المنافسة فى الفئة المتوسطة دايما شديدة لأنها تعتبر الفئة الأكثر انتشارا لأنها بتجمع ما بين أفضل مواصفات مقابل أفضل سعر و دايما فيها جديد و كل سنة المنافسة أشد من اللى قبلها.
فى 2018 شاومي نوت 6 برو قدر يتفوق على Samsung A7 2018 فى نقط كتيرة بالرغم من أنه كان أرخص بحوالى 2000 جنيه , تفتكروا السنة دى بردوا هيقدر Xiaomi Redmi Note 7 انه يتفوق على هاتف Samsung Galaxy A50 و لا ايه؟
مقارنة النهاردة هنعرف فيهم مين أفضل فى كل من الشاشة و المعالج و الكاميرا و البطارية علشان تختار المناسب لك.
هاتف Samsung Galaxy A50 :-
المميزات:
- بطارية بسعة 4000 مللي أمبير و أداء جيد جدا مع زمن شحن سريع ساعتين فقط مع Type C .
- كاميرا سيلفي متميزة .
- تجديد سامسونج للسوفت وير و اضافة العديد من المميزات و الخصائص مع احدث نظام أندرويد 9.0 Pie.
- شاشة سوبر أمولد تقدم اداء مذهل مع ألوان رائعة.
- يمكنك استخدام كارت ذاكرة خارجي و شريحتين اتصال فى نفس الوقت.
- وزن الهاتف الخفيف مع انحناءات الظهر تجعله مريح فى المسك باليد الواحدة.
- مستشعر بصمة مدمج بالشاشة و هو أول واحد فى سلسلة ال A.
العيوب:
- بصمة الهاتف تقدم أداء بطيء مقارنتا بالمنافسين.
- الهاتف لا يدعم لمبة اشعارات و لكن تم التعويض عنها بأكثر من طريقة.
- ظهر الهاتف من البلاستيك .
هاتف Xiaomi Note 7 :-
المميزات:
- يقدم معالج الهاتف أفضل أداء فى الفئة أقل من 4000 جنيه.
- يتوافر الهاتف بنظام تشغيل اندرويد فطيرة 9.0 Pie.
- مستشعر بصمة الهاتف يعمل بسرعة عالية.
- سعر الهاتف ممتاز مع ضمان 30 يوم للاستبدال فى حالة وجود أى عيب.
- متوفر بالهاتف دعم مستشعر IR للتحكم بالأجهزة المنزلية.
- يدعم الهاتف USB Type C و هو الأول فى سلسلة REDMI.
- أمكانية تصوير فيديو Slow Motion.
- تدعم الكاميرا الخلفية العديد من الأوضاع للتصوير و قد تكون الأفضل فى الفئة السعرية.
- تدعم الشاشة طبقة حماية من Corning gorilla glass 5.
- بطارية الهاتف 4000 مللي أمبير تقدم أداء جيد جدا مع شحن سريع فى حالة استخدام شاحن سريع غير الموجود بعلبة الهاتف.
- سعر ارخص من المنافسين في كل الفئات السعرية .
العيوب:
- يجب الاستغناء عن الشريحة الثانية لاستخدام كارت الذاكرة الخارجي.
- كاميرا الهاتف الخلفية بارزة عن جسم الهاتف.
- كاميرا السيلفي تعتبر قليلة فى دقتها و تقدم أداء أقل من المنافسين.
- اضاءة لمبة الاشعارات ضعيفة.
- بسبب أن الهاتف مصنوع من الزجاج فى الظهر يجعله سريع الاتساخ ببصمات الأصابع.
- صندوق الهاتف لا يحتوي على سماعات الأُذن Earphones.
- الشاحن المُرفق فى علبة الهاتف يقوم بالشحن فى وقت طويل لذا سيتوجب عليك أن تشتري شاحن أخر للاستمتاع بالشحن السريع.
