في موبايلات كتيره بتنزل الفتره دي .. والناس برده عماله تسأل عن أفضل موبايل للتصوير او أفضل كاميرا في موبايل، والنهارده في المقالة دي هقولك أفضل الموبايلات من ناحية الكاميرات في الفئة المتوسطة من اول 2500 جنية ولحد 6000 جنية .. عشان تقدر تشتري موبايل يكون بيصور كويس !
وخلي بالك ان جودة الكاميرا وقدرتها على إنتاج صور كويسه مش بترجع للميجا بيكسل .. شوفنا الفتره الأخيره موبايلات بكاميرات وصلت لـ108 ميجا بيكسل لكن لسه موصلش لأعلى Level في التصوير .. الموضوع بيرجع لحسابات تانيه زي نوع المستشعر وفتحة العدسة وطريقة مُعالجة السوفت وير للصوره .. كذا حاجه بتتحكم في جودة الصورة.
من 2500 لـ3000 جنيه :-
1- Redmi Note 8
الموبايل ده مقدرتش ارشحه في مقالة افضل هواتف الألعاب .. وده عشان الـNote 9 الجديد منه هينزل قريب .. بس في الكاميرات الموبايل ده محترم جدًا .. وهو تقريبًا الموبايل الوحيد اللي بيدعم جوجل كاميرا في الفئة دي بعد الـRealme 5 .. الموبايل ده بيجي بـ4 كاميرات في الضهر والأساسية منهم بدقة 48 ميجا بيكسل وفتحة عدسة F/1.8 والسيلفي بيجي بدقة 13 ميجا بيكسل بفتحة عدسة F/2.0 .. يمكن الكاميرا الأماميه مش قد كده فيه.
بس الموبايل ممتاز وبيطلع صور محترمه جدًا من الكاميرا الخلفيه .. خصوصًا مع إستخدام تطبيق جوجل كاميرا .. حرفيًا هتاخد أفضل كاميرا في الفئة السعرية دي .. وغير كده كمان الـNote 8 هو افضل موبايل بيصور فيديوهات تحت الـ3000 جنيه .. بيصور 4K وبيصور 1080p مع مثبت إلكتروني وجودة الفيديو بتطلع محترمه جدًا.
الموبايل ده سعره حوالي 2800 جنيه مصري للنسخة الـ64 جيجا مع 4 جيجا رام ودي النسخة اللي متوفره وتقدر تجيبها بسهولة حاليًا وهي برده أفضل نسخة من حيث السعر والقيمة اللي هتقدمهالك بالسعر ده.
2- Realme 6i
الموبايل ده بيجي بكاميرا خلفيه 48 ميجا بيكسل F/1.8 والكاميرا الأماميه بدقة 16 ميجا بيكسل مع فتحة عدسة F/2.0 .. الكاميرا الأماميه بتاعت الـRealme 6i احسن حتى من غير جوجل كاميرا .. الموبايل ده بيجي بمعالج من ميدياتك ومعالجات ميدياتك مش بتهتم بدعم المطورين برامج زي جوجل كاميرا.
سوفت وير الكاميرا بتاع ريلمي كويس مش وحش .. بس للأسف مش بيديلك افضل اداء .. يعني لو انت هتقارن سوفت وير ريلمي بسوفت وير شاومي لأ ريلمي هيكسب .. بس موضوع Google Camera في النوت 8 هو اللي خلاني احطه في المركز الأول قبل الـ6i.
وعمومًا الموبايل ده بيدي اداء كاميرات كويس في الفئة السعرية بتاعته .. هو اللي هرشحهولك لو مش حابب النوت 8 لأي سبب .. والـRealme 6i دلوقتي سعره حوالي 2800 جنيه للنسخة الـ64 جيجا مع 3 جيجا رام.
3- Honor 9X Lite
يمكن انت تعترض بس انا شايف ان الموبايل ده الكاميرا الخلفيه بتاعته كويسه .. واللي بتيجي بدقة 48 ميجا بيكسل بفتحة عدسة F/1.8 .. مُقارنتًا بالموبايلات التانيه اللي رشحتها فا هي تقدر تبقى في المركز التالت عادي .. والـNight Mode هو اقوى ميزة في الموبايل ده .. ممتاز جدًا وبيطلع صور مفيش موبايل تاني بيطلعها.
