مقارنة Redmi Note 8 2021 مع Realme C25 مع Infinix Hot 10S – الأفضل بـ2500 جنية ؟

بعد ما قدمنالكم ترشيحات أفضل موبايلات بـ 2000 جنية، النهارده هنعمل لكم مقارنة بين أهم وأفضل 3 موبايلات في فئة 2500 جنية في مصر وهما Realme C25 و Redmi Note 8 2021 و Infinix Hot 10S .. في موبايل من سامسونج Galaxy M12 يعتبر مهم برده في الفئة دي لكن احنا لسه معملناش ليه مراجعه .. هنراجعه قريب وهنعرف موقفه وسطهم .. النهارده خلينا نشوف مين أفضل موبايل بـ 2500 جنية .. شاومي ولا ريلمي ولا انفنكس ؟

التصميم :-

العادي في الفئة الاقتصادية ان الموبايل بيكون من خامات بلاستيك .. أكيد ده الطبيعي .. لكن ريدمي نوت 8 2021 كسر القاعدة دي، لإنه عبارة عن تجديد لـRedmi Note 8 اللي كان بيقدم أفضل خامات في الفئة الإقتصادية وقته .. ومازال ريدمي نوت 8 2021 هو أفضل خامات بظهر فخم من الزجاج.

لكن انفينكس هوت 10S وريلمي C25 خاماتهم بالكامل من البلاستيك .. وبكده نقطة تفوق لخامات Note 8 2021 .. وعمومًا كل خامة ليها مميزاتها وعيوبها وانت عليك تختار اللي يناسبك.

شكل تصميم الكاميرا الخلفية في نوت 8 2021 قديم شوية .. ولكن انا مش شايفها ازمة يعني .. الأهم هو بروز الكاميرات … اكبر بروز في نوت 8 2021 .. هوت 10S وريلمي C25 البروز بتاعهم صغير .. وهنا نقدر نقول ان شاومي اسوأهم من ناحية بروز الكاميرات.

الـ3 موبايلات جاي معاهم جرابات في العلب بتاعتهم .. وجراب نوت 8 2021 بيحاول يغطي البروز الكبير ده.

لو انت من محبي الموبايلات الصغيرة في الإيد فا نوت 8 2021 أصغر موبايل فيهم .. تحسهم اخوهم الصغير واقلهم وزن وتخانه .. ولو انت بتحب الموبايلات الكبيرة فا Hot 10S هو اللي هيناسبك .. اما لو انت عاوز حاجة متوسطة فا ريلمي C25 ماسك العصاية من النص.

الشاشة :-

انفينكس HOT 10S بشاشة 6.82 بوصة .. ريلمي C25 بشاشة 6.5 بوصة .. ريدمي نوت 8 2021 بشاشة 6.3 بوصة .. والـ3 شاشات طبعًا IPS LCD ولكن الـHot 10S الوحيد اللي شاشته 90 هيرتز .. والـNote 8 2021 هو الوحيد اللي شاشته بدقة FHD+ والباقي HD+ بس.

أحسن شاشة فيهم من ناحية السطوع وجودة الألوان ودقة التفاصيل هي بتاعت ريدمي نوت 8 2021 لإنها بإختصار أصغر شاشة وفي نفس الوقت أعلى دقة فيهم وده مترجم لكثافة بيكسلات محترمة جدًا .. ده غير ان الشاشة عليها حماية Corning Gorilla Glass الجيل الخامس اللي مش موجودة في باقي الموبايلات.

في المركز الثاني ريلمي C25 اللي سطوعها مقبول جدًا مع كثافة بيكسلات مقبولة .. وبتيجي الشاشة متركب عليها سكرينة كويسة ومش هتحتاج تشيلها أو تغيرها .. وهو الوحيد اللي معاه سكرينه.

المركز الأخير شاشة Infinix Hot 10S اللي علشان كبيرة أوي ودقتها HD+ فا كثافة البيكسلات فيها قليلة جدًا، ده غير أن الشاشة أقل سطوع فيهم .. هوت 10S معاه سكرينة مش متركبه .. منصحش بيها .. طبعا الشاشة 90 هرتز ولكن تأثيرها واضح في الاداء مش في كوالتي الشاشة.

الأداء :-

انفينكس Hot 10S وشاومي ريدمي نوت 8 2021 بيتقدموا بمعالج ميدياتك Helio G85 .. اما ريلمي C25 بيجي بمعالج ميدياتك Helio G70 .. مفيش فرق جوهري بين المعالجين دول وبيقدموا أداء متقارب جدًا .. والـ3 موبايلات بيجو بنفس نوع ذاكرة التخزين اللي هو eMMC 5.1.

السوفت وير الخفيف والـ90 هيرتز اللي في شاشة Hot 10S خلت الأداء الفعلي فيه أحسن ونقدر نقول انه ياخد المركز الأول .. المركز الثاني هو ريلمي C25 اللي السوفت وير بتاعه كويس ومستقر ومنظم ومفيهوش اعلانات .. والفرق بينه وبين انفينكس Hot 10S مش كبير.

