نزلنا ليكم مقال وفيديو مقارنة بين Vivo V21 و Mi 11 Lite و Galaxy A52 ودي كانت أفضل موبايلات من فئة 5 الاف لـ 6 الاف جنية في مصر .. ودي تعتبر ترشيحاتنا في الفئة السعرية دي، النهارده بقى هنرشحلكم أفضل الموبايلات بسعر من 3 الى 5 الاف جنية مصري هنا في السوق المصري للنص الأول من 2021 !
من 3000 جنية لـ3500 جنية :-
Redmi Note 10
ده أكتر موبايل متصدر المشهد حاليًا في الفئة السعرية دي .. نوت 10 4G العادي مش نوت 10 5G .. بيقدم تصميم شيك مع خامات عادية زي الباقي، لكن الموبايل خفيف، وزنه 179 جرام .. شاشة AMOLED ممتازة 6.4 بوصة FHD+ بسطوع ممتاز وألوان مقبولة ومعدل تحديث 60 هيرتز طبعًا
معالج محترم .. كوالكوم سناب دراجون 678 هيقدملك أداء معقول على الفئة السعرية اللي الموبايل فيها .. بيشغل ألعاب بشكل منطقي ولكن مع سخونة بسيطة في جسم الموبايل، لكن مقبولة برده .. البطارية 5000 مللي امبير والشحن سريع 33 وات وصوت Stereo ومستشعر IR Blaster .. متكامل جدًا بصراحة.
أهم ميزة تُحسب للموبايل ده هو انه أقوى موبايل من ناحية الشبكة من شاومي نزل في 2021 .. دي حاجه كويسة جدًا .. لكن اللي ممكن يدايقك منه هو الكاميرا السيلفي لإن أداءها مش ممتاز .. يمكن بيكون حلو مع جوجل كاميرا، وتصوير الفيديوهات بالموبايل ده مش أفضل حاجه .. مستشعر التقارب اداءه مش أقوى حاجه برده.
برشحلك النسخة الـ128 جيجا مع 4 جيجا رام بسعر 3300 جنية تقريبًا .. بلاش النسخة العالية منه لإنها هتدخل مع النسخ الأولى من نوت 10 اس واللي هنرشحه كمان شوية .. وممكن تلاقي Redmi Note 9 Pro لكن بلاش منه، نوت 10 شاشته أحسن وشبكة أقوى ومفيش مشاكل فيه ولا في تراب في الكاميرات.
بدائل :-
لو عايز بدائل لـ Redmi Note 10 فأنا هكون صريح معاك، موبايلات اوبو وموبايلات فيفو في الفئة دي المعالجات بتكون ضعيفة جدًا، والكاميرات أداءها متواضع جدًا، والشاشات أقل من العادي، مفيش ميزة حقيقية.
البديل المنطقي ممكن يكون Galaxy M21 .. لكن للأسف هو متوفر بكميات قليلة جدًا وصعب تلاقيه، أخر سعر شوفناه ليه كان 3000 جنية للنسخة الـ64 جيجا مع 4 جيجا رام .. لو لاقيته وعايز بديل لـ ريدمي نوت 10 فا هاته لإنه موبايل لقطه فعلًا ومش هيتكرر من سامسونج.
من 3500 جنية لـ4000 جنية :-
1- Redmi Note 10S
يعتبر هو هو Redmi Note 10 لكن مع معالج أحسن شوية Helio G95 من ميدياتك .. معالج قوي بيقدملك أداء ممتاز وبالتحديد في الألعاب لكن سخونيته أكتر شوية، وفيه شوية مميزات في الواجهة زي Second Space والـAnti-Flicker في الشاشة .. ومن عيوبه الكاميرا السيلفي وتصوير الفيديوهات والشاشة 60 هيرتز.
برشحلك النسخة الـ128 جيجا مع 6 جيجا رام من Redmi Note 10S، سعرها حوالي 3900 جنية في المحلات .. وبلاش النسخة الأعلى الـ128 مع 8 رام وبلاش النسخة الأقل، لإن سواء أعلى او اقل في إختيارات تانية.
