مفيش حد مش بينزل من بيته من غير موبايله دلوقتي .. وده بيوضح اهمية البطارية واهمية سرعة الشحن .. النهارده هنقدملكم الانطباعات الأولية لـ Xiaomi 11T Pro الجديد من شاومي واللي بيجي بشاحن بقوة 120 وات ودي تعتبر أقوى سرعة شحن لحد دلوقتي .. وهوضح نتيجة التجربة الأولية للموبايل.
التصميم :-
تصميم الموبايل ميعتبرش نقطة قوة .. تصميم ممكن تتقبلة في فئة سعرية 6 الاف او 7 الاف جنية لكن مش تصميم موبايل غالي خالص .. والاعتراض مش على الخامات على قد ما هو على الشكل نفسه.
الفريم معدن كويس والظهر زُجاجي، خامات راقية كويسة جدًا .. بس ده بيتترجم لوزن ثقيل نسبيًا حوالي 204 جرام وتخانة مش قليلة خالص حوالي 8.8 مللي .. وأنا شايف ان شاومي كانت تقدر تعمل تصميم أفضل من ده.
بروز الكاميرات مش كبير أوي لإن أصلًا الموبايل تخانته كبيرة نسبيًا فا دي حاجه كويسة .. والموبايل مش مقاوم للماء والغُبار بشهادة مُعتمدة .. مقاومته لرذاذ الماء الخفيف بشهادة IP53.
الشاشة :-
شاشة 11T Pro بتيجي بحجم 6.67 بوصة من نوع AMOLED بدقة FHD+ بتردد بيوصل لـ120 هيرتز .. الشاشة بتعرض أكثر من مليار لون .. داعمة للـHDR10+ مع سطوع بيوصل لـ1000 شمعة.
الشاة ممتازة .. محتاج بس ترفع التردد لـ120 هيرتز وتخلي الألوان Saturated وتفعل الذكاء الإصطناعي في الشاشة، وهتلاقي تجربة الشاشة مُمتازة جدًا ومتكاملة جدًا.
تجربة الشاشة قريبة من تجربة Poco F3 .. والشاشة هنا محمية بطبقة حماية Corning Gorilla Glass Victus وبتيجي في العلبة متركب عليها سكرينه.
الأداء :-
الموبايل بيجي بمعالج رائد من كوالكوم وهو سناب دراجون 888 بتكنولوجيا 5 نانو ميتر .. معالج قوي جدًا وكلنا تقريبًا عارفين أداءه .. بيجي مع ذاكرة تخزين UFS 3.1 سريعة جدًا في القرائة والكتابة .. وده بيقدملك أداء فائق جدًا زي Mi 11 .. وكمان مع الشاشة الـ120 هيرتز علشان تاخد سلاسة أداء رهيبة.
مشكلة المعالج ده السخونية بقى .. لما عملنا تجربة للمعالج على برامج تقيلة بتجيب أقصى أداء في أنوية المعالج .. المعالج حصلة إختناق وتردداته نزلت 25% فقط .. وده رقم متوسط مش وحش ومش ممتاز .. المعالج بيلجأ لإنه يعمل إختناق للأنوية لما الحرارة تزيد عليه .. معنى ان الاختناق مش كبير أوي انه مفيش سخونيه كبيرة.
وبالنسبة للسخونية في جسم الموبايل نفسه .. فا السخونيه أرحم بكتير عن Mi 11 وده جايز يكون لإن الـXiaomi 11T Pro أتخن شوية .. وده بيسمح لشاومي انها تظبط التبريد بتاع الموبايل .. ومش معنى كده انه مش بيسخن، لأ هو بيسخن عادي بس في المعقول وأقل من Mi 11 بفرق ملحوظ.
لعبة ببجي بتشتغل على Ultra HDR .. وممكن تنزلها لـHDR علشان تفتح الـExtreme في الفريمات .. واللعبة سلسه جدًا والسخونه في ببجي وفي الألعاب عمومًا بسيطة جدًا.