التصميم :-
بظهر زجاجى لامع تتغير ألوانه باختلاف الاضاءة مع اطار بلاستيكي عريض و عدم وجود انحناءات بظهر الهاتف يأتى شاومى ريدمي نوت 7 و هنا هتحس انك ماسك هاتف Premium لكنه متعب شوية فى الاستخدام بايد واحدة لمدة طويلة و للأسف فى بروز واضح للكاميرا الخلفية و حتى بعد وضع الجراب فيه بروز 2 الى 3 ملم.
يأتى نوت 7 بأبعاد 159.2*75.2*8.1 ملم و وزن 186 جرام ,متوفر في الأسواق بألوان الأسود و الأحمر و الأزرق.
على عكس هاتف Samsung Galaxy A50 مصنوع من البولى كاربونيت البلاستيك المقوي مع Curves فى ظهر الهاتف بأبعاد 158.5*74.7*7.7 ملم مع وزن 166 جرام مما يجعله مريح و سهل فى الاستخدام فهو خفيف فى اليد الواحدة, متوفر في الأسواق بألوان الأسود و الأبيض و الأزرق.
بالنسبة للحماية من المياه ولا واحد منهم مضاد للماء و لا ننصح ابدا انك تحط أى واحد فيهم فى المياه لكن الشاومى ريدومي نوت 7 يعتبر مقاوم لطرطشة أو رذاذ الماء علشان تقفيله حلو و فيه كاوتش فى الفتحات.
الشاشة :-
شاشة هاتف Samsung Galaxy A50 تأتي من نوع Super Amoled كما هو معتاد من سامسونج بقياس 6.4 بوصة تعرض 16 مليون لون بدقة Full HD+ بجودة 1080*2340 بيكسل مع كثافة بيكسلات 403 بيكسل لكل بوصة بأبعاد 19.5:19 مع دعم حماية من نوع Corning gorilla glass 3 كما يوجد اسكرينة حماية تم تركيبها على الشاشة مسبقا و تمثل الشاشة 84.9% من حجم الهاتف مع دعم اللمس المتعدد و أعلى الهاتف نوتش Infinity U يمكنك الغائها من الاعدادات و الأطراف حول الشاشة قليلة.
شاشة هاتف Xiaomi Redmi Note 7 تأتي من نوع IPS LCD بقياس 6.3 بوصة تعرض 16 مليون لون بدقة Full HD+ بجودة 1080*2340 بيكسل مع كثافة بيكسلات 409 بيكسل لكل بوصة بأبعاد 19.5:19 مع دعم حماية من نوع Corning gorilla glass 5 لكن ننصح بتركيب اسكرينة للحماية ايضا و تمثل الشاشة 81.4% من حجم الهاتف مع دعم اللمس المتعدد مع نوتش Drop water و لكن لا يمكن الغائها من الاعدادات.
الأفضليه هنا هتكون فى صالح شاشة السامسونج السوبر أمولد و الفرق هيكون واضح جدا لو استخدمت الاتنين مع بعض تتفوق شاشة ال A50 فى السطوع تحت الشمس و وضوح الألوان و دقة فى الرؤية دا غير ان حواف اللى حول الشاشة أقل شوية من الشاومي و سرعة استجابة التاتش أفضل فى السامسونج على عكس الشاومي أحيانا بتعلق خصوصا فى الكتابة.
تجربة الصوت :-
صوت السماعة الخارجية فى الاتنين عالى لكن فى النوت 7 مجسم أكثر .
صوت سماعة المكالمات فى الاتنين ممتاز و عالى .
صوت سماعة الأُذن فى الاتنين ممتاز و عالى بردوا.
و الاتنين فيهم ميكروفون اضافي لإزالة الضوضاء مما يُحسن من جودة الصوت في التسجيل و الفيديو.
الأداء :-
معالج هاتف Samsung Galaxy A50 هو Exynos 9610 octa ثماني النواة يعمل بقوة تردد 4*2.3 جيجا هرتز Cortex A73 و 4*1.7 جيجا هرتز Cortex A53 بمعمارية 10 نانو اللى سجل 140232 نقطة فى اختبار Antutu مع معالج رسوميات و جرافيك Mali-G72 Mp3.
