مراجعة Redmi Note 11S الجديد – أحدث موبايل من شاومي في مصر !

من فترة طويلة نزل موبايل Redmi Note 11S واتسعر في الأسواق المصرية .. لكن متوفرش وقتها للبيع بسبب مشاكل الإستيراد .. ومن أيام شركة شاومي أعلنت عن توفر الموبايل في السوق المصري بأسعار جديدة وبالفعل الموبايل بقى متاح للبيع .. والنهارده هنقدملكم مراجعة Redmi Note 11S الجديد في مصر.


التصميم :-

تصميم Note 11S سهل مُمتنع .. شاومي مضافتش حاجات كتير في التصميم، الظهر من البلاستيك علشان ميظهرش فيه خدوش وتراب بسهولة .. الموبايل مقاوم لرذاذ الماء بشهادة IP53 بس دي شهادة مش قوية.

الموبايل وزنه حوالي 179 جرام وتخانته 8.1 مللي، فريم الموبايل مش منحني .. مُسطح شوية زي Redmi Note 11 العادي .. والتصميم مختلفش كتير عن نوت 11 العادي.

المختلف شوية هنا هو بروز الكاميرا الخلفية .. ريدمي نوت 11 اس بيجي بمستشعر 108 ميجا بيكسل فا بروز الكاميرات بيجي على درجتين والعدسة الرئيسية بتيجي بدرجة أعلى فا بتكون بارزه بشكل كبير.

شاومي بتحل الموضوع ده عن طريق ان الجراب الشفاف اللي في علبة الموبايل فيه “شفه” عاليه عند العدسة الأساسية وأقل عند باقي العدسات، وبالتالي بتحل الموضوع ده.


الشاشة :-

شاشة الموبايل من نوع AMOLED بحجم 6.43 بوصة بدقة FHD+ بتردد 90 هيرتز مع ثقب صغير للسيلفي، هي هي شاشة ريدمي نوت 11 العادي مفيش إختلاف بينهم.

الشاشة ممتازة في الفئة دي .. لكن كان نفسي ان الشاشة تكون 120 هيرتز لإن المعالج هنا يقدر يشغل الـ120 هيرتز بدون مشاكل .. لكن شاومي بتخلي ميزة الـ120 هيرتز حصرية لنسخة الـPro من السلسلة.

سطوع الشاشة كويس جدًا تحت الشمس .. الألوان كويسة ومُشبعة وتقدر تتحكم في درجة تشبع الألوان من خلال إعدادات الشاشة .. والشاشة عليها حماية Gorilla Glass الجيل الثالث ومتركب عليها سكرينة.


الأداء :-

ريدمي نوت 11 اس بيجي بمعالج ميدياتك Helio G96 بتكنولوجيا 12 نانو .. معالج أقوى وأداءه أعلى من SD680 الموجود في HONOR X8 .. بس ده على حساب إستهلاك البطارية الأعلى والسخونية الأعلى.

شاومي عمومًا عامله نظام ان نسخة الـS من سلسلة النوت بيكون فيها معالج نشيط من ميدياتك من فئة الـG علشان يكون إختيار كويس للـGamers .. وده اللي بنشوفه هنا في Note 11S.

أداء الموبايل الفعلي معقول جدًا .. بس انا عندي تعليق ان شاومي بتضيف كل Animation الواجهة ومش بتخففه زي ما شوفنا في Redmi Note 11 .. وده بيحسسك ببعض التقطيعات والتهنيجات الخفيفة في الإستخدام.

الأداء الرسومي كويس .. ببجي بتشتغل على High Graphic وبتشتغل بأداء ممتاز .. ودي حاجه بقالي كتير مقولتهاش في الفئة السعرية دي.


عوامل الأمان وعناصر اخرى :-

البصمة موجودة على زِر الباور .. هي سريعة بس بيحصل تجميع لأيقونات الواجهة اتمنى انه يتلغي .. والـFace Unlock سرعته مقبولة الى حد كبير.

الموبايل بيجي بـMIUI 13 المبني على Android 11 .. واتمنى من شاومي تسرع في اطلاق الـAndroid 12 على موبايلاتها .. خصوصًا ان الموبايل بقاله فتره نازل بره.

الموبايل مفيهوش NFC .. بس في مستشعر IR Blaster علشان تتحكم في الأجهزة الكهربائية .. في مدخل 3.5 مللي .. وفي ميكروفون اضافي لعزل الضوضاء

صوت الموبايل بيكون Stereo .. هو مش أعلى Stereo هتجربه، بس الصوت درجته كويسة الى حد كبير.

مستشعر التقارب للأسف شكله سوفت وير لإنه برده بيعلق، وده بقى عيب ثابت في معظم موبايلات شاومي اللي بنجربها .. هو المستشعر أداءه مش كارثي، بس مش أحسن حاجه.

