بعد النجاح الكبير لموبايل Redmi 9 .. واللي بالمناسبة فعلًا موبايل كويس جدًا .. واللي بيسأل عليه لحد دلوقتي أخباره إيه بعد فتره من الإستخدام فهو مُمتاز جدًا ويمكن في وجه نظري أحسن من الـRedmi Note 9 ومُستقر أكتر منه.
المهم .. شاومي قالت تهتم أكتر بالفئة الإقتصادية وتنزل أصغر فرد في عائلة الريدمي وهو الـRedmi 9A .. وعلشان ابقى صريح معاك .. الريدمي 9A مُختلف إختلاف كبير عن الريدمي 9 .. وبرده سعره أقل كتير .. فخلينا نشوف كده موقف الـRedmi 9A بالنسبة لسعره .. هل فيه مشاكل جوهريه .. هل هو أفضل موبايل بـ1600 جنية ؟
التصميم :-
تصميم ريدمي 9A كلاسيكي أوي أوي بصراحة .. السهل المُمتنع زي ما بيقولوا عليه .. شاومي مصرفتش كتير على تصميمه علشان تقدر تنزله بسعر منافس أوي.
التصميم من البلاستيك وعلشان الموبايل معهوش جراب في العلبة .. فهتلاقي في تجزيعة بسيطة كده في الظهر هتسمع صوتها لما تمشي بإيدك عليه .. ودي علشان ميتخربش بسهولة.
بس حقيقي انا بيبقى نفسي الشركات تروق كده على الزبون الإقتصادي وتديله جراب في العلبة .. ما هو حقه يتبسط برده علشان يحافظ على موبايله.
في زي فريم كده على ظهر الموبايل بلون مختلف شوية مرصوص فيه الكاميرات .. ومكمل لحد تحت ومكتوب فيه كلمة REDMI .. ده المختلف في التصميم اللي هنا.
الكاميرا مش بارزه جامدة عن جسم الموبايل فمتقلقش من القصة ديه .. والموبايل كبير شوية وزنه 196 جرام وتخانه 9 ملم .. مش صغير خالص .. ومحتاج شوية على ما تتعود عليه.
الشاشة :-
شاشة بحجم 6.53 بوصة من نوع IPS LCD بدقة HD+ .. والسيلفي موجود في نوتش في الشاشة .. والحواف حوالين الشاشة مش صغيرة .. ولكن مش الكبيرة أوي يعني .. أقدر أقول مقبوله بسعر الموبايل.
الشاشة نفسها كويسة .. كسطوع مقبولة فهي بتوصل لحد 400 شمعة .. وألوان الشاشة هنا برده مقبولة .. مش بهتانة، والسوفت وير بيحاول يظبطلك دايمًا درجات الألوان على حسب سطوع الشاشة.
وللأسف الشاشة مش جاي عليها سكرينة ولا في إعلان رسمي على طبقة الحماية على الشاشة.
الأداء :-
الموبايل جاي بمعالج جديد أول مره أجربه وهو الميدياتيك Helio G25 بمعمارية 12 نانو .. هختصر عليك وقت .. ده يعتبر هو هو الـHelio P25 .. الفرق بس في سرعة تردد الأنوية حاجة بسيطة .. إنما نفس المعمارية ونفس المعالج الرسومي.
فملخص الكلام .. الأداء مش هيبقى طيارة معاك .. الأداء هتحسه متكتف شوية .. لإن الموبايل بـ2 جيجا رام .. وكمان الواجهة اللي هنا مش Lite .. لأ بالعكس ده شاومي حاطة واجهتها الجديدة الـMIUI 12 في أرخص موبايل عندها.
حاجه كويسة نشوف أحدث واجهة على الموبايل ده .. بس انا حاسسها تقيلة شوية على المعالج والرام اللي هنا .. والأداء هنا مش سريع ومينفعش حد يقول عليه مُمتاز.
هتحس بتقل في حركات كتير وفي أوقات كتير الجهاز فعلًا بيتخض كدا من الأوامر اللي بتعملها .. هو مش بيـFreeze أو بيقف بشكل كامل .. لا هو مجرد تقطيعات وتقل.
الأداء الرسومي .. ببجي بتشتغل على Balanced وMedium .. واللعبة هتلاقي فيها Drop في الفيرمات كتير .. مش أحسن تجربة لعب خالص .. بس هو مين بالسعر ده اصلًا بيقدم تجربة في ببجي كويسة ؟
وكول اوف ديوتي شغالة على اعدادات جرافيك Low .. بس لاقيت اللعبة كويسة جدًا وقدرت ألعب فتره كبيرة على الموبايل بدون أي مشاكل .. والموبايل مش بيسخن مع الإستخدام خالص.
عوامل الأمان وعناصر اخرى :-
للأسف مفيش بصمة في الظهر .. والإعتماد على الـFace Unlock .. ويدوبك سرعته مقبولة .. مش طيارة ولكن مقبوله .. والموبايل مفهوش لمبة إشعارات ولا في بديل ليها.
واجهة MIUI 12 :-
تعالوا نتكلم شوية عن الواجهة الجديدة لشاومي الـMIUI 12 وأشهر حاجة فيها هي الـControl Center اللي شكلها إتغير وبقت شبه موبايلات ابل جدًا.
من على يمين النوتش هتنزل قائمة الإختصارات .. ومن على شمال النوتش هتنزل قائمة الإشعارات .. وممكن تلغي اصلًا شكل الـControl Center الجديد وترجع شكل القائمة القديمة بتاعت شاومي من الإعدادات لو حابب.
