دلوقتي ريلمي قررت تنزل Realme C15 في مصر .. وده موبايل تركيبة مواصفاته مختلفة شوية .. بس زي ما إنت عارف .. إن في حرب بين Realme وXiaomi في كل الفئات السعرية تقريبًا .. ودايمًا بيتحطوا في مقارنات مع بعض .. والمستخدم بيبقى حيران ما بينهم .. وعلشان كده هنقارن النهارده بين Realme C15 والـRedmi 9.
التصميم :-
الموبايلين جايين بنفس الخامات الخارجية .. خامة من البلاستيك وعليها طبقة طلاء خشنة شوية علشان تحمي الموبايل من الخرابيش.
شكل الكاميرا الخلفية في Realme C15 موجودة في مربع والفلاش لوحده تحت كده … ولكن المُميز هنا إن مفيش بروز للكاميرات خالص .. بس خلي بالك .. الـC15 مش بيجي معاه جراب في العلبة .. مع إنه مش رخيص يعني .. ما علينا.
موبايل Redmi 9 كلكم عارفين شكل الكاميرا الخلفية بتاعته .. مش محتاج أتكلم عنه .. والبروز خفيف ولكنه موجود وظاهر لو هنقارنه بالـC15 .. بس ريدمي 9 جاي معاه جراب شفاف في العلبة وديه ميزة .. والجراب بيغطي البروز بالكامل.
بالنسبة لشياكة التصميم .. ديه حاجه ترجع لزوقك .. مش هينفع اقولك مين الأحلى .. وبالنسبة للألوان فالـC15 بيتقدم بالونين الفضي والأزرق اما الـRedmi 9 بيتقدم بالأخضر والبنفسجي والرمادي.
أما حسابات الوزن والأبعاد .. فالريلمي أتقل من الريدمي بحوالي 10 جرام .. لإن وزن C15 حوالي 209 جرام بسبب بطاريته الضخمة .. ده غير إن تخانته الريلمي برده أكبر حوالي 9.8 ملم .. وبالتالي الريدمي مسكته في الإيد احسن شوية.
الشاشة :-
الإختلافات تبدأ تظهر هنا .. شاشة C15 بتيجي بحجم 6.5 بوصة نوع IPS LCD بدقة HD+ والسيلفي موجود في نوتش الشاشة .. اما Redmi 9 فا شاشته 6.53 بوصة من نوع IPS LCD بس بدقة FHD+ .. والسيلفي برده في نوتش.
اول ملحوظة هقولها هي الحافة السُفلية .. في Redmi 9 الحافة السُفلية أقل حاجه بسيطة اوي عن الـRealme C15.
دقة الشاشة وكثافة البيكسلات أحسن في الـRedmi 9 .. لو شوفت الموبايلين قدام عينك وشغلت فيديو على الشاشتين هتقدر تحدد فعلًا إن Redmi 9 أفضل.
اما اللي واضح وصريح أوي بقى هو السطوع .. قولتلكم في مراجعة Redmi 9 إن سطوعه قليل شوية .. فا أما الـC15 إتحط جنبه بقى واضح جدًا إن سطوعه اعلى .. والسطوع الأعلى بالتبعيه بيترجم لألوان زاهية أكتر.
فالموضوع هنا مُحير شويتين .. لو عاوز نصيحة بقى ومحتار .. لو إنت بستخدم الشاشة كتير تحت الشمس .. خليك في شاشة الـC15 .. أما لو انت راجل Gamer مثلًا وبتلعب وبتتفرج على فيديوهات بدقة عالية وكل الكلام ده عالبًا بتعمله في البيت .. لذلك خليك في الـRedmi 9.
الشاشتين عليهم حماية Corning Gorilla Glass .. والشاشتين جايين في العلبة متركب عليهم سكرينه .. وفي النهاية كده عايز أقول إن شاشة Realme C15 هي هي شاشة C11 وشاشة C3.
الأداء :-
ريدمي 9 فيه أقوى معالج في فئته السعريه وهو ميدياتك Helio G80 .. اما الـC15 فا هو جاي بمعالج ميدياتك Helio G35.
انا شخصيًا معرفش ليه ريلمي ما إستخدمتش معالج G70 على الأقل في الـC15 .. كان هيبقى جامد أوي .. ولكن هي إستخدمت نفس معالج الـC11 .. والمعالج ده موجود في موبايلات أرخص زي Redmi 9A وRedmi 9C.
