احنا في موبيزل حاليًا بنعمل الإحصائيات الأخيرة .. قدمنا ليكم مقالة أسوأ هواتف في مصر لعام 2020 .. والنهارده هنقدم ليكم مقالة أفضل الموبايلات اللي نزلت طول السنة .. وعلشان نقدر نجمع أكبر عدد ممكن من الفئات السعرية فا هنضيف أكتر من موبايل في كل فئة علشان يتوفر كذا خيار في نفس الفئة السعرية.
فئة الـ2500 جنية :-
1- Redmi 9
موبايل Redmi 9 في أفضل الموبايلات يعتبر أفضل قيمة مقابل سعر في الفئة دي .. مجالناش منه شكاوى كتير من المستخدمين بتوعه .. هيقدملك أحسن معالج في الفئة دي الـHelio G80 مع شاشة 65 بوصة بدقة ممتازة FHD+ ولكن بسطوع قليل شوية تحت الشمس .. بطارية ضخمة ومنفذ شحن Type C بس الشحن السريع مش معاه في العلبة.
كل ده بالإضافة للصوت العالي وإضافات شاومي المُتميزة زي ميكروفون اضافي لعزل الضوضاء ومستشعر الـIR Blaster .. الموبايل سعرة للنسخة الـ64 جيجا مع 4 جيجا رام حوالي 2500 جنية وبيختلف من محل للتاني.
2- Realme C3
الـRealme C3 بيتفوق على ريدمي 9 في سطوع شاشة أعلى لكن بدقة أقل .. وبيتفوق في كاميرات احسن بفرق بسيط جدًا .. بديل كويس ومعقول لو حد مش حابب او مش لاقي ريدمي 9 .. الموبايل سعره حوالي 2500 جنية للنسخة الـ64 جيجا و3 جيجا رام .. وبلاش الـC11 والـC12 علشان اسوأ منه بسبب المعالج.
3- Infinix Hot 10
الموبايل ده بقى موجود بكميات كويسة حاليًا .. تطور انفينكس في الفئة الإقتصادية جبني جدًا .. الموبايل قريب جدًا من Infinix Note 7 وأقل منه في السعر .. معالج G70 محترم مع بطارية كبيرة وشاشة ضخمة لكن مش أفضل دقة .. صوت مش وحش وتصميم بشكل عام مقبول جدًا .. سوفت وير سهل وبسيط وسريع لكن السيلفي مش لطيفة اوي.
سعر موبايل Infinix Hot 10 للنسخة الـ64 جيجا مع 4 جيجا رام حوالي 2200 جنية مصري .. والنسخة الـ128 جيجا مع 4 جيجا رام سعرها حوالي 2350 جنية مصري.
فئة الـ3500 جنية :-
1- Redmi Note 9S
موبايل Redmi Note 9S بيقدم أقوى معالج في السعر ده وهو الـSD720G .. معالج بيخليه من أفضل الموبايلات في الفئة دي .. شاشة ضخمة دقتها FHD+ محترمة وبيقدم تجربة كاميرات كويسة جدًا خاصة في الكاميرا الخلفية .. مع تجربة جوجل كاميرا هتقدر تعتمد عليه أكتر وأكتر كمان .. الموبايل بيقدم بطارية ضخمة وبيدعم الشحن السريع في العلبة.
صوت الموبايل عالي وكويس وطبعًا فيه اضافات شاومي المعروفة ميكروفون اضافي لعزل الضوضاء والـIR Blaster .. واللي مميز اوي في الموبايل ده هو الخامات الزجاجية المحترمة والتصميم الفخم .. الموبايل سعره حوالي 3350 للنسخة الـ64 جيجا مع 4 جيجا رام وحوالي 3700 جنية للنسخة الـ128 جيجا مع 6 جيجا رام.
2- Galaxy M21
سامسونج كان عندها في الفئة دي موبايل Galaxy A21s .. لكن كان ناقصة شوية حاجات زي الأداء وان شاشته نوعها مش كويسة .. سامسونج راحت منزلش الـGalaxy M21 اللي جه علشان يقدم شاشة AMOLED دقتها FHD+ بالإضافة لمعالج محترم وكاميرات كويسة وبطارية ضخمة جدًا.
موبايل الصراحة مُميز جدًا بسعرة ده وأرخص اموليد بالسعر ده وبدقة ممتازة .. سعر الموبايل 3500 جنية وعليه تخفيض لأخر سنة 2020 علشان يكون بسعر 3000 جنية بس للنسخة الـ64 جيجا مع 4 جيجا رام.
3- Realme 6 / 6i
ريلمي عندها Realme 6i اللي بينافس في الفئة دي .. بصراحة هو مش هيكسب Note 9S في أي حاجه .. ومش هيكسب الـM21 كمان يعني الاتنين افضل منه .. بس انا بقولك بديل منطقي شوية علشان مش تجيب حاجه بعيدة في الفئة دي .. الموبايل سعره للنسخة الـ64 جيجا و3 رام بسعر 2850 جنية ونسخة الـ128 جيجا مع 4 رام بسعر 3200 جنية.
