شركات كتير الفترة دي بتنزل موبايلات مره وبعدين ينزلوه مره كمان بإختلاف بسيط، شاومي عملت كده لما نزلت Xiaomi 11 Lite 5G New Edition اللي هو نسخة من Mi 11 Lite القديم لكن مع إستخدام معالج أقوى SD778G .. النهارده هنقدملكم مراجعة Xiaomi 11 Lite 5G NE وهنوضح موقفه وسط المُنافسين ومميزاته وعيوبه.
التصميم :-
أحسن حاجه في الموبايل ده هو وزنه، موبايل وزنه 158 جرام وتخانته 6.8 مللي بس .. نفس وزن وأبعاد مي 11 لايت .. موبايل صغير وخفيف جدًا، لما تجربه هتلاحظ الفرق بينه وبين أي موبايل بتستخدمه!
وفي نفس الوقت التصميم Premium فخم جدًا .. ظهر زُجاجي فخم مع شكل كاميرات محترم ومفيهوش أي تفاصيل ملهاش لازمه، الفريم بلاستيك مش معدن علشان الوزن يبقى أخف.
احنا في موبيزل كنا مُعجبين بالتصميم ده في Mi 11 Lite ولسه لحد دلوقتي أهم ميزة في الموبايل ده هي التصميم .. لكن في ناس بتحب الموبايل يكون تقيل وليه وزن وهي أذواق في الأخر.
بروز الكاميرات الخلفية معقول، وفي جراب شفاف في علبة الموبايل بيغطي البروز ده.
الشاشة :-
شاشة الموبايل بحجم 6.55 بوصة من نوع AMOLED بدقة FHD+ مع ثُقب متوسط الحجم للسيلفي على الشمال .. وتردد الشاشة بيوصل لـ90 فريم في الثانية.
نفس شاشة مي 11 لايت القديم بدون إختلاف.
شاشة كويسة من ناحية الألوان .. هي الألوان هنا مش مشبعة بزيادة .. هتحس احيانا ان الالوان فاتحه شوية .. بس ممكن تخلي الوان الشاشة مشبعة من اعدادات الشاشة وهتحس انها افضل شوية .. السطوع معقول على فئة ال 5 6 الاف جنية .. مش هيضايقك تحت الشمس.
الشاشة عليها طبقة حماية Corning Gorilla Glass الجيل الخامس .. والموبايل جاي في العلبة متركب عليه سكرينه.
الأداء :-
أداء الـXiaomi 11 Lite 5G NE مختلف تمامًا عن Mi 11 Lite القديم .. شاومي إستخدمت معالج سناب دراجون 778G اللي بيشتغل بتكنولوجيا 6 نانو .. داعم لشبكات الجيل الخامس.
معالج أداءه ممتاز جدًا، والحلو في المعالج ده انه يقدر يوفر في البطاقة بشكل كبير، وفي نفس الوقت مش بيسخن أوي .. ودي ميزة كبيرة ليه، لكن أداء الموبايل كان هيكون أفضل لو الشاشة كانت داعمة للـ120 هيرتز.
أداء الموبايل حلو لو هتقارنه بموبايلات في فئة 5000 جنية، لكن لو قارنته بموبايلات أغلى في السعر هتلاقي موبايلات تانية أقوى من شاومي نفسها وهيخسر قدامهم.
ببجي بتشتغل على Ultra HDR ودي اعدادات معقولة جدًا على المعالج ده .. المعالج مش بيحصله إختناق كبير لما تضغط عليه ومش بيسخن أوي ودي حاجه لطيفة جدًا.
عوامل الأمان وعناصر اخرى :-
البصمة موجودة على زِر الباور، أداءها سريع بس برده بيحصل تجميع في أيقونات الواجهة .. والـFace Unlock سريع بس برده الأيقونات بتاخد وقت في التجميع.
الموبايل داعم للـNFC .. وفيه ميكروفون اضافي لعزل الضوضاء .. وفيه مستشعر IR Blaster .. لكن للأسف مفيش مدخل السماعات الـ3.5 مللي، وفي وصلة تحويل من Typc C لـ3.5 مللي في العلبة.
صوت الموبايل بيكون Stereo .. صوت ممتاز جدًا وعالي جدًا، يخليك متتوقعش ان الصوت طالع من الموبايل الصغير ده .. الـBass محترم، وده نفس صوت مي 11 لايت القديم بالمناسبة.
مستشعر التقارب موجود سوفت وير مش حقيقي .. بيقفل الشاشة بسهولة في الوقت المطلوب، لكن مش بيفتح بسهولة وغالبًا هيغلط .. ودي مشكلة ممكن تتحل بتحديث سوفت وير عادي.
بالنسبة لأداء الشبكات سواء شبكة الـWi Fi او شبكات الإتصال فا مفيش أي مشلة في الشبكات وأداءها كويس جدًا.
