ترشيحات أفضل موبايلات للتصوير في الفئة المتوسطة في 2020 في مصر !

عملنا ليكم من فترة ترشيحات أفضل الموبايلات للألعاب في الفئة المتوسطة لسنة 2020. وأكيد مش كل الناس أولوياتها أقوى معالج وتشغيل ألعاب الأندرويد، لذلك هنقدملكم النهارده ترشيحات أفضل موبايلات للتصوير في الفئة المتوسطة من سعر 2000 جنية لـ6000 جنية لعام 2020 .. علشان تقدر تشتري موبايل كويس في الكاميرات.

إعتمادي في تقييم الكاميرات مش على الكاميرا دقتها ايه وكده .. إعتمادي على تجربتنا لكل موبايل، وهلخصلك كل مراجعات الهواتف اللي نزلت الفترة اللي فاتت وهجيبلك أفضل الموبايلات للتصوير في الفئة المتوسطة !


فئة 2000 – 3000 جنية :-

في الفئة دي علشان تبقى فاهم الدنيا .. مفيش موبايل هيقدملك كاميرا خرافية، الكاميرات كلها متواضعة الى حد كبير .. وأنا بدوري هجيبلك أفضل كاميرات في الفئة دي.

Galaxy A21s

1- Galaxy A21s

متستغربش .. معالجة سامسونج للكاميرات قوية جدًا مؤخرًا. وبتطلع صور بـHDR مظبوط نوعًا ما ودي حاجه بتبقى غايبة في الفئة السعرية الإقتصادية دي .. الموبايل بيجي بـ4 كاميرا خلفية ويهمنا منهم الأساسية اللي بدقة 48 ميجا بيكسل وفتحة عدسة F/2.0 .. والكاميرا السيلفي بدقة 13 ميجا بيكسل بفتحة عدسة F/2.2.

موبايل Galaxy A21s بيطلع صور حلوة جدًا بالكاميرا الخلفية في الإضاءات العالية والمُعتدلة .. حاجه محترمة فعلًا، صور تكاد تكون الأفضل بالسعر ده .. ولما قارنته مع Redmi Note 9 لاقيت الـA21s بيكسب في معظم أوضاع التصوير.

بالإضافة لإنك هتاخد أحسن تصوير بالعدسة الـWide Angle تحت الـ3000 جنية مع العدسة الـ8 ميجا بيكسل اللي هنا .. طب ايه هي العيوب اللي هتقابلك في التصوير بموبايل A21s ؟

  • مفيش ثبات إلكتروني في تصوير الفيديوهات الـ1080p
  • مفيش Night Mode في الكاميرا الخلفية
  • السيلفي مش الأفضل .. مش وحش لكنه مش الأفضل.

سعر موبايل Samsung Galaxy A21s للنسخة الوحيدة اللي بيتوفر الموبايل من خلال في مصر نسخة 64 جيجا مع 4 جيجا رام بسعر حوالي 2850 جنية.

مراجعة Galaxy A21s :-


Realme 6i

2- Realme 6i

ده الموبايل الأفضل في السيلفي في الفئة دي .. بيجي بـ4 كاميرا خلفية والأساسية منهم 48 ميجا بيكسل بفتحة عدسة F1.8 والسيلفي 16 ميجا بيكسل بفتحة عدسة F/2.0 .. بإختصار الكاميرا الخلفية هنا عادية، متقدرش تتفوق على A21s وفيها نفس مشكلة تصوير الفيديوهات بدون ثبات إلكتروني.

التفوق في Realme 6i بس في السيلفي .. يكاد يكون الأحسن في الفئة السعرية دي .. وطبعًا انا بتكلم عن الفئة دي يعني متفتكرش ان السيلفي خيالي بقى وWoW وكده .. الفكرة بس انه بيطلع أحسن صورة بالسعر ده بالنسبة للمنافسين.

سعر Realme 6i نسخة الـ64 جيجا مع 3 جيجا رام بحوالي 2850 جنية .. ومتشتريش النسخة الـ128 جيجا منه لإن سعرها دخلها في منافسة مع موبايل تاني أجمد منه هكتبلك عنه كمان شوية.