وفي نفس الوقت ريلمي عندها موبايل منافس جدا Realme 6 بمعالج قوي جدا ميدياتيك G90T الي بيقدم اداء قوي جدا في الألعاب ولكن مع سخونة بسيطة في جسم الموبايل مع شاشة 90 هرتز FHD+ وشحن سريع 30 واط وكاميرا خلفية 64 ميجا بيكسل .. الموبايل سعره حوالي 3800 جنية للنسخة 128 جيجا مع 4 جيجا رام ويعتبر اختيار كويس جدا في فئته السعرية.
4- Honor 9X Lite
لو انت بقى عايز تستخدم موبايل لطيف من هواوي وليك ذكريات مع الشركة وحابب الخامات والإعتمادية بتاعتهم .. فا Honor 9X Lite هو الوحيد اللي هقدر ارشحهولك بسبب وجود خدمات جوجل فيه .. موبايل حلو بيقدم تجربة شاشة محترمة بسطوع محترم وألوان معقولة وتقفيل ممتاز جدًا مع خامات خارجية ممتازة.
الموبايل ده انا رشحتهولك علشان بخدمات جوجل .. ونصيحتي ليك بلاش تشتري موبايل من غير خدمات جوجل .. سعر الموبايل للنسخة الـ128 جيجا مع 4 جيجا رام حوالي 2800 جنية.
فيديو مراجعة Honor 9X Lite :-
فئة الـ4500 جنية :-
1- Poco X3 NFC
موبايل Poco X3 NFC أقدر أقولك هو أفضل الموبايلات من حيث قيمة مقابل سعر في الفئة دي .. شاشة محترمة جدًا بتردد 120 هيرتز .. صوت ستيريو قوي .. معالج كوالكوم ممتاز وداعم للجوجل كاميرا وسخونيته محترمة جدًا .. فيه شوية اضافات زي لمبة إشعارات والـIR Blaster والـNFC وميكروفون اضافي وكاميرا خلفية قوية جدًا.
الموبايل بشكل عام ممتاز في الفئة دي .. سعر الموبايل للنسخة الـ64 جيجا مع 4 جيجا رام حوالي 4000 جنية اما النسخة الـ128 جيجا مع 6 جيجا رام حوالي 4400 جنية.
2- Realme 7
موبايل Realme 7 بيقدملك تصميم جديد عصري مع بروز كاميرات كويس .. موبايل خفيف وشيك وتصميم عملي .. عوامل أمان سريعة .. شبكة قوية .. كاميرا سيلفي ممتازة تتفوق على Poco X3 .. دعم تركيب شريحتين وكارت في نفس الوقت .. متوفر بنسخة 8 جيجا رام مش 6 جيجا رام بس .. وأخر وأهم حاجه الشاحن الطلقة الـ65 وات.
الموبايل يعتبر صفقة كويسة بعد الـPoco X3 .. الموبايل موجود بنسخة واحدة بس كالعادة والنسخة دي بمساحة تخزين 128 جيجا مع 8 جيجا رام، النسخة دي هتلاقيها في المحلات بمتوسط سعر 4500 جنية.
3- Galaxy M31
ده في حالة لو انت مش عايز شاومي ولا ريلمي .. هتلاقي الـGalaxy M31 من سامسونج بالشاشة الـAMOLED الممتازة لكن مع تصميم النوتش القديم .. معالج أضعف من معالجات شاومي وريلمي لكن لو إستخدام بسيط مش هيكون أزمة بالنسبالك .. شبكة الـWiFi برده أضعف من ريلمي وشاومي.
هتلاقي بطارية قوية وضخمة لكن في الإستهلاك مش هتفرق عن Poco X3 مثلًا .. الشحن للأسف بطيء .. كاميرات حلوة جدًا متوازنة .. الخلفية حلوة والسيلفي حلوة .. السعر للنسخة الـ128 جيجا مع 6 جيجا رام حوالي 4100 جنية.
4- Oppo Reno 3
مكنتش حابب أرشح موبايل Oppo Reno 3 ضمن أفضل الموبايلات في 2020 الحقيقة .. هو موبايل لعشاق اوبو فقط .. هيقدملك شاشة AMOLED مع بصمة سريعة تحت الشاشة .. معالج أداءه ضعيف شويتين .. كاميرا كويسة جدًا في الفئة دي .. شبكة ممتازة جدًا يمكن الافضل وسط المنافسين .. بطارية للأسف صغيرة جدًا.
سعر الموبايل للنسخة الـ128 جيجا مع 8 جيجا رام حوالي 4300 جنية مصري .. الموبايل يعتبر بديل كويس للـM31 والناس اللي استخدامهم خفيف وعايزين شاشة كويسة وكاميرات معقولة هيكون مناسب ليهم.
فئة الـ7000 جنية :-
1- Mi 10T
موبايل Mi 10T بيقدم طفرة في الأداء .. هو من أفضل الموبايلات في مصر من حيث الأداء بالرغم من سعره .. الموبايل بيقدم الأداء الأقوى وسط كل المنافسين بالسعر ده وبفرق ضخم وملحوظ بمعالج سناب دراجون 865 .. ده غير نوع الذاكرة الـUFS 3.1 والرامات الـPDDR5 هتاخد خلطة أداء رهيبة وهتاخد أداء طيارة حرفيًا بفرق ضخم عن أقرب المنافسين.