لو إنت متعرفش نوع المعالج المستخدم في الـC15 وبتستخدمه مش هتحس بتقصير منه .. أداء الـG35 هنا أحسن كتير عن اللي جربته في Redim 9A و9C وكمان الـRealme C11 .. هل السبب إن الـC15 جاي أقل نسخة منه بـ4 جيجا رام مثلًا .. فالواجهة واخده حريتها أكتر .. الله أعلم.
ومع كل ده .. فا أكيد أداء Redmi 9 أحسن وأسرع .. ولكن بسبب تقل Animation واجهة شاومي .. فاللي حصل إن الفرق مش كبير .. مش الفرق الـWow في الإستخدام اليومي العادي.
ولو كانت واجهة شاومي أسرع من كده كان زمان الـRedmi 9 بقى أسرع كتير .. شوف كده مراجعة Huawei Y9a بنفس المعالج الـG80 هتلاقي أداءه أفضل بسبب الواجهة.
نيجي بقى للفرق الواضح في الإستخدام، الأداء الرسومي .. ريدمي 9 بيشغل لعبة ببجي على High HD .. واللعبة بتشتغل زي الفل بدون تقطيعات .. أما الـC15 أخرك اعدادات جرافيك Medium وهتلاقي تقطيعات.
أما لعبة كول اوف ديوتي بتشتغل على اعدادات جرافيك Medium على ريدمي 9 وشغاله زي الفل .. والـ سي 15 أخرك Low جرافيك .. وأكيد هتشتغل كويس على Low يعني.
عوامل الأمان وعناصر اخرى :-
مبدئيًا أنا مُعجب أكتر بحجم مستشعر البصمة في الـC15 اللي أكبر من الريدمي 9 اللي بصمته صغيره وكمان في مستطيل الكاميرات (ممكن تلغبطك) .. بالنسبة لسرعه البصمه فا الإتنين كويسين جدًا وزي بعض .. والـFace Unlock برده الإتنين نفس السرعة تقريبًا.
الموبايلين مفيش فيهم لمبة إشعارات .. والإتنين فيهم Dark Mode عادي جدًا .. والموبايلين فيهم كل المستشعرات برده.
ريدمي 9 فيه ميكروفون اضافي لعزل الضوضاء وفيه مستشعر IR Blaster كمان .. انما ريلمي مفهوش الكلام ده.
صوت موبايل Redmi 9 أعلى من الـC15 بفرق ملحوظ كعادة موبايلات شاومي في كل الفئات السعرية .. وصوت سماعة المكالمات عالي ومُمتاز في الموبايلين.
أما تسجيل المكالمات بقى الـRealme C15 هو اللي بيسجل .. ريدمي 9 للأسف مفيهوش ميزة تسجيل المكالمات (هيوصله تحديث يخليه يدعم التسجيل قريب).
أما بالنسبة لشبكات الـWiFi .. فا ريلمي C15 بيقدر يلقط عدد شبكات أكتر .. وده معناه إن المدى بتاعه أقوى .. أما قوة شبكات الإتصال فا الإتنين زي بعض تقريبًا.
ريلمي C15 فيه تسجيل مكالمات ومدى الـWiFi فيه أقوى.
البطارية :-
موبايل Realme C15 جاي ببطارية ضخمة ضخمة بحجم 6000 مللي أمبير .. تحس إنك ماشي بـPowerbank .. أما ريدمي 9 ببطارية ضخمة برده بس أصغر شوية .. بحجم 5000 مللي أمبير.
الغريب في الأمر .. إني حسيت إن الإستهلاك واحد في الموبايلين .. يعني الإتنين بينقصوا معايا زي بعض مش حاسس بـ إن بطارية الـC15 أحسن .. وحقيقي مش عارف ليه.
أما بالنسبة لمنفذ الشحن فالريدمي 9 بيجي بمنفذ USB Type C .. اما الـRealme C15 فا بيجي بمنفذ Micro USB 2.0.
الفكرة في الشواحن بقى .. الـC15 معاه شاحن 18 واط في العلبة والمفروض إن دي أهم ميزة في الموبايل .. ولكن لما جربته استغربت جدًا .. فضلت مستني الموبايل حوالي 3 ساعات على ما شحن !
أومال شحن سريع إزاي ؟ أنا مش عارف .. هل الشاحن اللي معايا فيه مشكلة .. ولا ده علشان البطارية ضخمة ؟
أما Redmi 9 فا كلكم عارفين .. معاه شاحن 10 واط بيشحن في 3 ساعات تقريبًا .. وينفع تشتري شاحن أسرع 18 واط هيشحنلك البطارية في ساعتين وربع بس.