2- Realme 7
ريلمي 7 حاليًا معقول جدًا على سعره بعد ما نزل .. بيجي بنفس معالج نوت 10 اس اللي هو ميدياتك Helio G95 اللي بيقدملك أداء ممتاز في الألعاب في الفئة دي، لكن للأسف الشاشة مش AMOLED ودي نقطة ضعف واضحة فيه .. لكن هي كشاشة IPS LCD فا هي محترمة بجودة FHD+ وبمعدل تحديث 90 هيرتز.
صوت Realme 7 مش Stereo .. شبكات الإتصال والـWi Fi فيه كويسين ومضمونين جدًا .. بطارية 4500 مللي امبير وشاحن 65 وات هو أسرع شاحن حاليًا في الفئة دي .. وبيقدم أداء معقول نسبيًا من الكاميرات سواء الأمامية او الخلفية.
الموبايل سعره حاليًا في المحلات للنسخة الـ128 جيجا مع 8 جيجا رام حوالي 4000 جنية وممكن تلاقيه بسعر أقل حاجه بسيطة لو دورت .. وهو بينزل بنسخة واحدة بس.
3- Galaxy A32
الموبايل ده للي عايزين سامسونج ومش عايز يشتري من شركة موبايلات تانية .. وده لإنه مش الأفضل خالص في الفئة دي، بيجي بمعالج ميدياتك Helio G80 وده معالج أضعف من المنافسين مع واجهة سامسونج اللي تعتبر تقيلة شوية .. ولكن في ناس بتحب واجهة سامسونج فا عادي، وفيه NFC ودي ميزة.
الشاشة هنا Super AMOLED بحجم 6.4 بوصة بدقة FHD+ بتردد 90 هيرتز .. ودي ميزة مش هتلاقيها غير عند سامسونج بالسعر ده لحد دلوقتي .. والبصمة موجودة تحت الشاشة بس مش أسرع حاجه .. بالنسبة للكاميرات فا هي معقولة لكن مش هتاخد منها أحسن أداء .. وللأسف مفيش تصوير فيديوهات 4K.
بطارية كبيرة 5000 مللي امبير ولكن سرعة شحن بطيئة 15 واط بس للأسف وكالعادة من سامسونج .. وموبايل Galaxy A32 سعره حوالي 3800 جنية للنسخة الـ128 جيجا مع 6 جيجا رام وهو بيجي بنسخة واحدة برده.
من 4000 جنية لـ5000 جنية :-
1- Poco X3 Pro
موبايل بمعالج رائد قوي .. سناب دراجون 860 بتكنولوجيا 7 نانو، أقوى من أي معالج تاني موجود في الفئة السعرية دي .. هيقدملك أداء قوي جدًا، حتى لما المعالج بيسخن بعد فترة من الضغط عليه مازال بيقدملك أداء أقوى .. وهيقدملك تجربة في الألعاب مثالية، مع ذاكرة UFS 3.1 سريعة وصوت Stereo وشاشة 120 هيرتز!
ولكن الشاشة هنا IPS LCD مش AMOLED .. يعني ألوان أقل وسطوع أقل .. لازم تضحي علشان تاخد معالج قوي بسعر رخيص، علشان كده بنقول الموبايل ده لمُحبي الألعاب .. لكن لو انت مستخدم عادي ومش Gamer فا الموبايل ده مش موجه ليك بشكل أساسي.
الكاميرات هنا متواضعه، مش هقدر أقول سيئة ومش هقول ممتازة، حاجه في النص، والسيلفي برده مش الأفضل .. جوجل كاميرا بتحسن الموضوع شوية بس برده مش أفضل كاميرا خالص في الفئة دي .. والبطارية 5000 مللي امبير بتشحن بقوة 33 وات وفي مستشعر IR Blaster والصوت Stereo وفي دعم للـNFC.
