مراجعة Redmi Note 11 Pro 4G من شاومي – فين الجديد ؟!

شاومي قدمت سلسلة Note 11 Pro الكاملة من فترة .. والسلسلة دي كانت عبارة عن 3 موبايلات .. النهارده هنقدملكم مراجعة Redmi Note 11 Pro 4G واللي يعتبر أقل نسخة في سلسلة الـPro من موبايلات Note 11 .. وتعتبر نسخة الـPro مهمه لإنها بتقدملك مواصفات شبه متكاملة، لكن هل Note 11 Pro 4G بيقدم التجربة دي ولا لا ؟!


التصميم :-

أفضل ما في Note 11 Pro هو تصميمه .. ظهر زُجاجي فخم، بقالنا زمن كبير مش بنشوف موبايلات بظهر من الزجاج في الفئة المتوسطة .. وده مخلي الموبايل في حته تانيه وأحسن بفرق كبير عن Redmi Note 11S.

الموبايل تقيل شوية، وزنه 202 جرام .. وطبعًا بالوزن ده مُعرض لإنه يقع بشكل كبير، ودي مشكلة الزجاج .. لكن تخانة الموبايل كويسة 8.1 مللي والفريم مُسطح من البلاستيك.

بروز الكاميرا الخلفية كبير كالمعتاد من شاومي مع مستشعر الـ108 ميجا بيكسل .. في جراب بيجي مع الموبايل في العلبة بيحاول يحل أزمة البروز دي.


الشاشة :-

الموبايل بيجي بشاشة كبيرة بحجم 6.67 بوصة من نوع Super AMOLED بدقة FHD+ بتردد بيوصل لـ120 هيرتز مع ثقب صغير للكاميرا السيلفي.

أداء الشاشة ممتاز مش هتحتاج أكثر من كده في الفئة دي .. خاصًة ان ألوان الشاشة كويسة جدًا وحواف الشاشة معقولة وثقب الكاميرا السيلفي صغير .. شاشة مُبهرة بصراحة .. وسطوع تحت الشمس ممتاز.

لما قارنت الشاشة مع Note 11S لاقيت تفوق بسيط لصالح Note 11 Pro في الألوان .. وفي حواف الشاشة الأصغر.

شاشة Redmi Note 11 Pro 4G عليها طبقة حماية Corning Gorilla Glass الجيل الخامس .. والموبايل بيجي في العلبة متركب عليه سكرينه.


الأداء :-

معالج الموبايل ده هو ميدياتك Helio G96 بتكنولوجيا 12 نانو ميتر .. مع ذاكرة تخزين من نوع UFS 2.1 .. ودي أول نقطه تعيب الموبايل للأسف .. ده نفس المعالج الموجود في Note 11S.

كلنا متعودين على ان شاومي بتستخدم معالج من كوالكوم في النسخة البرو من موبايلات سلسلة نوت علشان تقدم لنا سخونيه أفضل وتوفير في الإستهلاك وكمان تحسن من معالجة الصور.

شاومي ضافت معالج كوالكوم سناب دراجون 695 في نسخة Note 11 Pro 5G فقط واللي هو أغلى للأسف وفي فئة سعرية أعلى .. بسعر نوت 11 برو 4G لو جبت Poco F3 او Xiaomi 11T يكون أفضل لك بكتير.

أداء ريدمي نوت 11 برو 4G مش كارثي .. أداء كويس جدًا زي أخوه الأصغر نوت 11 اس ومفيش فرق بينهم .. لكن كنا محتاج تحسين في النسخة البرو عن نسخة Note 11S بصراحة.

ببجي بتشتغل على اعدادات جرافيك High HD والفريمات بين 30 فريم لـ50 فريم على أعلى جودة متاحة .. لكن الأداء مستقر وثابت، بس الموبايل بيسخن بشكل واضح عن نوت 11 اس بسبب ان الظهر زُجاجي.


عوامل الأمان وعناصر اخرى :-

البصمة موجودة على زِر الباور .. أداءها سريع بس في تجميع بيحصل في أيقونات الواجهة، الـFace Unlock أداءه معقول لكن برده بيحصل تجميع في أيقونات الواجهة.

نوت 11 برو أحسن من نوت 11 اس في دعمه للـNFC .. والصوت Stereo عالي جدًا، من أفضل التجارب الصوتيه اللي هتجربها في الفئة السعرية دي .. ومدخل السماعات الـ3.5 مللي موجود!

مستشعر التقارب كالعادة سوفت وير مش موجود حقيقي .. لكن الأداء بتاعه مش الأفضل .. مش عارف ليه شاومي بتضيف المستشعر الحقيقي في الموبايلات الرخيصة لكن مش بتضيفه في الموبايلات الغاليه.

شبكات الـWi Fi والإتصال أداءها كويس جدًا زي Redmi Note 11S بالظبط بدون أي مشاكل.


البطارية :-

بطارية 5000 مللي امبير .. أدائها زي Note 11S أو قريب منه، هيكون في فرق بسيط بسبب ان Note 11 Pro بيجي بمعدل تحديث اعلى 120 هيرتز .. بس في المجمل أداء البطارية كويس .. يقدملك 7 ساعات شاشة مفتوحة.

