بقالنا فترة بنجرب موبايل جديد من شاومي وهو Mi 10T Lite .. أرخص موبايل 5G في مصر، وانت عارف اننا في مراجعات الموبايلات بنحاول نقارن الموبايل اللي بنراجعه بأقرب موبايل ليه .. لكن المرة دي الوضع مختلف شوية، أقرب مُناسب للموبايل هو الـPoco X3 من شاومي نفسها.
أكيد انت عارف ان براند Mi أعلى من براند Poco .. وبالتبعيه لازم يكون Mi 10T Lite أعلى خاصة انه داعم لشبكات الجيل الخامس .. فا النهارده في المراجعة هقولك الموبايل مُوجه لمين وينفع مين أكتر في الإستخدام.
التصميم :-
الـMi 10T Lite مُميز في تصميمه الزجاجي المحمي بـGorilla Glass الجيل الخامس .. فخم وشيك .. ولكن الفريم من البلاستيك .. ومازال الفئة السعرية دي مش هتلاقي فيها زجاج من المنافسين سواء ريلمي او سامسونج او اوبو.
شكل الكاميرا الخلفية برده مستطيل لكن واخد دوران من اليمين والشمال زي Poco X3 .. لكن شكل الدائرة هنا أحسن شوية من البوكو لإن توزيع العدسات شكله أحسن والفلاش بره الفريم .. وكمان بروز الكاميرات .. البروز كبير زي ما هو لكن جاي على درجتين وده هيقلل من احتمالية دخول تراب في العدسات.
الموبايل كالعادة تقيل 214 جرام وسماكته 9 ملم .. فكالمعتاد انت بتمسك موبايل تقيل من شاومي ولكن الموبايل هنا انحف شوية من البوكو X3 اللي تخانته 9.4 ملم.
مجملا الموبايل ده أشيك وأفخم من بوكو X3 خاصًة ان مي 10 تي لايت اللون بتاع الظهر جاي متدرج كده وشيك .. وده أهم فرق بين الموبايلين .. على مستوى الموبايلات المنافسة هما موبايلين بس اللي يتفقوا على Mi 10T Lite في جزئية التصميم .. Nova 5T كخامات ووزن .. Mi Note 10 Lite لإن الفريم معدن.
الشاشة :-
شاشة كبيرة بحجم 6.67 بوصة IPS LCD بدقة FHD+ فيها ثقب كبير شوية للسيلفي مع تردد بيوصل لـ120 هيرتز.
ومن الأخر دي نفس شاشة Poco X3 مع نفس السطوع الـ450 شمعة اللي هو متوسط، مش الأفضل .. وفي نفس الوقت مش اللي يضايقك مُقارنتا بشاشة IPS LCD.
لكن هتلاحظ ان شاشة Mi 10T Lite دافيه او Warm اكتر وده واضح في عرض الألوان بتاعتها .. تحسها مشبعه اكتر من شاشة الـPoco X3 ولكن الفرق مش كبير، مش جوهري يعني.
نقطة تفوق الشاشة هنا بس هو موضوع الـ 120 هيرتز اللي شاومي حرقته في بوكو X3 .. فا مبقاش ميزة تنافسية في Mi 10T Lite.
تقبلت جدًا شاشة بوكو X3 على سعره اللي في حدود 4000 جنية .. إنما إحنا هنا بنتكلم في موبايل بـ5000 جنية وأكتر .. فـ هنا أفضل الشاشات الـAMOLED خاصًة ان كل المنافسين من شاومي وريلمي واوبو بيقدموا شاشات AMOLED محترمة بسطوع أعلى بجودة ألوان اعلى.
وكمان واجهة شاومي تقيله نسبيًا وبتحس بالتقطيع اللي بيحصل والشاشة بتغير التردد بتاعها لان التردد الـ120 هيرتز متغير مش ثابت علطول .. علشان الموبايل يقدر يحافظ على استهلاك البطارية .. واخيرًا شاشة الموبايل عليها حماية Gorilla Glass 5 ومتركب عليها سكرينة.
الأداء :-
أول موبايل في مصر بيجي بمعالج سناب دراجون 750G بتكنولوجيا 8 نانو داعم لشبكات الجيل الخامس .. المعالج ده بيقدر يحقق Score أعلى على Antutu Benchmark من الـScore اللي بيحققه Poco X3 اللي بيجي بمعالج سناب دراجون 732G وده ناتج من ان الـCores المبني عليها الـ750 احدث.