وموبايل Honor 9X Lite مبيدعمش جوجل كاميرا، للأسف معالجات الكيرين من هواوي كلها كده تقريبًا .. ويمكن السيلفي بتاع الموبايل ده ضعيف شوية لإنه بيجي بدقة 8 ميجا بيكسل بفتحة عدسة F/2.0 .. ميقدرش ينافس النوت 8 ولا الـ6i.
الموبايل ده بيتوفر بنسخة بمساحة تخزين 128 جيجا مع 4 جيجا رام والمساحه الكبيره دي ميزه فيه .. وبرده سعره حوالي 2800 جنيه للنسخة دي.
4- Infinix Note 7
الموبايل ده بصراحه مكنتش حابب احطه .. بيجي برده بنفس الكاميرا السيلفي الـ48 ميجا بيكسل .. ممكن اصنفه في المركز الرابع مثلًا بعد الـ9X Lite بس مش هيقدر يتفوق على اي موبايل من الموبايلات اللي فوق دي في الكاميرا الخلفيه.
يمكن يتفوق على الـ9X Lite مثلًا في الكاميرا الأماميه بس بفرق بسيط .. يعني في السيلفي ممكن الـInfinix Note 7 يبقى رقم 3 بعد الـ6i .. والموبايل ده سعره في المحلات حوالي 2850 جنيه للنسخة الـ128 جيجا مع 6 جيجا رام.
من 3000 لـ3500 جنيه :-
1- Redmi Note 9S
الموبايل ده فعلًا بإستخدام الجوجل كاميرا هيديك اقوى تجربة تصوير .. وهينافس معاك لحد سعر 5500 جنيه .. جرب Redmi Note 9S مع اغلى موبايل هنتكلم عنه في المقاله النهارده وهتشوف بنفسك يقدر ينافس ويسد بإستخدام Google Camera ولا لأ .. جوجل كام على الموبايل ده غريب جدًا وبيطلع نتايج مشوفتش زيها بصراحه.
الموبايل ده بيجي بكاميرا خلفيه بدقة 48 ميجا بيكسل بفتحة عدسة F/1.8 بمستشعر سامسونج GM2 والسيلفي بدقة 16 ميجا بيكسل بفتحة عدسة ديقة F/2.5 .. بس اداءها حلو جدًا خصوصًا مع إستخدام جوجل كاميرا.
تصوير الفيديو في الموبايل ده محترم جدًا برده .. الموبايل بيصور 4K وبيصور 1080p مع مثبت إلكتروني .. والموبايل ده بيجي بنسختين واللي بنرشحها الـ64 جيجا مع 4 جيجا رام بسعر 3250 جنيه في المحلات دلوقتي .. والنسخة الـ128 جيجا مع 6 جيجا رام بتيجي بسعر 3700 جنيه.
2- Realme 5 Pro
الموبايل ده لسه على وضعه .. الكاميرا الخلفيه الأساسية بدقة 48 ميجا بيكسل بفتحة عدسة F/1.8 بمستشعر سوني IMX565 .. والكاميرا السيلفي بدقة 16 ميجا بيكسل بفتحة عدسة F/2.0 .. الموبايل برده بيطلع صور ممتازه ومحترمه جدًا بدون اي مشاكل وبيقدر ينافس لسه لحد النهارده.
ومتوفر للموبايل ده تطبيق جوجل كاميرا وبيطلع نتايج محترمه برده يمكن بس تصوير الفيديوهات هنا ميقدرش ينافس مع موبايلات شاومي اللي موجوده فوق .. موبايلات شاومي هتكون افضل كصوت وصوره كمان .. بس عمومًا الـRealme 5 Pro إختيار ممتاز في الفئة دي.
الريلمي 5 برو هتلاقي منه النسخة الصغيره الـ128 جيجا مع 4 جيجا رام بحوالي 3400 جنيه مصري وهي اللي بنرشحها بالسعر ده وبلاش النسخة الكبيره منه.