شبكات الـWi Fi والإتصال كويسة جدًا زي ما كانت كويسة برده في Redmi Note 11 ومفيش فيها أي مشاكل.


البطارية :-

بطارية الموبايل 5000 مللي امبير .. الأداء الفعلي بتاعها مش قوي زي Note 11 لإن المعالج هنا بيستهلك بطارية بشكل أكبر خاصًة لو هتستخدم الموبايل بشكل مُكثف.

الشاحن بقدرة 33 وات وبيشحن البطارية بالكامل في ساعة تقريبًا .. وقت شحن ممتاز.


الكاميرات :-

الكاميرا الخلفية الأساسية 108 ميجا بيكسل فتحة عدسة F/1.9 .. عدسة Ultra Wide بدقة 8 ميجا بيكسل فتحة عدسة F/2.2 .. عدسة Macro دقة 2 ميجا بيكسل وعدسة للعزل 2 ميجا بيكسل .. والسيلفي 16 ميجا بيكسل بفتحة عدسة F/2.5.

الكاميرا الخلفية اتحسنت كتير في Redmi Note 11S عن Redmi Note 10S القديم بفضل إستخدام مستشعر 108 ميجا بيكسل .. الصور تفاصيلها بقت أكثر، بس في تحفظ على معالجات ميدياتك اللي مش بتقدم أفضل معالجة للصور .. أحيانًا هتحس ان الصور محتاجه تشبع ألوان أكثر ومعالجة أفضل.

طول ما الإضاءه عالية هتلاقي التفاصيل كتير والألوان كويسة .. أول ما الإضاءه تقل هتلاقي التفاصيل قلت وهتحس ان الصور ألوانها متواضعه جدًا .. ولما الإضاءه تقل أكثر هتحتاج تشغل الـNight Mode واللي بيقدر يطلع صور بتفاصيل معقولة بس على حساب لون البشرة اللي بيضيع خالص.

لما قارنت الموبايل مع Galaxy A33 اللي بمستشعر 48 ميجا بيكسل .. لاقيت انه بيتفوق على Note 11S في معالجة الصور بشكل واضح وده العيب اللي ذكرته في بداية تقييمي للكاميرا في نوت 11 اس.

بالنسبة لـ سيلفي نوت 11 اس فا الألوان بتفرقع لو الشمس عالية .. بس لو الإضاءه معقولة هتاخد صور سيلفي كويسة، هو بس لون البشرة فاتح شوية وناعم شوية محتاج يتظبط عن كده .. ولما الإضاءه بتقل تفاصيل السيلفي هتقل شوية، وهتاخد بالك ان التفاصيل قليلة لما تعمل زوم.

مفيش Night Mode في السيلفي وبصراحة دي حاجه مش لطيفة، بس أداء السيلفي في الإضاءات الضعيفة مش وحش خالص وهتاخد أداء معقول جدًا بالرغم من عدم وجود Night Mode.

ولما قارنت مع سيلفي A33 لاقيت إختلافات صغيرة بين الموبايلين في السيلفي، مفيش تفوق واضح لسامسونج.

بالنسبة لتصوير الفيديوهات فالموبايل بيدعم تصوير بجودة 1080p مع 30 فريم في الثانية وده بسبب المعالج المُستخدم في الموبايل .. الموبايل فيه مثبت إلكتروني، والموبايل فيه ميكروفون اضافي لعزل الضوضاء.


redmi note 11s price

سعر Redmi Note 11S :-

  • نسخة 64 جيجا مع 6 جيجا رام بسعر 5650 جنية
  • نسخة 128 جيجا مع 6 جيجا رام بسعر 6300 جنية
  • نسخة 128 جيجا مع 8 جيجا رام بسعر 6700 جنية

والموبايل بيدعم تركيب شريحتين إتصال من الجيل الرابع مع كارت ميموري بحجم 1 تيرا.


الرأي النهائي :-

نوت 11 اس يعتبر قريب أكثر لـ ريدمي نوت 11 العادي .. الفرق بيتلخص في معالج أقوى مع مستشعر كاميرا خلفية أقوى، كان نفسي يبقى Note 11S أرخص من كده شوية لكن للأسف كل الموبايلات زادت.

نوت 11 اس نزل في فترة إنتقالية بين الأسعار القديمة والأسعار الجديدة .. وده هيخليك تفكر انك ممكن تجيب Poco F3 او Poco X3 Pro او Poco X3 GT خاصًة انهم بأسعار قريبة، وده صح لو انت اولوياتك الألعاب والأداء .. وممكن كمان تجيب Redmi Note 10 Pro القديم هيقدملك تجربة أحسن.

قد يعجبك أيضا...

Comments

جاري التحميل...