من فترة عملنا ليكم مراجعة لاب توب Dell G3 3500 .. وده كان أفضل لاب توب للألعاب الثقيلة لكن سعره كان 15 الف جنية تقريبًا .. دلوقتي جه الدور على الفئة الإقتصادية .. لو عايز تشتري لاب توب بسعر متوسط 6000 جنية .. هتلاقي قدامك خيارين وهتبقا محتار.
الخيار الأول هو لاب توب جديد وهو Lenovo S145 وده أفضل لاب توب جديد في حدود سعر 6000 جنية.. وللاسف اللاب ده امكانياته متواضعه لأن الفئة السعرية ديه مفيش لاب بمواصفات قوية تماما في اللابات الجديدة.
الخيار الثاني هو لاب توب إستيراد الخارج وهو HP Probook 650 G1 .. اللاب توب الإستيراد يعني لاب توب مستعمل لكن جاي من بره .. وده بيكون مواصفاته أحسن شوية لكن بيكون تصميمه قديم على عكس اللاب توب الجديد اللي هيقدم تصميم كويس لكن مواصفات متواضعه.
التصميم :-
الـ Lenovo S145 الجديد .. أقوى حاجة فيه تصميمه علشان لاب توب جديد طبعا .. اللاب رفيع جدًا تخانه 2 سم بس مع وزن خفيف 1.8 كيلو جرام .. اللاب نفسه شكله شيك و واخد Style لابات لينوفو الأغلى في السعر .. وطبعًا الخامات من البلاستيك المقوى .. واخده Finish شبه المعدن بس هو بلاستيك خفيف جدًا لدرجة انه اتخربش من كام يوم استخدام.
مفصلة الشاشة هنا كبيرة .. واخدة حجم الشاشة كلها تقريبًا وده طبعا بيخليها عملية في الإستخدام وصعب اللاب مفصلته تبوظ معاك بسهولة .. وده عموما ستايل لاب توب لينوفو كلها .. هما بيهتموا أوي بموضوع المفصلة .. وكمان المفصلة هنا بتفتح لحد 180 درجة.
الـKeyboard كبيرة وفيها أرقام وواخده شاسية اللاب توب كله .. ومفيهاش Back Lights او إضاءه في الكيبورد في الفئة السعريه دي .. بس ضغطة ازرار الكيبورد هنا مريحة جدا .. الـTouchpad في اللاب توب ده سيئة جدًا .. بطيئة وصعب تتعامل بيها وضغطة الزرار المدمجة فيها مش عملية خالص .. لازم تستخدم ماوس مع اللاب ده.
على اليمين مدخل SD Card ومدخل السماعات الـ 3.5 مللي .. وعلى الشمال مدخل كابل الشاحن ووصلة الـHDMI .. و3 مداخل USB .. أول واحدة فيهم Type 2 والإتنين التانين المدخل السريع 3.1 .. وبعد كده لمبة حالة البطارية .. ومفيش هنا مكان DVD Room.
قدام في الفريم الأمامي في جزء كده محطوط فيها سماعتين اللاب توب .. واحدة يمين و واحدة شمال .. دول صعب يتكتموا لإن مكانهم ذكي جدًا .. بالنسبة لصوتهم مش عالي ومفيهوش Bass.
بالنسبة بقى للاب توب HP Probook 650 G1 الإستيراد .. طبعًا التصميم هنا قديم لان اللاب ده نفسه أول انتاج ليه كان في 2014 .. من وقت طويل فات .. المهم اللاب تخانته 3 سم تخانه كبيرة ووزنه تقيل 3.2 كجم .. شكل التصميم نفسه قديم في اللاب ده .. الخامات من البلاستيك بس أحسن من البلاستيك الموجود في لاب توب لينوفو بصراحة.
ولكن المميز في اللاب ده إن الفريم اللي حول الكيبورد اللي إيدك بتلمسه علطول بيكون من المعدن علشان يديك احساس الفخامة .. مفصلة الشاشة هنا مختلفه شوية عن لينوفو S145 هنا المفصلة قطعتين من جوانب الشاشة .. حجمهم صغير .. مفصلة الشاشة هنا أضعف بشكل واضح من اللينوفو ولازم تاخد بالك وانت بتفتح وتقفل اللاب ده.
الكيبورد هنا واخدة حجم اللاب كله .. واخدة Style او شكل قديم شوية وضغطة أزرار الكيبورد نفسها اتقل شوية مش مريحة زي اللينوفو .. وبرده مفيش Backlights .. لو بصيت في الـKeyboard هتلاقي في زرار في النص شغال زي الماوس كده.
