إستكمالًا لسلسلة مراجعات الـ لاب توب اللي بدأناها معاكم .. فريق موبيزل عمل رحلة ميدانية علشان نقدر نشتري أرخص لاب توب جديد في السوق المصري ينفع فعلًا للإستخدام التقيل. مونتاج، جيمنج، برامج تقيله والكلام ده، ووصلنا لـ Dell G3 3500 .. بيقدم معالج محترم وكارت شاشة محترم ومساحة تخزين SSD.
وحابب أوضح حاجه بس .. أكيد ناس هتسأل ليه أشتري لاب توب بالسعر ده؟ .. في فئة كبيرة من الشباب دلوقتي شغالين Freelancers او شغل حر على الإنترنت في مجالات كتير .. يعني اللاب توب ده وسيلة في أنه يقدر يحقق دخل .. وعلى حسب مجاله كل ما المواصفات أفضل كل ما الإمكانيات هتبقى أحسن .. فا أكيد لازم يصرف على الوسيلة بتاعته في تحقيق الدخل وهو اللاب توب بالإضافة الى تنمية مهاراته طبعًا سواء بكورسات أون لاين او اوف لاين.
ده غير شباب الجامعات اللي بيعملوا مشاريع تخرج وبيستخدموا برامج تقيلة شوية .. فا برده دول محتاجين لاب توب يقدر يشغل البرامج دي .. واللاب توب ده حتى هيقدروا يستخدموه بعد ما يتخرجوا في شغلهم .. فا أنا بحط نفسي مكان كل واحد بيدور على لاب توب قوي رخيص ودوري أغطي كل الفئات .. وقريب هنراجع أفضل لاب توب إقتصادي.
التصميم :-
لاب توبات شركة ديل Dell معروف عنها دائمًا الشكل التقليدي .. دائمًا بيهتموا بالمواصفات أكتر، لكن الموضوع هنا إختلف .. لاب توب Dell G3 هنا شكله شيك وتصميمه جديد بالنسبة لـ لاب توب ديل التانية .. اللي كنت بجربه لونه أسود مطفي ومُطعّم بالأزرق في كذا حتة وده بيخليه ياخد ستايل الـGaming Laptops.
هتلاقي الأزرق ده ماشي على فريم اللاب وحوالين الـTouchpad .. وفي ظهر اللاب توب في برده خطوط رابر او مطاطية باللون الأزرق علشان ترفع اللاب شوية علشان التبريد .. وفي نص ظهر اللاب كلمة G3 محفورة .. وفريم اللاب توب نفسه او الجوانب مش كلها جايه مسطحه لا بعد المداخل بتاعته هتلاقي الفريم بيصغر وبيبقا منحني.
ده غير أن ظهر الشاشة برده فيه تضلعيه خفيفة وجاي بـCurves بسيطة من تحت .. مُجملًا شكله شيك جدًا ولكن الشياكة هتاخدها بتضحية وهي الخامات .. الخامات هنا من البلاستيك المُقوى واللي هو بعد ما جربنا كتير تقريبًا دي أحسن خامة بلاستيك موجودة في اللاب توبات .. مش هتحس إنه برميم اوي لما تمسكه وتستخدمه .. ولكن شكله العصري يقدر يعديلك نقطة الخامات دي ونقطة البلاستيك برده هتبقى أحسن في تشتيت الحرارة.
وزن اللاب تقيل شوية .. حوالي 2 كيلو و340 جرام .. وزنه مش خفيف إطلاقا وتخانته 2.1 سم .. برده اللاب مش رفيع علشان الهاردوير المحترم اللي جواه .. واسخف حاجة في اللاب توب ده هي مُفصلة الشاشة الصغيرة وفي النص مش واخده الشاشة كلها .. فا طبعًا هتبقى معرضه للكسر اكتر.
هنا لازم تفتح وتقفل اللاب من نص الشاشة مش من الطرف .. حاجة سخيفة بصراحة .. وفي ناس إشتكت أن المفصلة باظت معاهم في خلال 6 شهور .. فـ خلي بالك اوي من موضوع المفصلة وأفتح الشاشة من النص دايمًا .. هي متينه وقوية بس الحجم الصغير هيخليها أكتر عرضه للكسر زي ما فهمتك .. وعلشان كده حتى هما ضافوا زرار الـPower في النص علشان يفكرك دائمًا إنك تقفل وتفتح الشاشة من النص.
الكيبورد هنا فيها Back light او أنوار بتنور باللون الأبيض وليه مستويين إضاءة وممكن تلغيه لو حابب .. والكيبورد كبيرة ومحترمة واخده شاسية اللاب توب كله .. والـTouchpad كويسة وملمسها حلو وسريعة والزراير مُدمجة جواها .. معرفش انت هتعتبر الزراير مدمجه في الـTouchpad دي بالنسبالك ميزه ولا عيب .. انت واستخدامك.
