محبين المعالجات القوية بأقل سعر ممكن .. شاومي مقدمه ليكم Snapdragon 865 واللي هو أحسن معالج Android في العالم حاليًا وبسعر بيبدأ من 7000 جنية في سلسلة الـMi 10T الجديدة .. وهما موبايلين بس اللي نزلوا حاليًا في السلسلة دي هما الـMi 10T العادي والـMi 10T Pro .. الفروقات بينهم في مساحة التخزين ومستشعر الكاميرا الخلفية بس.. بقية المواصفات مفيهاش اي اختلاف ولو بسيط.
احنا جربنا الفترة اللي فاتت الـMi 10T Pro والنهارده هنقدملكم المراجعة الكاملة بتاعته وفي نهاية المقال ده هقولك رأيي في الموبايلين وأني فيهم صفقة رابحة أكتر .. ولو ان الإتنين أسعارهم رهيبة !
الكاميرات :-
ده الفرق الجوهري بين النسخة العادية والـPro .. الـMi 10T Pro بيجي بـ3 كاميرات في الظهر .. الأساسية 108 ميجا بيكسل فتحة عدسة F/1.7 فيها مثبت بصري حقيقي .. والتانية 13 ميجا بيكسل للتصوير الواسع فتحة عدسة F/2.4 والأخيرة 5 ميجا بيكسل للماكرو.
الـMi 10T العادي بيجي بنفس الكاميرات لكن الأساسية 64 ميجا بيكسل فتحة عدسة F/1.9 بمستشعر سوني IMX682.
الكاميرا السيلفي بدقة 20 ميجا بيكسل مع فتحة عدسة F/2.2 في الموبايلين مفيش فرق .. والسيلفي موجود في ثُقب في نص الشاشة من فوق.
علشان أقدر أحكم على الـ108 ميجا بيكسل في الـMi 10T Pro كان لازم أدور على منافس قوي .. ولاقيت الـGalaxy S20 FE واللي سعره أغلى 1000 جنية بس كاميراته قوية وممتازة جدًا ( سعر الـ S20 FE حوالي 9500 جنية تقريبا ).
جربت أصور في الظل .. عجبني أكثر تفاصيل الوجه في الـ10T Pro وكمان الـEffect بتاع الـHDR مطلع Look جامد في الصورة .. بس الـS20 FE أفضل في خلفية الصورة والتفاصيل اللي ورا الشخص .. جربت أصور Portrait في وقت المغرب كده والصورة طلعت في الـS20 FE مُشبعة أوي لكن في الـ10T Pro كان في تفاصيل أكتر.
أي صور مباني او شجر او صورة يظهر في السماء هتلاقي صور الـS20 FE أفضل لإنه بيقدر يعالج الصور بشكل أحسن .. واتكرر معايا السيناريو ده كذا مره .. بس احيانًا التفاصيل بتكون أفضل في الـ10T Pro.
لما نشغل بقى وضع الـ108 ميجا بيكسل في الـ10T Pro ونشوف هل هيفرق في التفاصيل بعد الـZoom ولا لأ .. لاقيته فرق جامد فعلًا وتفوق في التفاصيل بشكل كبير لما تعمل زوم في الصورة .. جربت أصور تاني وقت المغرب كده وصورة الـ10T Pro طلعت لون شجرة أفضل وعملت Effect جامد جدًا على الصورة.
الـUltra Wide Angle بقى فا كالعادة وكالمتوقع صورة الـGalaxy S20 FE أفضل والزاوية أوسع شويتين عن الـ10T Pro .. وكمان الألوان في الصورة بتبقى أفضل والتفاصيل أكتر بفرق بسيط .. جربت أصور في الإضاءه الداخلية وهنا يبان فرق معالجة كل شركة للصور .. الـ10T Pro بيفتخ الصور اوي انما الـS20 FE بيظبط الصورة وألوانها ولون البشرة.
