في مقال قبل كده على موقع وقناة موبيزل على يوتيوب قدمنالكم افضل 10 تطبيقات اندرويد .. ولاقينا رد فعل إيجابي جدًا منكم، ومُعظم التعليقات طلبت اننا نعمل حلقة عن افضل العاب اندرويد وخاصة الألعاب الـOffline اللي مش بتحتاج نت علشان تشتغل.
الألعاب الـOffline هي اللي مش بتحتاج نت سواء WiFi او Data علشان تقدر تلعبها .. هي بتكون العاب بسيطة نسبيًا ومُسلية .. وطبعًا بسبب الظروف الحالية والنت الضعيف عن مُعظم الناس فا العاب الـOffline هتكون مطلوبه !
النهارده في المقال ده هنقدملكم أفضل 10 العاب اوف لاين بدون انترنت تقدر تحملهم وتلعبهم في اي مكان وفي اي وقت .. معظم الألعاب جديدة ومُسلية ومُمتعة.
1- Zombie Gunfire
اول لعبة معانا هي لعبة Zombie Gunfire من ألعاب الأكشن والرعب، اللعبة مساحتها 40 ميجا بايت بس تقريبًا.
قصة اللعبة دي إن الـZombies في نهاية العالم إحتلوا أماكن كتير .. وإنت دورك انك تقتلهم وتتخلص منهم وتنقذ المدينة بتاعتك .. واللعبة فيها 3 شخصيات رئيسية وكل ما تنجح في مهمات أكتر كل ما يتفتحلك الشخصيات دي وتقدر تحارب بيهم.
اللعبة فيها أكتر من 80 مُستوى او Level مُختلف وكل مرة أكيد بتبقى أصعب و كل اللي عليك إنك تقتل أكتر من العدد المطلوب منك في الـLevel علشان تقدر تفتح الـLevel اللي بعده.
اللعبة الـGraphic بتاعها مُمتاز والتحكم فيها سهل ومُسليه جدًا و الأسلحه اللي بتكون معاك في الأول بيكون عبارة عن رشاش وقنابل وتقدر تضرب بأيدك في حالة ان اسلحتك خلصت .. علشان كدة لازم متهدرش رصاص كتير وتقتلهم بأقل عدد من الرصاص قبل ما الذخيره بتاعتك تخلص.
كل ما تخلص مهمه هتجمع منها ذهب او Gold اللي هتقدر تشتري بيه بعد كدة اسلحة اقوى تساعدك انك تنهي المُهمه بتاعتك اسرع وتقتل اكبر عدد من الـZombies في اقل وقت.
2- Zombie Hunter D-Day
اللعبة التانية اللي هي Zombie Hunter D-Day برده هي لعبة اكشن وقتل الـZombie .. اللعبة مساحتها حوالي 80 ميجا.
قصة اللعبة هو Yنك الناجي الوحيد في مدينة كلها Zombie وبتحاول إنك تفضل عايش لأطول فترة مُمكنه، بتدخل مهمات كتير وتقتل أكبر عدد من الـZombie عشان تاخد نقط وتقدر تشتري بيها اسلحة اقوى.
اللي عجبني في اللعبة دي مع ان فيها شبه كبير من لعبة Zombie Gunfire هو إن التحكم فيها مُمتع أكتر .. مقولتش اسهل .. بقول مُمتع أكتر والـGraphic مُمتاز وفيها حاجات بسيطه كدة لطيفة.
زي مثلًا أصوات الطلقات القريبة من الواقع مع هزة الموبايل .. وكمان أصوات الـZombie المُرعبة وزي إنك لو قتلت الـZombie في رأسه مثلا بتاخد Points أكتر وده بيخلي اللعبة كدة فيها تشويق وإثاره اكتر.
وزي ما قولتلك اللعبة فيها اسلحة كتير بتقدر تشتريها من الـPoints بتاعتك اللي بتجمعها .. وطبعًا فيها Levels او مستويات كتيره !
3- Dead Trigger
اللعبة الثالثه وهي احسن لعبة ـكشن وقتل Zombie هتبقى موجودة معانا النهارده وهي لعبة Dead Trigger. واللعبة مساحتها 30 ميجا بس.
اللعبة دي مُختلفه بقى عن اللعبتين اللي فاتوا في نقطة مهمه جدًا .. وهي إنك هنا بتقدر تتحرك وتنفذ مُهمات مش مجرد ثابت في مكانك وبتقتل أكبر عدد من الـZombie.
قصة اللعبه شبه معظم العاب الزومبي .. إنك في مدينة بقت كلها Zombie وانت بتحاول إنك تنقذ أكبر عدد من الناجين وتنقذ نفسك معاهم.
