مراجعة Huawei Y9a – موبايل لا يقدم أي جديد بسعر غريب !

فئة الـY من شركة Huawei هي الفئة الإقتصادية المحبوبة عند المصريين .. مشهور عنها إنها بتقدم تركيبة مواصفات كويسة وبتعيش في نفس الوقت بدون ظهور أي مشاكل مُفاجأة .. والنهارده معادنا مع موبايل جديد من فئة الـY وهو Huawei Y9a.

الموبايل معانا بقاله فتره بنجربة والنهارده هننقل لكم تجربتنا ليه .. وفي البداية أنا عارف إن أول سؤال عندك دلوقتي هو بخصوص خدمات جوجل .. فالموبايل ده جاي بمواصفات جديدة على فئة الـY وبالتالي هو من غير خدمات جوجل والإعتماد فقط على خدمات هواوي.


التصميم :-

الموبايل واخد شكل نفس تصميم الـMate 30 Pro .. وده موبايل فلاج شيب عند هواوي .. فـ هواوي شايفه إنها تحط التصميم المُميز بتاعها في موبايل فئة متوسطة إنجاز.

المهم الكاميرا الخلفية موجودة في دايرة بارزة شوية عن جسم الموبايل .. والفلاش لوحده كده على الشمال فوق لإن ملوش مكان في الدائرة .. كنت في الأول مش مُتقبل الشكل ده .. بس على الطبيعة ولما إتعودت عليه تقبلت الفكرة وحبيت شكلة.

نتكلم في الخامات بقى .. الفريم لامع لدرجة إنك هتحسه من الألمونيوم .. بس هو بلاستيك مطلي طلاء محترم .. أما خامة الظهر فالشركة بتقول إنه زجاج .. أنا إحترت معاها وقعدت اخبط عليه علشان اعرف هو بلاستيك ولا زُجاج.

الـMaterial بتاعته أفضل من البلاستيك من خبطته كده بس في نفس الوقت مش حاسس إن ده مش زجاج صريح Premium .. ممكن يكون Mix طبقة بلاستيك وفوقيها طبقة زجاج خفيفه.

الموبايل بيجي بوزن حوالي 196 جرام وتخانه 9 ملم .. الموبايل مش صغير خالص والموبايل عريض نسبيًا.

الموبايل موجود في مصر بثلاثة ألوان، اللون الإسود واللون الفضي واللون الوردي، وشخصيًا عاجبني اللون الوردي بالتدرج اللي في الألوان.

ولو هتكلم عن جزئيه الـSlider بما إنه من التصميم .. فهو نفس Slider الـY9s والـY9 Prime 2019 بالظبط .. فيه بوش خفيف كده .. بس محدش إشتكى من الـSlider ده لحد دلوقتي .. ولكن أنا ملاحظ إن معظم شركات الموبايلات تخلت عن فكرة السلايدر .. فا مش عارف إيه اللي فكر هواوي بالفكره ديه تاني .. جايز الناس حبتها مثلا ؟


الشاشة :-

شاشة بتيجي بحجم 6.63 بوصة من نوع IPS LCD بدقة FHD+ والشاشة كاملة بدون ثقب او نوتش والإعتماد على سلايدر للسيلفي زي الـY9s.

طبعًا الشاشة ولا هي AMOLED ولا هي 90 هيرتز .. الإعتماد فقط على عنصر الشاشة الكاملة في الإبهار في الموبايل ده .. لمُحبي الشاشات الكاملة.

ألوان الشاشة وسطوعها مُمتازين على إن الشاشة IPS LCD .. مش هتحس بـ أي تقصير في أداء الشاشة ديه ولا ألوانها تحت الشمس.

ولكن السؤال هنا .. هل إنت شايف إن نقطة الشاشة الكاملة كفيلة إنها تغنيك عن شاشة AMOLED بتشبع ألوان اعلى أو تغنيك عن شاشة عادية بتردد 90 هيرتز في 2020 ؟

وأخيرًا كالعادة .. الشاشة مفيش إعلان رسمي عن وجود طبقة حماية عليها .. بس الموبايل بيجي في العلبة متركب عليه سكرينه.


الأداء :-

إتفاقية هواوي مع ميدياتك علشان تاخد منها معالجات بسبب الحظر الأمريكي إتنفذت بسرعة .. الموبايل ده جاي بمعالج ميدياتيك Helio G80 بتكنولوجيا 12 نانو والموبايل بيحقق Score قليل على Antutu بالنسبه لسعر الموبايل.

أيوة ده نفس المعالج الموجود في Redmi 9 الأرخص منه .. ولكن خلينا نتكلم شوية عن الأداء الفعلي للمعالج وواجهة التشغيل ممكن تعمل إيه.