التصميم للأسف مش الأفضل والموبايل كبير ومش رفيع، بروز الكاميرات كبير ودي حاجه من الحاجات اللي لازم توافق عليها علشان تاخد المعالج القوي اللي هنا .. مستشعر التقارب شغال كويس، لكن الشبكة أقل من Redmi Note 10 العادي يعني نقدر نقول متوسطة.
الموبايل متوفر بنسختين، نسخة 128 جيجا مع 6 جيجا رام سعرها حوالي 4300 جنية مصري .. اما النسخة الـ256 جيجا مع 8 جيجا رام سعرها حوالي 4800 جنية مصري .. وأخيرًا بفكرك ان الموبايل ده للـGamers، لو انت مش جيمر وعايز شاومي كمل المقال وشوف ترشيحي لـRedmi Note 10 Pro.
2- Realme 7 Pro
موبايل متوسط للناس المتوسطة اللي عاوزين موبايل مقبول في كل حاجة بس مش قادرين يزودوا المبلغ ويشتروا موبايل فئة متوسطة جديد في رينج سعر 5 الاف .. والميزانية قافله على 5 الاف او اقل .. موبايل Realme 7 Pro بمعالج سناب دراجون 720G .. مع واجهة ريلمي الخفيفة مش هتلاقي مشكلة في الاداء لو استخدامك متوسط.
مع شاشة AMOLED محترمة ولكن 60 هرتز فقط مش 90 هيرتز ولا 120 هيرتز .. صوت ستريو معقول .. بطارية 4500 مللي وشحن سريع جدا 65 واط .. كاميرات سواء امامية او خلفية هتديلك اداء كويس جدا في الفئة السعرية اللي الموبايل ده موجود فيها .. وفوقيهم بصمة سريعة وشبكات قوية جدا.
موبايل ريلمي 7 برو سعره دلوقتي في المحلات بعد الحرق حوالي 4800 جنية للنسخة 128 جيجا مع 8 جيجا رام وبيتوفر في السوق بنسخة واحدة بس، وتقدر توصل لسعر أقل من ده.
وفي بدائل لـ ريلمي 7 برو بالتحديد بنفس السعر وهما Oppo Reno 4 و Vivo V20 .. بس الموبايلات دي ناقصة في السوق، علشان كده رشحتلك ريلمي 7 برو لإن هو ده اللي موجود منه كميات بس دور على أقل سعر ليه.
3- Redmi Note 10 Pro
الموبايل الوحيد اللي شاشته AMOLED بدقة FHD+ بتردد 120 هيرتز في الفئة دي .. اه هو الـ120 هيرتز مش هيشتغلوا معاك بإستمرار لان المعالج ميستحملش بس ماشي .. معالج متوسط سناب دراجون 732G مش بطال .. هيقدملك اداء متوسط لو انت استخدامك متوسط .. وانت كده كده لو Gamer هتروح لـPoco X3 Pro.
كاميرات كويسة أكيد احسن من بوكو X3 برو بس الكاميرا الخلفية الـ108 ميجا بيكسل اداءها بيقل شوية في الاضاءات الضعيفة .. بطارية كبيرة 5000 مللي امبير وشحن سريع 33 واط وصوت Stereo ومستشعر IR Blaster وكل حاجات شاومي الجميلة دي .. والتصميم زجاج بس في بروز كبير للكاميرا الخلفية.
المستشعر بتاع التقارب هنا اداءه مش حلو مُقارنًة بالباقي .. وده علشان هو سوفت وير مش حقيقي .. وكمان قوة الشبكة مش الأفضل علشان كدا خليته اخر واحد في الترشيحات.
لو هتشتري الموبايل فانا أنصحك بالنسخة الـ128 جيجا مع 6 جيجا رام بسعر 4600 جنية .. منصحكش تدفع أكتر من كده في الموبايل ده .. لو عايز نسخة أحسن شوية في الخامات الخارجية والداخلية وحجم صغير وموبايل متقارب منه جدًا فكر في Mi 11 Lite اللي انا مرشحهولك في فيديو أفضل موبايلات من 5 لـ6 الاف.
Comments