لو جينا نبص على الجنب اليمين هنلاقي مدخلين USB 2 ومدخل السماعات الـ3.5 مللي ومدخل الـSD Card .. وعلى الشمال في مدخل الشحن القديم ومدخل HDMI ومدخل USB 3.2 ومدخل سلك LAN .. وفي 2 مايكروفون جنب الكاميرا الـHD فوق موجودين في فريم الشاشة من فوق علشان الـVideo Call.
صوت اللاب توب جاي من سماعتين مكانهم حلو في الإنحناء بتاع الفريم يمين وشمال اللاب .. صوتهم عالي ولكن مفيش Bass اوي .. بيكون إستخدامهم حلو في الـGaming والفرجة على فيديوهات ولكن في الموسيقى اداء الـBass مش هيعجبك.
الشاشة :-
شاشة تقليدية بمقاس 15.6 بوصة بدقة FHD+ .. بسطوع عادي 250 شمعة تحت الشمس .. بزاويا رؤية معقولة مش أفضل حاجة ولكن معقولة .. كذلك الحال أقصى سطوع للشاشة مش اعلى حاجة .. لو جربته جنب لاب توب قديم هتلاقي مفيش فرق واضح في السطوع.
الفريم هنا حول الشاشة مش أصغر حاجة .. ولكن Dell هنا مش مركزة على شكل الشاشة اوي ولا استحواذها علشان تقدر توفر اكتر في سعر اللاب .. لكن الميزة الوحيدة اللي في الشاشة هنا إنها بتردد 120 هيرتز.
ده مساعد الـHardware المُحترم اللي هنا إنه يخلي الأداء سلس اكتر واكتر .. فعلا إستخدام 120 هيرتز في الشاشة اللي هنا عمل فرق في الإستخدام لاني كنت بقارن بينه وبين Dell G3 الجيل اللي فات وحتة معدل التحديث بتاع الشاشة فارق أوي.
الأداء :-
وديه النقطة اللي اخترت اللاب ده علشانها .. اللاب ده بيجي بأكتر من نسخة .. أنا أخترت النسخة الأقل بتيجي بمعالج i5 10300H رُباعي الأنوية بتردد من 2.5 جيجا هيرتز وبيوصل لحد 4.5 جيجا هيرتز بتكنولوجيا 14 نانو بـ8 ميجا كاش .. المعالج ده محترم جدًا جدًا .. عايز أقولك انه يوازي في الأداء i7 8750H .. ويتفوق عليه في المهام البسيطة كمان.
طبعا اللاب هنا بيجي بـ8 جيجا رام .. الـPass Speed بتاعه 2933 وده رقم محترم جدًا .. حجم الرام هنا 8 جيجا مش 16 جيجا .. ملقتش 16 جيجا بالسعر ده .. لو بالنسبالك أزمة فا ممكن تفك الـ8 جيجا رام تبيعهم وتجيبلك رامتين 8 جيجا يدولك 16 جيجا رام لأن الـ8 رام اللي هنا مفصولين 4 جيجا و 4 جيجا.
المهم المعالج اللي هنا هو أرخص معالج محترم يقدر يشغل لك كل اللي انت عايزه بدون أي مشاكل .. وكمان معاك كارت شاشة GTX1650 معاه 4 جيجا رام DDR6 .. لو هنستخدم اللاب توب ده في المونتاج مثلًا .. جربنا نرندر Project تقيل جدًا بجودة 4K وقدرنا نرندره في 13 دقيقة فقط .. الـProject الـFHD+ بياخد حوالي 7 دقائق رندرة بمتوسط وقت الفيديو 10 دقايق.
أداء اللاب توب سلس جدًا وأنت شغال في المونتاج .. وخصوصًا لو الـProject موجود على الـSSD علشان مفيش أي حاجة تقطع معاك لو الداتا اللي في الـProject بدقة 4K مثلًا.
طيب في الألعاب التقيلة بقى .. هيسد معاك جدًا مفيش أي مشاكل .. شغلت فورت نايت على اعلى اعدادات جرافيك واللعبة اشتغلت بكل كفاءة بدون اي مشاكل .. ومن خلال موقع Can U Run it لاقيت ان كل حاجه تقريبًا ممكن تشغلها بكل كفاءه زي كول اوف ديوتي War Zone وRed Dead Redemption 2 .. الألعاب دي تقيلة جدًا بس اللاب توب هيقدر يشغلها بشكل معقول على أعدادات جرافيك قليلة.