أما بالنسبة لهاتف Xiaomi Redmi Note 7 بمعالج Snapdragon 660 ثماني النواة يعمل بقوة تردد 4*2.2 جيجا هرتز Kyro 260 و 4*1.8 جيجا هرتز Kyro 260 بمعمارية 14 nm اللى سجل 144000 نقطة فى اختبار Antutu مع معالج رسوميات و جرافيك Adreno 512 .
الاتنين قريبين جدا فى نتيجة اختبار Antutu و تقريبا فى الأداء الفعلى مفيش اختلاف ملحوظ حتى توفير الطاقة اللى مفوض سامسونج تتفوق فيه بحكم ان المعالج 10nm و الشاومي 14nm مش ملحوظ و الاتنين زي بعض الأداء فى الاتنين ممتاز الاختلاف هيكون فى الواجهة لأنها مختلفة فى الاتنين السامسونج بواجهة مستخدم One UI و الشاومي MIUI 10 و الاتنين بنظام أندرويد فطيرة 9.0 Pie.
أما بالنسبة لأداء معالج الرسوميات و الجرافيك و خصوصا لعبة PUBG الاتنين بيقدموا أداء جيد جدا على High HD جرافيك لكن فى السامسونج تقدر تلعب على Ultra HD على عكس الشاومى اللى High HD فقط.
الذاكرة الداخلية و الذاكرة العشوائية:
يتوافر شاومي نوت 7 بثلاث نسخ حيث الأول بذاكرة داخلية 32 جيجا بايت مع 3 جيجا بايت رام و الثاني 64 جيجا بايت مع 4 جيجا بايت و الثالث 128 جيجا بايت مع 4 جيجا بايت رام ذاكرة عشوائية.
يمكنك زيادة المساحة الداخلية للهاتف عن طريق إضافة كارت ذاكرة خارجي يصل الى 256 جيجا بايت و لكن مع الاستغناء عن الشريحة الثانية لاستخدامه.
اما عن هاتف A50 يأتي بنسخة واحدة بذاكرة داخلية 128 جيجا بايت مع 4 جيجا بايت رام ذاكرة عشوائية و يمكنك زيادة المساحة الداخلية للهاتف عن طريق إضافة كارت ذاكرة خارجي يصل الى 512 جيجا بايت فى منفذ منفصل.
الكاميرا الخلفية :-
احنا هنتكلم الأول عن الأداء الفعلى لكل كاميرا و المواصفات بالأرقام هتبقي فى الآخر .
لو الذكاء الاصطناعى شغال و HDR و الوضع Auto هنصور فى الشمس بورتريه هنلاقي فى النوت 7 فاتحة شوية و القص أفضل من السامسونج .
لو البورتريه فى الظل هيتفوق النوت 7 فى قص الأطراف .
ولو التصوير فى اضاءة الغرفة هيتفوق ال A50 فى التفاصيل .
ولو هنجرب ال Zoom علشاان نشوف التفاصيل البعيدة فى الاتنين تفاصيل ضايعة فى ال Zoom .
أما بالنسبة للتصوير الليلي فى الاضاءة الصفراء هاتف الشوامى نوت 7 عالج ألوان الصورة علشان يخرجها جميلة لكن ألوان السامسونج كانت واقعية أكثر لكن فى النوت 7 بيحاول يخلي التفاصيل أوضح و الصورة احلى بعيدا عن الشكل الواقعي.
هتلاقي في فيديو المقارنة الي موجود في أخر المقالة صور متصورة بالموبايلين جمب بعض .
نيجي بقي للأرقام..
كاميرا هاتف Samsung Galaxy A50 الخلفية تأتي ثلاثية بجودة 25 ميجا بيكسل مع فتحة عدسة f/1.7 مع دعم الضبط التلقائي المزدوج PDAFو الثانية 8 ميجا بيكسل مع فتحة عدسة f/2.2 بزاوية واسعة Ultra wide و الثالثة 5 ميجا بيكسل مع فتحة عدسة f/2.2 مخصصة للعزل و فلاش أحادى LED و تصوير فيديو بجودة 1080 بيكسل مع 30 لقطة فى الثانية مع تصوير بجودة 720 بيكسل مع 30 لقطة فى الثانية كما يمكن تصوير Slow motion و لكن هنا لا يمكنك التنقل بين الكاميرات الثلاثة كما هو الحال فى هاتف Samsung S10 كما تدعم التصوير بوضع بانوراما و HDR.
