بعد ما زوار موقع موبيزل أختاروا أفضل الموبايلات بالنسبة ليهم في 2019 و كمان نشرنا نتيجة التصويب من فترة على الموقع في مقالة خاصة .. نقوم الأن بتوضيح الترشيحات النهائية لموقع موبيزل لأفضل الموبايلات الي ممكن تشتريها بعد عام طويل من الموبايلات في 2019 مع الأسباب .. وتوضيح المميزات والعيوب والسعر لكل موبايل في كل فئة سعرية من أول 1500 جنية لحد 6000 جنية .. وهي دي الفئات السعرية المهمة الي الكل بيسأل عنها .. نتمنى تكون المقالة مفيدة ليكم .
فئة 1500 جنية :-
1- Nokia 5.1 Plus
هو موبايل قديم شوية موجود بقاله سنة تقريبا في السوق، بس المميز فيه إن دلوقتي سعره بقي أرخص جدا لحوالي 1650 جنيه و هو الموبايل الأمثل لو بتدور علي موبايل يستحمل معاك ألعاب تقيلة في الفئة السعرية دي لأن الموبايل ده بمعالج ميدياتيك P60 و هو معالج كويس هيشغلك مثلا PUBG على High HD بدون اي مشاكل.
موبايل Nokia 5.1 Plus شبكته قوية ومساحته 32 جيجا مع 3 جيجا رام، وزي ما قلنا هو قديم نسبيا علشان كده هتلاقي الشكل القديم بتاع الشاشة اللي فيها نوتش عريض نسبيا و الشاشة هنا 5.8 بوصة بدقة HD PLUS و نوعها IPS، ومعاك مستشعر بصمة خلفي وكاميرات تمشي الغرض الخلفية مزدوجة الأساسية 13 ميجا بيكسل و السيلفي 8 ميجا بيكسل.
عيوب الموبايل :-
- بطارية 3060 مللي امبير فقط تُعطي اداء ليس الافضل
- شاشة بحجم صغير وحواف ضخمة ونوتش عريض
- الهاتف لا يدعم تركيب شريحتين إتصال مع كارت ميموري في نفس الوقت
- لا يوجد جراب لحماية الهاتف داخل العلبة
مميزات الموبايل :-
- اقوى اداء في هذه الفئة السعرية
- دعم منفذ الشحن Type C
- خامات خارجية زُجاجيه مُحترمه جدًا
- اندرويد خام من جوجل لأداء سلس وتحديثات اسرع
- كاميرا خلفية تُعطي اداء جيد بالنسبة للفئة السعرية
سعر الموبايل :-
سعر الموبايل في المحلات دلوقتي حوالي 1650 جنيه مصري وهو بيدعم تركيب شريحتين إتصال او شريحة واحده بس وكارت ميموري لزيادة مساحة التخزين.
2- Oppo A1K
وهو موبايل الهلك و زي ما بيقولوا الموبايل اللي هتبهدله و مش هيحصله حاجة وينفع كدا كموبايل ثانوي، الموبايل ده تقفيله من جوا من أفضل الموبايلات الموجودة في الفئة السعرية، هو طبعا مش بيقدم أي مواصفات تخليه مميز لأنه بالمعالج التقليدي بتاع الفئة ديه ميدياتيك بي 22 معالج اقتصادي بحت.
مفيش بصمة خلفية في Oppo A1k و دي من اسوأ الحاجات اللي فيه. أدائه مش بطال زي ما قلنا كموبايل ثانوي و مساحته 32 جيجا مع 2 جيجا رام، شاشة كويسة و بالشكل الجديد بتاع النوتش الصغير و حجمها 6.1 بوصة بدقة HD، معاك بطارية كويسة 4000 مللي هتستحمل معاك وقت طويل وهتقعد معاك يومين لو هتستخدمه كموبايل ثانوي خصوصا إن الموبايل شبكته قوية و صوته في المكالمات كويس جدا.
عيوب الموبايل :-
- لا يوجد مستشعر بصمة الإصبع
- الهاتف مُعرض للخدش بسهولة
- الكاميرات لا تُعطي اداء جيد في هذه الفئة السعرية
- تصميم الهاتف الامامي ليس الافضل فالحواف ضخمة جدًا
- معالج ليس الافضل في سعره، فمُعالج Nokia 5.1 Plus افضل بفرق كبير
مميزات الموبايل :-
- بطارية الهاتف تُعطي اداء جيد للإستخدام اليومي
- وزن الهاتف خفيف وخاماته الخارجية قوية وجودة تصنيعه ممتازة كعادة هواتف اوبو
- الهاتف يدعم تركيب شريحتين إتصال وكارت ميموري في نفس الوقت
سعر الموبايل :-
الموبايل في المحلات دلوقتي سعره وصل لـ 1750 جنيه، والموبايل بيدعم تركيب شريحتين إتصال مع كارت ميموري خارجي لزيادة مساحة التخزين بحجم يصل لـ256 جيجا بايت.
3- Infinix Hot 8
وده موبايل اللي يشوفه ف ايدك من بعيد يقولك ايه يا عم الموبايل الجامد، عندك كاميرا خلفية ثلاثية هي أي نعم مفيش واحدة فيهم wide angel بس يعني المهم إنهم موجودين شكل و السيلفي 8 ميجا بيكسل و كمان معاه فلاش حقيقي، شاشة كبيرة أوي 6.6 بوصة فيها نوتش صغير للسيلفي وبدقة HD Plus.
نفس المعالج الاقتصادي الموجود في الفئة السعرية دي و الي هو ميدياتيك P22 المعالج ده اقتصادي مش بتاع ألعاب أوي يعني يدوب يشغل PUBG مثلا على medium جرافيك ولو هتلعب لفتره نزلها لأقل اعدادات جرافيك، الموبايل تصميمه مطرقع و في منه ألوان حلوة و أهم حاجة منتشر في المحلات وهتعرف تلاقيه بسهولة
موبايل Infinix Hot 8 موجود فيه مستشعر البصمة في الظهر، بس أهم حاجة بقي الموبايل ده فيه بطارية عملاقة 5000 مللي أمبير وديه من أكبر البطاريات اللي بالسعر ده و معاك شاحن عادي 10 واط علشان يعني تسعير الموبايل وكدا.