الـDark Mode موجود وشغال والمُميز هنا إن كل البرامج بتقلب أسود حتى الـFacebook كمان .. وكان في ميزة جديدة في الواجهة ديه اللي هي Floating Window اللي تقدر تشغل برنامج فوق برنامج .. بس مش موجودة هنا.
وأخر ميزة معانا هي في وضع توفير الطاقة الفائق اللي بيقفل حاجات كتير أوي في الواجهة علشان لو إنت بره ومش معاك الشاحن وعاوز الموبايل يكمل اليوم فعلها وإعتمد على الموبايل في المكالمات بس.
نرجع للموبايل نفسه بقى .. وضع الجيب او الـPocket Mode كان بيعلق في الموبايل ده لحد أما وصل تحديث ظبطه وبقى شغال بكفاءة ومش بيعلق معايا خالص.
المستشعرات شغالة كويس .. ضوء وتقارب زي الفل .. بس للأسف مفيش جيروسكوب في الموبايل ده .. وصوت الموبايل جاي من سماعة واحدة صوتها مقبول جدًا على سعر الموبايل مقدرش أقول عليه واطي.
وصوت سماعة المكالمات مش عالي اوي .. برده ممكن أقول عليه مقبول .. بس للأسف المايكروفون الإضافي بتاع عزل الضوضاء متشال من الموبايل ده .. وكالعادة مفيش تسجيل مكالمات.
وبالنسبة لقوة الشبكات .. الـWiFi كويس جدًا .. وشبكات الإتصال متوسطة .. مش أقوى حاجة ولكن أديها تقييم متوسط.
البطارية :-
بطارية ضخمة بتيجي بحجم 5000 مللي أمبير .. حرفيًا مش هتعرف تخلصها .. هتكمل معاك 10 ساعات وأكتر شاشة مفتوحة.
بس منفذ الشحن Micro USB 2.0 .. مع إن الـRedmi 8A القديم كان USB Type C .. مش عارف ليه شاومي تخلت عن المنفذ ده.
والشاحن المرفق الـ10 واط .. الطبيعي إنك متلاقيش شحن أسرع من كدا في الفئة ديه .. وهو بيشحن البطارية في حوالي 3 ساعات.
الكاميرات :-
كاميرا خلفية واحدة بدقة 13 ميجا بيكسل بفتحة عدسة F/2.2 وكاميرا أمامية بدقة 5 ميجا بيكسل بفتحة عدسة F/2.2 .. ومفيش Night Mode في ابلكيشن الكاميرا بتاع شاومي.
ومُجملًا أداء الكاميرات مقبول في الإضاءات العالية .. بس لازم تثبت إيدك كويس وانت بتصور وتستنى شوية بعد حتى ما تصور علشان متلاقيش الصورة مهزوزة.
متتوقعش أداء خيالي من كاميرا موبايل اقتصادي .. بس زي ما بقولك لو الإضاءة العالية ممكن تاخد صور كويسة بالموبايل ده بس طبعًا مش هتلاقي تفاصيل كتير .. وطبعا مفيش Night Mode والصور بليل بتبقى لا يعتمد عليها خالص.
السيلفي برده نفس الكلام على الكاميرا الخلفية هقوله في السيلفي .. لو الإضاءة عالية هتاخد صور مقبولة .. اه مش أحسن لون بشرة ولكن مجملًا الصور بتطلع شارب وفيها بعض التفاصيل .. بس لما الإضاءة بتقل الوضع بيبقى مش حلو خالص.
سعر الموبايل :-
سعر الموبايل الرسمي للنسخة الوحيدة المتوفرة منه بمساحة تخزين 32 جيجا مع 2 جيجا رام بسعر 1599 جنية مصري.
وبينفع تركب شريحتين إتصال من الجيل الرابع مع كارت ميموري بحجم 256 جيجا في نفس الوقت.
الرأي النهائي :-
مميزات Redmi 9A :
- أقوى معالج في الفئة دي
بأداء عادي وواجهة تقيلة - بطارية قوية وبتقعد وقت طويل
- شاشة مقبولة جدًا
- أحدث سوفت وير من شاومي
عيوب Redmi 9A :
- مفيش بصمة إصبع
- مفيش جراب في العلبة
- مفيش مايكروفون عزل ضوضاء
- الواجهة تقيلة جدًا
- منفذ الشحن الـmicroUSB 2.0
العيوب دي لما قارنته باللي معاه في فئته السعرية .. زي الـHuawei Y5p والـInfinix Hot 9 والـNokia 3.2 .. وكنت اتمنى وجود بصمة الإصبع في الموبايل ده.
الفرق بين Redmi 9A و Redmi 9 :
- معالج أقل بفرق ضخم
- بطارية لا تدعم الشحن السريع
- دقة شاشة أقل
- درجة علو الصوت أقل
- التصميم الخارجي أقل
- اداء كاميرات اقل
- مفيش مستشعر بصمة
- مفيش مستشعر الـIR Blaster
- مفيش مايكروفون اضافي لعزل الضوضاء
وطبعًا في فرق حوالي 650 جنية مصري عن الـRedmi 9 .. وطبعًا لو تقدر تزود الميزانية وتوصل للـRedmi 9 اعمل كده وهاته طبعًا .. هيكون إختيار مُمتاز جدًا وهتتبسط بيه جدًا.
Comments