سوق التابلت في السوق المصري محدود شوية .. والإختيارات فيه مش كتيره، وكمان المواصفات مش قوية مقابل السعر اللي هتدفعه .. هواوي نزلت تابلت Huawei Matepad 11 الجديد وهو أول موبايل من هواوي بنظام HarmonyOS الإصدار الثاني الخاص بيهم واللي بيشتغل بخدمات هواوي فقط.
الشاشة :-
الشاشة هنا كبيرة .. بتيجي بحجم 10.95 بوصة بدقة 2K .. الشاشة من نوع IPS LCD ولكن لما تشوف جودتها هتحس انها نضيفه جدًا، من أنضف الشاشات الـIPS LCD اللي موجودة.
ألوانها أحسن بكتير من معظم التابلتس الموجودة في السوق المصري، ألوان مُشبعة تقدر تتحكم فيها من اعدادات الشاشة، وسطوع الشاشة كويس جدًا.
الشاشة بتيجي بتردد 120 هيرتز ومفيش أي تقصير من أداء الشاشة هنا .. طبعًا كان نفسي الشاشة تكون AMOLED لكن الشاشة الـAMOLED موجودة في الـMatepad Pro الأغلى.
الأداء :-
التابلت بيجي بمعالج كوالكوم سناب دراجون 865 بتكنولوجيا تصنيع 7 نانو ميتر .. مع مساحة تخزين 128 جيجا من النوع السريع UFS 3.1 بالإضافة الى 6 جيجا رام.
المواصفات القوية دي مع نظام هواوي المُستقر بالإضافة الى معدل التحديث الـ120 هيرتز بيترجم لـ أداء خُرافي، التابلت سريع جدًا وسلس جدًا مع Animations لطيفة وسريعة جدًا.
جربت أشغل لعبة ببجي على اعدادات Ultra HDR بفريمات Ultra .. والجودة ممتازة جدًا وهتاخد تجربة ألعاب محترمة جدًا على التابلت.
عوامل الأمان وعناصر اخرى :-
التابلت بيتقدم بنظام صوت Stereo محترم جدًا علشان تستمتع بأي حاجه هتعملها على التابلت سواء ألعاب او فيديوهات .. 4 سماعات بصوت عالي ودرجات صوت محترمة والـBass قوي جدًا.
التابلت مفيش فيه بصمة للأسف، بتقدر تفتحه بالـFace Unlock او عن طريق باسورد بتكتبه .. وفي لمبة إشعارات موجودة علشان تنور لما يجيلك اشعارات.
أداء الشبكات ممتاز جدًا والـWi Fi قوي جدًا في التابلت .. والتابلت بيدعم Wi Fi 6.0 بالمناسبة.
القلم والكيبورد :-
التابلت بيتقدم مع جراب مُرفق فيه كيبورد .. خامات محترمة جدًا، والجراب فيه درجتين علشان تثبت التابلت عليهم بمغناطيس قوي جدًا مستحيل يتحرك من مكانه.
الكيبورد تقدر تستخدمه في انك تتحكم بالتابلت من خلال الزراير عادي وفي نفس الوقت تكتب في Notepad .. تكتب Email او Sheet .. من الأخر لاب توب صغير للشغل كده.
بالنسبة للقلم الـmPencil هو بيشحن Wireless من جسم التابلت وليه مكان بيثبت فيه كويس وبيشحن منه .. القلم سلس جدًا والتأخير بتاعه يكاد يكون معدوم، وتقدر ترسم او تكتب او كمان تقدر تكتب بإيدك عادي وتحول الكلام ده لـText وتاخده كوبي تبعته لحد عادي بدون مشاكل.
في ميزة لطيفة وهي وانت بتكتب وغلطت في الكلام وعايز تمسح بسرعه بتدوس Double Tap على القلم هتلاقي الاستيكة اشتغلت امسح ودوس دوستين تاني وكمل كتابة .. ولو بتحل مسائل حسابيه صعبه تقدر تفتح تطبيق My Script Calculator وتكتب بإيدك اي معادلة حسابيه هتلاقي التابلت بيحلهالك بكل سهولة.