أما كاميرا هاتف Xiaomi Redmi Note 7 الخلفية تأتي مزدوجة الأولى 48 بجودة ميجا بيكسل مع فتحة عدسة f/1.8 مع دعم الضبط التلقائي المزدوج PDAF و مستشعر من سامسونج GM1 والثانية بجودة 5 ميجا بيكسل مع فتحة عدسة f/2.2 مع فلاش ثنائي Dual LED و تصوير فيديو بجودة 1080 بيكسل مع 30 أو 60 أو 120 لقطة فى الثانية كما يمكنه تصوير ال Slow motion و ايضا التصوير بجودة 720 بيكسل مع مثبت بصري اليكتروني gyro EIS و دعم الذكاء الاصطناعى.
اما بالنسبة لتصوير الفيديوهات فالتجربة الفعلية أثبتت تفوق النوت 7 في تصوير الفيديوهات خصوصا في الاضاءة الضعيفة وستجد مقارنة تصوير فيديو في فيديو المقارنة بأخر المقالة .
الكاميرا الأمامية :-
هاتف A50 بجودة 25 ميجا بيكسل مع فتحة عدسة F/2.0 أما هاتف Note 7 تأتي بجودة 13 ميجا بيكسل مع فتحة عدسة F/2.2و الاتنين بيقدروا يصوروا فيديو بجودة 1080 بيكسل مع 30 لقطة فى الثانية مع دعم HDR و العزل عن طريق السوفت وير.
الأداء الفعلى للاتنين فى الشمس البورتريه أفضل فى النوت 7 فى الظل ألوان الجلد واقعية اكثر و أفضل فى النوت 7 أما فى اضاءة الغرفة فى النوت 7 هتبقي الألوان باهتة شوية و هتبدا النويز في الظهر ويبدأ تفوق ملحوظ للسامسونج A50 لأن فتحة العدسة أوسع .
فى البورتريه بالليل فى السامسونج الصورة اجمل و الألوان مشبعة أكثر .
فى اضاءة الغرفة الضعيفة يتفوق الA50 بشكل ملحوظ .
فى التصوير بالليل و اضاءة قوية فى اتجاه العدسة يتفوق بشكل ملحوظ الA50 .
هتلاقي في فيديو المقارنة الي موجود في أخر المقالة صور متصورة بالموبايلين جمب بعض .
البطارية :-
الاتنين بيجوا ببطارية 4000 مللي أمبير بنفس الاستخدام الشاومى استحمل 8 ساعات و السامسونج 7 ساعات ( شاشة مفتوحة ) طبعا فى اختلاف فى الاستخدام ما بين كل شخص و التانى لكن فى المجمل نقدر نقول ان البطارية هنا جيدة جدا فى الاتنين.
اما بالنسبة لسرعة الشحن فى Xiaomi Redmi Note 7 بيدعم تقنية الشحن السريع Quick Charge 4 لكنه بيجي بشاحن 10 واط بيشحنها فى حوالى ساعتين و ثلث أما السامسونج الشاحن بقوة 15 واط و بيشحن البطارية فى حوالى ساعتين و الاتنين بمنفذ USB Type C.
