علشان تشتري موبايل يكون قوي في تشغيل الألعاب تاخد بالك من مجموعة حاجات أساسية .. أول حاجه المعالج لازم يكون قوي في فئته السعرية .. ثم تردد الشاشة العالي .. والصوت الـStereo ليه دور مهم .. وكمان مستشعر الـGyroscope مهم جدًا في معظم الألعاب .. وكل ما السعر هينزل كل ما هتتنازل، وأهم حاجه هي المعالج!
هنقدملكم ترشيحات أفضل الهواتف للألعاب قبل نهاية سنة 2021 .. ولو محتاج تشوف باقي مميزات وعيوب الموبايل تقدر تشوف المراجعة الكاملة للموبايل من قناة موبيزل على يوتيوب او قسم مراجعات الموبايلات.
من 2000 لـ2500 جنية :-
Infinix Hot 10S
الموبايل بيجي بمعالج ميدياتك Helio G85 اللي يعتبر كويس جدًا في الفئة الإقتصادية .. والمعالج الرسومي بتاعه كويس، هيشغل ببجي على High HD بدون مشاكل .. وكمان الشاشة بتشتغل بمعدل تحديث 90 هيرتز .. هي اه IPS LCD وكمان HD+ لكن معدل التحديث كويس وهيناسب الألعاب بشكل كبير.
الموبايل مفيهوش صوت Stereo ومفيهوش مستشعر Gyroscope حقيقي .. البطارية 6000 مللي امبير هتكفي وقت لعب كبير لكن الشاحن 10 واط فقط، وكمان مدخل الشحن قديم Micro USB 2.0.
سعر Infinix Hot 10S في الوقت الحالي في المحلات النسخة الـ64 جيجا مع 4 جيجا رام بسعر 2250 جنية .. اما النسخة الـ128 جيجا مع 4 جيجا رام بسعر 2500 جنية.
من 2500 لـ3000 جنية :-
1- Redmi 10
موبايل محترم بيتقدم بمعالج ميدياتك Helio G88 وبيشغل لعبة ببجي بشكل كويس جدًا على High HD .. وفي نفس الوقت شاشة IPS LCD بدقة FHD+ وبمعدل تحديث 90 هيرتز .. وكمان معاك صوت Stereo محترم، لكن مستشعر الـGyroscope سوفت وير ومش دقيق أوي .. البطارية 5000 مللي امبير والشاحن 18 وات.
موبايل Redmi 10 بيتوفر بـ3 نسخ .. أرشحلك النسخة الـ64 جيجا مع 4 جيجا رام بسعر 2800 جنية .. بلاش النسخ الأعلى منه لإنها هتدخل في فئة تانيه فيها موبايلات أقوى.
2- Realme C25s
الموبايل ده نفسه من Realme C25 لكن المعالج أقوى بفرق بسيط .. بيجي بمعالج ميدياتك Helio G85 .. الموبايل هيشغل ببجي على High HD بشكل كويس جدًا .. لكن للأسف الشاشة IPS LCD وبدقة HD+ مع 60 هيرتز فقط .. وكمان مفيش صوت Stereo .. فا هو بديل للـRedmi 10 في المركز الثاني.
موبايل Realme C25s بيجي ببطارية 6000 مللي امبير بتشحن بقوة 18 وات عن طريق USB Type C .. النسخة الـ64 جيجا مع 4 جيجا رام من الموبايل بتيجي بسعر 2800 جنية مصري.
من 3000 لـ3500 جنية :-
1- Redmi Note 10S
الموبايل بيجي بمعالج ميدياتك Helio G95 بيشغل ببجي على Ultra HDR والأداء كويس جدًا .. شاشة 60 هيرتز فقط وهي AMOLED وبدقة FHD+ .. الصوت Stereo ومستشعر الجيروسكوب موجود حقيقي .. بطارية 5000 مللي امبير وشاحن 33 وات ومنفذ شحن USB Type C .. مجموعة مواصفات محترمة جدًا.
موبايل Redmi Note 10S يعتبر بديل لـRedmi Note 10 اللي مش متوفر حاليًا في السوق المصري .. أرشحلك اقل نسخة منه الـ64 جيجا مع 6 جيجا رام بسعر 3350 جنية .. والنسخة الأعلى 128 جيجا مع 6 جيجا رام بتيجي بسعر 3700 جنية.
2- Infinix Note 10 Pro
الموبايل بيجي بمعالج ميدياتك Helio G95 معالج قوي في تشغيل الألعاب .. وفي نفس الوقت معاك صوت Stereo وشاشة FHD+ لكن IPS LCD وسطوعها متواضع شوية، وترددها 90 هيرتز .. والبطارية 5000 مللي امبير بتتشحن بقوة 33 وات عن طريق USB Type C .. موبايل كويس في الفئة دي للألعاب.
موبايل Infinix Note 10 Pro موجود في السوق المصري للنسخة الـ128 جيجا مع 8 جيجا رام بسعر 3600 جنية.