الـTouchpad هنا حلوة وسريعة والأزرار مفصولة عن بعضها والزرار متكررة فوق وتحت علشان لو بتعمل حاجة على الـTouchpad وطلعت لفوق بصباعك تلاقي أزرار ولو نزلت تحت تاني تلاقي ازرار .. هي شكلها قديم بس عملية في الشغل عليها .. وفي بصمة تحت الـKeyboard سريعة وعملية .. وفي زرارين فوق على اليمين، واحد بيقفل الصوت وواحد بيقفل الواي فاي.
الجنب اليمين هتلاقي مدخل VEGA قديم وملوش إستخدام حاليًا .. مدخل Display Board قديم برده .. ومدخلين USB 3.0 ومدخل السماعات الـ3.5 مللي .. الجنب الشمال هنلاقي مدخل الشحن ووصلة الإنترنت و3 مداخل USB 3.0 وتحتيهم مدخل SD Card وجنبهم DVD Room ومدخل صغير للـSmart Card.
في الفريم الأمامي في أربع لمبات .. واحدة للـWi-Fi وواحدة للشاحن وواحدة للبطارية والأخيرة بتاعت الهارد .. والـSpeaker هنا موجود تحت الشاشة قدام الـKeyboard .. صوته مش أحسن حاجه بس أقل من الـLenovo S145 لو هتقارن.
الشاشة :-
الشاشتين بيجو بقياس 15.6 بوصة .. فريم لاب توب لينوفو الجديد أصغر بفرق ملحوظ عن فريم لاب توب اتش بي الإستيراد .. شاشة لينوفو S145 بدقة HD .. شاشة HP Probook 650 G1 بدقة FHD+.
ده غير إن سطوع وألوان شاشة الـHP الإستيراد أحسن من شاشة لينوفو الجديد .. زوايا الرؤيا في الإتنين مش قد كده بس احسن شوية في الـHP.
انا شايف شاشة الـHP الإستيراد احسن من ناحية الدقة والسطوع والألوان .. بس على حساب شكل أقدم شوية وفريم او حواف للشاشة اكبر لان ستايل اللاب نفسه قديم طبعًا.
الأداء :-
وده أهم فرق بين اللاب توبات اللي معانا .. لينوفو S145 الجديد بيجي بمعالج AMG A6 9225 التردد بتاعه بيوصل لـ3 جيجا هيرتز بإستهلاك 15 واط .. وده معالج جديد مبني على معمارية موفرة للطاقة ولكن كمجمل أداء فهو معالج ضعيف نسبيًا ولكنه أفضل معالج لاقيته في لاب جديد بالسعر ده .. مع كارت شاشة مدمج Radeon R4 مع 4 جيجا رام.
اما الـHP الإستيراد بيجي بمعالج قديم نسبيًا ولكنه كان قوي وقتها .. وهو Core i5 4300M التردد بتاعه بيوصل لـ3.3 جيجا هيرتز باستهلاك طاقة كبير شوية 37 واط .. طبعا المعمارية بتاعته أقدم بكتير وبالتالي إستهلاكه للطاقه أكبر .. مع كارت شاشة مدمج Intel وخارجي Radeon 8750M بـ1 جيجا رام DDR5 .. مع 8 جيجا رام.
طبعا واضح من توليفة المواصفات .. ان لاب توب HP الإستيراد أقوى بفرق 100% من اللاب اللينوفو من ناحية الاداء.
اللاب توب اللينوفو الجديد يناسب إستخدام خفيف خالص وممكن كمان تحس بتهنيج فيه مع أي مهام بسيطة .. ولو يكن فتحت مثلًا فيديو على اليوتيوب على المتصفح وعملت Full Screen تحس ان اللاب مش قادر يواكب اللي انت بتعمله .. عمومًا أنا شايف اللي يفكر يشتري اللاب لينوفو S145 الجديد لازم يبقى متصالح مع نفسه وعارف انه بيجيب لاب توب جديد بس المعالج بتاعه على يناسب الإستخدام الخفيف فقط.
من الناحية التانية لو هنقارن مع لاب توب HP Probook 650 G1 الإستيراد هنلاقيه بيقدم تجربة أحسن شوية والمهام البسيطة اللي اللينوفو بيعملها بصعوبة بتقدر تعملها بسهولة على اللاب ده .. وكمان ممكن تحمل أكتر على اللاب وتعمل مهام اصعب واصعب زي مونتاج خفيف مثلًا .. وكمان متنساش انك معاك كارت شاشة خارجي فده هيساعدك أكتر في الإستخدامات التقيله بعيدًا عن كارت الشاشة المدمج في اللاب اللينوفو الجديد.