خواص أخري :-
بالنسبة للمبة الاشعارات موجودة فى هاتف Xiaomi Redmi Note 7 أسفل الشاشة باللون الأبيض و الاشعارات بتظهر شوية و تختفي لحد ما يجيلك اشعار جديد ترجع تظهر تانى أما هاتف Samsung Galaxy A50 مفيش لمبة اشعارات بس فيه تعويض عنها عن طريق امكانية أن تقوم الشاشة بوميض أو اضاءة Flash فى حالة وصول اشعارات و اذا كان الهاتف موجود على سطح و الظهر لأعلى سوف يقوم فلاش الكاميرا الخلفية بهذه المهمة و ايضا عن طريق خاصية Always on display التى تعرض الاشعارات فور وصولها أو عن طريق ميزة تدعمها واجهة الهاتف و هى امكانية عمل تذكير أو Reminder فى حالة وصول اشعار من تطبيقات تحددها انت عن طريق اهتزاز وصوت رنين لذلك أما عن ظهور الاشعارات فهى تظهر جميعها فوق الشاشة و يمكنك تحديد عدد محدد من الاشعارات لتظهر كما يمكنك اختيار اذا نسبة البطارية تظهر أم لا و الاشعارات دايما ظاهرة جنب النوتش.
واجهة سامسونج بتدعم انك تعمل نسختين Dual apps من برامج التواصل الاجتماعى لكن الشاومي بتتفوق فى امكانية عمل نسختين من أى تطبيق.
الاتنين فيهم كل المستشعرات القرب و البوصلة و السرعة و الضوء و الجيروسكوب لكن مستشعر التقارب فى السامسونج لازم تلمس الشاشة شوية علشان يشتغل على عكس النوت 7 بيشتغل من غير ما تلمس الشاشة .
تفوق النوت 7 بدعم مستشعر IR حيث يمكنك استخدام الهاتف كريموت كنترول للتحكم بالأجهزة المنزلية.
بالنسبة للتعامل مع الشبكات فى السامسونج الشبكة مستقرة أكثر و لكنها أضعف من النوت 7 بمعنى ان ال A50 صعب تلاقيه غير متاح بس لم تعمل مكالمة فى مكان الشبكة فيه ضعيفة ممكن الصوت يقطع ولو فتحت نت Mobile data هيبقي بطئ على عكس النوت 7 اللى ممكن تلاقيه فجأة بيسقط شبكة و موبايلك غير متاح و لو الشبكة موجودة يكون زى الفل و الشبكة قوية و النت سريع جدا.
عوامل حماية الخصوصية و الأمان :-
الاتنين فيهم مستشعر بصمة الاصبع فى الشاومي موجود بظهر الهاتف و الذي يعمل بسرعة عالية زى الصاروخ لكن فى السامسونج البصمة مدمجة بالشاشة بتفتح فى خلال ثانيتين تقريبا.
الاتنين فيهم Face unlock و شغال كويس جدا و لكن فى الشاومى لازم تغير البلد للهند علشان يشتغل.
محتويات صندوق الهاتف :-
هاتف SAMSUNG A50:
الهاتف والشاحن 16 واط و كابل الشحن Type C ودبوس معدنى وجراب لحماية الهاتف وسماعات أذن.
هاتف REDMI NOTE 7:
الهاتف والشاحن 10 واط و كابل الشحن Type C ودبوس معدنى وجراب لحماية الهاتف.
ملحوظة : صندوق الهاتف لا يحتوي على سماعات الأُذن Earphones.
سعر الهاتف :-
هاتف SAMSUNG A50:
5300 جنيه مصري للنسخة الوحيدة 128 جيجا بايت مع 4 جيجا بايت رام.
هاتف REDMI NOTE 7:
3000 جنيه مصري 32 جيجا بايت مع 3 جيجا بايت رام.
3777 جنيه مصري 64 جيجا بايت مع 4 جيجا بايت رام.
4222 جنيه مصري للنسخة 128 جيجا بايت مع 4 جيجا بايت رام.
من الأخر بقى نجيب مين؟
لو قارنا بين النسختين 128 جيجا بايت من الاتنين هنلاقي فيه فرق حوالى 1000 جنيه دا هيديك فى السامسونج شاشة أحسن لأنها سوبر أمولد و شاحن سريع و سماعات أذن فى العلبة وانتشار وسعر اعادة بيع افضل في السامسونج .
لو الحاجات ديه متفرقش معاك النوت 7 هيكون اختيار كويس بالنسبة ليك .. ولو تفرق معاك اكيد الـ A50 هيكون الأفضل ليك .
Comments