مراجعة Xiaomi Mi 11 – اغلى موبايل من شاومي !

موبايل Mi 11 وصل مصر متأخر شوية .. وده يعتبر الموبايل الرائد بتاع شاومي، الـFlagship اللي بتحط فيه أقوى مواصفات عندها وبتنافس بيه مع موبايلات ليها وزنها وإسمها في السوق، النهارده هنقدملكم مراجعة Mi 11 الجديد النسخة اللي نزلت السوق المصري وهنوضحلكم كل حاجه عنها.


التصميم :-

خامات Mi 11 جامدة جدًا .. حاجة عظمة من شاومي .. خامات فلاج شيب فعلًا .. ظهر زجاجي عليه حماية Corning Gorilla Glass الجيل الخامس .. فريم الومنيوم.

وانت ماسك الموبايل ده في ايدك .. هو فعلًا موبايل رائد ميقلش أي حاجة عن اي فلاج شيب من ناحية المسكة في الإيد الفخمة جدًا .. التخانة الـ8.1 ملم والوزن الـ196 جرام اللي متوزع على الموبايل كله بشكل محترم جدًا.

الظهر والشاشة فيهم إنحناء وقافلين على بعض مع الفريم الرفيع أوي .. لو ماسك الموبايل لفتره طويله من غير جراب ممكن تحس ان الفريم الرفيع ده مش مريحك اوي .. ولكن مش للدرجة الكبيرة.

والموبايل معاه جراب شفاف في العلبة بيحاول يغطي بروز الكاميرات الكبير شوية .. شكل الكاميرا الخلفية هنا شاومي حرقته في الموبايل الأرخص Mi 11 Lite .. بس لسه الشكل جامد جدا برده.

اللي ناقص الموبايل ده في جزئية الخامات هي مقاومة المياه .. الموبايل مفيهوش شهادة مُعتدمة لمقاومة المياه .. وده اللي ينقصه عن الموبايلات الرائدة من سامسونج وابل.


الشاشة :-

شاشة عظيمه جدًا .. كبيرة 6.8 بوصة AMOLED بدقة QHD+ بتردد بيوصل لـ120 هيرتز مع إنحناءات في اطراف الشاشة يمين و شمال .. مع ثقب للسيلفي على الشمال.

الشاشة دي فيها كل التقنيات اللي ممكن تتخيلها .. شاشة داعمة للـHDR10+ .. مع مليار لون .. وبتشتغل بدقة QHD+ مع 120 هيرتز في نفس الوقت .. مع سطوع عالي جدًا بيوصل لـ1500 شمعة.

فا أنت هنا بتاخد تجربة شاشة جامدة جدًا .. ألوان عظيمة ومشبعة بزيادة .. سطوع عالي جدًا .. وكمان سوفت وير شاومي فيه AI Image Enhancement اللي بيقدر يرفع الدقة بتاعت اي فيديو بتتفرج عليه علشان تستمتع أكتر بالشاشة .. وبيعزز الألوان أكتر وبتفعل الـHDR في الفيديوهات حتى لو مش بتدعمها.

بس طبعا كل الحاجات دي لو شغلتها وشغلت الـQHD+ مع الـ120 هيرتز متسألش عن إستهلاك بطارية .. لو قعدت معاك 3 ساعات يبقى حلو .. والشاشة عليها حماية Gorilla Glass Victus .. وكمان متركب عليه سكرينة كويسة جدا.

لحد دلوقتي كل حاجه تمام .. بس وأنا بجرب الموبايل ده لما بشغله فتره ومعلي السطوع شوية الموبايل بيسخن بسرعة .. ولما بيسخن، الشاشة بتطبع!

بيظهر تطبيع لمدة 10 دقائق كده وبعدين بيختفي، حصلت معانا في التجربة أكثر من مره، وحقيقي موضوع مستفز، يعني معاك إمكانيات جبارة من موبايل رائد لكن خايف من التطبيع.

وفي كمان حاجه غريبة حصلت .. كنت بصور بالموبايل في الشمس، الموبايل سخن جامد، الشاشة إضائتها نزلت للنص حتى وأنا معلي السطوع على الأخر .. لحد ما بعدت عن الحر والسطوع رجع لطبيعته تاني!