أما بالنسبة للسخونية فا طبعًا اللاب الـ HP الاستيراد معمارية المعالج أقدم بكتير وبالتالي اكيد استهلاكه للطاقه اكتر واكيد سخونيته أكتر ولكن بصراحة نظام التبريد بتاعه مش بطال خالص .. اللاب بيشفط الهوا من تحت ويخرج السخونية من على اليمين .. طبعا الجزء اليمين لو حطيت إيدك قدامه هتحس بسخوينه .. بس الكلام ده مش بيقصر على جسم اللاب نفسه او الفريم اللي حوالين الكيبورد اللي انت بتحط ايدك عليه ومش هتحس بازمه في الحرارة.
من الناحية التانية لينوفو S145 مفيهوش نظام تبريد كويس .. بس اللاب أساسًا مش بيسخن جامد .. لإنه اصلا موفر جدا جدا لإستهلاك الطاقة زي ما وضحنا .. ولو هتقيس سخونيه قصاد سخونيه .. فاللينوفو أكيد بيسخن أقل مقابل اداء أقل.
البطارية :-
بطارية لينوفو S145 الجديد 35 واط وبطارية الـHP الإستيراد 56 واط .. طبعا بطارية الـHP أكبر بفرق ملحوظ.
الإستهلاك الفعلي .. لو إستخدام خفيف خالص نقل بيانات وتصفح .. هتلاقي لينوفو قعد معاك ساعتين ونص .. والـHP حوالي ساعتين.
المعالج بتاع لينوفو موفر جدًا للطاقة ولما تيجي تستخدم اللاب توب من غير شاحن هتاخد تجربة سيئة .. هتحتاج إن أنت توصل الشاحن علشان تستخدمه إستخدام طبيعي.
على عكس الـHP المعالج بتاعه شغال بكفاءة معقوله من غير الشاحن وبيديلك تجربة كويسة جدًا من غير ما توصل الشاحن وبالتالي بيتسهلك بطارية أكثر من لينوفو واصلا المعالج بتاع الـHP مبني على معمارية قديمة بتستهلك طاقة أكتر مع مراعاة إن حجم بطارية اتش بي اكبر وده في الأخر اترجم للاستهلاك اللي انا وضحته.
زمن الشحن في لاب توب لينوفو 3 ساعات .. وفي لاب توب اتش بي 3 ساعات إلا تلت مع إن بطاريته أكبر بس الشاحن بتاعه أسرع بفرق ملحوظ .. قوة الشاحن 90 واط في الاتش بي الاستيراد .. لكن شاحن اللينوفو الجديد 45 واط بس.
سعر Lenovo S145 و سعر HP Probook 650 G1 :-
- لاب توب Lenovo S145 الجديد بمعالج AMD A6 وكارت شاشة داخلي وشاشة 15.6 بوصة مع هارد 500 جيجا و4 جيجا رام بسعر 5800 جنية
- لاب توب HP Probook 650 G1 الإستيراد بمعالج i5 4300M وكارت شاشة AMD 8750M وشاشة 15.6 بوصة مع هارد 500 جيجا و8 جيجا رام بسعر 6000 جنية
الرأي النهائي :-
لاب توب لينوفو الجديد يكسب في نقطة أنه جديد فقط .. طبعًا في ناس بتفضل اللاب توب الجديد، تصميم أشيك وأخف .. لكن مكسبش في أي حاجه تانية .. من الأخر انا شايف لو هتجيب لاب توب لينوفو الجديد لازم تبقى فاهم إمكانيات اللاب توب .. وتبقى فاهمك إنك هتستخدمه إستخدام خفيف ومش هتقدر تستخدمه إستخدام متوسط او مكثف لان امكانياته لا تسمح.
الفئة السعرية بتاعت الـ6000 جنية في اللاب توبات الجديدة مش مطلوب منها إنها تقدملك أداء قوي .. ولا هو لاب توب Gaming ولا لاب توب للشغل التقيل .. لازم تكون مُتقبل النقطة دي.
لو مش متاح غير المبلغ ده ولازم تجيب لاب توب يستحمل شغل تقيل شوية .. ساعتها تفكر في لاب توب إستيراد لإنه دائمًا هيقدملك منظومة مواصفات هي أقدم بس أقوى من الجديد بسعره .. هتاخد منها تجربة أداء أحسن بكتير زي ما وضحتلك .. بس في مقابل شكل قديم وكمان مستعمل.
لو عندك تخوف من اللاب توب الإستيراد .. لما تيجي تشتريها أنزل مركز أو مول فيه أكبر عدد من محلات الإستيراد وخد لفة وأوصل لأحسن Specs او مواصفات ممكنة بأقل سعر .. شوف حالة اللاب توب كويس ولا لأ قبل ما تشتريه .. وهتاخد ضمان من المحل لمدة شهر لو حصل أي حاجه في الفترة دي بترجع فلوسك او بتبدل اللاب.
Comments