مراجعة Vivo V19 – موبايل مظلوم في الفئة المتوسطة !

الفئة المتوسطة في مصر اللي هي من 5 لـ6 الاف جنية .. نزل فيها موبايلات كتير الفترة الأخيرة .. وانا شخصيًا بحب الموبايل الإعتمادي اللي ميحصلش فيه مشاكل ولا ابقى خايف اني اشتريه وتظهر فيه مشاكل ومعرفش اصلحه .. وفي نفس الوقت احب جدًا يكون بيقدملي تركيبة متكاملة مفيهاش تنازل كبير.

النهارده هنقدملكم مراجعة كاملة لموبايل Vivo V19 الجديد .. ونشوف موقف الموبايل ده بالنسبة للمنافسين بتوعه في الفئة المتوسطة .. ايه المميز اللي بيقدمه .. وايه عيوبه ؟


التصميم :-

موبايل Vivo V19 خاماته غريبة جدًا .. اول ما مسكت الموبايل ده في إيدي بوزنه الـ186 جرام .. حسيته خفيف وقولت مستحيل يكون الظهر من الزجاج زي ما الشركة بتقول .. اكيد مش هكسره .. انا مليش في جو التكسير.

المهم فضلت اخبطه على المكتب وجنبه موبايلات تانية بلاستيك وزجاج .. طلع فعلًا بيعمل رنة الزجاج .. فهو فعلًا من الزجاج والشركة كمان بتقول عليه حماية Corning Gorilla Glass 6.

خامات جميلة اوي .. بس اللي فعلًا متسبب في الوزن الخفيف بقى .. الفريم، الفريم بلاستيكي وخاماته وملمسه رخيص شوية .. قلل كتير من فخامة الموبايل ده.

شياكة التصميم بقى .. الموبايل شكله فلاج شيب كدا في نفسه .. الظهر مراية حرفيًا بيعمل إنعكاسات وبيغير لونه بطريقة عجيبة على حسب الإضاءة اللي في المكان .. بس طبعا المراية ديه هتخليه يتبصم بسهولة جدا .. وشكل رصة الكاميرات عاجبني جدًا .. مفيش تنازل في الحته ديه برده علشان تاخد شكل وتصميم موبايل فلاج شيب.

بروز الكاميرا الخلفية خفيف اوي .. والجراب الشفاف المُرفق بيغطي البروز ده بالكامل .. كان نفسي في جراب شيك كدا زي اللي كان بيجي مع الـVivo V17 Pro القديم.


الشاشة :-

شاشة بتيجي بحجم 6.44 بوصة من نوع Super AMOLED بدقة FHD+ .. فيها ثقبين للسيلفي على اليمين .. وبدون مُبالغة، ديه من احسن الشاشات اللي جربتها الفترة الأخيرة .. وحواف الشاشة قليلة جدا فوق وتحت.

والشاشة الوانها مُمتازة .. سطوعها حلو تحت الشمس مش هتواجه معاها اي مشاكل .. والشاشة كمان بتدعم الـHDR10 .. عيش حياتك يا معلم.

بس الأجمل بقى إن الشاشة ديه بتدعم الـAnti Flicker .. اما بتشغلها هتريح عينك جدًا .. لما تيجي تمسك الموبايل وانت نايم على السرير ومقلل الإضاءة .. لو انت عينك حساسة وبتصدع بسرعة .. فيفو بتهتم بادق التفاصيل.

الشاشة كمان هتلاقي متركب عليها سكرينة اما تطلع الموبايل من العلبة.


الأداء :-

وهنا فيفو مستخدمتش معالج جديد في الفئة المتوسطة .. استخدمت معالج سناب دراجون 712 ثماني النواة بتكنولوجيا 10 نانو .. نفس المعالج اللي شوفناه في Realme 5 Pro و Realme XT !

المعالج قديم على 2020 .. بس حقيقي مع التجربة الفعلية .. مش هتحس بأي تقصير في الأداء على الموبايل ده بسبب سوفت وير فيفو المستقر جدًا جدًا.

ممكن تشوفني ببالغ بس التجربة هنا متقلش اي حاجة عن SnapDragon 730 الموجود في Galaxy A71 والـMi Note 10 Lite بعيدًا عن الأرقام .. بس طبعًا أكيد أقل من تجربة الـKirin 980 الموجود في الـNova 5T والـHonor 20.

الـAnimations اللي في الواجهة هنا لطيفه جدًا وتقدر تتحكم في كل اشكال الـAnimations بتاعت فتح الموبايل والبصمة وكل حاجة .. ومع ذلك لو حاسس انه متقل عليك ممكن تقفله خالص وهتحس الموبايل اسرع كتير.