الأداء :-

شاومي بتستخدم احسن معالج موجود من كوالكم .. معالج سناب دراجون 888 تكنولوجيا 5 نانو داعم لشبكات الجيل الخامس .. مع الـ120 هيرتز اللي في الشاشة، ومع ذاكرة التخزين من نوع UFS 3.1 .. هتاخد أداء جبار حرفيًا!

ولكن في نقطة .. معالج سناب دراجون 888 اساسًا بيسخن بسهولة .. وشاومي مش بتهتم بتبريد موبايلاتها اللي معظمها بيسخن .. فده اترجم لان الموبايل ده حرفيًا بيسخن بطريقة رهيبة.

الموبايل بيسخن بسرعه من أي حاجة بتعملها عليه .. لو بتتفرج حتى على فيديو على شاشة الموبايل هيسخن .. فالموضوع ده هيضايقك كتير .. مش معقول أنا شاري موبايل بالرقم ده ويسخن السخونية دي.

ببجي بتشتغل على Ultra HDR .. هتاخد أداء عظيم .. أداء جامد جدًا من الشاشة والصوت والمعالج .. بس زي ما قولتلك الموبايل هيسخن جدًا في ايديك .. وهتلاقي البطارية بتنزل بسرعه.

الموبايل لما بيسخن بعد فترة من الضغط عليه بيحصله اختناق لحد 60% تقريبًا من قوته .. هو لسه طبعًا بيبقى سريع جدا .. ولكن زي ما قولتلك هي في الأول وفي الأخر مشكلة معالج وسخونية .. المعالج ده محتاج تبريد من نوع خاص علشان تعرف تستمتع بيه.


عوامل الأمان وعناصر اخرى :-

البصمة مُدمجة بالشاشة .. مكانها فوق شوية بس حلو .. سريعة ولطيفة .. وكمان البصمة هنا تقدر تقيس بيها ضربات القلب بتاعتك .. حركة لطيفة من شاومي .. والـFace Unlock صاروخ كعادة شاومي .. والموبايل هنا وصله تحديث بواجهة شاومي MIUI 12.5 ونظام تشغيل Android 11.

الموبايل فيه كل حاجه، Always On Display، مستشعر NFC، مستشعر IR Blaster، ميكروفون اضافي لعزل الضوضاء .. لكن كالمتوقع مفيش مدخل سماعات 3.5 مللي، وفي وصلة تحويل من Type C في علبة الموبايل .. المستشعرات كويسة في الموبايل .. مستشعر التقارب أداءه مقبول، مش سريع اوي بس مش بيغلط.

صوت الموبايل Stereo مُحترم جدًا من Harman Kardon اللي بتعمل الأنظمة الصوتيه في سيارات بي ام دبليو وفولفو .. صوت عالي ومجسم بس فيه هزه سيطة بتحصل في ظهر الموبايل.

شبكات الـWiFi محترمة جدًا وبيدعم Wi Fi 6 .. وفعلًا الـWi Fi في الموبايل ده جبار .. أما بقا شبكات الاتصال فهي هترخم عليك تجربتك في الموبايل ده .. مش وحشه، لأ هي كويسة .. بس برده الموبايل ده كان بيبقى غير متاح في أوقات كتير خصوصًا فودافون .. مع العلم اني كنت بجربه مع Galaxy A22 والـA22 كانت شبكته أحسن.


البطارية :-

البطارية 4600 مللي أمبير .. رقمها كبير .. ولكن اداءها الفعلي سيء .. الموبايل لو تقلت عليه شوية .. ومشغل الـ120 هيرتز مع الـQHD+ ومعلي السطوع، هتلاقيها بتوصل 3 ~ 4 ساعات شاشة مفتوحة بالعافية .. وقت قليل اوي.

طيب لو قفلت بقى كل حاجه .. خليته 60 هيرتز وجودة FHD+ .. ومشغلتش العاب ومرفعتش السطوع .. هيوصل 7 ساعات شاشة مفتوحة .. شاومي بتقدم امكانيات عظمة .. بس البطارية مش هتقدر تسد.