مبدئيًا حابب أوضح إن واجهة هواوي المُتطورة اللي بدون خدمات جوجل بقت ثابته كده وسريعة جدًا .. وممكن تتأكد من ده بإنك تسأل أي حد معاه Huawei Nova 7i.

وده له عامل كبير إن أداء الـG80 في الـY9a ممكن أقول عليه ده أفضل أداء شوفته لحد دلوقتي في موبايل من المعالج ده .. والموضوع كان واضح جدًا من الـSpeedTest اللي عملته بالـY9a والـRedmi Note 9 .. ممكن تشوفه من فيديو المراجعة في أخر المقالة.

ولكن ركز في كلامي .. ده مش معناه إن أداء الـY9a هو الأفضل بسعره .. لا خالص على الإطلاق.

أداء الـY9a مرضي في الإستخدام اليومي ومش هيحسسك بأي عجز او تقصير أو تهنيج .. ولكنه مش بيقدم أفضل معالج في فئته السعريه .. وهواوي نفسها عندها Nova 7i بمعالج أحسن كتير بنفس السعر تقريبًا.

ندخل على الأداء الرسومي .. لعبة PUBG بتشتغل على High HD .. واللعبة بتشتغل بكل كفاءة .. لعبة Call Of Duty بتشتغل على اعدادات جرافيك Medium .. واللعبة برده بتشتغل بكل كفاءة.

اللي لاحظته إن الموبايل ده مش بيسخن .. أو يمكن يكون ديه أقل سخونيه واجهتها من الـHelio G80 في الموبايل ده .. لو إنت من الناس اللي بتقلق من سخونة الموبايلات .. فـ متقلقش من الموبايل ده.


عوامل الأمان وعناصر اخرى :-

بصمة جانبية مُدمجه بزر الباور خلاص التريند المعروف .. والبصمة كالعادة صاروخية .. ومفيش هنا Face Unlock علشان يحافظوا على عُمر Slider الكاميرا السيلفي.

الموبايل جاي زي ما قولتلك بواجهة هواوي المبنية على Android 10 ولكن بدون خدمات جوجل .. الإعتماد على خدمات هواوي والـApp Gallery علشان تحمل تطبيقاتك.

ولو إنت ملقتش التطبيق اللي إنت عاوزه على الـApp Gallery فا ممكن تفتح الـPetal Search وتبحث على التطبيق اللي إنت عاوزه وهتقدر تحمله بسهوله من خلاله .. هو يعتبر بديل البحث في جوجل مش أكتر.

بس برده لازم أكد عليك .. لازم تبقى مُتقبل فكرة غياب خدمات جوجل وغياب البرامج المُرتبطة بالحزمة الأمنية لجوجل لإنك مش هتقدر تسطبها على أي موبايل بدون خدمات جوجل بشكل رسمي.

وأنا خلاص مبقتش أتكلم عن الطرق اللي موجودة لتنزيل خدمات جوجل لإنها كلها يومين وبتلاقي الطريقة إتحظرت وخدمات جوجل وقفت على الجهاز .. فلو إنت فعلًا ناوي تشتري موبايل بدون جوجل فا إتأكد فعلًا إنك هتتعامل وهتتعايش بدون جوجل.

مفيش لمبة إشعارات للأسف ومفيش بديل عنها .. أكيد في Dark Mode .. وأكيد تقدر تعمل نسختين من برامج التواصل الاجتماعي.

المستشعرات .. مستشعر الضوء موجود وحقيقي .. التقارب موجود سوفت وير بيعتمد على حركة الموبايل علشان يقفله على ودنك زي الـY9s .. والجيروسكوب موجود وشغال.

صوت الموبايل متوسط .. مش أعلى صوت في الفئة السعريه ديه .. صوت سماعة المكالمات عالي ومُمتاز وفي مايكروفون إضافي لعزل الضوضاء في المُكالمات .. وللأسف مفيش تسجيل مكالمات برده.

وبالنسبة لقوة الشبكات والـWiFi .. فا معروف عن هواوي إن شبكاتها مُمتازه والموبايل ده مواجهتش معاه مشكلة في الشبكة.


البطارية :-

بطارية الموبايل بتيجي بسعة 4200 مللي أمبير .. ممكن تشوفها عاديه .. بس على نفس إستخدامي اللي بحسب بيه كل مره إستحملت معايا 8 ساعات شاشة مفتوحة.

انا بصراحة توقعت تقعد معايا 7 ساعات بس بالكتير .. فهي حلوة والسوفت وير مُوفر في إستهلاك البطارية.

أما بالنسبة للشحن فنفس شاحن الـNova 7i موجود هنا بقوة 40 واط بيشحنلك 70% من البطارية في نص ساعة بس .. هواوي بقت مُميزة أوي في قوة الشحن في الفئة المتوسطة.