دور الـAnimation انه يأخرك شوية على ما المعالج يتستجيب ومع ذلك اما بقفلها في الموبايل ده مش بحس بالتأخير بتاع إستجابة المعالج .. وده اللي انا بحكيلك عنه من اول فقرة الأداء.

بالنسبة للأداء الرسومي .. لعبة ببجي بتشتغل على High HD وبتشتغل كويس جدا بدون اي تهنيج او تقطيع في الفريمات .. كول اوف ديوتي شغالة على Very High .. وبرده شغالة زي الفل بدون اي تقطيع.

اتقل لعبة اكشن اللي هي فورت نايت شغالة بشكل رسمي على الموبايل ده على Medium Graphic .. شغالة كويس جدا برده.

والموبايل ده تبريده عظيم .. مش هيسخن بسهولة معاك .. وديه حاجة احترمتها جدًا في الموبايل ده.


عوامل الأمان وعناصر اخرى :-

البصمة مُدمجة في الشاشة .. والبصمة هنا سريعة جدًا جدًا مش بتغلط .. إعتمادية اكتر من كل المنافسين .. وبنفس كفاءة البصمة بتاعت موبايلات اوبو .. والـFace Unlock برده سريع جدًا زي موبايلات اوبو.

الـDark Mode اللي في الموبايل ده مُمتاز .. علشان الشاشة الـAMOLED المُميزة اللي هنا .. وكمان الـFacebook بيقلب أسود .. لو حابب تجربه.

مفيش لمبة اشعارات .. بس عندك خاصية الـAlways On Display مُمتازة بتعرضلك الساعة بأشكال كتير وايقونات إشعارات البرامج اللي جاتلك .. والسوفت وير برده بيدعم إن الموبايل يشغل الفلاش لما يجيلك إتصال على الموبايل.

المُستشعرات بقى .. سينسور الضوء موجود حقيقي وسريع جدًا وعملي .. إنما سينسور المقاربة مش موجود .. والإعتماد على السوفت وير في قفل الشاشة اثناء المكالمة.

زي الـReno 2 بالظبط .. مش بيغلط كتير .. بس الأفضل السينسور الحقيقي .. وبالمناسبة في تسجيل مكالمات هنا عادي.

صوت الموبايل جاي من سماعة واحدة .. والصوت عالي ومجسم .. زي الـMi Note 10 Lite وزي الـOppo Reno 3 .. وصوت سماعة المُكالمات عالي جدًا ومُمتاز .. وصوت سماعات الأذن برده عالي جدا.

ونيجي للشبكات بقى .. الـWiFi على الموبايل ده ممتاز كمدى وكقوة استقبال .. وكمان شبكات الإتصال في الموبايل ده قوية جدًا حتى أقوى من موبايلات اوبو اللي بجربها واللي هي اصلا كويسة !


البطارية :-

بطارية الموبايل ده بتيجي بحجم 4500 مللي أمبير .. ممكن تقولي ان في بطاريات اكبر 5000 مللي امبير وكدا .. بس احب اقولك ان السوفت وير الذكي اللي هنا .. منظم جدا في استهلاك الطاقة.

ومع إستخدام تقيل .. البطارية مُمكن تستحمل لحد 7 ~ 8 ساعات شاشة مفتوحة .. مع إستهلاك مُتوسط ممكن توصل لأكتر من كده.

الشاحن المُرفق 33 واط .. بيشحن البطارية بالكامل في ساعة وربع فقط … وده وقت كويس جدا .. ميقلش اي حاجة عن المنافسين.


الكاميرات :-

الكاميرا الخلفية رُباعية .. الأساسية 48 ميجا بيكسل بفتحة عدسة F/1.8 والتانية 8 ميجا بيكسل فتحة عدسة F/2.2 للتصوير الواسع .. والتالتة 2 ميجا بيكسل ماكرو والأخيرة 2 ميجا بيكسل للعزل.

والكاميرا السيلفي مُزدوجة 32 ميجا بيكسل فتحة عدسة F/2.1 والعدسة التانية للتصوير السيلفي 8 ميجا بيكسل فتحة عدسة F/2.3 تصوير واسع Ultra Wide.

جربت نُسخ كتير من جوجل كاميرا مشتغلتش بالرغم من ان الموبايل بمعالج سناب دراجون .. عمومًا لو لاقيت نسخة شغالة هسيبها في مقالة تحميل جوجل كاميرا.

سوفت وير الكاميرا بتاع الموبايل ده مُختلف شوية عن اوبو وريلمي .. علشان تشغل الـUltra Wide او الـBokeh او الماكرو بتدوس ع الـLens اللي على اليمين تحت وتختار اللي انت عاوزه.

