افضل موبايلات الفئة المتوسطة في تشغيل الألعاب – العب براحتك !

ناس كتير تايهه وسط الموبايلات الكتير الي نزلت الفترة الي فاتت .. بس في مجموعة كبيره حابين يلعبوا العاب تقيله على الموبايل بتاعهم .. في المقال ده هتلاقي افضل موبايلات الفئة المتوسطة في تشغيل الالعاب .. الالعاب من اكتر الحاجات اللي الناس بقت بتهتم بيها في موبايلاتها دلوقتي واحنا دايما في موبيزل لما بنراجع موبايل بنعرفكم اداءه عامل ايه في الالعاب.

المركز الاول :-

المركز الأول معانا لموبايل Honor 20 او Nova 5T .. الاتنين بالنسبالي واحد لانهم بنفس المعالج الرائد معالج كيرين 980 .. معالج Kirin 980 معالج ممتاز في تشغيل الالعاب حرفيا، هيشغلك كل الالعاب الي انت عاوزها وزيادة بصراحة لإن المعالج ده معالج فلاج شيبس او هواتف رائده بينزل بأسعار بضعف الاسعار دي !

يعني مثلا ببجي بتشتغل على Ultra HDR واللعبة مش بتسقط اي فريمات .. يعني هتقدر تلعب اللعبة لمدة طويلة من غير اي تهنجيات .. كول اوف ديوتي شغالة على Very High واللعبة بردة شغالة زي الفل بدون اي مشاكل، وبالنسبة بقا لأتقل لعبة حاليا اللي علشان تحملها هيجيلك شلل بتاع 6 جيجا .. هي فورت نايت والي بردو بتشتغل على اعلى اعدادات جرافيك واللعبة بردة شغال بكفاءة على المعالج ده بدون اي مشاكل او تهنيجات.

طيب تقولي اجيب الـHonor 20 ولا الـHuawei Nova 5T .. هقولك الاتنين بالنسبالي واحد .. النوفا اغلى علشان تصميمه اشيك وفيه 2 جيجا رام ازيد .. يفرقوا ولا لأ دي حاجه ترجع لإستخدامك .. انما كمواصفات تانية وهارد وير .. مفيش اي اختلافات ومتخليش حد يضحك عليك.

موبايل هونر 20 دلوقتي سعره في المحلات حوالي 5600 جنيه للنسخة 128 جيجا مع 6 جيجا رام، اما هواوي النوفا 5 تي سعره في المحلات بيوصل لـ6200 جنيه للنسخة الـ128 جيجا مع 8 جيجا رام.

مواصفات Huawei Nova 5T / Honor 20 :-

• تصميم الموبايل من الزجاج اللامع و وزن 174 جرام
• الهاتف يدعم تركيب شريحتين إتصال من الجيل الرابع
• شاشة IPS LCD بحجم 6.26 بوصة جودتها FHD+ والشاشة كامله والسيلفي في ثٌقب
• معالج هايسيليكون كيرين 980 ثماني النواة بدقة تصنيع 7 نانو ميتر
• معالج رسومي Mali-G76 MP10
• مساحة تخزين 128 جيجا مع 8 جيجا رام في نوفا 5 تي او 6 جيجا رام في هونر 20، والهاتف لا يدعم تركيب كارت ميموري
• كاميرا سيلفي بدقة 32 ميجا بيكسل بفتحة عدسة F/2.0
• كاميرا خلفية رُباعيه بدقة 48 ميجا بيكسل بفتحة عدسة F/1.8 للأساسية بمستشعر IMX586، والثانيه بدقة 16 ميجا بيكسل بفتحة عدسة F/2.2 وهي Ultra Wide والثالثه بدقة 2 ميجا بيكسل بفتحة عدسة F/2.4 وهي ماكرو والرابعه بدقة 2 ميجا بيكسل بفتحة عدسة F/2.4
• بطارية بسعة 3750 مللي امبير تدعم الشحن السريع بقوة 22.5 وات عن طريق USB Type C
• الهاتف لا يدعم منفذ 3.5 مللي للسماعات الخارجية
• الهاتف يدعم Face unlock ويدعم بصمة الإصبع على زِر الباور

المركز الثاني :-

المركز التاني هو الـXiaomi Redmi Note 8 Pro، الموبايل ده بقا عمل طفره ونقله نوعيه عن كل الموبايلات الي بسعره .. لانه في فئة سعرية اقل شوية .. الموبايل ده بيجي بمعالج ميدياتك الجديد Helio G90T ودي سلسلة معالجات جديده من ميدياتك مُوجهه للألعاب والإستخدام الرسومي للموبايلات.

