندرويد 10 مع واجهة فيفو Funtouch 10 .. الإتنين فيهم Dark Mode اللي بيقلب كل حاجة للون الإسود حتى الـFacebook .. والموبايلين فيهم Option عمل نسختين من برامج التواصل الإجتماعي.

وللأسف الإتنين مفهش لمبة اشعارات ولا في بديل عنها .. المستشعرات كلها شغالة في الموبايلين .. ضوء، تقارب، جيروسكوب.

صوت الموبايلين جاي من سماعة واحدة تحت على اليمين .. والصوت زي بعض تقريبًا والصوت عالي ومقبول جدًا بالسعر ده مُقارنتا بالمنافسين.

أداء شبكات الواي فاي وشبكات الإتصال مُمتاز في الموبايلين مش هتلاقي فيهم أي مشاكل.

البطارية :-

بطارية كبيرة بحجم 5000 مللي أمبير في الموبايلين .. هتستحمل معاك يوم كامل من الإستخدام وأكتر كمان .. مفيش اي مشاكل فيها.

منفذ الشحن USB Type C في الموبايلين .. والشاحن المرفق 10 واط في الموبايلين وبيشحن البطارية في حوالي ساعتين ونص.

وقوة الشحن وزمن الشحن دول مش مناسبين تماما للـY50 اللي بنفس سعره في الـRealme 6 بشاحن 30 واط .. إنما ممكن اتقبله شوية في الـY30 واللي برده في منافسين بشحن أسرع ولكن مش بالفرق الكبير اوي.

الكاميرات :-

الكاميرا الخلفية واحدة في الموبايلين رباعية الأساسية 13 ميجا بيكسل فتحة عدسة F/2.2 .. والتانية 8 ميجا بيكسل للتصوير الواسع فتحة عدسة F/2.2 .. والتالتة 2 ميجا بيكسل ماكرو فتحة عدسة F/2.4 والاخيرة 2 ميجا بيكسل للعزل.

والسيلفي 16 ميجا بيكسل فتحة عدسة F/2.0 في الـY50 .. اما في الـY30 فهو 8 ميجا بيكسل فتحة عدسة F/2.0.

والـY50 فيه Night Mode اما الـY30 فا للأسف هو مفيهوش نايت مود .. وعارف ليه بروز الكاميرات قليل أوي ؟ .. علشان الكاميرات اللي هنا أداءها متواضع أوي.

عموما أداء الكاميرات مقبول في الشمس .. ولكن طبعًا في تفوق في معالجة الألوان وفي الـHDR في الـY50 بطبيعة الحال إنه أغلى وبمعالج أفضل وده اللي مخلي الصور تبقى أحسن شوية برغم إنه بنفس الكاميرا الخلفية بتاعت الـY30.

لما قارنت Y50 بالـRealme 6 فا لاقيت ريلمي 6 برنس جدًا وأحسن بشكل واضح وصريح من الـY50 .. ولما جربت أصور بالـNight Mode بالموبايلين فا لاقيت تفوق واضح وصريح جدا لريلمي 6 برده.

ولما نقارن الـY30 مع الـNote 9 .. هنلاقي برده النوت 9 متفوق في التفاصيل وفي الألوان عمومًا .. الـY30 بحس صوره بهتانه شوية كدا مش عارف ليه.

أما السيلفي .. فهو مختلف شكلًا و موضوعًا في الموبايلين .. سيلفي الـY50 أفضل بفرق واضح من الـY30 .. سيلفي الـY30 معجبنيش بالنسبة لسعره .. أما سيلفي الـY50 فهو كويس جدًا ويمكن ده من احسن الحاجات اللي في الـY50.

ولما جربت اقارن الـY50 بالـRealme 6 في السيلفي لاقيت Y50 متفوق بفرق بسيط في الإضاءات الضعيفة .. ومقارنة الـNote 9 مع الـY30 لاقيت تفوق واضح لتفاصيل النوت 9 في السيلفي على الـY30.

بالنسبة لتصوير الفيديوهات بالكاميرا الخلفية .. فـ فيفو Y50 بيصور فيديوهات 4K من غير ثبات الكتروني و 1080p بثبات الكتروني .. اما Y30 فبيصور فيديوهات بجودة 1080p بدون ثبات الكتروني .

شوف صور وفيديوهات متصورة بالموبايلات في فيديو المراجعة !

أسعار الموبايلات :-

• Y50 نسخة 128 جيجا مع 8 جيجا رام بسعر 4300 جنية مصري
  وبيدعم تركيب شريحتين إتصال وكارت ميموري في نفس الوقت
• Y30 نسخة 128 جيجا مع 4 جيجا رام بسعر 3300 جنية مصري
  وبيدعم تركيب شريحتين إتصال مع كارت ميموري في نفس الوقت

الرأي النهائي :-

مميزات Vivo Y30 :-

• بطارية قوية
• صوت عالي
• شبكة قوية
• عوامل أمان سريعة

عيوب Vivo Y30 :-

• معالج قديم واداءه متواضع
• كاميرات ضعيفة
• دقة شاشة قليلة

مميزات Vivo Y50 :-

• بطارية قوية
• شبكة قوية
• من أرخص الموبايلات بـ8 جيجا رام
• سيلفي محترم جدًا

عيوب Vivo Y50 :-

• معالج مش الأفضل
• كاميرا خلفية مش كويسة
• الشاشة مش مُميزة
• سرعة شحن غير مقبولة إطلاقًا
• خامات خارجية متواضعه
• مفيش مايكروفون اضافي لعزل الضوضاء

وعمومًا Y30 و Y50 موبايلات مش مُميزة من ناحية المواصفات .. ولكن فيفو بتـ تارجت الناس اللي بيحبوا يشتروا موبايلات مضمونة بشكل كبير .. خايفين من ظهور مشاكل خفيفة او Bugs في السوفت وير .. خايفين من السخونية ولو بسيطة .. لان كل ده مش هتلاقيه في الموبايلات دي.

بس بقى في حالة كونك Gamer بتلعب كتير على الموبايل او بتحب التصوير كتير .. فالموبايلات ديه معتقدش انها هتكون مناسبة لإستخدامك.

فيديو المراجعة :-