لما جربت بقى أصور بالـNight Mode صورة مبنى .. لاقيت الـS20 FE أفضل بصراحة بسبب الألوان المنطقة أكتر وكمان معالجة الصورة والتفاصيل طالعة أكتر .. وجربت تاني صورة ضلمة خالص وفي ضوء في وجه العدسة .. لاقيت الـS20 FE قدر يجيب تفاصيل أكتر بس بشكل عام الاتنين كويسين.
جربت أصور بالليل في الضلمة شخص .. لاقيت الـS20 FE مطلع لون بشرة أفضل وتفاصيل أكتر في الوجه وجايب الألوان الحقيقية في الصورة .. لكن التفاصيل بتاعت الصورة بشكل عام أفضل في الـ10T Pro .. وجربت اصور شارع ضلمة ومفيش غير مصدر نور واحد بس وبصراحة الموبايلين فردوا عضلاتهم وطلعوا صورة منورة حلوة جدًا.
بالنسبة بقى للسيلفي فا هو معجبنيش في الـMi 10T Pro .. وكمان زاوية التصوير ضيقة جدًا .. والصور اوقات كتير بتبقى فاتحه زيادة عن اللزوم .. في الإضاءه الداخلية ممكن تميل للـ10T Pro أكتر علشان بيفتح الصورة وبيعالجها بشكل أفضل .. وبيطلع الصورة بشكل عام أفضل بعيدًا عن الواقعية.
ولكن الملحوظ ان اداء السيلفي في الـ10T Pro قليل جدًا في الإضاءات الضعيفة .. المُشكلة المُعتادة عندهم .. الـS20 FE أفضل بفرق ملحوظ.
بالنسبة بقى للـMi 10T العادي فا الكاميرا الخلفية الأساسية بتاعته زي اللي موجودة في الـPoco X3 بالظبط .. لكن مع إختلاف معالجة أفضل في الـMi 10T بسبب المعالج الأقوى .. لسه مجربتش كاميراته لكن أتوقع تبقى أحسن حاجه بسيطة اوي من الـPoco X3 اللي هو كان جامد جدًا اصلًا.
وبالنسبة لتصوير الفيديوهات بالـMi 10T Pro فا هو أرخص موبايل حاليًا بيقدر يصور 8K بسبب المعالج الـSD865 الموجود فيه .. بس على جودة الـ8K مش هتلاقي ثبات ممتاز .. وفي كمان تصوير فيديوهات 4K مع 60 فريم لكن الثبات مش بيكون الأفضل برده .. أفضل ثبات هتاخده هيكون على 4K مع 30 فريم في الثانية.
لو عايز بقى تجري بالموبايل او توصل لأفضل ثبات ممكن تشغل الـStady Mode اللي هينزل الجودة على 1080p وهيديلك أفضل ثبات مُمكن .. والـZoom في تصوير الفيديوهات اخره 6X على العدسة الرئيسية لإن مفيش هنا عدسة مُخصصة للزوم .. وبالنسبة للسيلفي فا هو بيصور على 1080p ومفيش أعلى من كده في السيلفي.
كل الصور والفيديوهات موجودين في فيديو المراجعة في أعلى المقالة.
التصميم :-
سلسلة الـMi 10T جايه بتصميم Premium جدًا .. ظهر زجاجي مُحترم عليه حماية Corning Gorilla Glass الجيل الخامس والحماية كمان موجودة على زجاج الكاميرا الخلفية .. مع فريم معدني.
الموبايل ظهره تحسه مراية .. بيعكس أي حاجه عليه .. ممكن تشوف نفسك عليه اصلًا .. ولذلك بيلم بصمات بسهولة جدًا وتحسه مغناطيس للبصمات .. لازم تمشي بفوطه معاه او تحطه في الجراب ومتركزش معاه.
تصميم الكاميرا الخلفية جديد ومقبول .. هو مش عاجبني اوي ولكنه مقبول وهي أذواق في الأول والأخر .. ولسه بروز الكاميرات الخلفية كبير شوية ولكن الجراب المُرفق في العلبة بيحل مشكلة البروز.