الكاميرات :-

الكاميرا الخلفية رُباعية .. الأساسية 64 ميجا بيكسل فتحة عدسة F/1.8 والتانية 8 ميجا بيكسل فتحة عدسة F/2.4 للتصوير الواسعة والتالتة 2 ميجا بيكسل فتحة عدسة F/2.4 للتصوير الماكرو والأخيرة 2 ميجا بيكسل للعزل.

والسيلفي 16 ميجا بيكسل بفتحة عدسة F/2.2 موجود في سلايدر السيلفي.

وبصراحة .. ديه أول مرة أشوف موبايل بالسعر ده مفهوش Night Mode في الكاميرا الخلفية .. وكمان سوفت وير الكاميرات كله مش مظبوط وفقير جدًا ومحتاج تظبيط كتير .. ده مينفعش سوفت وير كاميرا موبايل بالسعر ده وأعتقد لازمله تحديث ضروري بسرعه.

اما بقى لما جربت أصور بالموبايل لاقيت الألوان بهتانه .. الـHDR مش قد كده وحتى مع تشغيل وضع الـHDR الخاص في سوفت الكاميرا برده الصور مش بتبقى قد كدا.

التفاصيل ممكن تكون كويسة .. ولكن معالجة الألوان الفقيرة خلت الصور مش حلوة إطلاقًا .. حتى لون السماء معجبنيش في العدسة الـUltra Wide ولكن كم التفاصيل مازال مقبول.

العدسة الماكرو كويسة كتفاصيل وكالوان حقيقية .. ده لو إنت هتستخدم الـMacro اصلًا .. في الإضاءات الداخلية العالية لسه التفاصيل كويسة بس هتلاقي الصور لاسعة من مناطق الإضاءة.

ولما الإضاءة بتقل شوية .. الصور بتبقى غير مقبولة على الإطلاق على موبايل بالسعر ده .. Noise كتير .. ولا حتى في Night Mode يحسن الدنيا شوية.

أما بالنسبة للسيلفي .. فهو نفس سيلفي الـY9s واللي رأيي عنه متغيرش اصلًا .. بيطلعلك صور كويسة لو إنت بتتصور في إضاءة شمس مناسبة.

ولكن في الإضاءات الداخلية التفاصيل بتقل كتير والصور بتبقى سايحة كده ولون البشرة بيبقى مش مظبوط .. وبالمناسبة أنا ملاقيتش بورترية في الكاميرا السيلفي .. شالوه ليه مش عارف.

وطبعا لما الإضاءة بتقل كتير .. التفاصيل بتقل أكتر وأكتر والصور بتبقى مش حلوة خالص.

بالنسبة بقى لتصوير الفيديوهات فالموبايل بيستخدم معالج الـG80 ومعنى كده إن الموبايل أخرة في تصوير الفيديوهات جودة 1080p بس لإن المعالج ده مش بيدعم تصوير فيديوهات بجودة أعلى من كده .. الموبايل فيه مُثبت إلكتروني وكمان فيه مايكروفون اضافي لعزل الضوضاء.

وأكيد عيب كبير في الفئة دي ان مفيش تصوير فيديوهات 4K لإن تقريبًا كل الموبايلات المنافسة بتدعم الـ4K .. وبرده موبايل الـNova 7i من هواوي في نفس الفئة دي مش بيدعم تصوير الـ4K .. ليه ؟ علشان المعالج نفسه مش بيدعم !

شوف تجربة التصوير بالموبايل في فيديو المراجعة !


سعر الموبايل :-

سعر الموبايل الرسمي للنسخة الـ128 جيجا مع 8 جيجا رام هو 4699 جنية مصري.

وبينفع تركب شريحتين إتصال من الجيل الرابع او شريحة واحدة مع كارت ميموري Nano واللي هو مش موجود في مصر .. فا إعتبر إن الموبايل مش بيدعم كارت ميموري.


الرأي النهائي :-

مميزات Huawei Y9a :-

  • تصميم شيك مُختلف
  • تقفيل محترم وخامات خارجية مضمونة
  • شاشة كبيرة بدون نوتش او ثُقب وسطوعها مُحترم
  • بطارية كويسة وشحن سريع جدًا

عيوب Huawei Y9a :-

  • الكاميرات مش أفضل حاجه سواء أمامية او خلفية
  • صوت مش عالي
  • شاشة عادية جدًا مفيهاش أي ميزة
  • معالج ضعيف في الفئة السعرية دي

في النهاية أنا شايف إن هواوي كانت محتاجه تميز الموبايل ده شوية علشان موضوع غياب خدمات جوجل .. بحاجات زيادة أكتر سواء معالج أقوى او شاشة بتردد أعلى او صوت Stereo مثلًا .. علشان تخليه منافس أكتر خصوصًا بعد التسعير بتاعه اللي أكيد حطه في منافسه مباشره مع موبايلات تانيه بمواصفات أقوى.


فيديو المراجعة :-

قد يعجبك أيضا...

Comments

جاري التحميل...