البطارية :-
بالنظر لحجم الموبايل أكيد تتوقع بطارية صغيرة .. البطارية بسعة 4250 مللي امبير وأداءها مش قوي فعلًا، لو استخدامك متوسط وكملت 6 ساعات شاشة مفتوحة يكون كويس جدًا.
الشاحن اللي بيجي مع الموبايل 33 وات، بيشحن البطارية بالكامل في ساعة تقريبًا او أقل حاجه بسيطة .. مش أسرع شاحن ولا أبطأ شاحن.
الكاميرات :-
الموبايل بيجي بكاميرا خلفية ثُلاثية، الأساسية 64 ميجا بيكسل بفتحة عدسة F/1.8 مفيهاش مثبت بصري، الثانية 8 ميجا بيكسل بفتحة عدسة F/2.2 للتصوير الواسع، الأخيرة 5 ميجا بيكسل بفتحة عدسة F/2.4 ماكرو، والسيلفي 20 ميجا بيكسل بفتحة عدسة F/2.2 بتطور بسيط عن مي 11 لايت القديم.
أداء الكاميرا الخلفية في الإضاءات العالية حلو .. الموبايل بيعمل معالجة حلوه للصور، وكمان بيقدم كمية تفاصيل محترمة جدًا .. وفعلًا في بعض الصور بتطلع الصور بتاعت كاميرا شاومي أحسن من جوجل كاميرا.
أما الأداء في الإضاءات الداخلية التفاصيل بتقل بشكل ملحوظ، وحتى في جوجل كاميرا مش بيطلع تفاصيل أكثر .. وبالتالي كده في الكاميرا الخلفية بفضل التصوير بكاميرا شاومي العادية.
لما قارنت الموبايل بالـGalaxy A52 لاقيت ان الموبايلين ممتازين في الإضاءات العاليه .. بس الصور بتاعت شاومي 11 لايت أفضل والألوان مُشبعه أكثر .. كمية التفاصيل واحدة تقريبًا، لكن في الإضاءه الداخلية يبدأ تفوق A52 يظهر بتفاصيل أكثر ومعالجة ألوان أفضل.
اما السيلفي .. فهو مختلف شوية في الـ Xiaomi 11 Lite 5G NE .. السيلفي هنا بيدخل ضوء زيادة شوية في الصور فتحس ان ساعات الصور بتلسع شوية لو بتتصور في مكان اضاءته عاليه .. الي هو محتاج تعمل ايدت وتقلل شوية الـ Highlights .. بس مجملا تجربة السيلفي مش وحشة .. وبتتحسن كتير مع استخدام جوجل كاميرا>
ولما قارنت الموبايل مع الـ Galaxy A52 و الـ Reno 6 .. لاقيت صور ال11 لايت منورة زيادة عن اللزوم ولاسعة احيانا .. بس في الاضاءات الداخلية السيلفي بتاع الـ 11 لايت كان كويس جدا.
بالنسبة لتصوير الفيديوهات فالموبايل بيدعم تصوير فيديوهات بجودة 4K مع 30 فريم في الثانية .. والموبايل بيدعم مثبت إلكتروني، وفي ميكروفون اضافي لعزل الضوضاء.
سعر Xiaomi 11 Lite 5G NE :-
- نسخة 128 جيجا مع 6 جيجا رام بسعر 5900 جنية
- نسخة 128 جيجا مع 8 جيجا رام بسعر 6300 جنية
- نسخة 256 جيجا مع 8 جيجا رام بسعر 6800 جنية
والموبايل بيدعم تركيب شريحتين إتصال 5G او شريحة واحدة مع كارت ميموري 256 جيجا.
الرأي النهائي :-
مميزات Xiaomi 11 Lite 5G NE :-
- تصميم خفيف وشيك جدًا
- أرخص موبايل بمعالج SD778G الي بيقدر يقدم اداء مستقر مع سخونية مقبولة
- شاشة معقولة في الألوان والسطوع بس كان الأفضل تكون 120 هرتز مش 90
- صوت ستريو عالي
عيوب Xiaomi 11 Lite 5G NE :-
- مستشعر المكالمات سوفت وير مش الأفضل
- كاميرا خلفية أداءها مش الأفضل في الإضاءات الداخلية
- بطارية صغيرة نسبيا
- مفيش مدخل 3.5 مللي ومفيش سماعة في العلبة
الموبايل ده موقفه محرج شوية لو انت بتدور على أعلى أرقام مواصفات .. لإنك هتلاقي Poco F3 في نفس الفئة السعرية بمعالج أقوى وشاشة أفضل وبطارية أكبر ومناسب أكتر للألعاب، اما لو انت مش Gamer ويهمك موبايل شيك خفيف وفي نفس الوقت أداء مستقر بدون مشاكل ممكن تفكر في الموبايل.
Comments