الشاحن اللي مع الموبايل في العلبة بيعوضلك ان البطارية مش حلوه .. شاحن 55 واط بيشحن في 55 دقيقه تقريبًا .. كنت متوقع يشحن اسرع من كده .. وبيدعم شحن لاسلكي 50 واط .. وشحن لاسلكي عكس بقوة 10 واط.


الكاميرات :-

الكاميرا الخلفية الرئيسية 108 ميجا بيكسل فتحة عدسة F/1.9 فيها مثبت بصري .. لو هزيت الموبايل في ايدك هتسمع صوت المثبت .. وعدسة Ultra Wide بدقة 13 ميجا بيكسل فتحة عدسة F/2.4 .. و العدسة الأخيرة 5 ميجا بيكسل ماكرو .. السيلفي 20 ميجا بيكسل فتحة عدسة F/2.2.

كاميرات Mi 11 حلوه الصبح .. هتقدملك تفاصيل كتر .. ألوان كويسة معقولة .. الـSharpness بتاع الصورة كويسة جدًا .. السوفت وير بيعمل معالجة لطيفة جدًا للصور .. الإضاءه الداخلية هتلاقي برده الكاميرا محافظة على اداءها .. وبالنسبة لـ جوجل كاميرا فا هو مش فارق كتير عن تطبيق الكاميرا الأساسي.

الأزمة بقى في التصوير الليلي .. المستشعر اللي هنا ضعيف في التصوير الليلي، هو هو نفس المستشعر اللي موجود في Mi 10T Pro .. مع ان هنا في مثبت بصري، بس بحس كتير ان الصور الـNight Mode بتطلع مهزوزه.

بالنسبة للسيلفي فا هو كويس ومعقول جدًا .. نادرًا لما بتلاقي فلاج شيب فيه سيلفي ممتاز بس الـMi 11 كويس في السيلفي .. وخاصًة لما تصور بورتريه الصورة بتبقى أفضل بفرق كبير.

بالنسبة بقى لتصوير الفيديوهات فا الموبايل بيصور لحد 8K ودي طبعًا ميزة قوية جدًا، وبيصور 4K مع 30 فريم او 60 فريم .. وفي HDR في تصوير الفيديوهات لو شغلته هيبقى اخرك في التصوير 4K على 30 فريم بس.

وفي وضع الـSteady Video Pro بيزود من الثبات بس اخرك 1080p .. وفي Steady Video بيزود برده من الثبات بس على جودة 4K مع 30 فريم .. وتقدر متشغلش الوضع ده خالص وتعتمد على المثبت البصري.

شوف تجربة التصوير صور وفيديوهات ومقارنة بالـiPhone 12 في فيديو المراجعة !


سعر Xiaomi Mi 11 :-

  • نسخة واحدة 256 جيجا مع 8 جيجا رام بسعر 14000 جنية

بينفع تركب شريحتين إتصال من الجيل الخامس لكن للأسف مبينفعش تركب كارت ميموري.


فيديو مقارنة Mi 11 مع iPhone 12 Mini :-


الرأي النهائي :-

شاومي غامرت في مواصفات الموبايل ده لكن متحملتش العواقب .. أداء فائق وشاشة ممتازة وتصميم شيك وخامات ممتازة وكاميرات كويسة .. لكن حاجات كتير هترخم عليك التجربة ومنها السخونية اللي بتأثر على الأداء والشاشة والبطارية .. وكمان التصوير بالليل مش أفضل حاجه ..

كنت أقدر اعدي حاجات واتنازل عنها في الموبايل ده لو كان سعره 10 الاف او 11 الف بالكتير، لكن 14 الف سعر مش قليل خالص، داخل منافسة مع موبايلات أقوى كتير من سامسونج و أبل.

نتمنى شاومي وهي بتعمل موبايلات رائدة تختبر الأجهزة لفترة أطول قبل طرحها للبيع، علشان تقدر تقدم تجربة حقيقية كويسة بعيدًا عن الأرقام .. لإن مستخدم الهواتف الرائدة تفكيره مختلف عن مستخدم هواتف الفئة المتوسطة، مش هيروح على الأرقام فقط، هيحتاج تجربة مستقرة ثابته مُرضية في كل الجوانب من غير أي تضحيات!

قد يعجبك أيضا...

Comments

جاري التحميل...