والمميز برده في اللعبة هنا هي سهولة التحكم .. فالحركه بصراحة سهله جدًا وسهل إنك تعمل حركات مُفاجئة بسهولة وتقدر تنشن على الهدف بسهولة .. كل ده مع جرافيك اللعبة فوق المُمتاز وواقعي لحد كبير جدًا .. واللعبة فيها مُهمات كتير واسلحة كتير وكل ما تخلص مهمات أكتر هتقدر تشتريهم زي ما إحنا عارفين
المُسلي في اللعبة إن المهمات مش ثابته يعني في مهمات بتطلب منك تقتل عدد معين من الـZombie وفي مهمات تانيه بتطلب منك ان بس تفضل عايش لمدة زمنيه مُحدده .. مش مهم تقتل قد ايه، المهم تفضل عايش .. وفي مُهمات إنك تفضي منطقه من الـZombie عشان الناجيين يروحوها.
للأسف اللعبه في منها جزء تاني مُحسن بس مش بتتلعب اوفلاين يعني لازم تبقى متصل بالأنترنت فمقدرتش اتكلم عنها في المقالة للأسف.
4- Ultimate Offroad Simulator
نسيبنا بقى من الـZombie والقتل والدم وندخل على اللعبة الرابعه معانا وهي لعبة سيارات إسمها Ultimate Offroad Simulator .. واللعبة دي مساحتها تقريبًا 96 ميجا.
اللعبة دي تعتبر من العاب العالم المفتوح أو الـOpen World .. وفي اللعبة دي انت بتسوق عربيات دفع رباعي وبتفضل تجمع نقاط عن طريق عمل Drifts بالعربية او بالطلوع على الجبال والطرق المكسره.
الجرافيك في اللعبة دي جميل جدًا والتحكم في العربيه مُمتاز بتحس فعلًا إنك سايق عربيه حقيقيه، كمان بتقدر تدخل مهمات تجمع بيها فلوس ونقط.
الفلوس والنقط اللي جمعتهم بقى تقدر تشتري العربيات المقفوله وتعدل على اي عربيه تختارها زي لون العربيه والجنوط ولون الجنوط وكل حاجه فالعربية، يعني تعمل عربية احلامك اللي تدخل بيها اللعبة وتكسب .. لعبة مُسليه اوي انصحك تجربها وهتعجبك.
تحميل Ultimate Offroad Simulator
5- Drive Simulator 2020
اللعبة الخامسه معانا من العاب مُحاكاة الواقع وهي لعبة Drive Simluation 2020 .. اللعبة مساحتها 92 ميجا بس.
من إسمها كدة مُمكن تفتكر إنها لعبة عربيات عاديه بس هي مش كدة .. في اللعبة دي إنت هتكون صاحب شركة شحن وشركة إنشائات، في الأول هتقوم بمهمات شحن بضاعه عشان تجمع فلوس وعلشان تقدر تشتري بيها معدات وعربيات أكتر وتنفذ مشاريع كبيره.
انت هنا مش مجرد هتسوق تريلا او عربيه نقل وتنقل حاجات بس .. لأ إنت كمان اللي هتحملها وإنت اللي هتسوق الأوناش والجرارات وتبني كباري ومباني سكنيه بنفسك، يعني هتتحكم في مشروع كامل محاكي للواقع.
التحكم في اللعبة مش سهل وهتاخد وقت لحد ما تتعود عليه، الحاجات اللطيفة اللي فالعبه إنك تقدر تشوف كل التريلات اللي هتسوقها من جوه وتقدر تسوق بليل او بالنهار و حاجات كتير مسليه اوي هخليك تكتشفها بنفسك، ومتنساش تحط بنزين للتريلا من محطات البنزين وانت ماشي بدل ما تدفع كل مكسبك عشان تحط بنزين وهي عالطريق.
6- Real Rally
اللعبة السادسة معانا هي برضه لعبة سباق بس سباق سيارات Rally .. وإسمها Real Rally .. واللعبة مساحتها 36 ميجا بس.
هنا انت بتدخل سباق Real Rally .. هو معروف بيكون في طرق غير ممهده وعربيه مُجهزة للطرق دي وهنا انت بتكسب بأقل وقت تخلص فيه عدد لفات التراك اللي بتلعب عليه.
اللعبة الـGraphic بتاعها لطيف جدا وممكن تظبط الـGraphic Quality على حسب موبايلك يستحمل انهي Quality منغير LAG او تقطيع فريمات، وممكن تعرف إمكانيات موبايلك عن طريق صفحة مواصفات الموبايلات على موقع موبيزل.
طبعًا أول ما تلعبها هتحس إنك مش متحكم كويس في العربيه علشان يديك إحساس سباق الـRally الحقيقي اللي بتكون في طرق وعره وصعب جدًا السواقه عليها.