عيوب الموبايل :-
- دقة الشاشة وإضاءتها ليست الافضل في هذه الفئة السعرية
- بطارية الهاتف ضخمة لكن لا تدعم الشحن السريع لذلك يتم شحن الهاتف في مدة كبيره جدًا
- الهاتف لا يدعم لمبة الاشعارات وارى انه من السهل ان يتم وضعها في الهاتف
- اداء المعالج ليس الافضل في هذه الفئة السعرية
مميزات الموبايل :-
- الموبايل بيدعم تركيب شريحتين إتصال وكارت ميموري في نفس الوقت
- بطارية الهاتف ضخمة جدًا وتُعطي اداء مُمتاز
- تصميم الهاتف الخارجي مميز جدًا
- شاشة الهاتف ضخمة وتأتي بتصميم شيك وحواف صغيره
سعر الموبايل :-
الموبايل بيجي بنسختين هنا في مصر، نسخة بمساحة تخزين 64 جيجا و4 جيجا رام ودي سعرها 2150 جنيه، والنسخة اللي بنرشحها هنا هي النسخة الـ32 جيجا و3 جيجا رام وسعرها 1750 جنيه، والموبايل بيدعم تركيب شريحتين إتصال وكارت ميموري عشان تزود الـ32 جيجا تخزين.
فئة 2000 جنية :-
1- Xiaomi Redmi 8
موبايل اقتصادي لذيذ جدا بيقدملك خامة خارجية و تقفيل محترم جدا، معالج كوالكوم في الفئة السعرية دي كويس جدا هو أي نعم معالج اقتصادي شوية و هو سناب دراجون 439 و يعتبر أدائه قريب جدا من ميدياتيك P22 بس المستخدمين بيحبوا اسم سناب دراجون علي الموبايل بتاعهم، عموما أداء الموبايل بردوا كويس مفيش فيه مشاكل و مناسب جدا لسعره بعيدا عن بردوا فكرة إن المعالج ده مش مناسب للجيمز التقيله زي الميدياتيك بي 22 بالظبط.
موجود بصمة خلفية سريعة و أدائها كويس جدا بالسعر ده في موبايل Redmi 8 ، الموبايل فيه كاميرات كويسة في الفئة الاقتصادية و كمان بيدعم تشغيل جوجل كاميرا و بيطلع نتائج أحسن بكتير لأن سينسور الكاميرا الخلفية كويس جدا و هو سوني IMX 383، والموبايل شاشته متوسطة 6.2 بوصة بدقة HD PLUS و فيها نوتش صغير للسيلفي.
واخيرا البطارية هنا عملاقه 5000 مللي أمبير و بتستحمل معاك وقت طويل جدا و المميز هنا إنه USB Type C و الموبايل بيدعم الشحن السريع وكفاية إنه حتى الشاحن البطئ اللي في العلبة ال 10 واط بيشحن البطارية لحد 90% في ساعتين وده وقت حلو جدا.
عيوب الموبايل :-
- الشاشة تأتي بحافة سفليه كبيره
- الهاتف لا يدعم لمبة الاشعارات
- اداء الموبايل ليس قوي على عكس المعتاد هو مُعتاد من شاومي في هذه الفئة
- الشاحن السريع غير موجود داخل علبة الهاتف
مميزات الموبايل :-
- تصميم الموبايل الخارجي جذاب وممتاز جدًا
- خامات الموبايل الخارجية من افضل الخامات في هذه الفئة السعرية
- منفذ الشحن Type C وهي ميزة في هذه الفئة السعرية
- الهاتف بيدعم IR Blaster للتحكم في الاجهزة الكهربائية كعادة موبايلات شاومي
- بطارية باداء ممتاز جدًا وتقبل الشحن السريع
- شاشة الهاتف تدعم طبقة حماية جوريلا جلاس 5
سعر الموبايل :-
الموبايل هنا في مصر بيتوفر بنسختين الاولى منهم بمساحة تخزين 32 جيجا و3 جيجا رام وهي دي اللي بنرشحها هنا، ودي بتيجي بسعر 2000 جنيه مصري اما النسخة التانيه من الموبايل بتيجي بمساحة تخزين 64 جيجا مع 4 جيجا رام ودي بسعر 2300 جنيه ومش بنرشح النسخة دي، والموبايل بيدعم تركيب شريحتين إتصال وكارت ميموري في نفس الوقت.
2- Samsung Galaxy A10s
تاني موبايل في الفئة السعرية ديه و هديله لقب الموبايل المنتشر و هو Samsung Galaxy A10s طبعا سامسونج ليها معزة خاصة في قلوب المستخدمين وخصوصًا في الفئة السعرية دي، الموبايل هيديك مستشعر بصمة في الظهر وشاشة 6.2 بوصة بدقة HD ومساحة 32 جيجا بايت و 2 جيجا رام وبطارية كويسة جدا 4000 مللي أمبير.
وانا حقيقي معنديش مشاكل مع سامسونج في الموبايل ده لان استخدام معالج ميدياتيك Helio P22 في الموبايل ده حسن جدا من أداء الشبكات عليه و بقت أفضل من أخوه القديم الـA10، وكمان أداء الموبايل عموما مقبول هو طبعا مش أفضل حاجة لأن واجهة سامسونج ثقيلة نسبيا بس مش هيأزمك يعني.
الشاحن المرفق في العلبة 1.5 امبير بس مش 2 امبير زي المنافسين و البطارية بتاخد وقت طويل في الشحن حوالي 3 ساعات مع إنها 4000 مللي أمبير مش 5000 بسبب قوة الشاحن القليلة شوية، والموبايل فيه كاميرا خلفية مزدوجة الأساسية 13 ميجا بيكسل و السيلفي 8 ميجا بيكسل و أدائهم تقليدي جدا مش أفضل حاجة يمكن ريدمي 8 في وجة نظري أفضل منه في جزء الكاميرات.