الجراب الي هنا جامد مختلف وشيك .. وكمان شاومي بتقول انه معمول بأيونات الفضة علشان يقاوم البكتيريا أكتر ومش هيصفر مع الوقت بسهولة وكمان مش هيبقى مصدر نقل للعدوى المنتشرة اليومين دول.
الموبايل بقى كالعاده وزنه تقيل 218 جرام وتخانه كبيرة 9.3 ملم ..تحس ان شاومي حرام تعمل موبايل رفيع وخفيف .. ولكن علشان هما بيملوا الموبايل بالمواصفات.
الشاشة :-
سلسلة الـMi 10T جاية بشاشة IPS LCD مش AMOLED .. هتقولي طيب ليه كده ؟ .. هقولك لو حطوا شاشة AMOLED يبقى الـMi 10 اللي هو الموبايل الرائد بتاعهم هيبقى موقفه ايه ؟ ما هو لازم يقللوا حاجة علشان يقدروا ينزلوا بالسعر .. وانا هنا مش ببرر انا بوضحلك طريقة تفكير الشركة وحرية الاختيار ترجع ليك حسب اولوياتك.
ولكن شاومي مش حاطه اي شاشة IPS LCD .. هي حاطة واحدة من أنظف الشاشات الـIPS LCD اللي ممكن تشوفها .. شاشة 6.67 بوصة كبيرة بدقة FHD+ بتردد بيوصل لـ144 هيرتز مع ثقب صغير للسيلفي على الشمال وداعمة للـHDR10+.
الشاشة هنا كمان سطوعها مقبول تحت الشمس متقلقش منها خالص .. مش هتضايقك زي الشاشات الـIPS LCD .. السطوع متوسط 500 شمعة وبيصل لحد 650 شمعة وده رقم محترم جدًا وبالتاكيد هو أقل شوية من سطوع الشاشات الـAMOLED الرائدة.
هي بس درجة تشبع الألوان بتاعتها أقل شوية من الـSuper AMOLED ده طبيعي ومنطقي ومستحيل حد يطلع يقولك انها بنفس كفاءة الـSuper AMOLED.
ومُجملا الشاشة كـIPS LCD عجبتني .. وكمان التردد بتاعها العالي اوي ده هيخليك مبسوط بالتجربة السعرية أوي اللي هتاخدها من الموبايل ده وتقدر تختار بين ترددات 114 هيرتز او 90 هيرتز او 60 هيرتز من اعدادات الشاشة وأنا شخصيا سايبها 144 هيرتز علطول.
حواف الشاشة مش أصغر حاجة ولا هيا كبيرة وأزمة .. حاجة في النص منقدرش نعيب فيها .. والشاشة كمان عليها حماية Corning Gorilla Glass الجيل الخامس وبتيجي في العلبة متركب عليها سكرينة.
الأداء :-
الـMi 10T العادي والبرو جايين بأحسن معالج أندرويد حاليا وهو الـ سناب دراجون 865 .. معالج رائد جبار .. يكفي إني اقولك أن المعالج ده علشان تاخده هتدفع رقم أكبر بكتير من ده .. وطبعًا المعالج ده بيحتاج ذاكرة ورام من النوع السريع وهنا الذاكرة UFS 3.1 والرام LPDDR5 وتبريد مائي كمان محترم .. يعني معاك هاردوير طيارة.
حابب بس أوضحلك نقطة الهاردوير القوي اللي هنا .. هيقدر يعادل التقل في واجهة شاومي .. انتوا عارفين خلاص أنها مش واجهة خفيفه .. يعني مثلًا بيحصل تجميع لأيقونات الواجهة لما بتفتح الموبايل من البصمة Animation سخيف كدا .. لكن مع ذلك هو سريع هنا بسبب المعالج والهاردوير القوي اللي هنا.
