مراجعة موبايل Alcatel 3x 2019 – أرخص موبايل 128 جيجا مع 6 جيجا رام !

شركة الكاتيل ليها ذكريات كتير معانا .. مين فينا مشلش موبايل الكاتيل زمان ؟ .. الكيان ده بيحاول يرجع عن طريق الفئة الاقتصادية .. ونزلوا دلوقتي موبايل جديد وهو Alcatel 3x 2019 .. كأرخص موبايل 128 جيجا و6 جيجا رام .. بس هل المساحة والرام كل حاجة ؟ طيب والخامات والمعالج والكاميرات ؟ هيقدروا ينافسوا مع الموبايلات الي في نفس الفئة السعرية ؟ .. كل ده هتعرفه في مقالة مراجعة موبايل الكاتيل الجديد مع موبيزل .


التصميم :-

شركة الكاتيل بتأكد ان تصميم الظهر من الزجاج .. بعد التجربة الفعلية من فريق موبيزل للموبايل .. الموبايل تصميمه فيه نسبة بسيطة من الزجاج مخلوطة بنسبة أكبر من البولي كربونيت وده باين جدا اما تخبط ع ظهر الموبايل وتشوف المتانة بتاعته و وزنه في ايديك .. يعني التصميم فكرني جدا بموبايل Xiaomi Redmi 8 .

اقرأ على موبيزل .. مراجعة موبايل Xiaomi Redmi 8 .

الفريم من البلاستيك وعليه طبقة طلاء عليها تجزيعه كدا .. وطلاء الظهر بلون ثابت مش بيتغير مع الانعكاسات عليه .. وده يوحيلك بكلاسيكية التصميم شوية وان الكاتيل عاوزه تشد ليها فئة معينة من المستهلكين الي ممكن يكونوا مش حابين فكرة الالوان المطرقعة الي بنشوفها في الفئة السعرية ديه .

عموما الموبايل وزنه مقبول 178 جرام وتخانته متوسطه حوالي 8.4 ملم .. حجمه في الايد متوسط مش كبير اوي ومش صغير اوي .. يعني ماسك العصاية من النص .

بروز الكاميرا صغير مش كبير والموبايل كمان جاي معاه جراب شفاف في العلبة بيغطي البروز ده .

واخيرا الموبايل فيه زرار على الشمال ده بتقدر تشغل بيه المساعد الصوتي بتاع جوجل .. الي انا عمري حتى ما اديتله الفرصه اني اجربه معرفش المشكلة فيا ولا ايه ؟ .. الزرار ده تقدر توقفه او تشغله من الاعدادات ومينفعش تغير وظيفته .. يعني هو بتاع جوجل بس .


الشاشة :-

شاشة الموبايل 6.52 بوصة من نوع IPS بدقة FHD+ .. الوان الشاشة مقبولة مش أحسن حاجة ولا أوحش حاجة .

السطوع بتاع الشاشة مقبول ولكنه مش اعلى حاجة في الفئة السعرية ديه .. ولكنه مش هيقصر معاك في الاستخدام تحت أشعة الشمس .

الشاشة فيها نوتش صغير محطوط فيه السيلفي ممكن تلغي النوتش من اعدادات الموبايل .

وبالنسبة للحواف حوالين الشاشة فهي بصراحة كبيرة حبتين تلاته يعني كان ممكن استغلال واجهة الموبايل يبقا احسن من كدا شوية .

واخيرا الشاشة مفيش اعلان رسمي عن وجود طبقة حماية عليها والموبايل بيجي معاه سكرينة بلاستيك في العلبة بتاعته .


الاداء :-

الموبايل بيجي بمعالج ميدياتيك P23 معالج ثماني النواة تكنولوجيا 16 نانو .. المعالج ده ادائه مش وحش خالص .. واحسن بكتير من P22 الموجود في اكتر من موبايل منافس .

