لو أهم حاجه عندك في موبايلك هي الكاميرا وبتفكر تشتري موبايل الفترة اللي جاية .. يبقى لازم تحاول توصل لأفضل موبايل بيقدم كاميرات مع مجموعة مواصفات متوازنه جنب الكاميرات دي، خاصًة ان الكاميرات مش برقم ميجا بيكسل فقط .. دي بالمعالج وبالسوفت وير وبحاجات تانيه كتير .. هنقدملكم ترشيحات أفضل كاميرات الفئة المتوسطة.
من 2000 جنية لـ3000 جنية :-
1- Realme C25
أول موبايل في الفئة دي هو Realme C25 من شركة ريلمي .. بيجي بكاميرا خلفية رئيسية 48 ميجا بيكسل بفتحة عدسة F/1.8 وبيجي بكاميرا سيلفي 8 ميجا بيكسل بفتحة عدسة F/2.0 .. والموبايل موجود في النسخة المصري للنسخة الـ64 جيجا مع 4 جيجا رام بسعر 2700 جنية.
في تجربة الموبايل ده جربته جنب موبايلات منافسة من شاومي وانفينكس .. وفعلًا الموبايل كان معقول جدًا في التصوير وقدر يتفوق في بعض الصور .. وده لإن ريلمي اهتمت بشكل كبير جدًا بالسوفت وير بتاع الكاميرات في الموبايل وده خلى معالجة الصور مقبولة جدًا، وكمان السيلفي كويس جدًا في الفئة دي.
2- Samsung Galaxy M12
الموبايل ده هو يعتبر نفس موبايل Galaxy A21s لكن مع تصميم مختلف ومعدل تحديث اعلى في الشاشة وتسعير أقل .. بيجي بكاميرا خلفية 48 ميجا بيكسل بفتحة عدسة F/2.0 مع كاميرا سيلفي 8 ميجا بيكسل بفتحة عدسة F/2.2 .. وسعره للنسخة الـ64 جيجا مع 4 جيجا رام 2600 جنية ونسخة الـ128 جيجا مع 4 جيجا رام 2800 جنية.
السيلفي في Galaxy M12 ده أقل من Galaxy A21s لكن مفيش فرق واضح بينهم .. وبالنسبة للكاميرا الخلفية فا هي ممتازة والموبايل هيقدر يطلع لك صور معقولة جدًا في الفئة السعرية دي.
3- Redmi Note 8 2021
الموبايل ده كاميراته أحسن من Poco M3 وأحسن من Redmi 9T علشان كده هو اللي دخل الترشيحات .. بيجي بكاميرا خلفية 48 ميجا بيكسل بفتحة عدسة F/1.8 مع كاميرا سيلفي 13 ميجا بيكسل بفتحة عدسة F/2.0 .. نسخة الـ64 جيجا مع 4 جيجا رام بسعر 2550 جنية اما نسخة الـ128 جيجا مع 4 جيجا رام بسعر 2850 جنية.
موبايل Redmi Note 8 2021 بيقدم كاميرا خلفية مُحترمة جدًا تقدر تعتمد عليها .. والسيلفي في الإضاءة العالية معقول الى حد كبير، لكن في الإضاءه القليلة بيكون ضعيف جدًا للأسف.
من 3000 جنية لـ4000 جنية :-
1- Samsung Galaxy A22
الموبايل ده بيجي بكاميرا خلفية 48 ميجا بيكسل بفتحة عدسة F/1.8 فيها مثبت بصري اللي بيساعد في صور الـNight Mode انها تطلع أفضل وكمان بيثبت الفيديوهات .. كاميرا سيلفي 13 ميجا بيكسل بفتحة عدسة F/2.2 .. بيتوفر بنسختين أنصحك بالنسخة الصغيرة الـ64 جيجا مع 4 جيجا رام بسعر 3100 جنية.
موبيل Galaxy A22 محترم جدًا في التصوير على سعره .. خاصًة في السيلفي الموبايل ده يعتبر أفضل حاجه في فئته من حيث الكاميرا السيلفي وبيتفوق على معظم المنافسين للأسف.
2- Redmi Note 10
الموبايل ده بيجي بكاميرا خلفية 48 ميجا بيكسل بفتحة عدسة F/1.8 مع كاميرا سيلفي 13 ميجا بيكسل بفتحة عدسة F/2.5 .. أنصحك بالنسخة الـ128 جيجا مع 4 جيجا رام بسعر 3200 جنية مصري.
موبايل Redmi Note 10 بيقدم كاميرات محترمة جدًا في التصوير في الفئة دي .. بس مش أفضل حاجه في الـNight Mode .. الـA22 بيتفوق في التصوير الليلي وكمان بيتفوق في السيلفي وعلشان جه ريدمي نوت 10 جه في المركز الثاني .. لكن بشكل عام الموبايل كويس في الفئة دي في التصوير.
3- Poco X3 NFC
أحسن اختيار في الفئة دي بقى هو Poco X3 NFC .. أحسن من الخيارات اللي فوق، بيجي بكاميرا خلفية 64 ميجا بيكسل بفتحة عدسة F/1.8 مع سيلفي 20 ميجا بيكسل بفتحة عدسة F/2.2 .. بيتوفر بالنسخة الـ128 جيجا مع 6 جيجا رام وسعرها في حدود الـ4000 جنية مصري.