الجميل هنا انو بيديك في اللعبة Options كتير في التحكم زي إنك تسوق عن طريق اسهم او تحريك الموبايل يمين وشمال او دريكسيون تسوق منه.
وكمان تقدر تغير وضعية الكاميرا إنك تسوق وإنت شايف العربيه كلها او إنك قاعد جوه العربيه او ان العربيه هي الكاميرا .. وكل ما تكسب أكتر هتقدر تفتح عربيات اسرع وأحسن في التحكم وتدخل تراكات او طرق اصعب.
7- Encounter Strike
اللعبة السابعه هنرجع بيها للأكشن وضرب النار .. بس متقلقش مفيش Zombie تاني، انا عارف انك اتهريت زومبي .. اللعبة دي اسمها Encounter Strike ومساحتها 55 ميجا تقريبًا.
قصة اللعبة بسيطه وهو إنك جندي في قوات مكافحة الإرهاب بتحارب الإرهابين اللي إحتلوا مناطق في بلدك .. اللعبة دي فيها مُميزات كتير تخليك تحملها و تجرب تلعبها، اولها إنها فيها 3 اوضاع او Modes للعبه وكل Mode فيه اكتر من 80 مستوى او Level .. وكل ما تعلى كل ما بيزداد صعوبه يعني معاك اكتر من 240 مستوى مختلف.
تاني ميزة شايفها في اللعبة هو تنوع الأسلحه، فيها اسلحة كتير بتقدر تشتريها لما تكسب مُهمات غير بقى القنابل والسكينه و غيرهم كتير، طبعًا لو شايف إنها حاجات عادية إفتكر اننا بنتكلم على لعبة Offline ومساحتها صغيره فا ده كويس جدًا على حجم 50 ميجا بس تقريبًا .. يعني متقرنهاش بـ لعبة ببجي مثلًا.
تالت ميزه ان Control اللعبه والتحكم فيها مُمتاز وسهل ومفيش اي LAG فالحركة او Bugs فاللعبة تخليك تتحرك بصعوبه او تلف حولين نفسك وانت بتتحرك زي العاب كتير جربتها في نفس نوع و حجم اللعبة دي.
الـGraphic هقول عليه جيد .. مش هقول مُمتاز .. بس في الأخر اللعبه جيده ومُسليه تستحق انك تجربها وتقولي رأيك في كومنت على المقال !
8- Tanks of Battle: World War 2
اللعبه الثامنه معانا وهي لعبة حرب الدبابات .. وإسمها Tanks of Battle: World War 2 .. اللعبة دي مساحتها تقريبًا 60 ميجا.
من اهم المُعدات الحربية اللي إستُخدِمَت في الحرب العالمية التانية، بخلاف الطيارات .. هي الدبابات، قصة اللعبه هنا ببساطه إنك بتحارب بدبابتك في الحرب العالمية التانية.
العاب الدبابات معروف عنها إنها صعبة في التحكم بسبب إنك عندك تحكم في حاجتين .. الأول هو التحكم في خط سير الدبابه نفسها والتاني هو تحريك المدفع بأتجاه الهدف والتصويب عليه .. وده بيخلي اللعبة محتاجه مهاره من اللاعب علشان كدة بتكون اللعبه مسليه ومثيره.
في اللعبه هنا هتدخل مُهِمات سهلة في البدايه عشان تتعلم إزاي تتحكم في تحريك الدبابه والمدفع .. بعد كدة هتلاقي المُهِمات بقت اصعب بكتير .. انا نفسي في مهمه مش عارف اعديها.
مميزات اللعبة بقى إنك كل ما تكسب معارك اكتر كل ما بتجمع دهب تقدر تشتري بيه دبابات اقوى واسرع .. واللعبه فيها دبابات كتير تقدر تشتريها.
اللعبه فيها Modes مُختلفه زي إنك تقدر تدخل مُهِمات فيها عدد مُعين من الدبابات مطلوب منك إنك تدمرها .. او إنك تدخل في أرض معركة تتحرك براحتك وتدمر اكتر عدد من الدبابات عشان تجمع دهب و فلوس تقدر تشتري بيها دبابات اقوى.
تحميل Tanks of Battle: World War 2
9- Knights Fight
اللعبه التاسعة لعبة هترجعك بقى للعصور الوسطي وهي لعبة Knights Fight .. اللعبة مساحتها 26 ميجا.
زي ما قولتلك اللعبة دي هترجعك للعصور الوسطي وعصر حروب السيوف والدروع والحاجات دي، انا حبيت اللعبة دي لإنها مش لعبة سهلة، ومحتاجة وانت بتلعب انك تفكر ضربتك الجايه هتبقي ايه وهتضرب ازاي وامتى وده اليي بيخليها مُسليه.