عيوب الموبايل :-
- الهاتف لا يدعم لمبة الاشعارات
- كاميرات الهاتف ليست الافضل في فئته السعرية
- اداء الموبايل في الالعاب اقل من المُنافسين
- البطارية تستغرق وقت طويل جدًا في الشحن
مميزات الموبايل :-
- الموبايل بيدعم تركيب شريحتين إتصال وكارت ميموري في نفس الوقت
- بطارية الهاتف تُقدم اداء مُرضي جدًا في هذه الفئة السعرية
- اداء الشبكات في الموبايل ممتاز
سعر الموبايل :-
الموبايل متوفر بنسخة بمساحة تخزين 32 جيجا مع 2 جيجا رام وسعر النسخة دي حوالي 1900 جنيه مصري وبتدعم تركيب شريحتين إتصال مع كارت ميموري في منفذ مخصص له.
فئة 2500 جنية :-
عاوز تلعب جيمز براحتك نروح بقي في الفئة السعرية من 2500 لـ 3000 جنية وركز معايا لإن الفئة دي حرفيا فيها موبايلات كتير كويسة و الفكرة هنا في الانتشار يعني لو لاقيت اصلا حاجة من اللي في المقال هنا هاتها و انت مغمض على طول، ومعظم الموبايلات في الفئة السعرية دي بمعالج سناب دراجون 665 وده معالج كويس جدا بالسعر ده و بيشغلك كل الألعاب بدون مشاكل بعيدا عن إنه بيشغل PUBG على Medium جرافيك مفيش High بس الألعاب كلها بتشتغل كويس جدا على المعالج ده، بعيدا عن Fortnite اللي مش بتشتغل بشكل رسمي ع المعالج ده.
1- Realme 5
موبايل محترم من ريلمي ارشحلك فيه النسخة 64 جيجا مع 3 جيجا رام و لازم تدور عليها كويس اونلاين و في المحلات لأن النسخة ديه بتخلص أول بأول، الموبايل فيه المعالج اللي قلت أنه الراعي الرسمي للفئة ديه وهو سناب دراجون 665 مع شاشة 6.5 بوصة IPS بدقة HD plus مش أفضل دقة شاشة بالسعر ده علشان وجود الشاومي نوت 8 اللي هنتكلم عنه كمان شوية، الموبايل حجمه كبير في الإيد حبتين تلاته و تصميمه شيك بس بلاستيك ، يعني مسألة الحجم و الشكل نسبية بس هو مش الأفضل في الفئة دي.
الكاميرا السيلفي اللي ف الموبايل ده محترمة جدا و قد تكون الأفضل بالسعر ده 13 ميجا بيكسل مع فتحة عدسة 2.0 بتطلع صور كويسة جدا في كل أوضاع التصوير، الكاميرا الخلفية رباعية نفس الرصة المعهودة الأساسية 12 ميجا بيكسل مع فتحة عدسة 1.8 و التانية 8 ميجا بيكسل للتصوير الواسع و الثالثة macro و الرابعة عزل، الكاميرا الخلفية هنا كويسة جدا الصبح بس في الاضاءات الضعيفة الشاومي نوت 8 يتفوق عليه.
الموبايل بطاريته ضخمة 5000 مللي أمبير بس للأسف منفذ الشحن micro USB و كمان شاحن 10 واط فالموبايل بطيء شوية في الشحن يعني 3 ساعات و أكتر، طبعا البصمة و ال Face Unlock وكل الحاجات ديه موجودة في الفئة السعرية دي فمش هنتكلم عنها كتير
وأخيرا شبكة الموبايل كويس جدا وعدد الشكاوي اللي وصلنا من شبكة Realme 5 قليل، يعني الشكاوى كلها محصورة في حساسية اللمس على الشاشة مع تركيب headphones و اللي اتحلت بتحديث سوفت وير.
عيوب الموبايل :-
- وزن الموبايل وحجمه كبير بسبب البطارية الضخمة
- دقة الشاشة ليست الافضل فهي HD فقط
- البطارية تحتاج وقت كبير لكي يتم شحنها
- الهاتف لا يدعم لمبة الاشعارات
- خامات الهاتف الخارجيه من البلاستيك على عكس الـXiaomi Note 8 الزجاج
- منفذ الشحن في الهاتف Micro USB 2.0
مميزات الموبايل :-
- اداء الكاميرات في الموبايل ممتاز جدًا سواء الاماميه او الخلفية
- بطارية الهاتف تُعطي اداء ممتازة جدًا
- المعالج يُقدم اداء ممتاز في هذه الفئة السعرية
- الهاتف يدعم شريحتين إتصال مع كارت ميموري
سعر الموبايل :-
النسخة اللي برشحها من الموبايل هي اقل نسخة واللي بتيجي بمساحة تخزين 64 جيجا مع 3 جيجا رام والنسخة دي سعرها 2600 جنيه والموبايل بيدعم تركيب شريحتين إتصال مع كارت الميموري الخارجي.
2- Xiaomi Redmi Note 8
الموبايل ده بيقدر يتفوق على الريلمي 5 في كام حاجة أولهم الحجم الأقل و التصميم الزجاجي المحترم و فرق الخامة الخارجية فعلا واضح لصالح الشاومي، الكاميرا الخلفية هنا رباعية بردوا بس الأساسية 48 ميجا بيكسل مع فتحة عدسة 1.8 و اللي بتطلع صور أحسن فعلا خصوصا بالليل، الموبايل فيه منفذ USB Type C و بيشحن أسرع بسبب إن حجم بطاريته أقل 4000 مللي أمبير بس طبعا الريلمي 5 بيستحمل عدد ساعات screen on أكتر.