الموبايل بيقدر يشتغل ببجي على Ultra HDR .. واللعبة شغالة زي الفل .. اه في سخونية زيادة شوية بعد اللعب لفترة بس مش مؤثرة والموبايل فعلا اداءه ثابت، لعبة كول اوف ديوتي شغالة على اعدادات جرافيك Very High واللعبة بردة بتشتغل حلو جدا .. وبالنسبة لفورت نايت شغالة على اعدادات جرافيك High .. وديه حاجة مشوفنهاش قبل كدا في الفئة السعرية ديه .. واللعبة بردة بتشتغل كويس جدا.

يعني من الاخر الـXiaomi Redmi Note 8 Pro عمل طفره في عالم تشغيل الألعاب على الموبايل كل ده بسعر 4100 جنية للنسخة 128 و 6 رام .. منصحكش تجيب 64 علشان تحمل العاب براحتك.

مواصفات Redmi Note 8 Pro :-

• تصميم زُجاجي ووزن 199 جرام
• الهاتف يدعم تركيب شريحتين إتصال من الجيل الرابع او شريحة مع كارت ميموري بحجم 256 جيجا
• شاشة IPS LCD بحجم 6.53 بوصة بدقة FHD+ وهي ليست كامله ويوجد نوتش Water Drop في الاعلى
• معالج ميدياتك Helio G90T ثماني النواة بدقة تصنيع 12 نانو ميتر
• معالج رسومي Mali-G76MC4
• مساحة تخزين 64 جيجا او 128 جيجا مع 6 جيجا رام
• كاميرا اماميه تأتي بدقة 20 ميجا بيكسل بفتحة عدسة F/2.0
• كاميرا خلفية رُباعية، الاولى بدقة 64 ميجا بيكسل بفتحة عدسة F/1.8 بمستشعر سامسونج GW1 والثانيه بدقة 8 ميجا بيكسل بفتحة عدسة F/2.2 وهي للتصوير العريض والكاميرا الثالثه بدقة 2 ميجا بيكسل بفتحة عدسة F/2.4 وهي مُخصصة للعزل، والكاميرا الرابعه بدقة 2 ميجا بيكسل بفتحة عدسة F/2.4
• بطارية ضخمة بحجم 4500 مللي امبير تدعم الشحن السريع 18 وات عن طريق منفذ USB Type C
• بصمة الإصبع في الهاتف موجوده في الضهر ويدعم Face Unlock

المركز الثالث :-

المركز التالت هو موبايل Xiaomi Mi 9T، الموبايل ده جاي بمعالج كوالكوم سناب دراجون 730 .. وهو معالج مُوازي بشكل او باخر للميديا تيك هيليو G90T وبيديلك نفس الاداء تقريبا، بس الفكرة اني خليته في المركز التالت بعد الـNote 8 Pro .. لان لو اهتمامك العاب بس بعيدا عن الشاشة الاموليد الكامله .. فـ وفر فلوسك وهات النوت 8 برو.

الـMi 9T بيشغل ببجي على اعدادات جرافيك High HD .. مش بيشتغل على اعدادات جرافيك اعلى بسبب دعم المعالج نفسه مع لعبة ببجي مش اكتر، فورت نايت شغالة على اعدادات جرافيك متوسطة .. وانا كلامي طبعا عن اللعبة بتشتغل بشكل رسمي على ايه .. لان في برامج بتقدر تسطبها وتخلي اللعبة تشتغل على اعدادات جرافيك اعلى.

موبايل شاومي Mi 9T في مصر متوفر بنسختين واللي بنرشحها هي الـ128 جيجا مع 6 جيجا رام بسعر 5300 جنيه في المحلات، والنسخة التانيه بمساحة تخزين 64 جيجا مع 6 جيجا رام ودي سعرها 5100 جنيه ومبنرشحهاش نهائيًا.

مواصفات Mi 9T :-

• تصميم زُجاجي بوزن 191 جرام
• الهاتف يدعم تركيب شريحتين إتصال ولا يدعم تركيب كارت ميموري
• شاشة الهاتف AMOLED بحجم 6.39 بوصة بدقة FHD+ وهي كامله والسيلفي في موتور
• معالج كوالكوم سناب دراجون 730 ثماني النواة بدقة تصنيع 8 نانو ميتر
• معالج رسومي Adreno 618
• مساحة تخزين 64 جيجا او 128 جيجا مع 6 جيجا رام
• كاميرا اماميه بدقة 20 ميجا بيكسل بفتحة عدسة F/2.0
• كاميرا خلفية ثُلاثية بدقة 48 ميجا بيكسل بفتحة عدسة F/1.8 وبدقة 8 ميجا بيكسل بفتحة عدسة F/2.4 وهي Telephoto لعمل زوم يصل الى 2 اكس بدون فقدان تفاصيل، والكاميرا الثالثه بدقة 13 ميجا بيكسل بفتحة عدسة F/2.4 وهي Ultra Wide للتصوير العريض
• بطارية بحجم 4000 مللي امبير تدعم الشحن السريع بقوة 18 وات عن طريق منفذ USB Type C
• بصمة الإصبع في الهاتف موجوده اسفل الشاشة ويدعم Face Unlock