لما بتفتح Setting الموبايل برده بيحصل Animation كده تحس ان الـMenu بتطلعلك من تحت ولكن برده معنديش مشاكل معاه .. والتقليب وتصفح وإستخدام باقي الموبايل مفهوش اي مشكلة .. زي ما بقولك الهاردوير هنا قوي لدرجة انه مش هيحسسك بتقل السوفتوير أوي .. لإن اللي بقوله ده لازم تبقى مركز اوي علشان تاخد بالك منه.
واصلًا أداء الموبايل هنا احسن بسنين ضوئية من أي موبايل تاني في فئته السعريه فيما عدا الـNova 7 اللي منجحش بسبب خدمات جوجل .. فا حقيقي هتتبسط اوي من أداء الموبايل هنا وخصوصًا بقى لما تفتح العاب وتلاقي أي حاجة بتشتغلك على اعدادات جرافيك محترمة اوي.
ببجي بتشتغل على Ultra HDR جرافيك مع Ultra فريم ريت .. وطبعا لو قللت الجرافيك هتلاقي فريم ريت اعلى من كدا.
كول اوف ديوتي بتشتغل على Very High جرافيك وماكس فريم ريت.
اتقل لعبة فورت نايت بتشتغل على اعلى اعدادات جرافيك Epic.
تجربة المعالج الرائد مع التبريد المائي مع الصوت الـStereo مع معدل اللمس الـ240 هيرتز اللي هنا هيدوك أداء مُميز جدًا في الألعاب في الموبايل ده .. تحس انه معمول للـGamers اصلًا.
عوامل الأمان وعناصر اخرى :-
بصمة الإصبع موجودة على زرار الباور .. مش أسرع بصمة ولكن ادائها محترم جدًا .. تأخيرها بس في تجميع ايقونات الواجهة .. والـFace Unlock بنفس سرعة البصمة تقريبًا .. كويس برده.
الشاشة IPS LCD فـا مفيش Always On Display ولكن شاومي معوضة ده بـ لمبة إشعارات علشان تعرف ان في إشعار جالك.
وعندك مستشعر الـIR Blaster موجود .. الـNFC موجود .. ميكروفون اضافي لعزل الضوضاء موجود .. الـPackage اللي بنشوفها دايمًا في موبايلات شاومي .. واللي كلكم بتحبوها.
المستشعرات موجودة .. الضوء موجود حقيقي وشغال .. مستشعر التقارب شغال سوفت وير وهو معلقش معايا في تجربتي القصيرة للموبايل .. الشاشة بتقفل على ودني وانا بعمل مكالمة لما الموبايل بيحس انه اتحرك واتحط على ودنك .. وبالمناسبة في تسجيل مكالمات.
الصوت هنا Stereo بيطلع من السماعة السفلية اللي محطوطه على الشمال .. المكان القديم الرخم وبيطلع من سماعة المكالمات مع بعض .. الصوت عالي .. ينافس الموبايلات المتوسطة ولكن مينافسش الموبايلات الرائده .. في هزه بسيطة في الظهر بتحصل لما الصوت بيعلى على الأخر .. وعمومًا الهزة دي مش بتأثر على اي حاجه.
الموبايل للأسف واخد ستايل الهواتف الرائدة .. مفيهوش مدخل السماعات الـ3.5 مللي .. بس شاومي معوضه ده بإنه بيجي معاه في العلبة وصلة تحويل من USB Type C للـ3.5 مللي.
قوة شبكة الـWiFi في الموبايل ده غريبه .. قويه لدرجة أنك بتحسب السرعة من اللي حواليك .. وده بفضل المعالج الرائد .. وشبكات الإتصال كويسة متقلقش منها.
البطارية :-
بطارية كبيرة 5000 مللي أمبير .. تخيل قعدت معايا وقت قد ايه وانا مشغل الـ144 هيرتز ؟ قعدت معاي حوالي 9 ساعات بإستخدام متوسط .. ومرات تانيه قعدت 8 ومرات تانيه 10 ساعات .. أداء البطارية فعلًا حلو وهيعجبك والفضل طبعًا للمعالج الـSD865 اللي هنا.