و كمان موجود هنا مستشعر IR و فيه لمبة اشعارات، والشاشة هنا 6.3 بوصة اصغر حجمًا من الريلمي 5 بس دقتها FHD+ بس، طيب ليه النوت 8 مش هو المرشح الأول قبل ريلمي 5 ؟
اسباب تفوق ريلمي 5 على نوت 8 :-
- أول سبب إن أصغر نسخة من النوت 8 النسخة 32 و3 رام اللي سعرها 2500 جنيه و اللي ينفع فيها تركب كارت ميموري و شريحتين اتصال مع بعض و النسخة ديه قليلة جدا و صعب تلاقيها بسهولة. النسخة اللي سهل تلاقيها ال 64 جيجا مع 4 جيجا رام بسعر 3000 جنيه و دي أغلى من ريلمي 5 بحوالي 350 جنيه مع مراعاة فرق حجم الرام.
- تاني سبب هو الشبكة، ريلمي 5 بيقدملك تجربة شبكة مستقرة أكتر شوية من النوت 8 لو هتجرب الاتنين مع بعض لفترة طويلة على نفس الشبكة.
- تالت سبب هو ان الكاميرا السيلفي في ريلمي 5 احسن بفرق كبير عن الريدمي نوت 8، لكن كاميرا النوت 8 الخلفية مش افضل بفرق كبير.
ملخوظة مهمة…مش شرط يكون العيب موبايلك جايز فعلا الشبكة عندك وحشة، اختبار الشبكة بيبقي بوجود الموبايلين معاك في نفس الوقت وتجرب عليهم نفس الشبكة والشريحة وده اللي بنعمله علي طول.
عيوب الموبايل :-
- الكاميرا السيلفي ليست
- الكاميرا الخلفية بارزه بشكل كبير عن ضهر الهاتف
- الشاحن السريع غير موجود في علبة الهاتف مثل Redmi 8
مميزات الموبايل :-
- منفذ الشحن من نوع Type C
- بطارية تُعطي اداء جيد جدًا
- خامات خارجية من افضل الخامات في هذه الفئة السعرية
- شاشة تُقدم دقة جيده والوان جيده
- تصميم الهاتف الخارجي ممتاز
- اداء الهاتف في الالعاب والإستخدام اليومي ممتاز
- يدعم لمبة اشعارات
سعر الموبايل :-
الموبايل بيجي بـ3 نسخ في السوق المصري، الاولى بمساحة تخزين 32 جيجا مع 3 جيجا رام بسعر 2500 جنيه والنسخة الثانيه بمساحة تخزين 64 جيجا مع 4 جيجا رام بسعر 2900 جنيه مصري والنسخة الاخيره بمساحة تخزين 128 جيجا مع 4 جيجا رام بسعر 3250 جنيه، والنسخة التي نُرشحها هي نسخة الـ64 جيجا مع 4 جيجا رام.
3- Oppo A5 2020
نلاقي اوبو نزلت سعر موبايل A5 2020 النسخة 64 جيجا مع 3 جيجا رام لحد 3000 جنيه.، الموبايل ده كان نازل غالي في الأول بس لما يتوفر منه كميات في المحلات بالسعر ده هيبيع بشكل كويس، هنفهم ليه .. الموبايل ده هو هو الريلمي 5 باختلاف بس فرق التصميم و 4 فروقات كمان .. الأول إن السيلفي هنا 8 ميجا بيكسل أقل من ال 13 ميجا بيكسل بتوع الريلمي.
الفرق بين A5 2020 وريلمي 5 :-
- الكاميرا السيلفي في ريلمي 5 بدقة 13 ميجا اما في الاوبو بدقة 8 ميجا
- الفرق الثاني في منفذ الشحن في الاوبو Type C وفي الريلمي Micro USB 2.0
- الفرق الثالث اوبو بيجي بسماعات جوه العلبة اما ريلمي مفيش معاه سماعات
- الفرق الرابع A5 2020 بيقدم احسن صوت في الفئة السعرية بفضل السماعات الستيريو
- الفرق الخامس والاخير في التصميم والشكل الخارجي للموبايلين
فيعني اسم أوبو على الجهاز و كوالتي أوبو المحترمة و عدم وجود أي مشاكل في الموبايل ده، يخليك لو مش لاقي النوت 8 تشتري الـA5 2020.
عيوب الموبايل :-
- دقة الشاشة HD فقط وهو عيب كبير
- ضهر الهاتف من البلاستيك اللامع الذي يظهر عليه الخرابيش والخدوش بسهولة
- الهاتف لا يدعم الشحن السريع
- الكاميرا السيلفي ليست الافضل
- الشاشة لا تأتي مع طبقة حماية عليها
مميزات الموبايل :-
- بطارية ممتازة جدًا تُقدم اداء مُرضي
- الهاتف يدعم تركيب شريحتين إتصال مع كارت ميموري
- سماعات الهاتف الخارجية ستيريو وتُقدم افضل اداء في هذه الفئة السعرية
- اداء المعالج ممتاز
سعر الموبايل :-
النسخة الاولى من الهاتف واللي بنرشحها هي الـ64 جيجا مع 3 جيجا رام ودي بتيجي بسعر 2800 جنيه مصري، والنسخة الكبيرة من الموبايل بتيجي بمساحة تخزين 128 جيجا مع 4 جيجا رام وسعرها 3400 جنيه بس دي مش بنرشحها لإن في افضل منها في سعرها.
فئة 3000 جنية :-
1- Realme 3 Pro
لو هتقدر تزود الفلوس 100 جنية بس كمان لحد 3100 جنيه هنتكلم عن الموبايل البرنس اللي محدش قدر ينافسه أول ما نزل و لحد دلوقتي اسمه مسمع جامد اونلاين و اوفلاين و هو الـRealme 3 Pro، بسعر 3100 جنية هتاخد أحسن كاميرا خلفية لأن الموبايل ده بمستشعر 16 ميجا بيكسل و بتطلع صور حلوة جدا و سيلفي 25 ميجا بيكسل و صور ممتازة.
وكمان هتاخد احسن اداء مع معالج سناب دراجون 710 أعلي معالج بالسعر و بيقدم أداء ممتاز أحسن من سناب دراجون 665 و بيشغل PUBG علي High HD بدون أي مشاكل، والبطارية 4000 مللي أمبير مع منفذ Micro USB و شاحن VOOC السريع بقوة 20 واط و البطارية بتشحن ل 100% في ساعة و ثلث.