من 3500 لـ4500 جنيه :-
1- Galaxy M31
الموبايل ده كويس .. تقدر تستخدمه وتصور بأبلكيشن الكاميرا الأساسي بتاع سامسونج وهتاخد صور محترمه جدًا من غير ما تضطر تدخل في حوارات جوجل كاميرا .. الـGalaxy M31 بيجي بكاميرا خلفيه 64 ميجا بيكسل بفتحة عدسة F/1.8 بمستشعر سامسونج GW1 .. والكاميرا السيلفي بدقة 32 ميجا بيكسل بفتحة عدسة F/2.0.
الكاميرا لما جربتها ادتني صور كويسه محترمه جدًا .. وطلعت معايا صور احسن من الـRealme 6 في بعض اوضاع التصوير .. يمكن في اوضاع تانيه الريلمي 6 تفوق بس عمومًا انا بحب الألوان اللي بتطلعها موبايلات سامسونج في الفتره الأخيره .. معالجة الصور عند سامسونج اتحسنت جدًا.
الموبايل ده بيجي بسعر 4050 جنيه للنسخة الوحيده المتوفره منه بمساحة تخزين 128 جيجا مع 6 جيجا رام.
2- Huawei Nova 7i
الموبايل ده برده كاميراته كويسه .. الكاميرا الخلفيه الأساسية بتيجي بدقة 48 ميجا بيكسل بفتحة عدسة F/1.8 اما الكاميرا السيلفي بتيجي بدقة 16 ميجا بيكسل بفتحة عدسة F/2.0 .. سوفت وير هواوي اداءه كويس جدًا في الصور وبيعمل معالجة محترمه للصور .. وطبعًا مفيش جوجل كاميرا على الموبايل ده.
الـNight Mode كمان كويس واداء الكاميرات عمومًا محترم جدًا بالسعر ده .. والسيلفي كمان ممتاز جدًا في الموبايل ده .. السيلفي فعلًا في الموبايل ده محترم جدًا وده اللي خلاني احط الـNova 7i فوق الـRealme 6 .. ومن الحاجات بقى اللي معجبتنيش ف النوفا 7i هي تصوير الفيديوهات لإن اخره 1080p وكمان مفيش مثبت إلكتروني.
الموبايل برده بيجي بنسخة واحده بمساحة تخزين 128 جيجا مع 8 جيجا رام والنسخة دي بتيجي بسعر 4100 جنيه مصري.
3- Realme 6
الموبايل ده بيجي بأربع كاميرات خلفيه، الأساسية بدقة 64 ميجا بيكسل بفتحة عدسة F/1.9 بمستشعر سامسونج GW1 .. والكاميرا السيلفي بدقة 16 ميجا بيكسل بفتحة عدسة F/2.0 والسيلفي بقى هو نقطة الضعف القوية اللي خلت الموبايل ده يبقى المركز التالت.
زي ما وضحت لك فوق ان الكاميرا السيلفي في موبايل Realme 6 معجبتنيش خصوصًا بالليل .. والـNight Mode ضايع .. والجوجل كاميرا كمان مفيهوش Night Mode للكاميرا السيلفي فا بصراحه السيلفي بالليل مش حلو خالص.
بالنسبة للكاميرا الخلفيه بقى هتنافس مع الـGalaxy M31 والـNova 7i عادي خالص واداءهم كلهم قريب من بعض عمومًا .. بس برده هنلاقي ان الـRealme 6i اقل منهم في المجمل في الكاميرا الخلفيه كمان .. والموبايل ده بيدعم تصوير فيديوهات 4K و1080p عادي بس مع دعم للمثبت الإلكتروني بس جودة الصوت اللي فيه وحشه للأسف لإن مفيش مايكروفون عازل للضوضاء.
النسخة الـ128 جيجا مع 4 جيجا رام من الموبايل ده دلوقتي بحوالي 3800 جنيه ف المحلات .. اما النسخة الـ128 جيجا مع 8 جيجا رام موجوده بسعر حوالي 4400 جنيه برده في المحلات.
4- Galaxy A51
الموبايل ده بيجي بكاميرا خلفيه بدقة 48 ميجا بيكسل بفتحة عدسة F/2.0 .. والكاميرا السيلفي بتيجي بدقة 32 ميجا بيكسل بفتحة عدسة F/2.2، الموبايل ده نازل بقاله فتره وحقق مبيعات قوية والسلسلة دي عمومًا من سامسونج بتبيع كتير .. والكاميرا بتاعت الـGalaxy A51 فعلًا مش وحشه زي ما كتير توقع.