اللاب توب هنا فيه مروحتين .. بيسحب الحرارة من تحت وبيطلع الحرارة من المخرجين اللي جنب مفصلة الشاشة وكمان في مخرج للتهوية قدام المفصلة نفسها .. دي حركة ذكية ان اللاب توب مش بيطلع السخونة تحته علشان تفضل موجودة وتتسبب في ان جسم اللاب توب يسخن زي ما بيحصل في الأجيال القديمة.
ليا تجربة سابقة سنتين مع لاب توب Dell G3 .. كان بيسخن أكتر من كده مع الضغط عليه .. لكن لحد يومنا هذا اللاب توب شغال ومكانش عندي مشكلة معاه في أي حاجه ومفيش مرة فصل مني وأنا شغال عليه .. ده اللي خلاني مايل أكتر إني أكرر التجربة مع الـDell G3 3500 الجديد.
البطارية :-
بطارية 51 واط .. مع الإستخدام الطبيعي الهادي خالص هتستحمل معاك من 3 لـ4 ساعات .. مش أحسن وقت طبعًا .. لو هتستخدم اللاب توب في المونتاج والإستخدام التقيل فا هيستحمل معاك حوالي ساعة ~ ساعة وربع .. مازالت ديل عندها ازمة شوية في حته البطاريات.
ولكن Dell معتمده على إن معظم المستخدمين اللي بيشتروا لاب توب جيمينج أغلب الوقت بيبقوا موصلين الشاحن اصلًا علشان ياخدوا أحسن أداء من الـ لاب توب .. واللاب جاي معاه في العلبة شاحن 130 واط بمدخل الشحن القديم .. وبيشحن بالكامل في ساعتين وده وقت معقول .. مش وحش ولكن مش أسرع حاجه.
سعر Dell G3 3500 :-
- النسخة الـi5 10300H مع 8 جيجا رام وكارت GTX1650 وشاشة 120 هيرتز مع 256 جيجا SSD وهارد 1 تيرا ومن غير ويندوز سعرها حوالي 15 الف جنية ( دي النسخة اللي راجعناها )
- النسخة الـi7 10750H مع 16 جيجا رام وكارت GTX1660 وشاشة 120 هيرتز مع 512 جيجا SSD من غير هارد إضافي سعرها حوالي 22 الف جنية
- النسخة الـi7 10750H مع 16 جيجا رام وكارت RTX 2060 وشاشة 144 هرتز مع 512 جيجا SSD من غير هارد إضافي سعرها حوالي 25 الف جنية
الرأي النهائي ( للنسخة الـ i5 ) :-
مميزات Dell G3 3500 :-
- اداء محترم من المعالج وكارت الشاشة .. أرخص لاب توب بتبريد معقول للـConfiguration ده .. ولكن ما زالت الفئة ديه من اللابتوبات مش هتاخد منها أفضل تبريد ممكن
- حجم كيبورد معقول وفيها Back light
- تصميم شيك ومختلف ولكن بخامات بلاستيك
- مساحات تخزين محترمة سواء SSD او الـ1 تيرا HDD
- الشاشة الـ120 هيرتز ناعمة وسلسة في الإستخدام
عيوب Dell G3 3500 :-
- مفصلة الشاشة أكبر عيب .. لازم لها معاملة خاصة ولازم تكون حريص وانت بتستخدمها
- سطوع الشاشة كان محتاج يكسر حاجز الـ300 شمعة علشان تستخدمه Outdoor بشكل أفضل
- مفيش دعم للبصمة في النسخة اللي راجعناها
- الخامات البلاستيك في كل حته في اللاب توب .. لو كان في أي Finish معدني ولو بسيط كان هيبقى Premium أكتر .. بس كله علشان السعر طبعًا
- الوزن تقيل نسبيًا لكن مقبول لأن معظم لاب توبات الجيمينج وزنها تقيل
- البطارية .. لسه Dell محتاجه تطور نفسها شويتين في البطاريات
- الـSpeakers بتاعت اللاب توب الـBass فيها كان محتاج يزيد شوية
وخلي بالك لو هتشتريه فا في من اللاب الـ i5 أكتر من نسخة .. في من غير الهارد الـ1 تيرا وفي بشاشة 60 هيرتز مش 120 هيرتز .. فا خليك في النسخة اللي جربناها النهارده لأن دي اللي بتقدم أفضل قيمة مقابل سعر.
ومن الأخر اللاب توب ده هو أرخص لاب توب بيحطك على أول الطريق في الـHigh Performance .. أكيد لو زودت المبلغ هتلاقي أحسن .. ولكن لو نزلت في السعر شوية هتلاقي أداء أقل بكتير.
قريب هنراجع أفضل لاب توب إقتصادي !
Comments