كل دي مميزات تخليك تفكر تجيبه أي نعم هو نزل اللي أحدث منه و هو الـRealme 5 Pro بس أغلي في السعر و الريلمي 3 برو مفيش فيه رصة الكاميرات الأربعة منهم الاتنين الزيادة ال wide angel و ال macro.
عيوب الموبايل :-
- تصميم من البلاستيك البولي كاربونيت سهل التبصيم والخربشة
- الهاتف لا يدعم لمبة الاشعارات
- منفذ Micro USB 2.0 وليس Type C
- شبكة الهاتف ليست الأفضل
مميزات الموبايل :-
- كاميرات تُقدم اقوى اداء في هذه الفئة السعرية
- معالج قوي جدًا يُعطي اداء مُمتاز في هذه الفئة السعرية بدون مُنافس
- الهاتف يدعم تركيب شريحتين إتصال وكارت ميموري في نفس الوقت
- الهاتف يدعم الشحن السريع
سعر الموبايل :-
النسخة الاولى من الهاتف بمساحة تخزين 64 جيجا مع 4 جيجا رام وهي تأتي بسعر 3100 جنيه مصري وهي النسخة التي نُرشحها، وهُناك نسخة اخرى من الهاتف بمساحة تخزين 128 جيجا مع 6 جيجا رام وهي بسعر 4000 جنيه مصري.
2- Nokia 7 Plus
موبايل Nokia 7 Plus ده خاماته محترمة جدا لأنه جاي بظهر من المعدن و فريم نحاس و الفريم ده موجود كمان علي فريم الكاميرا اللي بارزة شوية، بصراحة الموبايل ده محترم جدا جدا كموبايل يستحمل معاك لا و مش بس كدا، ده كمان جاي بمعالج سناب دراجون 660 ، معالج مش وحش خالص ف الفئة السعرية دي يجي بعد سناب دراجون 710 علي طول مش هيقصر معاك ف الاستخدام.
وطبعا مفيش كلام عن الشبكة لأن في النوكيا مع المعالج ده بيقدم شبكة قوية جدا جدا و طبعا معاك بصمة خلفية سريعة ومفيش فيها مشاكل ومعاك كاميرا خلفية مزدوجة الأساسية 12 ميجا بيكسل مع فتحة عدسة 1.8 و التانية للزوم 13 ميجا بيكسل و العدسات من Ziess كويسة جدا و بتطلع صور واقعية جدا، أما السيلفي 16 ميجا بيكسل مع فتحة عدسة 2.0 أدائه ميقلش حاجة عن كل المنافسين.
المميز ف النوكيا دايما التحديثات، بمعني إن الموبايل قديم نسبيا في السوق و هتلاقيه باندرويد أوريو 8 بس أول ما تطلعه هيوصلك اخر تحديث لاندرويد 9 نوكيا علي وضعها جدا ف النقطة دي، البطارية مقبولة جدا في الموبايل، بطارية بسعة 3800 مللي أمبير و USB TYPE C و شاحن سريع 18 واط موجود في العلبة مش هيقصروا معاك فى الاسخدام.
عيوب الموبايل :-
- الهاتف لا يدعم لمبة الاشعارات
- الشاشة ابعادها قديمة وتصميمها قديم جدًا
- الموبايل غير مُنتشر بشكل كبير
مميزات الموبايل :-
- خامات الهاتف الخارجية قوية جدًا
- كاميرا خلفية ممتازة بالوان واقعية
- اداء الهاتف لا بأس به
- تحديثات مستمرة وسريعة
- بطارية قوية تدعم الشحن السريع عن طريق Type C
سعر الموبايل :-
النوكيا 7 بلس بحوالي 3400 جنية للنسخة 64 جيجا مع 4 جيجا رام و ينفع تركب شريحتين اتصال او شريحة و كارت لكن مينفعش التلاته مع بعض.
3- Samsung Galaxy M30s
موبايل Samsung M30s محترم جدا جدا قدر يقف و يسد مع منافسين بسعر أعلى منه، الموبايل جاي بمعالج Exynos 9611 اللي أدائه قريب جدا من سناب دراجون 660 و مش هيقصر معاك في الاستخدام اللي مش هيعجبك هو تقل واجهة سامسونج شوية بس الناس بتحبها، وطبعًا أهم حاجتين في الموبايل ده الشاشة والبطارية.
نبدأ بالشاشة السوبر اموليد الـ6.4 بوصة الممتازة من سامسونج و اللي بدقة Full HD plus وفيها نوتش صغيرة للسيلفي، شاشة محترمة قد تكون هي الأفضل بالسعر ده، و لو همك الشاشة ف المقام الاول فاكيد اختيارك هيكون ال M30 S خصوصا ان الشاشة كمان سطوعها عالي جدا تحت الشمس.
البطارية ضخمة جدا 6000 مللي أمبير هتكمل معاك يوم ونص استخدام مستريح جدا و بتشحن في ساعتين و شوية بالشاحن ال 15 واط و منفذ شحن USB Type C.
الكاميرات تعتبر متوسطة مش رقم واحد و مش وحشة برده، هي مقبولة جدا في الفئة السعرية دي و بتطلع ألوان واقعية، معاك 3 كاميرات في الظهر المميز فيهم إنهم مش بارزين خالص، الرئيسية 48 ميجا بيكسل مع فتحة عدسة 2.0 و السيلفي 16 ميجا بيكسل مع فتحة عدسة 2.0 و الأداء في المجمل مقبول لكن التفاصيل مش كتير أوي لما الاضاءة بتكون قليلة بس فيه night mode بيحسن الوضع حاجة بسيطة.
البصمة في الظهر أدائها مش أسرع حاجة بس مقبول و أداء الشبكات علي الموبايل كويس مش وحش زي موبايلات جالاكسي A القديمة.