عوامل الأمان وعناصر اخرى :-
البصمة موجودة على زِر الباور .. هي سريعة بس بيحصل تجميع بسيط في أيقونات الواجهة .. التجميع بيحصل بسرعه بس مزعج شوية وملوش لازمة .. والـFace Unlock أداءه كويس.
مستشعر المكالمات موجود حقيقي Hardware أخيرًا .. شغال زي الفل وأداءه ممتازة، هو بس مكانه مش أفضل حاجه كان المفروض يكون تحت شوية لكن كويس انه موجود.
السماعات الخارجية في الموبايل بتيجي Stereo .. والتجربة الصوتيه محترمه جدًا .. الـBass محترم ودرجات الصوت كويسة جدًا ونقية جدًا.
البطارية :-
البطارية بتيجي بسعة 5000 مللي امبير .. البطارية مش أفضل حاجه، بتخلص بسرعه .. لكن مش هنحكم عليها دلوقتي هنخلي الحكم عليها في مراجعة Xiaomi 11T Pro الكامله .. ولكن بشكل عام هي أرحم من بطارية Mi 11 اللي بطاريته سيئة جدًا من وجهة نظري .. وبالنسبة للشاحن فا هو بقوة 120 وات وموجود في العلبة.
عملنا تجربة فعلية علشان نعرف بيها الموبايل بيشحن في قد ايه .. الموبايل كان 16% واتوصل بالشاحن، وفي خلال 5 دقائق شحن لحد 49% .. وبعد كمان 5 دقائق إضافية شحن لحد 73% .. وبعد كمان 5 دقائق إضافية علشان يكون اجمالي الوقت 15 دقيقة شحن من 16% الى 91% .. وشحن من 16% الى 100% في 18 دقيقة بس.
الكاميرات :-
العدسة الأساسية بدقة 108 ميجا بيكسل بفتحة عدسة F/1.8 بدون مُثبت بصري بمستشعر من سامسونج HM2 .. والعدسة السيلفي الأساسية 16 ميجا بيكسل بفتحة عدسة F/2.5.
الكاميرات اتجربت جنب Galaxy A52s اللي يعتبر بيقدم كاميرات ممتازه في فئته، والنتيجة ان معظم صور 11T Pro الألوان بتاعتها مُشبعة بزيادة وده هيحسسك ان صور A52s ألوانها بهتانه .. لكن الألوان الحقيقية موجودة في A52s في معظم الصور .. وبشكل عام الـLook بتاع صور شاومي أحلى.
الحاجه اللي كانت ناقصة الكاميرا دي انها يكون فيها مثبت بصري .. شوف تجربة الكاميرا ومقارنتها مع A52s 5G في فيديو المراجعة !
السعر المتوقع :-
الموبايل هيتعلن بشكل رسمي عن سعره في مصر يوم 27 اكتوبر القادم، وممكن سعره يوصل لـ12 ألف جنية مصري للنسخة الـ256 جيجا مع 12 جيجا رام .. ومفيش مكان لتركيب كارت ميموري ومفيش مدخل 3.5 مللي.
ودي كانت إنطباعات أولية سريعة عن الموبايل .. لسه الموبايل هيتجرب فترة أطول علشان نشوف الشبكة وأداءها وكمان البطارية وباقي التفاصيل .. والموبايل ده لو انت يهمك الأداء في المقام الأول والأخير يبقى هو اللي تفكر فيه .. وفي نفس الوقت معاك شاحن صاروخ وصوت Stereo ممتاز جدًا.
الموبايل هينزل غالي وممكن بالسعر بتاعه تشتري Mi 11 او اي موبايل رائد تاني .. والأمل الأكبر على Xiaomi 11T العادي انه ينزل بسعر منطقي ومنافس أكثر .. نتمنى ده يحصل.
Comments