البطارية :-
البطارية هنا عملاقة بحجم 7250 مللي امبير هتشتغل حوالي 8 ساعات او اكتر شاشة مفتوحة لو مشغل الـ120 هيرتز ورافع السطوع لأعلى مستوى .. وطبعًا تستحمل أكثر لو استخدامك خفيف.
الشاحن اللي موجود 22.5 واط هيشحن البطارية في حوالي ساعتين و40 دقيقة .. طبعًا كان نفسي في شاحن أسرع علشان التابلت هنا مش رخيص.
الكاميرات :-
كاميرا خلفية بتيجي بدقة 13 ميجا بيكسل بفتحة عدسة F/1.8 .. والكاميرا السيلفي بتيجي بدقة 8 ميجا بيكسل بفتحة عدسة F/2.0 والكاميرات بأداء متوسط محتاجه إضاءه قوية علشان تاخد اداء كويس منها.
سعر Huawei Matepad 11 :-
- نسخة 128 جيجا مع 6 جيجا رام بسعر 8500 جنية
التابلت بيدعم الـWi Fi فقط .. وعلشان تاخد القلم بتزود الف جنية و الكيبورد بتزود برده ألف جنية.
الرأي النهائي :-
التابلت بيقدم تجربة مختلفة وقوية .. أداء قوي وشاشة محترمة ودعم للقلم وللكيبورد .. مع صوت محترم وبطارية معقولة .. اما نقاط الضعف فا هي تتلخص في غياب خدمات جوجل والشحن مش أسرع حاجه والكاميرات أداءها متواضع والكيبورد والقلم لازم سعرهم يقل شوية او يتضافوا في عرض كويس.
أجهزة تابلت أخرى من هواوي :-
1- Huawei Mediapad T8
تابلت إقتصادي شيك بتصميم معدني بوزن 310 جرام .. شاشة 8 بوصة بدقة HD+ سطوعها متواضع، بطارية كبيرة 5100 مللي امبير .. معالج متواضع شوية في الإستخدام .. بيتقدم بخدمات جوجل.
تابلت Huawei Mediapad T8 إقتصادي جدًا وسعره 1900 جنية للنسخة الـ16 جيجا مع 2 جيجا رام 4G وفي نسخة تانيه 32 جيجا مع 2 جيجا رام بسعر 2400 جنية وبرده شبكات 4G.
2- Huawei Matepad T10s
تابلت بيجي بخامات معدنية محترمة مع وزن 450 جرام وشاشة كبيرة 10.1 بوصة بدقة FHD+ لكن مع سطوع مش قوي اوي .. معالج Kirin 710 أداءه معقول وأرحم بكتير من معالج الـT8 .. سماعات Stereo بصوت عالي وبطارية معقولة جدًا بتيجي بحجم 5100 مللي امبير.
سعر الـHuawei Matepad T10s للنسخة الـ32 جيجا مع 2 جيجا رام حوالي 3500 جنية WiFi فقط .. اما النسخة الـ64 جيجا مع 3 جيجا رام بسعر 4300 جنية وبتدعم شبكات الـ4G.
3- Huawei Matepad 10.4
التابلت ده بيجي بشاشة 10.4 بوصة بدقة FHD+ بتوصل لدرجات سطوع أعلى من Matepad T10s وبتقدم تجربة أحسن في المجمل .. وبيجي مع معالج Kirin 810 بيقدملك أداء سلس وناعم .. والتابلت بيجي بخدمات هواوي بس، والصوت من 4 سماعات Stereo وكمان معاك بطارية 7250 مللي امبير .. ومفيش مدخل 3.5 مللي.
سعر Huawei Matepad 10.4 للنسخة الـ64 جيجا مع 4 جيجا رام حوالي 4500 جنية لنسخة الـWi Fi فقط .. اما نسخة الـ4G لو عايز تركب شريحة إتصال بتكون بسعر 5300 جنية.
Comments