الموبايل ده كاميراته جامده جدًا، كسب مُنافسين كتير منهم Realme 7 و Redmi Note 9 Pro في مقارنة كاميرات عملناها من فتره بينهم .. لكن في مُشكلتين لو اختارت الموبايل ده :-
المشكلة الأولى :-
لو زودت 400 جنية بس هتجيب موبايل Poco X3 Pro واللي بيقدم معالج أقوى بفرق ضخم، وبيجي بنفس التصميم ونفس الشاشة لكن الكاميرات بتكون أقل من نسخة الـNFC .. وبالتالي هتحتار والاختيار ليك في الأخر.
المشكلة الثانية :-
في نفس الفئة السعرية هتلاقي Redmi Note 10S من شاومي .. شاشة أحسن وتصميم أحسن، لكن كاميراته أقل حاجه بسيطة في الأداء الفعلي، وهتلاقي Galaxy A32 و Realme 7 .. الاتنين كويسين في الكاميرات لكن ريلمي 7 بيتفوق في مجموعة المواصفات اللي بيقدمها جنب الكاميرات القوية.
من 4000 جنية لـ5000 جنية :-
1- Redmi Note 10 Pro
الموبايل ده بيقدم كاميرا خلفية 108 ميجا بيكسل بفتحة عدسة F/1.9 بمستشعر من سامسونج .. وبيجي بكاميرا سيلفي 16 ميجا بيكسل بفتحة عدسة F/2.5، أنصحك بالنسخة الـ128 جيجا مع 6 جيجا رام واللي سعرها حوالي 4450 جنية مصري.
موبايل Redmi Note 10 Pro كويس جدًا في التصوير .. عجب كل اللي جربه في الكاميرات تقريبًا، تقدر تعتمد عليه كُليًا في الكاميرات وهيعجبك جدًا .. السيلفي بس ممكن ميكونش أفضل حاجه لكنه مقبول برده وأداءه كويس، وطبعًا الكلام ده بغض النظر عن المشاكل والعيوب اللي في الموبايل ده.
2- Mi 11 Lite
لو مش عايز العيوب اللي في الـNote 10 Pro او لو الموبايل لـ بنت فا Mi 11 Lite هيكون هو أفضل حاجه .. كاميرا خلفية 64 ميجا بيكسل بفتحة عدسة F/1.8 مع كاميرا سيلفي 16 ميجا بيكسل بفتحة عدسة F/2.5، نسخة الـ128 جيجا مع 8 جيجا رام سعرها حاليًا في حدود الـ4850 جنية مصري.
الكاميرات أقل في الرقم من ريدمي نوت 10 برو لكن الأداء مُتقارب .. وميزة الموبايل ده الأقوى انه أصغر وأخف في الإيد وأشيك في التصميم وخاماته أحسن.
3- Realme 7 Pro
موبايل Realme 7 Pro هو موبايل قديم بس مازال ممتاز .. وسعره منطقي عن الجيل الأحدث Realme 8 Pro .. بيقدم كاميرا خلفية 64 ميجا بيكسل بفتحة عدسة F/1.8 وكاميرا سيلفي 32 ميجا بيكسل بفتحة عدسة F/2.2 ونسخة الـ128 جيجا مع 8 جيجا رام منه سعرها في حدود 4500 جنية مصري.
موبايل معقول جدًا في التصوير .. ممكن ميكونش أحسن من موبايلات شاومي في الفئة دي في الكاميرا الخلفية، لكن اللي مُتأكد انه ممتاز ويتفوق هو الكاميرا السيلفي، هي الأفضل على الإطلاق في الفئة دي.
من 5000 جنية لـ6000 جنية :-
برشحلك في الفئة السعرية دي خيارين فقط وهما Vivo V21 و Galaxy A52 .. مفيش أحسن من الموبايلين دول في التصوير في الفئة دي، الموبايلين بيتقدموا بكاميرا خلفية 64 ميجا بيكسل بفتحة عدسة F/1.8 وفيهم مثبت بصري، وأداءهم ممتاز جدًا ومفيش واحد فيهم أقل من التاني في حاجه.
السيلفي برده ممتاز في الموبايلين، الـV21 فيه مثبت بصري في الكاميرا السيلفي ودي مش موجودة في الـA52 .. لكن بشكل عام الاتنين ممتازين جدًا وهيقدمولك أداء مُرضي بشكل كبير في الفئة دي.
موبايل Galaxy A52 سعره للنسخة الـ128 جيجا مع 8 جيجا رام حوالي 5500 جنية مصري، اما موبايل Vivo V21 سعره للنسخة الـ128 جيجا مع 8 جيجا رام برده في حدود الـ5500 جنية مصري، وانت تختار بينهم اللي يعجبك.
طبعًا في خيارات تانيه ومنها Oppo Reno 5 4G لكن مش كويس في التصوير .. مقبول بس مش الأفضل وميترشحش، ممكن الفترة الجاية لما سعره يقل يكون ممتاز، وموجود كمان Realme 8 Pro اللي يعتبر كويس جدًا في الفئة دي بالكاميرا الـ108 ميجا بيكسل .. لكن للأسف سعره غالي جدًا على باقي مواصفاته.
وشاومي كمان عندها في الفئة دي Poco X3 GT و Poco F3 ودي موبايلات بتهتم بالجانب العملي، أداء وسرعة وبرامج وألعاب، بتقدملك معالجات قوية وتصميمات مختلفة وشاشات بمعدل تحديث مرتفع، لكن الكاميرات في الموبايلات دي مش مميزة خالص.
Comments