مراجعة موبايل Xiaomi Redmi 8 – أفضل موبايل بسعر 2000 جنية !

فئة سعر 2000 جنية كان صعب تلاقي فيها موبايل كويس صح ؟

شركة شاومي زي ما غيرت مفاهيم الفئة المتوسطة كمان غيرت الفئة الاقتصادية بعد نزول موبايلها الجديد Xiaomi Redmi 8 بخلطة مواصفات قوية بسعر 2000 جنية .

خلينا نشوف في المقالة ديه .. هل فعلا شاومي ريدمي 8 موبايل مناسب لاستخدامك ولا لا ؟ وايه موقفه بالنسبة للمنافسين ؟

التصميم :-

كان صعب تلاقي خامات كويسة في الفئة الاقتصادية صح ؟ موبايل Xiaomi Redmi 8 جاي بتصميم الشركة بتقول عليه انه من الزجاج .. بعد تجربتي ليه احساسي انه زجاج مخلوط عليه نسبة بولي كربونيت .. يعني هو لا يرقى انه يبقا زي الزجاج بتاع موبايلات الفئة المتوسطة .. بس ما زال تصميم محترم وخامة نظيفة جدا يمكن ده احسن خامة خارجية في الفئة الاقتصادية لحد دلوقتي .

وكمان التصميم شكله شيك بالفريم الاسود الي ف نص الظهر وجواه الكاميرا الخلفية المزدوجة وتحتهم مستشعر البصمة .. بس مش عاجبني الحسنة او الفلاش الي موجود لوحده فوق الفريم ده .. والمميز في التصميم هنا .. الكاميرا الخلفية مش بارزة خالص عن ظهر الموبايل حاجة كويسة جدا .

الموبايل جاي معاه جراب شفاف في العلبة ركبه علشان تحافظ على الموبايل .

ريدمي 8 وزنه تقيل نسبيا هو حوالي 188 جرام و تخانته كبيره شوية اكبر من 9 ملم .. فيه كرف خفيف كدا ع الظهر علشان يحسن شوية من مسكة الموبايل ف ايديك والي معنديش معاها مشاكل في الفئة السعرية ديه .

الشاشة :-

شاشة موبايل ريدمي 8 عادية جدا بحجم 6.2 بوصة بدقة HD+ من نوع IPS .

شاشة تقليدية في الفئة السعرية ديه .. يعني مفيهاش ميزة عن المنافسين .. عموما الشاشة ادائها كويس واستجابة اللمس او التاتش عليها كويس جدا .

الوان الشاشة مقبولة والسطوع تحت الشمس مقبول هو مش عالي اوي بس لما قارنته مع المنافس المباشر ليه Samsung A10s و لاقيته قريب منه اوي يعني الفرق مش كبير .

الحواف حوالين شاشة Redmi 8 بردة مقبولة وزي المنافسين في الفئة السعرية ديه .

الشاشة عليها حماية جوريلا الجيل الخامس والموبايل معلهوش سكرينة . انصحك تركبله سكرينه اول ما تشتريه .

الأداء :-

معالج الموبايل سناب دراجون 439 وده اقل معالج مقبول من سناب دراجون وبيتحط في الموبايلات الاقتصادية .. شوفنا المعالج ده قبل كدا في Redmi 7A .. فيعني مفيش نقلة نوعيه شاومي عملتها في استخدام المعالج ده في الموبايل ده .

بس حابب افهمك ان ريدمي 7 كان بمعالج اعلى لانه كان في فئة سعرية اعلى من الي ريدمي 8 اتحط فيها .

وان كان المعالج ده في وجه نظري قريب جدا من اداء ميدياتيك P22 الموجود بردة في نفس الفئة السعرية وده معالج موبايل Samsung A10s .

عموما اداء ريدمي 8 كويس جدا بسبب واجهة شاومي الي مش هقدر اقول انها خفيفة لانها مبقتش خفيفة اوي بس الاداء هنا كويس و مكنش فيه اي مشاكل معايا ومقبول جدا ع انه في الفئة الاقتصادية والاستخدام مضايقنيش في التصفح وبرامج السوشيال .. خصوصا ان اصغر نسخة من ريدمي 8 ب 3 جيجا رام يعني سماحية اكتر لفتح برامج اكتر والتنقل بينهم .. ما بالك بالنسخة الـ 4 جيجا رام بقا !