اي موبايل فئة متوسطة، لما تيجي تمسكه .. وتصور بيه لوحده .. من غير ما تقارنه بحد .. هتحس إنك مبسوط .. بس لازم تجرب الكاميرا بتاعت الموبايل جنب موبايل تاني بنفس سعره في نفس ظروف التصوير.

وانا رأيي في الـVivo V19 انه واخد اتجاه اوبو وريلمي .. في إنه بيخلي الوان الصورة أحسن .. بس معالجة الصور هنا بالنسبالي مُتقبلها اكتر من ريلمي واوبو .. معالجة الصورة ليها دور كبير .. بس هو بيمسح شوية تفاصيل .. الـNight Mode بتاعه مُمتاز.

ولما نيجي نقارن مع المنافس المباشر الـMi Note 10 Lite .. هنلاقي تفوق واضح لمُستشعر الـMi Note 10 Lite في تفاصيل أكتر .. بشكل واضح .. بس يمكن معالجة الفيفو افضل في الإضاءة الداخلية والـNight Mode .. اما مُقارنتًا بالـReno 3 .. فحقيقي عجبني أكتر الفيفو اللي خلى الوان صورة الرينو 3 تبان بهتانة.

اما بالنسبة للسيلفي .. المفروض إن السيلفي هنا سوبر .. علشان معاك كمان عدسة Ultra Wide بتطلع صور حلوة جدًا في الإضاءات العالية وتقدر تعتمد عليها .. بس لما الإضاءة تقل للأسف مش هتقدر تعتمد عليها وهتعتمد على العدسة الرئيسية بس في التصوير السيلفي.

مقارنتًا بالـMi Note 10 Lite .. في الإضاءات العالية .. شاومي يكسب علشان فتحة العدسة الأضيق بتبقى احسن الصبح .. في التصوير الليلي .. الفيفو يكسب .. والكلام ده بدون جوجل كاميرا.

اما مع الـReno 3 .. فالرينو واخد إتجاه إنه بيفقع الوان صور السيلفي شوية زيادة عن الطبيعي .. والـV19 بيفتح الصور شوية .. تفتيح الصورة ده اللي بيعجب البنات .. بس كتفاصيل عجبني أكتر صور الفيفو.

بالنسبة لتصوير الفيديوهات .. الموبايل بيصور بالكاميرا الخلفية بجودة 4k@30FPS ولكن بدون تثبيت الكتروني .. انما الجودة الأقل الـ 1080p والـ 720p هتلاقي فيهم ثبات الكتروني محترم .. وبالنسبة للتصوير الفيديو بالكاميرا السيلفي فهو على جودة 1080p وفيه ثبات الكتروني سواء على الكاميرا السيلفي الرئيسية او الكاميرا السيلفي الـ Ultra Wide.

ممكن تشوف الصور والفيديوهات المتصورة بالموبايل في فيديو المراجعة في أخر المقالة,


سعر الموبايل :-

سعر الموبايل الرسمي وقت الإعلان عنه 6300 جنية للنسخة الوحيدة بمساحة تخزين 128 جيجا مع 8 جيجا رام.

وطبعًا بينفع تركب كارت ميموري بحجم 512 جيجا وشريحتين إتصال مع بعض في نفس الوقت.


الرأي النهائي :-

مميزات الـVivo V19 :-

  • تركيبة مواصفات قوية مع إعتمادية عالية بدون اي مشاكل ممكن تظهرلك
  • تصميم شيك جدًا بخامات مقبوله و وزن خفيف
  • شاشة مُمتازه بتصميم حديث
  • بطارية قوية بتدعم شحن سريع
  • تجربة شبكات مُمتازه جدًا
  • عوامل الأمان سريعة وإعتمادية
  • كاميرا سيلفي مُحترمه خاصًة الـUltra Wide اللي هتستخدمها كتير الصبح
  • تبريد محترم جدًا للمُعالج لحل مشاكل السخونيه

عيوب الـVivo V19 :-

  • فريم من البلاستيك بيضيع فخامة الزُجاج
  • مش اقوى مُعالج ومش اقوى اداء بالرغم من الإستقرار الرهيب اللي فيه
  • سينسور الكاميرا الخلفيه مش افضل حاجه
  • مفيش NFC واللي موجود في مُعظم المُنافسين من سامسونج وشاومي
  • تسعير الموبايل غالي بالرغم من الإعتمادية اللي الموبايل بيقدمها

فيديو المراجعة :-

قد يعجبك أيضا...

Comments

جاري التحميل...