اداء موبايل Alcatel 3x 2019 في الاستخدام العادي من برامج و سوشيال ومكالمات كويس جدا .. مفيش اي تهنيجات حصلت والواجهة خفيفة ومشاكلها قليلة وكمان معاك 6 جيجا رام بتديلك سماحية كبيرة لفتح تطبيقات كتير في الخلفية وبيبقا عندك سلاسة في التنقل ما بينهم .

نيجي عن تطبيق الكاميرا ونقف شوية .. التطبيق ساعات بيهنج ولازم بعد ما تصور تصبر ثانيتين تلاته كدا علشان الصورة تطلع كويسة .. فاتمنى تحديث يحسن شوية من اداء تطبيق الكاميرا .

بالنسبة للاداء الرسومي ..فالموبايل فيه معالج رسومي كويس وهو Mali G71 MP2 .. والمعالج ده بيقدر يشغل لعبة ببجي على High HD .. بس منصحكش تشغلها ع الجودة ديه نزلها لميديام جرافيك وهتشتغل معاك كويس جدا .

وبيشغل لعبة كول اوف ديوتي على ميديام جرافيك بردة بدون اي مشاكل او تهنيج .. احيانا بس ممكن تحس بس ان اللودنج او التحميل بتاع اللعبة وهيا بتبدأ بتاخد وقت اكتر من الطبيعي ولكن جوا الجيم وانت بتلعب مفيش اي مشاكل .

يعني من الاخر الكاتيل 3 اكس 2019 بيديلك اداء رسومي في الالعاب مقبول جدا ممكن اقول عليه انه يجي بعد Xiaomi Note 8 و Realme 5 .. وقريب من الواي 7 2019 و Samsung A20s .. وافضل من Infinix S5 بكل تأكيد .


عوامل الأمان و عناصر أخرى :-

موبايل Alcatel 3x 2019 فيه بصمة خلفية كويسة جدا .. مش صاروخية يعني بس كوسية وممكن تعمل اختصارات بمستشعر البصمة كتير وحلوة جدا زي انك تحدد صباع معين اول ما تلمس البصمة بيه الموبايل مثلا يبدأ في تسجيل الصوت وخلافه .

وبردة فيه فيس ان لوك بس مش سريع بياخد ثانية كدا ع ما يتعرف ع وشك ويفتح .

الموبايل مفيهوش لمبة اشعارات .. بس ايقونات الاشعارات بتظهر فوق جمب النوتش .

الموبايل بيدعم عمل نسختين من برامج التواصل الاجتماعي .. والسوفت وير خالي من الاعلانات على عكس سوفت وير انفينكس المليء بالاعلانات .

الموبايل فيه كل المستشعرات موجودة وحقيقية وشغالة زي الفل زي مستشعر الضوء والتقارب والجيروسكوب والموبايل بيدعم تشغيل الراديو .


الصوت والشبكة :-

صوت الموبايل جاي من سماعة واحدة تحت ع اليمين .. التانية ديه بتشتغل كمايك .

وصوت الموبايل بصراحة مش عالي .. يعني هو مقبول بس مقدرش اصنفه انه عالي .

صوت سماعات المكالمات عالي وممتاز وصوت سماعات الاذن بردة كويس جدا .

وأخيرا بالنسبة لشبكة الموبايل .. اتفاجئت اما جربت الموبايل ان شبكته ممتازة بصراحة مبتقطعش وكويسة جدا ومفيهاش اي مشاكل .


البطارية :-


البطارية المعهودة في الفئة الاقتصادية .. 4000 مللي أمبير استحملت معايا حوالي 6 ساعات شاشة مفتوحة .. وقت مقبول جدا ولكنه يعني مش الأفضل في موبايلات تانية دلوقتي ببطارية 5000 وبتقعد وقت اطول .

منفذ الشحن هنا Type C .. الحمد لله انه مش Micro USB بس الموبايل معاه شاحن 10 واط .. الموبايل بيشحن لحد 90% في ساعتين الا ربع تقريبا .. وكالعادة اخر 10 في الميه بيطولوا شوية علشان يحافظوا على عمر البطارية وبياخدوا حوالي ساعة الا ربع ويبقا كدا وقت الشحن الاجمال حوالي ساعتين ونص .


