أسعار الموبايلات في مصر زادت بشكل كبير الفتره اللي فاتت .. وده بيرجع لحاجات كتير أوي منها الرسوم الجمركية اللي اتفرضت على الموبايلات مؤخرًا، ومع ذلك متوقع ان الموبايلات اللي هتنزل الفتره اللي جايه هتنزل بأسعار غاليه .. علشان كده النهارده هنقدملكم ترشيحات لأفضل الموبايلات تحت سعر 5000 جنية الفترة دي.
أفضل الموبايلات للألعاب :-
1- Poco X3 Pro
موبايل Poco X3 Pro هو أفضل موبايل للألعاب في الفئة دي، موبايل مش هيتعوض .. الجيل الجديد منه Poco X4 Pro نزل بره وأحتمال يوصل مصر قريب، وبيقدم معالج أضعف من اللي موجود فيه بفرق كبير.
موبايل بوكو X3 برو بيجي بمعالج سناب دراجون 860 الرائد، واللي هيقدملك أحسن تجربة للألعاب والأداء في الفئة دي مع صوت Stereo وبطارية ضخمة .. وطبيعي يكون في تنازلات زي التصميم بتاعه وزي الكاميرا السيلفي اللي مش أفضل حاجه، وكمان الشاشة بتاعته IPS LCD مش AMOLED لكنها كويسة.
اخر سعر وصلنا له للموبايل ده كان للنسخة الـ256 جيجا مع 8 جيجا رام حوالي 5200 جنية مصري، لكنه مؤخرًا الكميات المتاحة منه قلت وبقيت صعب توصل له.
2- Redmi Note 10S
موبايل Redmi Note 10S ده يعتبر مميز جدًا على جانب الأداء الرسومي بسبب المعالج الـ ميدياتك Helio G95 اللي بيقدم أداء ممتاز جدًا في الألعاب في الفئة دي، لكنه بدقة تصنيع 12 نانو ميتر، وسعره هتلاقيه في حدود 4150 جنية للنسخة الـ128 جيجا مع 6 جيجا رام او 4500 جنية للنسخة الـ128 جيجا مع 8 جيجا رام.
3- Realme 8
برده الموبايل ده بيجي بنفس المعالج الـHelio G95 من ميدياتك واللي بيتميز على جانب الأداء الرسومي والأداء في الألعاب لكن يعيبه الإستهلاك المُرتفع للبطارية بسبب تكنولوجيا الـ12 نانو .. والـRealme 8 بيتوفر في السوق المصري للنسخة الـ128 جيجا مع 8 جيجا رام بسعر حوالي 4600 جنية مصري.
4- Infinix Note 11S / Pro
موبايل نوت 11 اس بيجي بمعالج ميدياتك Helio G96 المميز في الأداء الرسومي برده .. مع معدل تحديث 120 هيرتز وبطارية ممتازة، لكنه مش بيقدم أحسن كاميرات .. وده اللي بيقدمها النسخة الـPro منه اللي بتيجي بنفس المعالج والبطارية لكن مع كاميرات أفضل.
موبايل Infinix Note 11S نسخة الـ128 جيجا مع 8 جيجا رام بسعر 4000 جنية مصري، اما موبايل Infinix Note 11 Pro نسخة 128 جيجا مع 8 جيجا رام بسعر 4250 جنية مصري.
أفضل الموبايلات للكاميرات :-
1- Galaxy A52
موبايل بيقدم أداء مقبول في الإستخدام اليومي الخفيف .. لكنه بيقدم كاميرا خلفية أساسية 64 ميجا بيكسل فيها مثبت بصري حقيقي، وكاميرا سيلفي بدقة 32 ميجا بيكسل .. وفيه صوت Stereo ومقاوم للماء والغبار IP67 وكمان شاشة Super AMOLED ممتاز جدًا .. يمكن من عيوبه البصمة البطيئة وأداءه مش أفضل حاجه.
موبايل Galaxy A52 سعره في السوق المصري للنسخة الـ128 جيجا مع 8 جيجا رام بسعر 5600 جنية .. لو تقدر تطلع للمبلغ بتاعك لفئة الـ7 الاف وتاخد Galaxy A52s 5G هيكون خيار أقوى بفرق ضخم.
2- Vivo V21
انا بختار الـV21 بالتحديد، مش الـV23 لإن الـVivo V23 الجديد سعره وصل لـ8300 جنية .. ومش فارق كتير عن الـVivo V21 .. الموبايل بيقدم تجربة كويسة في الأداء اليومي مع سوفت وير خفيف .. الموبايل بيقدم كاميرا خلفية 64 ميجا بيكسل فيها مثبت بصري والأمامية 44 ميجا بيكسل وفيها مثبت بصري برده.
موبايل Vivo V21 بيقدم بصمة سريعة وشاحن سريع وخامات ممتازة وبيقدم تجربة متكاملة كويسة .. وكاميرته من أفضل كاميرات الفئة السعرية دي .. والموبايل سعره للنسخة الـ128 جيجا مع 8 جيجا رام بسعر 5400 جنية.
أفضل الموبايلات للإستخدام اليومي :-
1- Oppo Reno 6 4G
شركة اوبو دائمًا بتقدر تقدم موبايل متكامل للإستخدام اليومي .. مش الأفضل في نقطة معينه او مش بيتفوق على منافسينه في الكاميرات مثلًا او بيقدم أقوى معالج في الفئة .. لكنه متكامل بيقدم تجربة كويسة مستقرة وثابته، وده اللي بيقدمه Oppo Reno 6 4G اللي سعره حوالي 5900 جنية للنسخة الـ128 جيجا مع 8 جيجا رام.
2- Redmi Note 10 Pro
موبايل متكامل كويس الى حد كبير في الفئة دي للإستخدام العادي، بيقدم تجربة مستقرة .. موبايل شاشته ممتازة وكاميراته كويسة .. لكنه مش مميز أوي في الألعاب مثلًا ولا هو الأفضل في الفئة دي في الكاميرات .. هو بيقدم مواصفات متوازنه .. والـRedmi Note 10 Pro سعره حوالي 5600 جنية للنسخة الـ128 جيجا مع 8 جيجا رام.
Comments