في نقطة تانية .. الـMi 10T Lite بيجي بذاكرة داخلية UFS2.2 وهي أسرع من بوكو X3 اللي بيجي بذاكرة داخلية UFS2.1 وده باين في فرق سرعة القراءة والكتابة اللي Mi 10T Lite متفوق فيها.
فبالتالي المعالج أكيد احسن .. ولكن واجهة شاومي وتقلها والـAnimations الكتير والـDrop Frames الكتيرة مش محسساني بالفرق في الأداء بين الموبايلين في الإستخدام اليومي العادي في التطبيقات .. حاسس اني ماشي بالبوكو X3 بس بتصميم مختلف اتمنى تكون فهمتني.
أكيد Mi 10T Lite علشان الأنوية بتاعت المعالج أفضل فهتاخد منه أداء أحسن شوية في المهام التقيلة وممكن على المدى الأبعد أقولك ان الـ750G هيبقى مستقر لفترة أطول مع التحميل على الموبايل.
في نقطة بس حابب اوضحها .. الـMi 10T Lite بـ6 جيجا رام مش 8 جيجا رام .. المُتعارف عليه في فئته السعريه هو 8 رام وبالتالي الموبايل ممكن تحس انه مش منظم شوية في الحفاظ على التطبيقات مفتوحة خاصة لو فاتح اكتر من Tap على جوجل كروم وبتتنقل ما بينهم هتلاقي الموبايل بيعيد تحميل معظم التابات.
الاداء الرسومي عادي جدا .. ببجي على High HD .. كول اوف ديوتي بتشتغل على جرافيك High وفريمات Max .. وعلى قد اعدادات الجرافيك على قد ما تلاقي الموبايل معقول جدًا في اداءه والسخونية مقبولة جدا في جسم الموبايل.
مُلخص القول .. موبايل Nova 5T مازال بيقدم أداء أقوى لو انت همك الرئيسي أداء بالرغم من ان الموبايل ده بقى قديم جدًا .. والـMi 10T العادي في حته تانية خالص في جزئية الأداء لو قدرت تزود المبلغ حاجه بسيطة.
عوامل الأمان :-
بصمة مدمجة بزرار الباور في Mi 10T Lite أدائها سريع واسرع بشكل ملحوظ من اداء بصمة بوكو X3 .. الـFace Unlock كويس مفيهوش مشاكل واسرع برده من Poco X3.
الموبايل جاي بواجهة شاومي .. مش الـLancher بتاع بوكو اللي كان جاي على Poco X3 .. فا معرفش دي بالنسبالك ميزة ولا عيب .. أنا بالنسبالي مش فرقالي بس المفروض ان شاومي بتصرف اكتر على السوفت وير بتاعها من سوفت وير بوكو.
المي 10 تي لايت جاي بـ لمبة اشعارات علشان تعرف الإشعارات اللي جاتلك وجاي بمستشعر IR Blaster كعادة موبايلات شاومي وكمان جاي بدعم لخاصية الـNFC .. وجاي بصوت Stereo.
لكن ركز معايا في جزئية الصوت دي .. فاكر مشكلة Poco X3 في حوار الـVibration بتاع الصوت الستيريو .. هنا شاومي شغلت دماغها .. الصوت اللي طالع من السماعات في مي 10 تي لايت اقل بفرق واضح من بوكو X3 .. وده بالتبعيه منع خالص اهتزاز الظهر .. يعني الصوت قل شوية والإهتزاز في جسم الموبايل مبقاش موجود.
الكلام ده حصل في تطبيق Youtube .. ولكن لما تيجي تحمل اي موسيقى وتسمعها على الموبايل هتلاقي Mi 10T Lite صوته علي تاني وفي هزه بتحصل في الظهر ولكن بشكل اقل شوية من Poco X3 .. الموضوع كله تحايل .. شاومي تحايلت بالسوفت وير في توطية صوت اليوتيوب لوحده.
كمان الفتحة اللي كانت موجودة في Poco X3 من فوق واللي بتسرب صوت المكالمات وأنت بتتكلم إتشالت من الموبايل ده وبالتالي محدش هيسمع اللي بيكلمك متقلقش.
شبكة الـWiFi كويسة جدًا في Mi 10T Lite وأسرع من Poco X3 بفضل المعالج .. بالنسبة لشبكات الإتصال .. شبكة فودافون اللي هي مش كويسة حاليًا بتقطع حاجه بسيطة في الموبايل .. اتصالات شغالة زي الفل .. أنا معرفش مشاكل شبكة الإتصال هتتحل امتى في مصر .. ولكن اقدر اقول ان الشبكة هنا أحسن من بوكو X3 لو انت هتقارن بينهم.