الكاميرات :-

الكاميرا الخلفية ثلاثية الاساسية 16 ميجا بيكسل فتحة عدسة 1.8 والتانية 8 ميجا بيكسل للتصوير الواسع بفتحة عدسة 2.2 والاخيرة 5 ميجا بيكسل للعزل والسيلفي 8 ميجا بيكسل فتحة عدسة 2.0 .

زي ما قلتلك في نقطة الاداء .. تطبيق الكاميرا لازم بعد ما تصور تثبت ايديك شوية كدا علشان تاخد صورة كويسة مش مهزوزة .

الكاميرا الخلفية تقدر تطلع بيها صور مقبولة بتفاصيل وألوان واقعية في الاضاءات العالية .. بس لما الاضاءة بتقل صعب تقدر تطلع صور كويسة بالموبايل ده .

بالنسبة لأداء الكاميرا السيلفي فهو مش احسن حاجة في الموبايل ده .. الكاميرا بتطلع صور بهتانة بشكل كبير و الكاميرا بتغلط في العزل و تحديد الوجه والاداء بيزداد سوءا في الاضاءات الضعيفة .

بالنسبة لتصوير الفيديوهات الموبايل بيصور فيديوهات لحد 1080p بجودة 30 اطار في الثانية بدون تثبيت الكتروني حقيقي .

لو عاوز تشوف الصور والفيديوهات المتصورة بالموبايل هتلاقيها في فيديو المراجعة الموجود في أخر المقالة .


سعر الموبايل :-


الموبايل فيه منه نسختين .. النسخة الكبيرة 128 جيجا مع 6 جيجا رام بسعر 2850 جنية والنسخة الصغيرة 64 جيجا مع 4 جيجا رام بسعر 2200 جنية وينفع تركب شريحتين او شريحة وكارت مينفعش تركب التلاته مع بعض .

علبة الموبايل بيجي فيها شاحن 10 واط و وصلة شحن Type C و سكرينة بلاستيك للشاشة و جراب شفاف وسماعات أذن .


رأيي النهائي في Alcatel 3x 2019 :-

الموبايل ده ماسك العصاية من النص .. يعني هو مش هيقدر يسد بشكل قوي مع Xiaomi Note 8 او ريلمي 5 لو اتحط في مقارنة كاملة معاهم خصوصا في نقطة الاداء والكاميرات بليل .

بس حقيقي الكاتيل يقدر يسد في الاداء والكاميرات والمساحة والرام والبطارية ويتفوق في الشبكة كمان لو اتحط في مقارنة مع Infinix S5 و Samsung A20s .. وديه الموبايلات الموجودة بالفعل في المحلات وفي منها كميات وبتتباع بقوة .

اتمنى من الكاتيل انها تلعب اكتر على نقطة المواصفات الأفضل وتكمل في طريقها بتقديم موبايلات بخامات كويسة وشبكة محترمة وضمان كويس علشان السمعة الطيبة هي الي بتخلي الموبايلات تتباع كويس في المحلات .

مميزات

  • تصميم بخامات محترمة من الكاتيل .
  • أرخص 128 جيجا و 6 جيجا رام حاليا .
  • شبكة الهاتف قوية .
  • اداء السوفت وير مع الهارد وير مناسب جدا لاستخدام برامج التواصل الاجتماعي والالعاب الخفيفة .
  • منفذ شحن Type C .

عيوب

  • الهاتف لا يقدم أفضل معالج في فئته السعريه .. لو انت جيمر او بتدور ع موبايل للألعاب التقيله فالموبايل مش هيكون مناسب ليك .
  • اداء الكاميرات خصوصا السيلفي مش مقبول في الاضاءات الضعيفة .
  • سطوع الشاشة ليس الأفضل وسط المنافسين .
  • لا يدعم تركيب كارت ميموري وشريحتين اتصال معا .
  • لا يدعم لمبة اشعارات .

فيديو المراجعة على اليوتيوب :-

قد يعجبك أيضا...

Comments

جاري التحميل...