مراجعة Redmi 10C – أقوى معالج بأقل سعر.. ولكن!

زمان كنت علشان تشتري موبايل في الفئة الإقتصادية بتدفع في حدود 2500 جنية .. وشاومي كان دائمًا عندها موبايل بينافس في الفئة دي .. لكن بعد إرتفاع الأسعار، شاومي اضطرت ترفع سعر الموبايل الإقتصادي بتاعها .. النهارده هنقدملكم مراجعة Redmi 10C الإقتصادي الجديد من شاومي واللي بينافس بالأسعار الجديدة.


التصميم :-

لما تمسك الموبايل علشان تستخدمه هتحس انه خفيف، وزن 190 جرام وتخانته معقوله جدًا 8.3 مللي .. والخامات من البلاستيك كالمعتاد في الفئة دي .. والظهر مصنفر علشان الخدوش والبصمات متظهرش بسهولة.

الغريب في التصميم هو شكل المربع اللي مكتوب فيه كلمة REDMI بخط كبير وجنبها الكاميرا في مربع بارز .. هما عدستين اللي حقيقيين وواحده وهمية وواحدة فيها الفلاش، وجنبهم البصمة.

مكان البصمة مش لطيف، كان الأفضل انها تبقى موجودة على زِر الباور .. لإن المكان ده قديم جدًا .. علبة الموبايل فيها شاحن ووصلة، مفيش جراب ولا في سكرينه على الشاشة.


الشاشة :-

شاشة من نوع IPS LCD بحجم 6.71 بوصة بدقة HD+ بنوتش Water Drop للسيلفي، والشاشة بتردد 60 هيرتز .. وهي مش نقطة إبهار في الموبايل، وفي نفس الوقت مش عيب قاتل.

شاشة Redmi 10C ألوانها مش أفضل حاجه، وكثافة البيكسلات قليلة، والسطوع في الأماكن الخارجية كويس لو في الظل او شمس خفيفه، لكن لو شمس مباشرة قوية هتلاقي ان السطوع مش لطيف.

الشاشة زيها زي شاشات موبايلات اوبو وسامسونج اللي في الفئة دي .. كنت اتمنى ان شاومي تميزها بدقة FHD+ او بتردد 90 هيرتز مثلًا .. لكنها مازالت مقبولة نسبيًا.

الشركة الوحيدة اللي بتقدم شاشة ممتازة في الفئة دي هي انفينكس بموبايل Infinix Hot 11S بدقة FHD+ بثقب للكاميرا السيلفي وبتردد 90 هيرتز.


الأداء :-

أفضل حاجه في الموبايل ده هو المعالج .. معالج كوالكوم سناب دراجون 680 بتكنولوجيا 6 نانو ميتر وذاكرة التخزين UFS 2.2، شاومي مبخلتش في انها تضيف معالج بنشوفه في موبايلات بأسعار أغلى بكتير.

تجربة الأداء في الموبايل ممتازة جدًا ومُرضية جدًا مُقارنًة بأي منافس في الفئة الإقتصادية .. وكمان الواجهة متشال منها Animations كتير وده مخلي الموبايل فعلًا نشيط ومش بيعلق نهائيًا .. الموبايل لو كان 90 هيرتز كان هيكون نقله فعلًا في الفئة الإقتصادية .. بس مازالت الـ60 هيرتز مقبولة بالسعر ده.

لو انت بتدور على موبايل نشيط في فتح البرامج والتنقل بينها فا ريدمي 10C هو الأسرع في الفئة دي .. بالمقارنة مع Infinix Hot 11S وغيره في الفئة دي.

تجربة الألعاب فا المعالج ده احنا عارفين ان اخره Medium Graphic وبالنسبة للسعر ده فا هو ممتاز .. والمعالج موفر جدًا في إستهلاك البطارية وكمان مش بيسخن لما بتضغط عليه.


عوامل الأمان وعناصر اخرى :-

بصمة الإصبع في الظهر مكانها مش لطيف بس إستجابتها كويسة ومفيش تجميع للأيقونات بيحصل .. والـFace Unlock سرعته معقوله بس لازم اضاءه تكون كويسة لإن الكاميرات متواضعه.

الواجهة مفيهاش Dual Apps علشان السوفت وير يكون خفيف .. ومفيش NFC في الموبايل .. ومفيش مستشعر الـIR Blaster المُعتاد من شاومي .. ومفيش ميكروفون اضافي لعزل الضوضاء!

الصوت هنا Mono مش Stereo .. مستوى الصوت أقل من المتوسط، ومفيش Bass تقريبًا .. صوت متواضع جدًا مش زي ما احنا متعودين من شاومي.

بالنسبة لمستشعر التقارب فا هو موجود حقيقي وشغال بأداء ممتاز .. وبالنسبة لشبكات الإتصال والـWi Fi فا ياخدوا تقييم فوق المتوسط، أعلى من موبايلات سامسونج وأقل من موبايلات أوبو.


البطارية :-

بطارية 5000 مللي امبير .. لكن معاها معالج موفر 6 نانو ميتر وشاشة مش بتسحب طاقة وسوفت وير متخفف تمامًا .. الشاشة هتقعد معاك حوالي 10 ساعات شاشة مفتوحة مرتاح جدًا.

مدخل الشحن USB Type C .. وسرعة الشحن 18 وات، لكن للأسف الشاحن الموجود في العلبة 10 وات فقط.


الكاميرات :-

كاميرا خلفية رئيسية 50 ميجا بيكسل بفتحة عدسة F/1.8، الثانية مُخصصة للعزل 2 ميجا بيكسل .. والكاميرا السيلفي 5 ميجا بيكسل بفتحة عدسة F/2.2.

الكاميرات متواضعه جدًا .. ومُجملًا علشان تاخد صورة معقولة لازم تكون في إضاءه عالية وميكونش في شمس قوية علشان الصور متتحرفش .. وده الطبيعي عمومًا في كاميرات الفئة المتوسطة، لو حابب تاخد صور أحلى بتزود المبلغ شوية.

السيلفي أداءه طبيعي كعدسة 5 ميجا بيكسل .. لازم اضاءه عالية وهتاخد صور بتفاصيل متواضعه جدًا مش أفضل حاجه مع لون بشره محتاج يتعدل عليه.

بالنسبة لتصوير الفيديوهات فالموبايل بيدعم تصوير بجودة 1080p .. والموبايل مفيهوش ثبات إلكتروني، وكمان مفيهوش ميكروفون اضافي لعزل الضوضاء.


سعر Redmi 10C :-

  • نسخة 64 جيجا مع 4 جيجا رام بسعر 3750 جنية
  • نسخة 128 جيجا مع 4 جيجا رام بسعر 4100 جنية

وينفع تركب شريحتين إتصال من الجيل الرابع مع كارت ميموري بحجم 1 تيرا.


الرأي النهائي :-

مميزات Redmi 10C :-

  • تجربة أداء قوية
  • أفضل بطارية في الفئة السعرية دي
  • مستشعر تقارب حقيقي

عيوب Redmi 10C :-

  • الشاشة ليست الأفضل
  • مستوى كاميرات متواضع
  • الصوت Mono ضعيف
  • الشاحن في العلبة 10 وات فقط

قد يعجبك أيضا...

Comments

جاري التحميل...