المركز الرابع :-

المركز الرابع هو الـRealme 5 Pro .. وده موبايل من الأخر من شركة ريلمي .. الموبايل جاي بمعالج سناب دراجون 712 .. وده يعتبر اقل معالج كويس في الفئة المتوسطة، والموبايل ده بيقدم قيمة ممتازة مقابل سعره خصوصًا النسخة الـ128 جيجا مع 4 جيجا رام ممتازة جدًا.

بيشغل ببجي على اعدادات جرافيك High HD .. واللعبة بتشتغل كويس بدون اي مشاكل، ولعبة كول اوف ديوتي شغالة على اعدادات جرافيك Very High وشغالة كويس جدا، واخيرا لعبة فورت نايت شغالة بشكل رسمي وبتشتغل على اعدادات جرافيك متوسطة.

موبايل Realme 5 Pro في مصر بيجي بنسختين الاولى 128 جيجا مع 4 جيجا رام وهي اللي بنرشحها، ودي سعرها حوالي 3450 جنيه في المحلات، اما النسخة الكبيرة بمساحة 128 جيجا مع 8 جيجا رام ودي سعرها 4250 جنيه وبتنافس في مكان مش بتاعها خالص.

مواصفات Realme 5 Pro :-

• تصميم من البلاستيك البولي كربونيت بوزن 184 جرام
• الهاتف يدعم تركيب شريحتين إتصال مع كارت ميموري بحجم 256 جيجا
• شاشة نوعها IPS LCD بحجم 6.3 بوصة بدقة FHD+ مع نوتش في الاعلى
• معالج كوالكوم سناب دراجون 712 ثماني النواة بدقة تصنيع 10 نانو ميتر
• معالج رسومي Adreno 616
• مساحة تخزين 128 جيجا مع 4 جيجا رام او 8 جيجا رام
• كاميرا سيلفي بدقة 16 ميجا بيكسل بفتحة عدسة F/2.0
• كاميرا خلفية رُباعيه بدقة 48 ميجا بيكسل بفتحة عدسة F/1.8 والثانيه بدقة 8 ميجا بيكسل بفتحة عدسة F/2.2 وهي Ultra Wide للتصوير العريض، والكاميرا الثالثه بدقة 2 ميجا بيكسل بفتحة عدسة F/2.4 وهي ماكرو، والكاميرا الرابعه بدقة 2 ميجا بيكسل بفتحة عدسة F/2.4 وهي مُخصصة للعزل
• بطارية الهاتف بحجم 4035 مللي امبير تدعم الشحن السريع بقوة 20 وات عن طريق منفذ USB Type C
• بصمة الإصبع في الهاتف موجوده في الضهر ويدعم Face Unlock

اختار انت بقى من الموبايلات ديه الموبايل الانسب ليك بالسعر الي تقدر تدفعه علشان تاخد من الموبايل افضل اداء في تشغيل الالعاب في الفئة السعرية بتاعته.

وعلى فكرة معلومة على السريع كدا .. قوة الاداء الرسومي مش بيتقاس باللعبة بتشتغل على اعدادات جرافيك ايه .. على قد ما بتقيسها بالفريم ريت انه يبقا ثابت على رقم محترم بدون ما يسقط فريمات كتير .. وفي نفس الوقت استهلاك البطارية يكون كويس .. ميحصلش اي تهنيجات مفاجئة وانت بتلعب على الموبايل يعني مثلا لو حد اتصل بيك وانت بتلعب ايه الي يحصل .. واخيرا الموبايل يبقا مستقر معاك في اداء تشغيل اللعبة لفترة طويلة .. لانك اكيد لو بتحب الالعاب هتلعب لفترات طويلة تعدي الساعة والساعتين ع الموبايل.

اما بقى لو عايز تشوف ترشيحات احسن الموبايلات بشكل عام ممكن تقرأ المقال ده : سلسلة الأفضل في عام 2019

فيديو الترشيحات :-