مراجعة Realme 6i :-


متستناش اني اقولك ان الموبايل التالت هو Redmi Note 9 .. بصراحة انا مش عارف أرشحة ليه في الكاميرات .. الكاميرا الخلفية بتاعته خسرت لما اتحطت مع Galaxy A21s في منافسة .. والكاميرا السيلفي بتاعته مش كويسة ومتقدرش تسد مع Realme 6i .. وتصوير الفيديو اخره 1080p والثبات مش قوي أوي .. فأنا مش شايف انه مميز في التصوير.

وطبعًا في موبايلات كتير غابت عن الفئة دي .. موبايل Redmi 9 و Realme C3 .. وللأسف مقدرتش اضيفهم لإن كاميراتهم متواضعة وهما اصلًا في فئة سعرية أقل .. وانا دايمًا بنصح لو عايز كاميرات لازم تزود السعر شوية.

موبايلات انفينكس برده الـNote 7 والـNote 8 غابوا عن الترشيحات في الفئة دي لإن لسه مُعالجة انفينكس للكاميرات مش قد كده .. وميقدروش ينافسوا اوي في الفئة دي .. يمكن Note 8 اتحسن شوية بس لسه برده مش الأفضل.


فئة 3000 – 4000 جنية :-

لو بتدور على أفضل موبايلات للتصوير في الفئة السعرية دي فا تحت الـ3500 جنية قدامك خيار واحد وهو الـRedmi Note 9S .. اما لو تقدر تزود وتبقى تحت الـ4000 جنية اعمل كده وهقولك على موبايلات حلوة في الكاميرات بعد الـNote 9S.

Redmi Note 9S

Redmi Note 9S

موبايل Note 9S بيجي بـ4 كاميرا خلفية .. الأساسية 48 ميجا بيكسل بفتحة عدسة F/1.8 بمستشعر سامسونج GM2 .. السيلفي بيجي بدقة 16 ميجا بيكسل بفتحة عدسة F/2.5 .. والموبايل ده فعلًا بيقدم كاميرات إستثنائية بتطلع صور حلوة جدًا .. وكمان بيدعم ابلكيشن جوجل كاميرا اللي هتطلع صور أحسن وخاصة مع السيلفي .. واللي هو هنا مش قد كده.

وتصوير الفيديوهات في الموبايل معقول جدًا .. الموبايل بيدعم الـ4K من غير مُثبت إلكتروني وبيدعم الـ1080p مع ثبات إلكتروني محترم جدًا.

الـNote 9S أنصحك بالنسخة الصغيرة منه واللي بتيجي بمساحة 64 جيجا مع 4 جيجا رام بسعر 3300 جنية .. النسخة الكبيرة الـ128 جيجا مع 6 رام بسعر 3750 جنية ومنصحش بيها حاليًا.

وده لإن سعرها زي سعر Realme 6 تقريبًا وزي سعر Note 9 Pro النسخة الصغيرة .. وعمومًا فوق الـ3500 جنية بلاش ريلمي 6 ولا نوت 9 برو ولا نوت 9 اس وزود الـ500 جنية دي وأوصل لفئة الـ4000 جنية علشان الفرق كبير.

مراجعة Redmi Note 9S :-


فئة 4000 – 5000 جنية :-

Poco X3

1- Poco X3 NFC

في الفئة دي انا عايز اقولك انك بتروح لحته تانية خالص .. أحسن بكتير من اللي فات .. وأول موبايل هنرشحه هو الـPoco X3، موبايل ممتاز بـ4 كاميرا خلفية والأساسية منهم 64 ميجا بيكسل بفتحة عدسة F/1.9 بمستشعر سوني IMX682 .. مستشعر محترم جدًا .. والسيلفي 20 ميجا بيكسل بفتحة عدسة F/2.2.

الموبايل ده في حته لوحدة في الكاميرات .. كنا عملنا ليكم مقارنة كاميرات بين Poco X3 وRealme 7 وNote 9 Pro ومعظمكم إختار الـX3 NFC لإنه يكون أفضل موبايل في الكاميرات .. وهو فعلًا بيقدم أفضل كاميرا خلفية بـ4000 جنية.