انت هنا بتنزل أرض القتال في اول اللعبة بسيف ودرع فقط .. وفي الأول السيف بتاعك مش هيكون اقوى حاجه .. والمطلوب منك إنك تقتل خصمك حسب مركزه يعني الأول هتحارب محاربين زيك بعد كدة بتحارب حارس من حراس الملوك وكل مره اللعبه بتكون اصعب وبتحارب اشخاص محترفين اكتر.
الـGraphic في اللعبة دي جيد على لعبة مساحتها 26 ميجا بس، وفيها Options كويسة لو عايز تلعبها اونلاين زي انك تنزل ارض المعركه مع اشخاص عشوائية Online او تلعب مع حد من نفس شبكة الـWiFi بتاعتك بس في نفس الوقت تقدر تلعبها اوفلاين براحتك.
زي ما قولتلك .. في اللعبه دي محتاج تفكر هتضرب ازاي وامتى عشان الضربه تيجي فيه مش فالدرع بتاعة .. وتصد انت كمان بدرعك ضرباته وكمان في حركه لطيفه كدة اسمها Comboz Hit وهي إنك تقدر تضرب كذا ضربه ورا بعض فالوقت المناسب عشان تخلص على خصمك.
كل الحاجات دي بتخليها اللعبة مُسليه جدًا وتقدر تلعبها في اي مكان في اي وقت منغير انترنت.
10- Taxi Sim 2020
اللعبة العاشره معانا هي لعبة من العاب محاكاة الواقع وهي لعبة Taxi Sim 2020 .. مساحة اللعبة 800 ميجا تقريبًا.
اللعبه هنا زي ما قولت هي مُحاكاة للواقع، هتعيش حياة سواق تاكسي في امريكا .. اللعبة دي الـGraphic بتاعها مُمتاز جدًا جدًا وهتستمتع في كل لحظة بتلعبها فيها.
اللعبه فيها وضعين .. الأول إنك ممكن تكون سواق تاكسي أصفر عادي بتلف فالشارع وتاخد العُملاء بطريقة عشوائيه .. والثاني تكون سواق خاص بتروح لحد شخص معين على الخريطه تاخده وتوصله.
هتبتدي اللعبه بالعربيه التقليديه للتاكسي في امريكا .. وبعد ما تجمع فلوس تقدر تشتري عربيه تانيه اسرع واحسن .. واللعبه فيها اكتر من 30 عربيه مُختلفه من اول الـBMW لحد عربيات الـSuper Cars زي الـBugatti والـRolls Royce وحاجات كتير جدًا هتشجعك انك تلعب اللعبه دي عشان تقدر تشتريهم .. وكمان تقدر تعدل فيهم زي إنك تشتري جنوط او تغير لون العربيه في حالة انك سواق VIP او سواق خاص .. وحاجات تانيه اكتشفها بنفسك.
كلمة سر اللعبه دي واكتر حاجه عجباني فيها هو التفاصيل .. تفاصيل اللعبه دي رهيبه حرفيًا، بخلاف إن في إختيارات كتير للـControl زي اسهم او دريكسيون او عن طريق إنك تحرك الموبايل يمين وشمال.
في حاجات لطيفه جدًا فالتحكم تخليك تحس انها فعلًا مُحاكاة للواقع بشكل كبير، زي مثلًا إنك عندك ازرار تشغيل وتبطيل العربيه، زُرار للمساحات، زُرار للنور، زُرار للكلاكس وزرار للإنتظار وفتيس الاوتوماتيك.
تقدر تتحكم في وضع الكاميرا إذا كان من جوا العربيه او من برا العربيه براحتك .. وكمان تقدر تشغل زرار الـSport Mode للعربية عشان العربيه تبقي اسرع والتحكم فيها اسهل.
علشان تقدر تجمع فلوس فاللعبه مُهمتك إنك زي ما بيقولوا تريح الزبون .. يعني كل زبون هيركب معاك هيبقى ليه طلبات زي إنك مثلًا متعديش سرعة مُعينه او إنك توصله بأسرع وقت او انك متعملش بيه و هو راكب اي حوادث او تخبط اي عربيه فالطريق عشان يديك فلوسك كامله وتاخد اكبر عدد من النقط .. ومتنساش إنك حتى لو مش معاك عميل فالعربيه حاول تتجنب إنك تخبط عربيتك عشان ده بيخسرك فلوس تصليح.
اللعبه دي فعلا مُسليه وممكن تدمنها عشان بس تقدر تشتري العربيات الخرافيه اللي فالعبه وتقدر توصل اسرع وتجمع فلوس اسرع.
Comments