الموبايل مفيش فيه لمبة اشعارات بس موحود خاصية Always on display اللي بتعرضلك الاشعارات و دي حاجة كويسة جدا برده.
عيوب الموبايل :-
- الهاتف لا يدعم لمبة اشعارات
- بصمة الإصبع ليست الاسرع في هذه الفئة
- لا توجد طبقة حماية على الشاشة
- جودة وخامات الهاتف الخارجية ليست الافضل
مميزات الموبايل :-
- وزن الهاتف خفيف بالنسبة لحجم البطارية الكبير
- الهاتف يدعم تركيب شريحتين إتصال وكارت ميموري
- شاشة من اقوى الشاشات في هذه الفئة السعرية
- اداء مقبول في هذه الفئة السعرية
- الكاميرات الخلفية ليست بارزه تمامًا
سعر الموبايل :-
الموبايل سعره 3600 جنية للنسخة 64 جيجا مع 4 جيجا رام و ينفع تركب كارت ذاكرة خارجي و شريحتين اتصال مع بعض، للأسف الموبايل مبقاش موجود كتير بسبب أنه قريب من مواصفات موبايل سامسونج اللي جاي بقوة و هو الـGalaxy A51 يعني تحسه كده اتسحب من السوق و الموجود للأسف في الفئة السعرية دي هو الموبايل المنتشر الـA30s و اللي هو اخر اختيار ف الفئة السعرية ديه.
4- Samsung Galaxy A30s
هاتف A30S هو موبايل سامسونج المنتشر بقوة في الفئة السعرية بتاعة 3500 جنيه، الموبايل جاي بشاشة سوبر أموليد 6.4 بوصة بس بدقة HD plus و للأسف ديه دقة مش مناسبة للفئة السعرية دي، بس سامسونج عملت كده علشان توفر و تدمج البصمة في الشاشة و اللي أدائها مقبول جدا و أحسن بكتير من موديلات A30 و A50 القديمة.
الموبايل برده جاي بأقل معالج ف الفئة السعرية بتاعته و هو Exynos 7904 و اللي أداءه العام قريب من سناب دراجون 636 و اللي هو بردوا مش أقوى حاجة في الفئة السعرية دي، الكاميرات كويسة لما جربناها مقارنة بالمنافسين الموبايل جاي بكاميرا ثلاثية الأساسية 25 ميجا بيكسل مع فتحة عدسة 1.7 و معاك wide angel و عزل و السيلفي 16 ميجا بيكسل، أداء الكاميرات عموما مش وحش بس مش أحسن حاجة بردوا خصوصا إن مفيش night mode في الموبايل ده.
بطارية تقليدية 4000 مللي أمبير يدوب هتكمل اليوم مع شاحن 15 واط ومنفذ Type C هتشحن بالكامل في ساعتين و ربع و ده بردوا وقت مش قليل في الفئة السعرية دي و المفروض الوقت كان هيبقي أقل من كده شوية ده الـ 6000 الموجودين في M3 بيتشحنوا في وقت أكبر ربع ساعة تقريبا، شبكة الA30S متوسطة مش أقوى شبكة و لكنها مش سيئة خالص مع الاستخدام بس يعني مش هتلقط معاك 4G كتير في أماكن التغطية الصعبة.
و أخيرا الموبايل للأسف مفيش فيه لمبة اشعارات و لا كمان فيه خاصية Always on display المشهورة بتاعة سامسونج.
عيوب الموبايل :-
- تصميم خارجي مُعرض للخدش
- لا يدعم لمبة الاشعارات
- شاشة بدقة HD+ فقط غير مقبوله بهذا السعر
- اداء ليس الافضل في هذه الفئة السعرية
مميزات الموبايل :-
- بصمة اسفل الشاشة باداء جيد
- بطارية تقدم اداء جيد
- منفذ Type C مع دعم للشحن السريع
- شبكة الهاتف لا يوجد بها مشاكل
سعر الموبايل :-
الـA30s موجود في المحلات كاختيار حلو للي عاوز موبايل من سامسونج في الفئة السعرية دي، وهو متوفر بنستخين، الاولى 64 جيجا مع 4 جيجا رام بسعر 3250 جنية و التانية 128 جيجا مع 4 جيجا رام بردوا ب 3500 جنية و ينفع تركب كارت ميموري و شريحتين اتصال مع بعض.
فئة 4000 جنية :-
1- Xiaomi Redmi Note 8 Pro
موبايل ريدمي نوت 8 برو هيديك تصميم خارجي ممتاز بخامة زُجاجيه فخمه وموجود فيه مستشعر IR للتحكم في الاجهزة الكهربائية، كما معالج ميدياتك G90T بيقدم اداء ممتاز جدًا، وهو الافضل في هذه الفئة السعرية، والموبايل بيدعم لمبة اشعارات وشاشة ضخمة بسطوع ممتاز.
عيوب الموبايل :-
- كاميرا سيلفي ليست الأفضل
- وزن الهاتف ثقيل نسبيا
- التصميم الزُجاجي مُعرض للكسر
- لا يُمكنك تركيب شريحتين إتصال مع كارت ميموري في نفس الوقت
- صوت الهاتف الخارجي ليس الافضل
مميزات الموبايل :-
- تصميم ممتاز بخامات فخمة جدًا
- شاشة كبيرة وحواف صغيره جدًا
- البطارية تدعم الشحن السريع
- كاميرا خلفية قوية جدًا بالنسبة لهذه الفئة السعرية
- معالج يُقدم اداء قوي جدًا في هذه الفئة السعرية
سعر الموبايل :-
الموبايل بيجي بنسختين، الاولى بمساحة 64 جيجا مع 6 جيجا رام ودي بسعر 3700 جنيه ودي مش برشحها، النسخة الكبيرة اللي بتترشح مساحة تخزينها 128 جيجا مع 6 جيجا رام وتأتي بسعر 4050 جنيه مصري، شخصيًا ارشحلك النسخة التانيه جدًا لإن النسخة الاولى مساحة تخزينها صغيره ومش بتدعم تركيب شريحتين وكارت في نفس الوقت.
