موبايل Mi 11 من شاومي عمل ضجة كبير وقت الأعلان عنه في الصين .. لأن شاومي إستخدمت أقوى معالج أندرويد حاليًا من كوالكم و هو سناب دراجون 888 .. فـ وأحنا بنجرب موبايل شاومي الجديد ( الي جاي من الصين) جتلنا فكرة .. نعمل مقارنة مع أصغر هاتف من سلسلة الأيفون 12 وهو الـ iPhone 12 Mini ونشوف شاومي هتقدر تنافس أبل في تجربة الاستخدام الفعلية ولا لأ ؟ .. مع مراعاة فرق السعر أكيد ولكن المقارنة ديه أكيد هتفيدك !
التصميم :-
الموبايلات ديه Flagships أو موبايلات رائدة ( غالية ) .. فا أكيد بـ خامات زجاجية محترمة في الموبايلين مع فريم من الألمنيوم .. أكيد الـiPhone 12 Mini أصغر وأرفع وهيتميز في النقطة دي لأنه Mini.
ولكن ده ميمنعش أننا نقف شوية عند Mi 11 لأن عجبني فيه أن شاومي تخلت عن فكرة الموبايلات التقيلة .. شاومي مي 11 وزنه 194 جرام للنسخة الزجاج مع تخانة 8.1 ملم .. الموبايل وزنه في الأيد ممتاز .. وتوزيع الوزن ممتاز .. شابوه شاومي انها عملت موبايل معقول الوزن أخيرًا.
شكل الكاميرا الخلفية بتاع مي 11 مُختلف خالص .. لغة تصميم جديدة كُليًا على شاومي .. عجبتني بصراحة على الحقيقة .. الموبايل شكله برميم أوي .. طبعا السنسور الـ108 ميجا بيكسل اللي شاومي مستخدماه في مي 11 حجمه كبير شوية فا لازم يبقا ليه بروز كبير وهنا شاومي خلت البروز على تلت درجات علشان متحسش بيه ولكنه مازال موجود وملحوظ واكبر شوية من بروز كاميرات ابل.
فريم الأيفون 12 ميني مسطح تمامًا .. هيضايقك شوية في النسخ الأكبر الـiPhone 12 والـiPhone 12 Pro وهيضايقك اكتر واكتر في الـiPhone 12 Pro Max .. انما في الـMini علشان الموبايل حجمه صغير أوي .. فا مش هيضايقك خالص زي ما وضحت في مراجعة iPhone 12 Mini وهتحس أنك مالك الموبايل كويس وثابت في ايدك.
الـMi 11 فيه Curves علشان يحسن من المسكة في الإيد .. وفعلًا المسكة بتاعت الموبايل ممتازة.
ولكن في نقطة مهمة غايبة هنا عن الـMi 11 وهو شهادة مقاومة الماء .. معرفش ليه فلاج شيب مش مقاوم للماء .. ولكن الايفون 12 ميني زيه زي سلسلة الايفون 12 كلها مقاوم للماء بشهادة IP68.
الشاشة :-
شاشة مي 11 بحجم 6.8 بوصة AMOLED فيها انحناء بسيط من الأطراف والشاشة بدقة QHD+ مع ثقب صغير للسيلفي بتردد بيوصل لـ120 هيرتز داعمة للـHDR10+.
شاشة ايفون 12 ميني بحجم 5.4 بوصة OLED مسطحة بالكامل والشاشة بدقة FHD+ مع نوتش كبير فوق في الشاشة بالتردد القديم الـ60 هيرتز مع دعم للـHDR10.
أقصى سطوع لشاشة مي 11 تحت الشمس 1500 شمعة اما ايفون بيكون 1200 شمعة .. تحت الشمس الفرق مش رهيب لأن الرقمين أصلًا كبار ولكن لما جربتهم سوا لاحظت مي 11 ساطع اكتر وألوان الشاشة ظاهره اكتر تحت الشمس.