يمكن بس الـNight Mode في الموبايل ده متواضع شوية مش بيقدر يسد جامد .. بس السيلفي كويس واداءه محترم وانت عمومًا لو بتدور على كاميرات كويسه من موبايلات سامسونج في الفئة دي هتلاقي موبايل كتير ومعظمها بيقدم صور من الأخر حلوه وكويسه.
الموبايل ده بيدعم تصوير فيديوهات 4K و1080p وبيدعم مثبت إلكتروني .. وسعر الموبايل دلوقتي في السوق حوالي 4300 جنيه للنسخة الـ128 جيجا مع 6 جيجا رام.
5- Note 8 Pro, 9X Pro
الموبايلين دول ليهم بدائل اقوى في الفئة دي .. لو حابب تجيب الـRedmi Note 8 Pro عشان الكاميرات فا بلاش منه وروح هات الـRedmi Note 9S هيديك كاميرا افضل مع دعم للجوجل كاميرا وهتاخد نتيجة اقوى بشكل عام.
اما لو عايز تجيب الـHonor 9X Pro عشان الكاميرات فا الـNova 7i نفس الموبايل تقريبًا مع خامات بلاستيك بس هيديك تجربة كاميرات قوية واقوى بفرق ملحوظ عن الـ9X Pro.
من 4500 لـ6000 جنيه :-
1- Galaxy A71
الموبايل ده يستحق المركز الأول بدون تفكير .. الكاميرا الخلفيه الأساسية بدقة 64 ميجا بيكسل بفتحة عدسة F/1.8 بمستشعر سامسونج GW1 .. والكاميرا السيلفي بتيجي بدقة 32 ميجا بيكسل بفتحة عدسة F/2.2 .. الموبايل ده من اقوى موبايلات الفئة المتوسطة حاليًا من حيث الكاميرات.
الموبايل بيقدم Package او مجموعة مواصفات محترمه جدًا بالسعر ده وأهمها وأفضلها في الموبايل ده هي الكاميرا .. الكاميرات الـ64 ميجا بيكسل بمستشعر سامسونج الـGW1 مع الكاميرا السيلفي المحترمه ودعم تصوير الفيديوهات الـ4K .. مفيش اي مشكلة في كاميرات الموبايل ده والصور اللي بتطلع منها فعلًا من اقوى الصور !
موبايل Galaxy A71 بيجي بنسخة واحده بمساحة تخزين 128 جيجا مع 8 جيجا رام وسعره 6000 جنيه مصري .. وممكن تلاقيه في المحلات بحوالي 6000 جنيه مصري.
2- Honor 20, Nova 5T
الموبايلين دول يُعتبروا واحد في كل حاجه .. كاميرا خلفيه 48 ميجا بيكسل بفتحة عدسة F/1.8 بمستشعر سوني IMX586 والكاميرا السيلفي بتيجي بدقة 32 ميجا بيكسل بفتحة عدسة F/2.0 والسيلفي موجود في ثُقب في الشاشة زي الـA71 فوق .. والموبايلين مش بيدعموا جوجل كاميرا.
عمومًا اداء الكاميرات في الـNova 5T والـHonor 20 مُمتاز مع Night Mode ممتاز .. هتاخد من الموبايلين دول تجربة كاميرات خلفيه مُحترمه جدًا .. بس السيلفي في الموبايلين دول بقى بالليل مش أفضل حاجه وميقدرش ينافس موبايلات زي الـA71.
الـHonor 20 والنوفا 5T مُميزين كمان في موضوع تصوير الفيديوهات الـ4K مع دعم للمثبت الإلكتروني .. النوفا 5T سعره في المحلات دلوقتي حوالي 5700 جنيه للنسخة الـ128 جيجا مع 8 جيجا رام اما الهونر 20 سعره حوالي 5400 جنيه للنسخة الـ128 جيجا مع 6 جيجا رام.