معاك كمان شاشة IPS LCD عادية لكن بتردد 144 هيرتز .. معاك صوت ستيريو قوي ومحترم وكمان خامات خارجية زجاجية ممتازة وفريم معدني .. بطارية كبيرة والشحن سريع بس مش الأسرع .. كاميرات خلفية معقولة جدًا مش وحشة تمامًا .. لكن للأسف مشكلة الموبايل هي الوزن التقيل وبروز الكاميرات.
مجملا الموبايل ممتاز ومناسب للي إستخدامهم تقيل ومحتاجين موبايل يدوسوا عليه جامد من غير ما يتعب .. بس لازم تتقبل العيوب زي الوزن ومفيش مدخل 3.5 مللي ومفيش مكان لكارت ميموري .. والكاميرا السيلفي كمان مش أفضل حاجه .. ومستشعر التقارب بتاع المكالمات مش أفضل حاجه .. والموبايل نسخة الـ128 جيجا مع 8 جيجا رام من بسعر 7000 جنية.
فيديو مراجعة Mi 10T / 10T Pro :-
2- Galaxy M51
فئة الـM من سامسونج حلوة بصراحة وطلع منها 3 موبايلات في قايمة أفضل الموبايلات في 2020 .. الـGalaxy M51 بيقدم كاميرات ممتازة .. سوفت وير محترم .. شاشة AMOLED كبيرة ممتازة جدًا وهتعجبك بشكل كبير جدًا .. بطارية ضخمة جدًا وهتكمل معاك وقت كبير من الإستخدام لكن الشاحن بتاعها بطيء شوية للأسف.
معالج بأداء معقول في الفئة دي .. مش هفكرك بأقوى اداء في الفئة دي واللي رايح لصالح Mi 10T بلا تفكير .. التصميم مش أفضل حاجه والتقفيل مش لطيف اوي والموبايل بيتخربش بسهولة .. الموبايل تقفيله مش الأفضل .. استقبال شبكات الـWiFi مش الأفضل في الفئة دي.
الموبايل مناسب للناس اللي واثقة في سامسونج وفي نفس الوقت عايزه قيمة مقابل سعر مقبولة وإستخدامهم للموبايل متوسط او خفيف .. شاشة محترمة وبطارية قوية وكاميرات قوية ومساحة تخزين 128 جيجا مع 8 جيجا رام وسعر محترم نسبيًا حوالي 6200 جنية.
3- Realme 7 Pro
الـRealme 7 Pro يعتبر بديل قوي منطقي شوية عن الـOppo Reno 4 بسبب الشاحن الأسرع حاليًا في الفئة المتوسطة الـ65 وات مع الصوت الستيريو والكاميرات الخلفية القوية .. وعامة انا شايف ريلمي 7 برو بديل للـM51 لنفس الإستخدامات خاصة انه بلاستيك ولكن خامات وتقفيل أحسن شوية ووزن أخف.
الموبايل بطاريته أصغر وشاشته AMOLED محترمة ومعالج كوالكوم سناب دراجون 720G وكاميرات محترمة سواء امامية وخلفية .. لكن لسه الأداء لصالح الـMi 10T والكاميرات لصالح الـM51.
نقاط التفوق على M51 تتلخص في قوة شبكات WiFi وشبكة إتصال أفضل مع عوامل أمان أسرع وصوت أعلى وشحن أسرع بفرق ضخم جدًا .. الموبايل سعره للنسخة الـ128 جيجا مع 8 جيجا رام حوالي 5700 جنية مصري.
4- Nova 5T
الموبايل ده انا برشحه علشان عشاق هواوي بس .. وكالعادة مش هينفع ارشح Nova 7 ولا Nova 7 SE بسبب غياب خدمات جوجل .. الـNova 5T لسه بينزل المحلات لحد دلوقتي .. بيقدم خامات زجاج محترمة وتقفيل ممتاز .. معالج هو الأقوى حاليًا بعد الـMi 10T علطول مع مراعاة فرق السعر بينهم وده اللي خلاني اضيفه ضمن أفضل الموبايلات في 2020.
كاميرات مش الأفضل تمامًا نظرًا لإن الكاميرات تطورت بشكل كبير في الفئة دي والموبايل قديم .. وكمان البطارية صغيرة شويتين والشاحن مش سريع أوي .. لكن المميز فيه ان شاشته صغيرة شويتين بغض النظر عن كونها IPS LCD وبتردد 60 هيرتز .. وللأسف الموبايل مفيهوش منفذ الـ3.5 مللي ومش بيدعم تركيب كارت ميموري.
الموبايل للنسخة الـ128 جيجا مع 8 جيجا رام سعره حوالي 5600 جنية مصري .. هواوي قدمت التكنولوجيا الجديدة في Nova 7 و Nova 7 SE لكن من غير خدمات جوجل لذلك مقدرتش اني ارشحها.
فيديو مراجعة Nova 5T :-
Comments