الشاحن المرفق 33 واط بيشحن البطارية في أقل من ساعة .. انا بصراحة كنت عاوز شاحن أسرع أو دعم شحن لاسلكي .. ولكن شاومي محبتش تضيف تاتش في نقطة البطارية علشان تقدر تنزل الموبايل بأقل سعر ممكن.
سعر الموبايل :-
- الـMi 10T Pro بنسخة 256 جيجا مع 8 جيجا رام بسعر 8400 جنية
- الـMi 10T بنسخة الـ128 جيجا مع 8 جيجا رام بسعر 7000 جنية
وللأسف مينفعش تركب كارت ميموري في الموبايلين للأسف .. هما شريحتين إتصال بس .. والفرق بينهم انا قولته فوق.
الرأي النهائي :-
الـMi 10T العادي صفقة قوية جدًا .. تكاد تكون أشبه بالـPoco F1 وقت نزولة بنفس فكرة المعالج الرائد بسعر قاتل .. ولكن مع تريندات وستايل 2020 زي الـ144 هيرتز والخامات البرميم وشكل التصميم.
والـMi 10T العادي برده .. هيقتل موبايلات كتير وأهمها Mi Note 10 Lite من شاومي نفسها .. لإن المعظم هيفكر في تزويد المبلغ اللي معاه ويجيب الـMi 10T .. الموبايل حرفًيًا في حته لوحده بسبب الأداء والخامات الراقية ومجموعة مميزات تانية .. ولكن كمستوى كاميرات وكألوان الشاشة فا ممكن تلاقي منافسين بيتفوقوا عليه عادي ( كلامي على النسخة العادية من Mi 10T ).
اما بالنسبة لـ Mi 10T Pro فخلينا نشوف مميزاته وعيوبه الأول وبعد كدا نشوف رأينا النهائي فيه ..
مميزات Mi 10T Pro :-
- الأداء العام في الموبايل مميز جدا
المعالج ( أقوى معالج أندرويد في العالم )
تردد الشاشة ( 144 هيرتز )
نوع الذاكرة والرام ( UFS 3.1 + LPDDR5 ) - كاميرا خلفية بأداء قوي محترم جدًا
- خامات خارجية مُمتازة جدًا
- دعم شبكات الجيل الخامس
- شاشة من أفضل الشاشات الـIPS LCD
- تصوير فيديوهات بجودة الـ8K
- سماعة خارجية Stereo صوتها معقول ولكن ميقدرش ينافس الموبايلات الرائدة
عيوب Mi 10T Pro :-
- وزن الموبايل تقيل جدًا
- شاشة ألوانها تخسر امام بعض المنافسين بشاشات AMOLED
- كاميرا سيلفي مش الأفضل
- مفيش منفذ الـ3.5 مللي
- مفيش كارت ميموري ولكن مش هتحتاج ليه لأن المساحة 256 في البرو
بس برده كان نفسي في إضافات تانية في موبايل Mi 10T Pro تحسسني أكتر بفرق الفلوس (بين العادي والبرو) غير المساحة والكاميرا .. زي الشحن اللاسلكي او مقاومة المياه، أي حاجه من الـFlagships الحقيقية.
لو محتار بقى بين الموبايلين .. فأنا شايف ان لو يهمك الأداء وهو رقم 1 في أولوياتك وميفرقش معاك الوزن التقيل ولا منفذ الـ3.5 مللي ولا كارت الميموري والـ128 على قد احتياجاتك يبقى تجيب الـMi 10T العادي .. اما لو انت عايز تاخد تجربة أداء مُميزة وفي نفس الوقت عايز كاميرا خلفية رئيسية كويسة جدًا يبقى تزود تروح للـMi 10T Pro.. ولكن لازم تبقا عارف ان التصوير السيلفي مش الأفضل.
Comments