2- Realme 5 Pro
ريلمي 5 برو بيجي بصوت ممتاز وواضح مع خامات خارجية بلاستيك بولي كاربونيت هتستحمل معاك وقعات، وبيديك الموبايل كاميرا سيلفي ممتازة، واقل نسخة متوفره من الموبايل مساحة التخزين فيها 128 جيجا، والموبايل هيوفرلك إستقرار في السوفت وير افضل من شاومي وكمان شحن اسرع بفرق بسيط.
عيوب الموبايل :-
- خامات خارجية من البلاستيك
- الهاتف لا يدعم لمبة الاشعارات
مميزات الموبايل :-
- اداء الكاميرات سواء الاماميه او الخلفية ممتازة جدًا
- الهاتف يدعم تركيب شريحتين إتصال من الجيل الرابع مع كارت ميموري
- معالج يقدم اداء جيد ومن شركة قوية وهي سناب دراجون
سعر الموبايل :-
الريلمي 5 برو ارشحلك فيه النسخة 128 جيجا مع 4 جيجا رام و ينفع تركب كارت ميموري وشريحتين اتصال مع بعض بسعر 3700 جنيه، وفي نسخة تانيه بمساحة تخزين 128 جيجا مع 8 جيجا رام ودي بسعر 4500 جنيه مصري.
3- Mi 9 Lite
لو زودت بقي المبلغ شوية ودخلت ف فئة الـ4500 جنية هتلاقي فيها الموبايل المظلوم من شاومي و هو الـXiaomi Mi 9 Lite معرفش ليه الموبايل ده سوقه مش ماشي في مصر .. يمكن علشان الناس بتفضل المعالج الأقوى والبطارية الأكبر والكاميرا الخلفية الممتازة اللي في الـNote 8 Pro.
عموما الـ Mi 9 Lite لازم تبقى فاهم إن خاماته أحسن لأن مهما كان خامات فئة الـMi من شاومي أحسن من الريدمي بتاعة النوت 8 برو، وكمان الشاشة الأموليد ممتازة جدا في المي 9 لايت مع البصمة المدمجة السريعة بالشاشة، وبرده أداء الكاميرات ممتاز جدا وعملنا مقارنه بيه مع موبايلات تانية كتير و لاقينا إن فعلا الأداء يضاهي مثلا الـMi 9T الأعلى و الأغلى من شاومي نفسها و كمان كسب موبايلات تانية أغلى منه.
بالنسبة للسيلفي فهو مش أحسن حاجة بس يعني أداءه بيتحسن مع جوجل كاميرا اللي بيشتغل على الموبايل ده بشكل ممتاز بفضل استخدام معالج سناب دراجون، الموبايل جاي بمعالج سناب دراجون 710 و هو المعالج التقليدي في الفئة السعرية دي، هي بس النقطة زي ما قلنا إن شاومي نفسها بتقطع علي موبايلاتها بالنوت 8 برو اللي محقق مبيعات قوية جدا بالمعالج الأقوى اللي فيه.
عيوب الموبايل :-
- لا يدعم تركيب شريحتين إتصال وكارت ميموري في نفس الوقت
- الهاتف مُعرض للكسر فهو بتصميم زُجاجي
- معالج الهاتف ليس الافضل في هذه الفئة السعرية
- الكاميرا السيلفي في الهاتف ليست الافضل
مميزات الموبايل :-
- شاشة سوبر اموليد ممتازة جدًا
- بصمة سريعة جدا اسفل الشاشة
- اداء الكاميرا الخلفية ممتاز جدا
- بطارية ضخمة بحجم كبير
- الهاتف يدعم لمبة الاشعارات
سعر الموبايل :-
المي 9 لايت بسعر 4444 جنيه للنسخة 128 جيجا مع 6 جيجا رام و ينفع تركب كارت ميموري وشريحة او شريحتين من غير كارت ذاكرة.
فئة 5000 جنية :-
1- Oppo Reno 2F
رينو 2 اف بيقدم شاشة كامله اموليد وسلايدر للكاميرا السيلفي فيه الوان وحركات وكمان تصميم الموبايل الخارجي من الزجاج مع فريم من البلاستيك للاسف، الموبايل بيجي مع بصمة اصبع تحت الشاشة سريعة جدا وبيجي مع تصميم مُميز جدًا وضهر فلات بدون اي بروز للكاميرات، كمان الكاميرات بتقدم اداء ممتاز جدا في السعر ده سواء اماميه او خلفية.
عيوب الموبايل :-
- اداء الموبايل اقل من معظم المنافسين
- الهاتف بتصميم زجاجي معرض للكسر
- الهاتف لا يدعم تصوير فيديوهات بجودة 2160p
- الهاتف لا يدعم لمبة الاشعارات
مميزات الموبايل :-
- خامات ممتازة جدا من اوبو
- شاشة سوبر اموليد قوية جدا وكامله بدون نوتش
- كاميرات تقدم اداء جيد
- بطارية ضخمة تقدم اداء ممتاز مع دعم للشحن السريع
- تصميم الهاتف شيك جدا وفخم
- شبكة اوبو الممتازة
سعر الموبايل :-
الرينو 2F سعره ف المحلات 5400 جنية للنسخة 128 جيجا مع 8 جيجا رام والموبايل بيدعم تركيب شريحتين إتصال وكارت ميموري في نفس الوقت.
2- Realme XT
موبايل ريلمي اكس تي محقق نجاح كبير على حجم شركة ريلمي في مصر، ومحقق مبيعات كويسه برده، الموبايل بيقدملك معالج كويس مع تصميم كويس وخامات كويسه وشاشة اموليد بس مش كامله للأسف فيها نوتش فوق، والتصميم هنا من الزجاج المخلوط بنسبة كبيرة من البلاستيك والكاميرات بارزة بشكل كبير جدا عن الضهر بتاع الموبايل، وبصمة الإصبع زي الرينو مدمجة تحت الشاشة وسريعة جدًا.