ألوان الشاشتين مُمتازين مفيش غبار عليهم .. بس شاشة مي 11 وضع الـAuto اللي فيها بيعزز الألوان بزيادة .. بيعزز الألوان في كل الواجهة مش وانت بتتفرج على فيديوهات، بس مش مشكلة عدي النقطة دي .. لما نشغل فيديو 4K على الموبايلين .. هنلاقي الالوان زي بعض بالظبط ولكن شاشة مي 11 أفتح أو منورة أكتر وديه أول مرة الاقي شاشة شاومي ساطعة أكتر والوانها ظاهره اكتر من شاشة أيفون ( شوف فيديو المقارنة لو عاوز تتأكد في أول المقالة ).
وكمان منقدرش ننسى دقة شاشة مي 11 الأعلى والتردد الأعلى والاتنين بيشتغلوا مع بعض فبيديلك تجربة محترمة جدا جدا وكمان مع شكل الشاشة الأحلى الكيرف والثقب الصغير للسيلفي مخلي تجربة شاشة الشاومي حلوة جدًا .. عجبتني اكتر من تجربة شاشة الايفون.
شاومي صرفت جامد جدا على شاشة مي 11 وهي فعلا نقله في شاشاتهم وواضح انها تقدر تسد وتنافس مع شاشات موبايلات أغلى بكل سهولة .. الشاشتين عليهم حماية.
الـMi 11 جوريلا فيكتس والايفون 12 ميني حماية من أبل .. شاومي بيجي عليه سكرينه والأيفون انت اللي بتركبله سكرينة.
الأداء :-
شاومي بمعالج سناب دراجون 888 تكنولوجيا 5 نانو و الايفون بمعالج A14 Bionic تكنولوجيا 5 نانو .. انا واقع قدام أقوى معالجين في العالم تقريبًا .. أرقام في أنتوتو ضخمة جدا تتخض لما تشوفها.
التجربة الفعلية للموبايلين .. شاومي المعالج معاه الشاشة الـ120 هيرتز اللي مسعداه جدًا في أنه يظهرلك ان التجربة بتاعته سلسه وناعمة أكتر .. أداءه فعلًا طيارة .. ولكن انا مقدرش أقول أن اداء الايفون 12 ميني وحش يعني لأن الـIOS خفيف جدا وسلس جدا برده.
أحب افكرك ان الـ12 ميني بـ4 جيجا رام ولكن النظام بيستخدمهم بذكاء جدا .. والنسخة اللي جربناها من شاومي مي 11 بـ12 جيجا رام.
عمومًا أنا شايف اداء الموبايلين مُمتاز جدًا .. يعني مقدرش أقول ان اداء الايفون سلس اكتر وفي نفس الوقت مقدرش اقولك الشاومي احسن .. ولكن الواقع بيقول ان ممكن بعد فترة كبيرة من تشغيل الموبايل الشاومي يبقى ابطأ لأن تحديثات شاومي بتأثر على استقرار واجهتها لفترة أطول.
الاداء الرسومي .. ببجي بتشتغل على Ultra HD و Ultra في الموبايلين .. التجربة أكيد ناعمه جدا جدا في الموبايلين .. لكن هنا في نقطة استثنائية ان شاشة الميني صغيرة أوي فهتخلي التجربة مش قد كده .. لو قارنت مع ايفون 12 او iPhone 12 Pro العادي هتلاقي التجربة متماثلة.
الموبايلين بيسخنوا مع الألعاب ولكن سخونية الايفون أقل بشكل واضح من الشاومي اللي بيسخن أزيد وبتسمع بشكل ملحوظ في فريم الكاميرا الخلفية .. و شاومي وعدت بأبديت جديد للواجهة بأضافة خواص جديدة وتقليل من السخونية.
عوامل الأمان وعناصر اخرى :-
الايفون مفهوش بصمة .. الأعتماد على الـFace ID .. سريع وبيشتغل في كل ظروف الاضاءة.