السيلفي بتاعه يمكن يكون مش قد كده .. زيه زي Note 9S و Note 9 Pro وهتحتاج جوجل كاميرا علشان تحسن التجربة بتاعته .. بس تصوير الفيديوهات بقى هو اللي حكاية، لو جيت تصور 4K هتلاقي مثبت إلكتروني .. لأ وكمان لو عايز تثبت الفيديو أكتر أنزل لـ1080p هتاخد فيديو ثابت وناعم بـQuality محترم جدًا وصور محترم جدًا جدًا !

الـPoco X3 في منه نسختين .. نسخة 64 جيجا مع 6 جيجا رام وسعرها 4000 جنية، ونسخة 128 جيجا مع 6 جيجا رام وسعرها 4350 جنية وبرشحلك النسختين عادي.

مراجعة Poco X3 :-


Oppo Reno 3

2- Oppo Reno 3

هتستغرب ؟ انا فعلًا استغربت 😁 .. موبايل Oppo Reno 3 بعد ما رخص .. الموبايل بيجي بـ4 كاميرات خلفية .. الأساسية 48 ميجا بيكسل بفتحة عدسة F/1.8 وفي كمان عدسة مُخصصة للـZoom بتوصل لـ20X .. والسيلفي في الموبايل ده 44 ميجا بيكسل بفتحة عدسة F/2.4.

لما جربنا الموبايل ده وقت ما نزل كان كاميراته كويسة .. دلوقتي بعد ما سعره رخص أعتقد كاميراته بقت تقدر تنافس بقوة في الفئة السعرية دي سواء الأمامية او الخلفية .. معرفش موقفه أيه بالنسبة للـPoco X3 في الكاميرا الخلفية لإني مقارنتهمش ببعض .. بس السيلفي في رينو 3 هيكون أفضل.

بالنسبة لتصوير الفيديوهات فالـReno 3 بيصور على 4K من غير ثبات في الـUltra Steady Mode اللي بينزل الجودة للـ1080p بس الثبات بيبقى ممتاز جدًا.

موبايل اوبو رينو 3 سعره دلوقتي حوالي 4300 جنية للنسخة الوحيدة المتوفرة منه بمساحة تخزين 128 جيجا مع 8 جيجا رام.

مراجعة Oppo Reno 3 :-


Galaxy M31

3- Galaxy M31

موبايل محترم .. هو قديم شوية بس جامد .. كاميراته محترمة جدًا .. بيجي بـ4 كاميرات في الظهر، الأساسية 64 ميجا بيكسل فتحة عدسة F/1.8 بمستشعر سامسونج GW1 .. السيلفي فيه بدقة 32 ميجا بيكسل بفتحة عدسة F/2.0.

ولو عايز رأيي بالمختصر المُفيد .. Galaxy M31 بيقدم أداء متقارب جدًا من Oppo Reno 3 .. الإتنين مُتاحين قدامك، شوف انت ميال أكتر لـOppo ولا لـSamsung .. نقطة تفوق في كاميرات رينو 3 هي العدسة المُخصصة للزوم.

تصوير الفيديوهات في الـM31 على 4K من غير ثبات إلكتروني .. والثبات بيشتغل مع الـ1080p بس .. والـM31 سعره حوالي 4100 جنية للنسخة الـ128 جيجا مع 6 جيجا رام.

مراجعة Galaxy M31 :-


غاب عن الترشيحات في الفئة دي موبايل Infinix Zero 8 .. هو موبايل كويس في الكاميرات وكل حاجة خصوصًا الـNight Mode بس أنا شايف انه ميقدرش ينافس اوي مع وحوش التصوير اللي هنا .. وغاب برده موبايل Realme 7 لإن كاميراته مش مميزة أوي بالنسبة للموبايل اللي هنا.


فئة 5000 – 6000 جنية :-

Galaxy M51

1- Galaxy M51

من فترة كنا عملنا مقارة بين Galaxy M51 وMi Note 10 Lite وOppo Reno 4 .. كلكم إخترتوا M51 في المركز الأول وهو فعلًا أفضل واحد فيهم .. الموبايل بيقدم 4 كاميرات خلفية والأساسية 64 ميجا بيكسل بفتحة عدسة F/1.8 بمستشعر سوني IMX682 .. السيلفي 32 ميجا بيكسل بفتحة عدسة F/2.0.