عيوب الموبايل :-
- لا يدعم لمبة الاشعارات
- معالج الهاتف ليس الاقوى في فئته
- بروز الكاميرات كبير جدًا
- السماعات الخارجية موجوده على اليسار وهو مكان غير مُناسب للعب
- الخامات الزجاجيه ليست الافضل وبها نسبة من البلاستيك
مميزات الموبايل :-
- الهاتف يدعم الشحن السريع
- الكاميرات تُقدم اداء ممتاز جدا
- المعالج اداءه مُستقر
- بصمة الإصبع سريعة جدًا
- شاشة الهاتف اموليد جيده
- الهاتف يدعم تركيب شريحتين إتصال مع كارت ميموري
- تصميم الهاتف الخارجي جيد
سعر الموبايل :-
الريلمي XT سعره حوالي 5300 جنيه للنسخة 128 جيجا مع 8 جيجا رام وهي نسخة واحده بس المتوفره منه وبتدعم تركيب شريحتين وكارت في نفس الوقت.
فئة 6000 جنية :-
1- Huawei Nova 5T
لو انت مستخدم يهمك بشكل أساسي الألعاب و الكاميرا الخلفية الجامدة جدا، يبقي تروح و انت مغمض تشتري الـ Huawei Nova 5T الجديد أو Honor 20 العادي، الموبايلين فيهم نفس المعالج الكيرن 980 الرائد اللي هيقدملك أفضل أداء في الفئة السعرية دي يكفي اني اقولك إن لعبة fortnite بتشتغل على اعدادات جرافيك Epic اللي هي أعلى حاجة ف الفئة السعرية ديه.
وكمان الكاميرا الخلفية الـ 48 ميجا بيكسل مع مستشعر سوني المحترم IMX 586 ف الموبايلين بتطلع صور ممتازة واقعية جدا بدون اللعب كتير في الألوان وكمان الـ night mode تحفة ف الموبايلين دول.
الفرق بس إن النوفا 8 رام و الاونر 6 رام و طبعا في فرق في التصميم اللي أشيك شوية في النوفا و الاتنين من الزجاج مع فريم معدن محترم و البصمة في زر الباور في الاتنين.
عيوب الموبايل :-
- شاشة IPS LCD ليست اموليد
- لا يوجد منفذ 3.5 مللي للسماعات الخارجية
- لا يوجد منفذ لوضع كارت ميموري خارجي
مميزات الموبايل :-
- اقوى كاميرات خلفية في الفئة المتوسطة
- اقوى اداء في الفئة المتوسطة
- تصميم مميز جدًا وشيك جدًا
- خامات من افضل خامات هذه الفئة السعرية فيما اعلى
- بطارية تقدم اداء ممتاز جدا
سعر الموبايل :-
النوفا سعره 6500 جنيه للنسخة 128 جيجا و 8 رام والهونر 20 سعره حوالي 5800 جنيه للنسخة 128 جيجا مع 6 جيجا رام والاتنين واحد بفرق ال2 رام الزيادة في النوفا.
2- Xiaomi Mi 9T
لو انت بقي عايز أداء كويس في الألعاب و كاميرات كويسة و شاشة أموليد كاملة بدون نوتش، يبقي لازم تفكر في الشاومي مي 9 تي لأن ده بالنسبالي من أفضل الموبايلات اللي نزلت من شاومي في 2019. الموبايل فيه معالج سناب دراجون 730 اللي أدائه كويس جدا جدا في الألعاب بردوا، هو اه أقل من الكيرن 980 بس ما زال ال 730 من أحسن معالجات الفئة المتوسطة العليا.
الشاشة ممتازة ف الموبايل ده بحجم 6.4 بوصة أموليد ألوانها حلوة جدا و دقتها Full HD plus و كمان الشاشة هنا كاملة بدون نوتش لأن السيلفي موجود في سلايدر بينور و بيشتغل كمان كأنه لمبة اشعارات.
التصميم شيك و شبابي و لو مش عاجبك الطرقعة اللي فيه ممكن تفكر في اللون الأسود الكربون هادي و رايق جدا و طبعا التصميم زجاجي فخم جدا.
أداء الكاميرات الخلفية كويس جدا و الـ night mode ممتاز بس زي ما بقولك لو قارنته مع النوفا 5 تي هيخسر احيانا و أداء السيلفي هنا مش اد كدا خالص و النوفا و الاونر أحسن في السيلفي بفرق بسيط.
عيوب الموبايل :-
- الهاتف لا يدعم تركيب كارت ميموري
- كاميرا سيلفي تقدم اداء ليس الافضل في هذه الفئة السعرية
مميزات الموبايل :-
- كاميرات خلفية ممتازة
- اداء مُستقر وقوي جدًا
- بصمة تحت الشاشة ممتازة
- خامات الهاتف الخارجية من افضل الخامات في هذه الفئة السعرية
- حواف الشاشة قليله جدًا
- شاشة اموليد تُقدم اداء ممتاز
سعر الموبايل :-
الشاومي Mi 9T مش بيدعم تركيب كارت ميموري ومنصحكش تجيب النسخة الـ 64 جيجا منه، لازم تفكر في الـ128 جيجا مع 6 جيجا رام بسعر 5700 جنيه مصري.
و بردوا ارجع أقولك لو بتفكر فى الشاومي Mi 9T و مش هامك الشاشة الأموليد وفر و هات النوت 8 برو لأنه هيقدملك نفس الأداء الرسومي و يمكن أقوى و كاميرات زيها و يمكن أفضل و بطارية أكبر و يبقى وفرت حوالي الفين جنيه.
من فتره عملنا إستفتاء على موقع موبيزل لأفضل الهواتف في سنة 2019، والنتيجة اللي طلعت واللي نشرناها في مقاله سلسلة الافضل في عام 2019 هي نتيجة إختيارات المُستخدمين وليست ترشيحات موقع موبيزل، وفي هذه المقاله قدمنا لكم ترشيحات موقع موبيزل من 1500 جنيه لـ6000 جنيه مصري !
Comments