بالنسبة للاداء الرسومي .. فالموبايل ده مش موجه للألعاب التقيله .. لو عاوز تلعب زود 500 جنية وهات Xiaomi Note 8  .. عموما ريدمي 8 شغل معايا ببجي على اعدادات جرافيك متوسطة واللعبة اشتغلت بشكل مقبول بس مش سلسلة بالدرجة الكافية .. وكول اوف ديوتي اشتغلت على اعدادات جرافيك هاي بس هتحتاج توطي بردة الجرافيك علشان تقدر تلعب بشكل سلس ع الموبايل .

عوامل الأمان :-

شاومي حطتلك بصمة في الظهر هنا ادائها كويس .. هي مش سريعة اوي زي ما متعودين من شاومي بس ادائها كويس في الفئة السعرية ديه .

والموبايل بيدعم فيس ان لوك سرعته بردة كويسة مش وحشة خالص .

السوفت وير و عوامل الأمان :-

السوفت وير هنا بيدعم الدارك مود والي شغال بشكل حلو ع الموبايل .. بس طبعا الدارك مود مش ف كله حاجة يعني هتلاقي الفيس بوك ابيض وانت مشغل الدارك مود عادي .

الموبايل بيدعم عمل نسختين من كل البرامج مش برامج سوشيال بس .

ملقتش لمبة اشعارات في الموبايل ده مش عارفه ليه شاومي شالتها .. ايقونات الاشعارات بتظهر ثانية جمب النوتش وبتختفي بعدها وكل فين وفين اما تظهر تاني .. الحركة البايخة المتكررة في سوفت شاومي .

مستشعرات الموبايل كلها موجودة وشغالة ضوء تقارب بوصة جيروسكوب كل حاجة شغالة زي الفل وبيشغل الراديو .

ريدمي 8 زي اخواته الكبار من شاومي فيه المستشعر المفضل ليكم وليا وهو الاي ار والي بيخليك تتحكم في الاجهزة الكهربائية زي التليفزونات مثلا .

الصوت و الشبكة :-

ريدمي 8 جاي بسماعة واحدة تحت ع اليمين وصوتها عظيم وحلو جدا في الفئة السعرية ديه عالي ومجسم .

صوت سماعات المكالمات عالي وممتاز وصوت سماعات الاذن مقبول مش اعلى حاجة .

وأخيرا شبكة الموبايل .. كويسة في الفئة السعرية ديه زي اداء Samsung A10s تقريبا .. جربت الاتنين مع بعض لفترة .. لاقيت نفس الاداء والي هو اداء كويس بس مش ممتاز يعني .

البطارية :-

بطارية ضخمة 5000 مللي أمبير .. هتقولي عادي شفتها في موبايلات تانية زي انفنكس هوت 8 مثلا .. هقلك البطارية هنا مميزة في انها بتدعم الشحن السريع وكمان مدخل الشحن تايب سي .. وديه حاجة اول مرة نشوفها في السعر ده .. جربت اشحن الموبايل بشاحن 18 واط البطارية شحنت لحد 90 % في ساعتين بالظبط .. وده وقت كويس جدا .

بس للأسف الموبايل جاي معاه شاحن 10 واط وانا كنت فاكر ده عيب بس لما جربت الشاحن 10 واط لاقيت اداء زي 18 واط بالظبط شحن  لحد 90% في ساعتين بردة .. وأخر 10% بيشحنوا في حوالي ساعة .. معنديش اي تعليق على ان زمن الشحن واحد في 10 واط و 18 واط !

اداء البطارية كويس .. استحملت معاها لحد 9 ساعات شاشة مفتوحة وفي وقت استخدامي علاطول معلي اضاءة الشاشة ع الاخر وانا شايف ده وقت كويس جدا .