3- Realme 6 Pro, Realme XT
الموبايلين دول بيجو بنفس الكاميرا الخلفيه الـ64 ميجا بيكسل بفتحة عدسة F/1.8 مع مستشعر سامسونج GW1 .. الصور اللي بتطلع من الموبايلين دول قريبه من بعض جدًا والفرق الوحيد بينهم هو معالجة السوفت وير .. بالرغم من ان الموبايلين من شركة واحده وبنفس الواجهة بس في إختلاف في معالجة السوفت وير للصور اللي بتطلع من كل موبايل.
بس الفرق مش كبير .. يمكن يبان شوية في الـNight Mode وطريقة معالجة كل واحد للصوره .. هتلاقي الـRealme 6 Pro مختلف واحسن شوية عن الـXT.
بس الكاميرا السيلفي بقى ككاميرا رئيسية شايفة احسن في الـRealme XT خصوصًا في الـNight Mode .. بس الريلمي 6 برو بيجي بكاميرا سيلفي مُزدوجه الأساسية منهم 16 ميجا بيكسل بفتحة عدسة F/2.1 للتصوير العادي .. والتانيه بدقة 8 ميجا بيكسل بفتحة عدسة F/2.2 وهي Ultra Wide بتطلع صور بزاوية واسعه .. ودي نُقطة تفوق على الاكس تي.
وكمان تصوير الفيديوهات في الـ6 برو فيه ثبات إلكتروني في الكاميرا السيلفي ودي نقطة قوية مش موجوده في الـXT .. وعمومًا كل واحد فيهم بيتفوق في حاجه .. وبالنسبة لتصوير الفيديوهات الاتنين بيصوروا 4K بس الـ6 برو فيه ثبات إلكتروني بس تسجيل الصوت فيه مش احسن حاجه.
الموبايلين بيجو بنفس السعر تقريبًا .. النسخة الـ128 جيجا مع 8 جيجا رام الوحيده المتوفره من كل موبايل فيهم بتيجي بسعر حوالي 5200 جنيه في المحلات.
موبايلات مترشحتش :-
مبدئيا لازم تبقا عارف ان Xiaomi Mi Note 10 Lite نازل خلاص أخر الشهر و هيقدم كاميرات قوية جدا في فئة الـ 6000 جنية وهنجرب الموبايل وقت ما ينزل ونشوف فعلا يستاهل الترشيح ويقدر ياخد لقب أفضل كاميرا موبايل بـ 6000 جنية ولا ؟
في موبايلات مرشحناهاش زي الـReno 2F وده منصحش بيه دلوقتي خالص لإن الـReno 3 على نزول خلاص .. وفي كمان الـXiaomi Mi 9T .. الموبايل ده قوي جدًا ومفيهوش اي مشاكل .. موبايل محترم من شاومي فيه تصوير فيديوهات 4K وفيه ثبات إلكتروني والكاميرا الخلفيه فيه محترمه .. بس الكاميرا السيلفي فيه مش قد كده بس الموبايل مبقتش اشوفه جديد في السوق .. الموبايل لو لاقيته وعايز موبايل محترم من شاومي كويس في الفئة السعريه دي وينافس يبقى توكل على الله فيه.
وفي كمان الـMi 9 Lite موبايل محترم جدًا وبيقدم تجربة كاميرات محترمه جدًا سواء اماميه او خلفيه بمستشعر قوي من سوني ومعالج بيدعم تشغيل الجوجل كاميرا .. الموبايل مرشحتهوش عشان مش منتشر كتير في مصر بس الموبايل ده بشكل عام بيقدم خلطه محترمه جدًا شاشة اموليد ممتازه مع خامات زُجاجيه محترمه جدًا ومعالج محترم مع تجربة كاميرات قوية وبطارية بتدعم الشحن السريع وكل ده تقريبًا في حدود الـ4300 جنيه.
والـVivo V17 Pro اللي دخل دماغ ناس كتير برده لما نزل بسبب كاميراته .. الموبايل ده محترم جدًا في الكاميرات خصوصًا الكاميرا السيلفي اللي كانت مُزدوجه .. بس للأسف مقدرتش ارشح الموبايل ده لإن الجيل الجديد منه Vivo V19 هينزل الاسواق المصرية قريب وبسعر اقل.
لا تنسى تحميل برنامج جوجل كاميرا على موبايلك .. لو بيدعم البرنامج هتلاقيها في المقالة !
Comments