الموبايل ده فعلًا جامد في التصوير .. سوفت وير كاميرات سامسونج حلو اوي ومش هتحتاج اي حاجه تانية .. يا دوب تصور وهتلاقي صورة حلوة جدًا في معظم أوضاع التصوير بالسيلفي او الخلفية .. والموبايل بيدعم تصوير فيديوهات بجودة الـ4K مع مثبت إلكتروني.

الموبايل سعره حوالي 6100 جنية للنسخة الـ128 جيجا مع 8 جيجا رام .. ولو بتسأل على Galaxy A71 فالـM51 أفضل منه في الكاميرا الخلفية وأقوى بشكل عام.

مراجعة Galaxy M51 :-


Mi Note 10 Lite

2- Mi Note 10 Lite

موبايل جامد جدًا من شاومي بكاميرا خلفية رئيسية 64 ميجا بيكسل فتحة عدسة F/1.9 بمستشعر سوني IMX686 .. مستشعر محترم جدا وبيقدم افضل تفاصيل .. والسيلفي 16 ميجا بيكسل فتحة عدسة F/2.5.

موبايل Mi Note 10 Lite هنا بيقدم أحسن تفاصيل ممكن تاخدها بالكاميرا الخلفية بس معالجة الألوان بتبقى مش قد كده .. وبحتاج تدخل منك في معظم الصور علشان تخليها احلى .. يعني من الأخر الموبايل بيطلعلك الـRow او المادة الخام للصور وانت عدل براحتك .. يناسب جدًا الناس اللي بتحب تعمل Edit بنفسها على الصور.

والموبايل بيصور فيديوهات على 4K مع مُثبت إلكتروني .. والنسخة الـ128 جيجا مع 8 جيجا رام سعرها حوالي 5700 جنية دلوقتي.

مراجعة Mi Note 10 Lite :-


Realme 7 Pro

3- Realme 7 Pro

الريلمي 7 برو بيقدم كاميرا خلفية أساسية 64 ميجا بيكسل بفتحة عدسة F/1.8 بمستشعر سوني IMX682 .. والسيلفي بيجي بدقة 32 ميجا بيكسل بفتحة عدسة F/2.5 .. والموبايل كويس جدًا هو بس معالجة الصور فيه أقل شوية من M51 وNote 10 Lite علشان كده جه في المركز التالت.

موبايل Realme 7 Pro بيدعم تصوير فيديوهات 4K مع ثبات إلكتروني .. والموبايل سعره للنسخة الـ128 جيجا مع 8 جيجا رام حوالي 5700 جنية مصري.

مراجعة Realme 7 Pro :-


وفي الفئة دي كده مرشحناش موبايل Nova 5T المحترم وده لإنه أقل في نقطة الكاميرات بشكل ملحوظ .. ومجموعة BBK عندها 4 موبايلات وهما اوبو رينو 4 وريلمي 7 برو وفيفو V20 .. الـV20 مجربناهوش لسه .. والـReno 4 كاميراته أقل من Realme 7 Pro وبالتالي حطينا ريلمي 7 برو واستغنينا عن رينو 4.


برنامج Adobe Lightroom :-

قبل ما نقفل المقال انا حابب أعرفك على برنامج لازم تجربه لو متعتك هي الكاميرات والتصوير .. برنامج Adobe Lightroom اللي هو من أحسن البرامج في التعديل على الصور .. وده مثال لصورة متصورة بموبايل Mi Note 10 Lite قبل التعديل وبعد التعديل.

دوس علشان تشوفها بالحجم الكامل

البرنامج موجود مجاني على Google Play Store تقدر تحمله .. وتقدر كمان تحمله من على موقع موبيزل .. لو ناسي فا احنا عندنا قسم تحميل برامج مجانية للأندرويد والأيفون.

بعد ما تحمل البرنامج إدخل اعدادات الألوان وعدل في درجة الألوان ودرجة تشبع الألوان براحتك للدرجة اللي أنت تحبها .. تقدر تشوف مثال على التعديل ده وشرح إستخدام البرنامج بالتفصيل في فيديو الترشيحات اللي موجود في بداية المقال .. أطلع شوفه 👆


فيديو مقارنة M51 و Reno 4 و Mi Note 10 Lite :-


فيديو مقارنة كاميرات Poco X3 و Note 9 Pro و Realme 7 :-

قد يعجبك أيضا...

Comments

جاري التحميل...