الكاميرات :-
الموبايلين جايين بـ4 كاميرات في الظهر .. الأساسية في الموبايلين 13 ميجا بيكسل بفتحة عدسة F/2.2 وفي عدسة وايد انجل 8 ميجا بيكسل في الموبايلين .. العدسة التالتة 5 ميجا بيكسل ماكرو في ريدمي 9 و2 ميجا بيكسل B&W في ريلمي، ملهاش لازمة .. والأخيرة 2 ميجا بيكسل في الموبايلين .. وده معناه إن مفيش عدسة ماكرو في C15 لو هي اصلًا كانت بتفرق معاك.
السيلفي في الموبايلين واحد .. بيجي بدقة 8 ميجا بيكسل بفتحة عدسة F/2.0.
سوفت وير ريلمي فيه Night Mode في الكاميرا الخلفية .. إنما شاومي مفيهوش Night Mode في السوفت وير.
وبعد تجارب كتير .. Realme C15 بيقدر يعالج الصور أفضل في الشمس وبيقدر يطلع صور أحلى وأحسن وعينك تحب تشوفها .. تفوق على Redmi 9 تقريبًا في كل الصور الـOutdoor اللي صورتها.
أما في الإضاءات الداخلية العالية .. فالوضع متفاوت .. يعني مره الاقي الـC15 أحسن ومرة الاقي Redmi 9 أحسن .. مفيش واحد فيهم علطول أحسن.
ولما جربت أصور علبة موبايل في إضاءه عالية .. الـRedmi 9 اداني صورة أفضل .. اما لما قفلت النور وضلمت المكان لاقيت صورة C15 أحسن ومنورة أكتر .. وده من غير ما استخدم الـNight Mode.
اما السيلفي فا بشكل عام عاجبني سيلفي C15 أكتر .. أداءه أحسن من المتوقع .. بيطلع ألوان معقولة جدًا ومطلع لون بشرة مُشبع شوية بالألوان بس أكيد عينك هتحب تشوفه.
اما في الظلمة الشديدة فا هو بيقدر يقلل الـNoise في الصورة أكتر من الـRedmi 9 بفرق واضح .. وكمان بيعرف يجيب تفاصيل أكتر.
بالنسبة بقى لتصوير الفيديوهات فالموبايلين أخرهم في تصوير الفيديوهات 1080p على 30 فريم في الثانية، وطبعًا مفيش مُثبت إلكتروني .. الـRedmi 9 فيه ميكرفون اضافي لعزل الضوضاء اما الـC15 فا مفيهوش للأسف.
شوف فيديوهات وصور متصورة بالموبايل في فيديو المقارنة
أسعار الموبايلات :-
ريدمي 9 بيجي السوق المصري بنسختين، ودي أسعارهم :-
- النسخة الـ32 جيجا مع 3 جيجا رام بسعر 2250 جنية
- النسخة الـ64 جيجا مع 4 جيجا رام بسعر 2500 جنية
وبينفع تركب شريحتين إتصال من الجيل الرابع مع كارت ميموري بحجم 512 جيجا في نفس الوقت.
وممكن تلاقيه أغلى في المحلات حوالي 100 جنية او 200 جنية بسبب السحب العالي عليه .. ناس كتير بتشتريه والكميات بتخلص أول بأول .. ولكن أنصحك تستنى لما كمية جديدة منه تدخل المحلات وتشتريه بسعره الرسمي بدون إستغلال.
ريلمي C15 سعره الرسمي للنسختين :-
- النسخة الـ64 جيجا مع 4 جيجا رام بـ 2790 جنية وهيبقا عليه خصم 200 جنية على موقع سوق . كوم
- النسخة الـ128 جيجا مع 4 جيجا رام بـ 2990 جنية
وطبعًا بينفع تركب شريحتين إتصال 4G مع بعض مع كارت ميموري بحجم 256 جيجا في نفس الوقت ..
الرأي النهائي :-
ريلمي C15 يتفوق على ريدمي 9 في :-
- شاشة بسطوع أعلى
- كاميرات أفضل سواء أمامية او خلفية
- شبكة WiFi أقوى
- بطارية أكبر مع شحن سريع 18 واط
بس للأسف محستش بسعة البطارية في الإستهلاك ولا حسيت بالشحن السريع
ريدمي 9 يتفوق على ريلمي C15 في :-
- شاشة بدقة أعلى
- معالج أقوى خاصة في الألعاب
- مايكروفون اضافي لعزل الضوضاء
- مستشعر الـIR Blaster
- صوت عالي ومحترم
- منفذ شحن USB Type C
- موجود معاه جراب في العلبة
- سعر أرخص
Comments