3- Galaxy A22
معالج ميدياتك Helio G80 بيشغل ببجي على Medium Graphic .. المعالج أضعف من باقي الخيارات اللي رشحتهالك في الفئة دي لكن انا برشحه علشان مُحبي سامسونج .. الشاشة AMOLED ممتازة HD+ بتردد 90 هيرتز .. مفيش للأسف صوت Stereo ولا مستشعر جيروسكوب .. البطارية 5000 مللي امبير بتتشحن بقوة 15 وات.
الموبايل سعره حاليًا اتخفض في محلات كتير .. تقدر تشتري Galaxy A22 النسخة الـ128 جيجا مع 4 جيجا رام بحوالي 3400 جنية مصري بس.
من 3500 لـ4000 جنية :-
1- Poco X3 NFC
موبايل أثبت نفسه بجدارة في السوق ولحد دلوقتي بيتباع .. معالج كوالكوم سناب دراجون 732 معالج كويس بيشغل ببجي على High HD وفي نفس الوقت صوت Stereo مع شاشة IPS LCD بتردد 120 هيرتز .. ومستشعر چيروسكوب حقيقي، وبيجي مع بطارية 5160 مللي امبير بتدعم الشحن بقوة 33 وات.
سعر موبايل Poco X3 NFC للنسخة بمساحة تخزين 128 جيجا مع 6 جيجا رام حوالي 3950 جنيه مصري.
2- Realme 7
هو البديل للخيار الأول في الفئة دي واللي بيجي بمعالج ميدياتك Helio G95 مع شاشة IPS LCD بمعدل تحديث 90 هيرتز .. لكن للاسف مش صوت Stereo .. وبطارية 4500 مللي امبير لكن بتشحن بقوة 65 وات وده اسرع شاحن في الفئة دي.
موبايل Realme 7 متوفر بنسخو 128 جيجا مع 8 جيجا رام بسعر بيع في المحلات حوالي 4000 جنيه او اقل شوية.
من 4000 لـ5000 جنية :-
1- Poco X3 Pro
موبايل قوي بمعالج كوالكوم سناب دراجون 860 بيشغل ببجي على Ultra HDR ودي جودة ممتازه .. معاك كمان صوت Stereo وشاشة IPS LCD بجودة FHD+ بتردد 120 هيرتز بالإضافة الى بطارية 5160 مللي امبير بتدعم الشحن بقوة 33 وات.
لو انت Gamer فالموبايل ده هيبسطك جدا .. النسخة 128 جيجا مع 6 جيجا رام بسعر 4400 جنيه مصري والنسخة 256 جيجا مع 8 جيجا رام بسعر 4800 جنيه مصري.
ترشيحات اخرى :-
في موبايلات تانيه في الفئة دي من شاومي زي Mi 11 Lite وكمان Redmi Note 10 Pro ولكن دي موبايلات بمعالجات أقل وبتخاطب فئه تانيه من المستخدمين وبتهتم بتقديم حاجات زي الكاميرات والتصميم وشاشات AMOLED .. لكن مش بتقدم أقوى معالجات في الفئة دي.
من 5000 لـ7000 جنية :-
1- Poco X3 GT
أقوى معالج موجود في الفئة دي في الموبايل ده .. ميدياتك Dimensity 1100 مع شاشة IPS LCD بدقة FHD+ بمعدل تحديث 120 هيرتز .. ده بالإضافة الى بطارية 5000 مللي امبير وشاحن سريع 67 وات.
سعر Poco X3 GT للنسخة 128 جيجا مع 8 جيجا رام حوالي 5900 جنيه مصري.. والأفضل انك تزود المبلغ شوية وتشتري Poco F3.
2- Poco F3
معالج كوالكوم سناب دراجون 870 قوي جدا بيشغل ببجي على Ultra HDR .. خامات زُجاجيه راقيه جدا .. شاشة AMOLED بتردد 120 هيرتز مع صوت Stereo وهتتبسط أوي بتجربة الالعاب على الموبايل ده .. والبطارية 4500 مللي امبير والشاحن 33 وات.
سعر Poco F3 للنسخة 128 جيجا مع 6 جيجا رام حوالي 6100 جنيه مصري وللنسخة 256 جيجا مع 8 جيجا رام بسعر 6700 جنية ، وموجود فيه أقوى معالج في الفئة دي.
من 7000 لـ8000 جنية :-
1- Galaxy A52s
عملنا قبل كده مقارنة بين Poco F3 و A52s و Reno 6 وفي نقطة الأداء تفوق Poco F3 وخد المركز الأول ثم A52s اللي جه في المركز الثاني .. موبايل محترم بيقدم باكيدج مواصفات ممتاز متكامل مناسب لأي حد بيحب تجربة سامسونج في الفئة دي بمعالج كوالكوم سناب دراجون 778G اللي بيقدم أداء ممتاز , ولكن نأكد ونقول انه أقل من Poco F3 !
الموبايل سعره للنسخة الـ128 جيجا مع 8 جيجا رام بسعر 7100 جنية اما النسخة الـ256 جيجا مع 8 جيجا رام بسعر 7800 جنية.
Comments