الشاومي مي 11 فيه مستشعر بصمة مدمج في الشاشة سريع جدًا .. وفيه Face Unlock عن طريق الكاميرا الأمامية مش بنفس جودة وكفاءة الأيفون أكيد ولكن اعتقد هتعتمد أكتر على بصمة الصباع في المي 11.
الموبايلين صوتهم ستيريو .. ولكن صوت الميني أضعف .. الصوت أعلى بفرق واضح في المي 11 اللي فيه سماعتين حقيقيتين واحدة فوق في الفريم العلوي والتانية تحت في الفريم السفلي.
بالنسبة لقوة شبكات الـWiFi .. فأنا جربتهم مع بعض وفعلًا زي ما شاومي قالت .. المي 11 شبكه الـWi Fi بتاعته أقوى والمدى بتاعها أقوى بفرق ملحوظ عن الايفون 12 ميني.
البطارية :-
بطارية الايفون صغيرة على قد حجمها 2227 ملي أمبير لكن الشاومي 4600 مللي أمبير .. بعيدًا عن فرق حجم البطاريات وفرق حجم الشاشات وفرق الدقة وفرق سرعة تردد الشاشة.
عملت Test للضغط على المعالج بكل طرق باستخدام برنامج Antutu على الموبايلين والبطارية نزلت 8 في المية في الموبايلين .. “شوف الفيديو في أول المقالة علشان تشوف الأختبار بالتفصيل”.
الواقع أن الأستهلاك اللي لاحظته في مي 11 وأنا مشغل الشاشة على أعلى تردد ودقة لاقيته استحمل حوالي 4 ~ 5 ساعات شاشة مفتوحة وده نفس زمن الأستهلاك المتواضع في ايفون 12 ميني.
ايفون 12 ميني بيدعم شحن بقوة 20 واط فقط .. وشحن Wiresless بقوة 12 واط.
أما شاومي مي 11 بيدعم شحن بقوة 55 واط وشحن Wireless بقوة 50 واط .. فروقات كبيرة لصالح شاومي طبعًا.
ابل بدأت تريند تشيل الشاحن من العلبة .. العلبة بيجي فيها الموبايل والوصلة فقط .. شاومي كمان عملت كده العلبة فاضية فيها الموبايل والجراب فقط ولكن في هدية مع الموبايل لو عاوزها من غير فلوس شاحن سريع بقوة 55 واط ومعاه وصله شحن لان الوصلة زي ما قولتلك مش مع شاومي في العلبة .. حركة لطيفة تعوض غياب الشاحن وفي نفس الوقت اخدت الشاحن السريع بتاع شاومي اللي بيشحن البطارية بالكامل في ساعة الا ربع.
الكاميرات :-
ايفون 12 ميني بكاميريتين الأساسية 12 ميجا بيكسل فتحة عدسة F/1.6 بمثبت بصري .. والتانية 12 ميجا بيكسل فتحة عدسة F/2.4 للتصوير الواسع.
مي 11 جاي بـ3 كاميرات .. الاساسية 108 ميجا بيكسل فتحة عدسة F/1.9 بمثبت بصري .. والتانية 13 ميجا بيكسل فتحة عدسة F/2.4 للتصوير الواسع .. والاخيرة 5 ميجا بيكسل ماكرو فتحة عدسة F/2.4.
والسيلفي 12 ميجا بيكسل في الأيفون و20 ميجا بيكسل في شاومي.
بعيدًا عن الأرقام بقى خلينا نشوف الاداء الفعلي للموبايلين .. بص يا سيدي مبدئيًا انا كنت مستغرب جدا نتايج الصور وانا بصور بالموبايلات برا Outdoor .. عارف ليه ؟
عشان شاشة مي 11 زي ما قلتلك بتعزز الألوان في كل حته حتى في الصور اللي أنت مصورها فكان متهيألي ان الصور بتاعت الشاومي احسن .. ولكن لما حطيت الصور على الكمبيوتر وشفتهم جمب بعض الامور رجعت لطبيعتها.