شاومي بتميز Note 11 Pro بشاحن سريع 67 وات وبيجي في علبة الموبايل .. الشاحن ده بيشحن 50% من البطارية في ربع ساعة فقط .. وده وقت شحن ممتاز جدًا جدًا.

بس علشان تشحن البطارية لحد 100% هياخد معاك حوالي ساعه إلا ربع .. وده لإن الموبايل بيوصل عن 90% والشحن السريع بيقف تمامًا.


الكاميرات :-

كاميرا خلفية رئيسية 108 ميجا بيكسل بفتحة عدسة F/1.9 بدون مثبت بصري .. عدسة Ultra Wide بدقة 8 ميجا بيكسل بفتحة عدسة F/2.2 .. عدستين 2 ميجا بيكسل ماكرو وعزل، وعدسة سيلفي 16 ميجا بيكسل F/2.5.

كاميرات نوت 11 برو 4G الخلفية مقدرش أقول عليها وحشه ولكن مش دي الطفرة ولا دي أفضل كاميرا ولا ده المستوى اللي تستناه من موبايل Pro من شاومي .. وده بسبب معالج Helio G96 المتواضع في معالجة الصور.

الصور مقبولة وكويسة في الإضاءات العالية مفيش مشكلة .. لكن لما الإضاءه بتقل الصور بتبقى فيها Over Sharpness حاجه بسيطة .. ولما الإضاءه تقل أكثر الـNight Mode بيشتغل وبيظبطلك الصورة.

لما قارنت الكاميرا الخلفية بتاعت نوت 11 برو بـ نوت 11 اس لاقيت ان نوت 11 برو يتفوق في بعض السيناريوهات .. معالجة الصور أحسن والألوان أفضل، الفرق حوالي 15% وهو فرق سوفت وير فقط.

ولما قارنت مع Galaxy A52s 5G اللي هو أفضل كاميرا خلفية في الفئة السعرية دي .. لاقيت ان A52s 5G متفوق في ألوان البشره في جميع الأوضاع .. ومعالجة الألوان أفضل بشكل عام في كل الصور تقريبًا.

اما بالنسبة للسيلفي فا سيلفي متواضع كعادة شاومي .. لازم إضاءه عالية علشان تاخد صورة سيلفي كويسة، بس برده لون البشرة مش بيبقى مظبوط أوي .. ولما الإضاءه تقل هتلاقي الصور تفاصيلها قلت.

ولما قارنت الكاميرا السيلفي مع A52s 5G لاقيت لون البشرة مظبوط أكثر في صور A52s 5G بفرق واضح عن صور ريدمي نوت 11 برو .. وده بالرغم من ان A52s 5G أداء السيلفي فيه متواضع.

بالنسبة لتصوير الفيديوهات فالموبايل بيدعم تصوير بجودة 1080p مع 30 فريم في الثانية .. مفيش 4K للأسف وده يعتبر عيب في الموبايل .. في مثبت إلكتروني .. وفي ميكروفون اضافي لعزل الضوضاء.


redmi note 11 pro 4g price

سعر Redmi Note 11 Pro 4G :-

  • نسخة 64 جيجا مع 6 جيجا رام بسعر 6550 جنية
  • نسخة 128 جيجا مع 6 جيجا رام بسعر 6950 جنية
  • نسخة 128 جيجا مع 8 جيجا رام بسعر 7450 جنية

وتقدر تركب شريحتين إتصال من الجيل الرابع او شريحة مع كارت ميموري 1 تيرا.


الرأي النهائي :-

مميزات Redmi Note 11 Pro 4G :-

  • تصميم ممتاز وخامات محترمة
  • شاشة ممتازة جدًا
  • بطارية ممتازة تدعم الشحن السريع
  • صوت عالي قوي جدا
  • مدخل الـ3.5 مللي موجود

عيوب Redmi Note 11 Pro 4G :-

  • مستشعر التقارب سوفت وير متواضع
  • معالج ضعيف الى حد كبير
  • كاميرا سيلفي مش لطيفة
  • مفيش تصوير فيديوهات 4K

محتار بين Note 11S و Note 11 Pro 4G ؟

لو محتار بين الموبايلين دول لازم تكون عارف ان نسخة Pro أفضل في الخامات الخارجية والتصميم بفرق كبير .. أفضل في الشاشة الأكبر بالألوان الأفضل والسطوع الأفضل .. صوت أعلى بفرق واضح .. دعم للـNFC .. شاحن أسرع، معالجة صور الكاميرا الخلفية أفضل لكن بفرق بسيط.

لو الحاجات دي تفرق معاك أنصحك بنسخة 128 جيجا مع 8 جيجا رام من نوت 11 برو .. اما لو متفرقش معاك فا نوت 11 اس مش هيكون وحش وأنصحك توفر وتجيب نسخة 128 جيجا مع 6 جيجا رام.

قد يعجبك أيضا...

Comments

جاري التحميل...