أفضل موبايلات الفئة المتوسطة 2022 في مصر بالأسعار الجديدة !

أسعار الموبايلات في الفترة الأخيرة في مصر رفعت بشكل كبير .. والزيادات السعرية مستمره للأسف .. علشان كده لو بتدور على موبايل في الفئة المتوسطة فانت هتحتاج ترفع الميزانيه بتاعتك .. والنهارده هنقدملك ترشيحات أفضل الموبايلات في الفئة المتوسطة في السوق المصري بعد إرتفاع الأسعار.


Galaxy M52

1- Galaxy M52

من مميزات الموبايل انه بيقدم معالج سناب دراجون 778G مع شاشة 6.7 بوصة Super AMOLED بتردد 120 هيرتز .. بطارية ضخمة 5000 مللي امبير لكن مش بتدعم الشحن فائق السرعة، عدسة خلفية 64 ميجا بيكسل أداءها كويس لكن مفيهاش مثبت بصري، سيلفي بدقة 32 ميجا بيكسل .. مع بصمة إصبع موجودة على زِر الباور.

لكن للأسف الموبايل مفيهوش مدخل السماعات الـ3.5 مللي .. ومش بيجي بسماعات Stereo خارجية .. ومش مقاوم للماء والغبار بشهادة IP67، ومفيش شاحن سريع في العلبة .. وتصميم الموبايل قديم.

موبايل Galaxy M52 5G موجود في المحلات للنسخة الـ128 جيجا مع 8 جيجا رام بسعر 6300 جنية مصري .. وهو يعتبر أرخص موبايل من سامسونج بيقدم معالج SD778G مع شاشة ممتازة جدًا .. لكن لازم تتقبله بالنواقص اللي فيه.


Galaxy A52

2- Galaxy A52

الموبايل بيقدم معالج سناب دراجون 720G مع شاشة Super AMOLED بحجم 6.5 بوصة بتردد 90 هيرتز .. بطارية 4500 مللي امبير، كاميرا خلفية 64 ميجا بيكسل لكن فيها مثبت بصري .. بصمة تحت الشاشة أداءها مش الأفضل .. صوت Stereo ومنفذ 3.5 مللي .. مقاوم للماء بشهادة IP67 مع تصميم جديد.

الموبايل متكامل الى حد كبير .. لكن بالمقارنة مع M52 هنلاقي ان المعالج أضعف بفرق مش قليل، وكمان الشاشة مش بتدعم معدل تحديث 120 هيرتز .. وبصمة الإصبع اللي تحت الشاشة أداءها متواضع الى حد ما .. على جانب أخر هو بيقدملك النواقص اللي في M52 زي الصوت الـStereo ومنفذ الـ3.5 مللي وغيرها.

موبايل Galaxy A52 متاح في المحلات للنسخة الـ128 جيجا مع 8 جيجا رام بسعر حوالي 6500 جنية مصري.


Redmi Note 11S

3- Redmi Note 11S

الموبايل ده بيتميز بالمعالج الـHelio G96 المُمتاز في الألعاب مع شاشة 6.43 بوصة AMOLED بتردد 90 هيرتز .. كمان بيقدم عدسة خلفية أساسية 108 ميجا بيكسل وبطارية 5000 مللي امبير بتدعم الشحن السريع بقدرة 33 وات .. وسماعات الموبايل بتكون Stereo.

لكن من عيوب الموبايل الكاميرا السيلفي المتواضعه بدقة 16 ميجا بيكسل .. والكاميرا الخلفية مش بتدعم تصوير 4K بسبب المعالج .. كمان بروز الكاميرات كبير الى حد ما، والموبايل بيسخن بسرعة جدًا .. ومستشعر التقارب مش أفضل حاجه .. ولو تقدر تزود وتجيب Redmi Note 10 Pro هيكون أفضل.

نسخة 128 جيجا مع 6 جيجا رام موجودة من Redmi Note 11S بسعر 6300 جنية مصري.


Realme 8

4- Realme 8

الموبايل بيقدم معالج Helio G95 مع شاشة Super AMOLED بحجم 6.4 بوصة .. بطارية 5000 مللي امبير بتدعم الشحن بقدرة 30 وات .. كاميرا خلفية 64 ميجا بيكسل بتصور فيديوهات 4K وأمامية 16 ميجا بيكسل .. وبيتميز بمستشعر التقارب أداءه ممتاز وكمان الشبكات ممتازة جدًا.

لكن من أهم عيوبه في الفئة السعرية دي هي الشاشة .. صعب تتقبل شاشة 60 هيرتز في الفئة السعرية دي .. كمان مفيش صوت Stereo، وتصميم الموبايل مُختلف وغريب.

نسخة 128 جيجا مع 8 جيجا رام من Realme 8 موجودة في المحلات بحوالي 6300 جنية مصري.


Vivo V23e

5- Vivo V23e

الموبايل بيتميز بمعالج Helio G96 مع تصميم شيك ووزن خفيف جدًا وسُمك رفيع جدًا .. مع شاشة 6.44 بوصة AMOLED .. كاميرا خلفية 64 ميجا بيكسل بفتحة عدسة F/1.8 مع عدسة أمامية 50 ميجا بيكسل F/2.0 بأداء ممتاز .. بصمة تحت الشاشة أداءها ممتاز، سوفت وير خفيف وشبكات أداءها ممتاز وشاحن 44 وات.

من عيوب الموبايل ان الشاشة تصميمها بـNotch وشكلها قديم جدًا .. وكمان مش بتدعم معدل تحديث مرتفع لإنها بتكون 60 هيرتز فقط وده عيب قوي .. كمان البطارية صغيرة 4050 مللي امبير فقط .. والموبايل مش بيدعم منفذ السماعات الـ3.5 مللي .. وكمان صوت الموبايل للأسف مش Stereo.

سعر Vivo V23e للنسخة الـ128 جيجا مع 8 جيجا رام حوالي 6300 جنية مصري.


Infinix Note 11 Pro

6- Infinix Note 11 Pro

وده خيار استثنائي بسعر رخيص .. بيتميز بالأداء القوي جدًا في الألعاب بمعالج Helio G96، ده أرخص موبايل بيقدملك المعالج ده في الوقت الحالي .. وبطارية ضخمة 5000 مللي امبير بتشحن بقدرة 33 وات .. شاشة ضخمة 6.95 بوصة IPS LCD بمعدل تحديث 120 هيرتز .. صوت Stereo.

ده تشتريه لو عايز أفضل أداء في الألعاب، لكن الكاميرات فيه مش أفضل حاجه .. أداءها متواضع الى حد كبير والمعالجة ضعيفة ومش بتدعم تصوير فيديوهات بجودة 4K، يمكن بتتميز بعدسة Telephoto بتعمل زوم لحد 30X .. وطبعًا الشاشة الـIPS LCD وسطوعها تحت الشمس متواضع .. ومفيش ميكروفون اضافي لعزل الضوضاء.

موبايل Infinix Note 11 Pro سعره للنسخة الـ128 جيجا مع 8 جيجا رام حوالي 5200 جنية مصري.

قد يعجبك أيضا...

Comments

جاري التحميل...