مازال في تفوق واضح و صريح لكاميرا الايفون .. شاومي مطورتش اي حاجة في كاميرات مي 11 .. مستخدمه Hardware وأرقام قديمة والـSoftware مش متطور اوي .. وبالتالي الايفون اكتسح الشاومي في معظم الصور .. اعتقد ان مي 11 برو او مي 11 الترا هيبقى فيهم التطوير في الكاميرات بس طبعًا هيبقوا اغلى .. ساعتها نبقا نقارن تاني.
في ايفون 12 ميني في Look كده مُميز واللي هو بيخلي لون الجلد برونزي شوية .. متفوق على الـLook البهتان اللي أقرب للواقع واللي بيطلع من الـMi 11 .. وفي الـNight Mode في تفوق واضح برده للـ ايفون بفتحة عدسة اوسع وبمعالجة أفضل.
بالنسبة للسيلفي فا زاوية التصوير في الايفون اوسع من الشاومي بفرق واضح .. وكالعادة اللون المميز البروني بتاع الـSkin Toon واضح جدًا في سيلفي الايفون اللي مخلي شكل صور شاومي مي 11 بهتانه جنبه .. ولو أنا هختار هختار صور الايفون 12 ميني عمومًا.
بالنسبة لتصوير الفيديوهات بالـMi 11 والـiPhone 12 Mini فالموبايل مي 11 بيقدر يصور على 8K مع 30 فريم أما ايفون 12 ميني أخره على 4K بس .. الـMi 11 تقدر تصور فيديوهات داعمة للـHDR10 بألوان أكتر .. وتقدر تاخد الفيديو ده تعرضه على أكتر من شاشة .. أي شاشة داعمة للـHDR10+ هتقدر تشوف الـContent عادي.
أما الـiPhone 12 Mini لأ مش فيه الميزة دي .. حلوه الحته دي في مي 11 بصراحة .. طبعًا الموبايلين فيهم مايكروفون اضافي لعزل الضوضاء والاتنين فيهم مثبت بصري.
شوف تجربة التصوير صور وفيديوهات بالكاميرات في فيديو المراجعة.
أسعار الموبايلات :-
- ايفون 12 ميني سعره بيبدأ من 800 دولار لأقل نسخة 64 جيجا مع 4 جيجا رام
- شاومي مي 11 سعره بيبدأ من 610 دولار لأقل نسخة 128 جيجا مع 8 جيجا رام
الموبايلين مش بيدعموا تركيب كارت ميموري.
طبعا سعر Mi 11 ده في الصين .. الموبايل هيطلع Global بنفس المواصفات تقريبًا بسعر أغلى شوية وهينزل في أخر فبراير ونقول سعره هيكون في حدود 650 دولار .. كدا الايفون اغلى حوالي 150 دولار او حوالي 2200 جنية مع مراعاه فرق مساحة التخزين.
الرأي النهائي :-
شاومي كانت كل مرة بتقدم بس أقوى معالج موجود في الـFlagship المنافس بتاعها .. وكان بقية المواصفات أرقام مش حقيقية أوي .. ولكن لأول مرة أقدر أقولك ان مي 11 موبايل فلاج شيب رخيص من شاومي يقدر ينافس ويتفوق بالمعالج وكمان الشاشة النقطة المهمة اللي كانت غايبة على شاومي.
وانا شايف ان مي 11 لو كان مقاوم للماء وكانت كاميراته احسن من كده شوية .. كان هيحرج كل الموبايلات الرائدة من كل شركات الموبايلات .. ولكن هو عنده نقطة تفوق قوية وهو السعر المنافس.
وفي النهاية أقدر أقول أن شاومي قدرت تنافس مع الأيفون .. فيما عدا الكاميرات اللي اتوقع بشكل كبير تتحسن كتير في الشاومي مي 11 برو أو الترا .. وفيما عدا اعتمادية تشغيل الموبايل بكفاءة لفترة أطول وسعر اعادة البيع الي لسه أبل متفوقه فيه.
Comments