البطارية :-
بطارية بحجم 4820 مللي أمبير أدائها كويس جدًا .. هتستحمل معاك من 7 لـ 8 ساعات شاشة مفتوحة إستخدام اعلى من المتوسط زي بوكو X3 تقريبًا والفرق ما بينهم لا يذكر .. حوالي 300 مللي أمبير مع أنوية احسن في معالج Mi 10T Lite.
وكالعادة انا مشغل الـ120 هيرتز أكيد مش هقفلهم لان ديه اهم ميزة للشاشة اصلا ومن غيرها هيقل كتير عن المنافسين.
الشاحن كالعادة 33 واط بيشحن البطارية في حوالي ساعة .. مفيش جديد في جزئية الشحن.
الكاميرات :-
الموبايل جاي بـ4 كاميرات في الظهر .. الاساسية 64 ميجا بيكسل فتحة عدسة F/1.9 بمستشعر Sony IMX682 وهو نفسه المستخدم في Poco X3 .. والتانية 8 ميجا بيكسل للتصوير الواسع فتحة عدسة F/2.2 والتالتة 2 ميجا بيكسل ماكرو والاخيرة 2 ميجا بيكسل عزل .. والسيلفي 16 ميجا بيكسل بفتحة عدسة F/2.5.
معالجة الألوان مختلفه تماما في Mi 10T Lite عن Poco X3 .. المي 10 تي لايت رايح للواقعية .. والبوكو رايح للألوان المشبعة .. وبالتالي لو حطيت الموبايلين جنب بعض .. هتلاقي نفسك ميال في معظم الصور لـ بوكو X3 .. وده طبيعي لإن العين بتحب الألوان المشبعة أكتر.
طبعا بـ أي برنامج Edit تقدر تعدل في الألوان براحتك وممكن من برنامج الصور بتاع شاومي نفسه .. ولكن انا بقارن صور بدون اي تعديلات .. الكاميرا الـUltra Wide أحسن شوية في بوكو X3 علشان 13 ميجا بيكسل مش 8 زي مي 10 تي لايت .. التصوير في إضاءة داخلية وNight الإتنين قريبين من بعض مفيش نقط تفوق كبيرة لواحد عن التاني.
السيلفي .. لا هيكون أحسن شوية في Mi 10 Lite عن بوكو X3 .. في Skin Toon محترم بدل الإصفرار اللي كان موجود في بوكو X3 .. الكاميرا السيلفي مُجملا احسن .. طبعا بتعاني شوية في الظلمة ولكن ما زالت احسن من Poco X3 وهتتحسن كتير بـ جوجل كاميرا.
بالنسبة لتصوير الفيديوهات فالموبايل بيقدر يصور بجودة بتوصل لـ4K لكن للأسف مفيش ثبات في الفيديوهات على جودة الـ4K .. الثبات الإلكتروني موجود في 1080p بس وده عيب للأسف في الموبايل .. والموبايل فيه ميكروفون اضافي لعزل الضوضاء.
ممكن تشوف الصور والفيديوهات في فيديو المراجعة في أول المقالة.
سعر Mi 10T Lite :-
- نسخة 128 جيجا مع 6 جيجا رام بسعر 5399 جنية مصري
ده كان سعره الرسمي وقت الحجز مع الهدية المحترمة .. المفروض حاليًا سعره يكون أقل من كده شوية .. وبينفع تركب شريحتين إتصال من الجيل الخامس طبعًا او شريحة واحدة مع كارت ميموري.
الرأي النهائي :-
التطورات في Mi 10T Lite عن Poco X3 :-
- خامات خارجية أفضل
- شبكة WiFi أسرع
- معالج أحسن بفرق بسيط بالإضافة الى دعم شبكات الجيل الخامس
- كاميرا سيلفي أحسن
لكن برده انا خدت تجربة قريبة جدًا من الـ Mi 10T Lite بسعر أرخص بفرق ملحوظ في الـPoco X3 .. لذلك الموبايل ده لو كان نزل قبل ما الـ بوكو X3 ينزل كان هيعجبني جدًا.
نقاط تفوق الـ Mi 10T Lite على الـ Poco X3 هتاخدها بفرق ألف جنية تقريبًا بين الموبايلين .. لو شايف انك محتاجها فا تمام، لكن لو مش شايف انك محتاجها فا الـPoco X3 مش هيقصر معاك.
Comments