الكاميرات :-

الكاميرا الخلفية مزدوجة الاساسية 12 ميجا بيكسل فتحة عدسة 1.8 بمستشعر سوني IMX 383 والتانية 2 ميجا بيكسل للعزل .
والسيلفي 8 ميجا بيكسل فتحة عدسة 2.0 .

الموبايل بيدعم تشغيل جوجل كاميرا .. ممكن تحمل النسخة المناسبة لريدمي 8 .. من هنا .

تجربة تصوير فيديوهات ع الموبايل مكنش فيها جديد .. زي كل موبايلات الفئة الاقتصادية بيدعم تصوير لحد 1080p .. بجودة 30 فريم في الثانية ومفيش تثبيت الكتروني .

بالنسبة لتجربة الصور .. الكاميرا الخلفية محتاجة تحديث يظبط الالوان شوية بس التفاصيل مقبولة طول ما الاضاءة كويسة وممكن تحسن من تجربة التصوير من خلال جوجل كاميرا والي بيطلع صور ممتازة على الفئة السعرية ديه .

بالنسبة للسيلفي ادائها مرضي جدا بالنسبة لسعر الموبايل .

ممكن تشوف الصور والفيديوهات المتصورة بالموبايل من خلال فيديو المراجعة في أخر المقالة .

الأسعار :-

ريدمي 8 موجود نستخين .. النسخة الصغيرة 32 جيجا مع 3 جيجا رام بـ 2000 جنية والنسخة 64 جيجا مع 4 جيجا رام بـ 2300 جنية وينفع تركب كارت ميموري وشريحتين اتصال مع بعض .

علبة الموبايل فيها الموبايل والجراب الشفاف وشاحن 10 واط و وصلة USB والعلبة مفيهاش سماعات ولا اسكرينة زي ما متعودين من شاومي .

التقييم النهائي :-

موبايل Redmi 8 عمل نقله نوعيه في 3 حاجات في الفئة الاقتصادية .. التصميم الخارجي المحترم جدا و البطارية الضخمة الـ 5000 ومنفذ التايب سي ودعم الشحن السريع وأخيرا المساحات والرام الي اسعارها منافسة جدا .

الموبايل بردة مش بيقدم تنازلات ضخمة لانه جاي بمعالج سناب دراجون ادائه مش بطال في الاستخدام الخفيف وكمان كاميرات كويسة هي بس محتاجة تحديث يظبطها وممكن تحسن تجربتها باستخدامك لبرنامج جوجل كاميرا والي بيتسطب بسهولة عليه .

تشتري الموبايل ده لو بتدور ع موبايل هدية او موبايل ثانوي او لاستخدام خفيف .. لو انت راجل جيمر او بتدور ع كاميرا خلفية احسن شوية انصحك تدور ع شاومي نوت 8 نسخة 32 او ريلمي 5 نسخة 64 بس هتتعب شوية ع ما تلاقي النسخ ديه لان اسعارهم منافسة جدا 2500 جنية بس هيدوك اداء وتجربة تصوير افضل بكتير عن الريدمي 8 .

حاجة اخيرة علشان منساش .. في موبايل تاني باسم Redmi 8A ده اخو الريدمي 8 في كل حاجة .. الفرق بس ان Redmi 8A بخامة اقل شوية ومن غير بصمة ولا الكاميرا الخلفية التانية بتاعت العزل وبمساحة 32 جيجا و 2 رام بسعر 1700 جنية .

مميزات

• خامات محترمة خارجية من الزجاج .
• منفذ شحن Type C .
• بطارية عملاقة تعمل لفترة .
• معالج سناب دراجون ادائه ثابت ومستقر لفترة أطول من ميدياتيك .
• يدعم مستشعر IR .
• يدعم بصمة خلفية سريعة وFace Unlock جيد .
• يدعم تشغيل شريحتين اتصال وكارت ميموري .

عيوب

• الكاميرات جيدة ولكنها تحتاج الي تحديث سوفت وير .
• لا يدعم لمبة اشعارات .

اقرأ على موبيزل .. مقارنة بين شاومي نوت 8 وريلمي 5 .

فيديو مراجعة الموبايل على اليوتيوب :-