المركز الثالث والأخير لـ ريدمي نوت 8 2021 اللي السوفت وير بتاعه MIUI 12.5 هو أتقل سوفت وير بين الـ3 موبايلات دول .. شوف فيديو المراجعة علشان تشوف الـSpeed Test بين الـ3 موبايلات!

فرق النعومة بتاعت الـScrolling في واجهة كل موبايل بيتفوق فيها انفينكس Hot 10S بفرق كبير .. المركز الثاني ريلمي C25 في النعومة، والمركز الأخير ريدمي نوت 8 2021.

بالنسبة للألعاب فا الـ3 موبايلات بيشغلوا ببجي على High HD .. تجربة قريبة جدًا من بعض ومش هتحس ان في واحد أجمد من التاني، ولكن الملحوظ ان اكتر موبايل بيسخن فيهم هو نوت 8 2021 وبعده Hot 10S وأقل واحد في السخونية Realme C25 .. والفروقات مش كبيرة برده.

عوامل الأمان وعناصر اخرى :-

البصمة موجودة في الظهر في الـ3 موبايلات .. والأداء في الـ3 موبايلات كويس جدًا ومش هيضايقك إطلاقًا .. يمكن C25 و Hot 10S أسرع حاجه بسيطة من Note 8 2021 بس مش ده المهم .. المهم حجم الدائرة الصغير أوي في نوت 8 2021 ودي حاجه مش لطيفة .. والـFace Unlock في الـ3 موبايلات كويس.

ريدمي نوت 8 2021 مفيهوش إمكانية عمل نسختين من برامج التواصل الإجتماعي .. لكن الميزة دي موجودة في Realme C25 و Infinix Hot 10S .. ريدمي نوت 8 2021 فيه لمبة اشعارات وميكروفون اضافي لعزل الضوضاء ومستشعر IR Blaster ودول مش موجودين في C25 و Hot 10S.

بالنسبة للصوت فا الـ3 موبايلات فيهم سماعة واحدة Mono .. أعلى صوت في نوت 8 2021 .. يجي في المركز الثاني Realme C25 وأخيرًا انفينكس Hot 10S أقل صوت فيهم .. وبالنسبة لمستشعر التقاربر فا هو موجود حقيقي وشغال كويس في الـ3 موبايلات.

اما قوة شبكات الـWiFi والاتصال .. المركز الاول ريلمي C25 .. المركز التاني انفينكس هوت 10S .. المركز الأخير نوت 8 2021 واللي ممكن يدايقك شوية في شبكة الاتصال لو حاطط شريحتين ولو واحدة منهم فودافون.

البطارية :-

البطارية صغيرة في نوت 8 2021 بسعة 4000 مللي امبير .. هتكفي حوالي 7 ساعات شاشة مفتوحة مثلًا .. اما في ريلمي C25 وانفينكس هوت 10S فا هي بسعة 6000 مللي أمبير هتكفي 10 ساعات واكتر.

منفذ الشحن USB Type C في نوت 8 2021 وريلمي C25 .. انما انفينكس هوت 10S بيجي بالمنفذ القديم microUSB 2.0 .. الشاحن اللي مع نوت 8 2021 بيشحن الموبايل بسرعه شحن 18 واط وبيشحن في ساعتين إلا ربع .. الشاحن اللي مع ريلمي C25 بيجي بقوة 18 واط بيشحن البطارية في 3 ساعات الا ربع.

الشاحن اللي مع انفنكس هوت 10S بيجي بقوة 10 واط بس ولكن برده بيشحن البطارية في 3 ساعات الا ربع .. معرفش ازاي مفرقتش عن ريلمي C25.

الكاميرات :-

الـ3 موبايلات بكاميرا رئيسية 48 ميجا بيكسل فتحة عدسة F/1.8 .. نوت 8 2021 الوحيد اللي فيه عدسة Ultra Wide بدقة 8 ميجا بيكسل .. السيلفي في نوت 8 2021 بدقة 13 ميجا بيكسل لكن في C25 و Hot 10S بدقة 8 ميجا بيكسل.

انفينكس أقل بفرق واضح في معظم الصور .. المنافسة بين نوت 8 2021 وريلمي C25 .. ريلمي بتعزز الألوان شوية علشان تخلي الصورة أحلى .. لكن شاومي بيقدم الألوان الحقيقية واللي مش بتكون وحشة برده.

كتفاصيل سواء ريلمي او شاومي فا هما معقولين جدًا وهيطلعولك صور مقبولة جدًا بالنسبة للسعر ده .. اتمنى انفينكس تشتغل أكتر على نفسها وتظبط السوفت وير عن كده لإنه هو ده اللي ناقصها.

والسيلفي كمان انفينكس مطلع صور غريبة شوية ومش حلوه خالص .. نوت 8 2021 صوره مقبوله .. أحسن صور سيلفي كانت في ريلمي C25 .. ريلمي بيحاول يظبط الصور على قد ما يقدر حتى لما الإضاءه بتقل.

اسعار الهواتف :-

• ريدمي نوت 8 2021 نسخة 64 جيجا مع 4 جيجا رام بسعر 2550 جنية
• ريلمي C25 نسخة 64 جيجا مع 4 جيجا رام بسعر 2700 جنية
• انفينكس هوت 10S نسخة 64 جيجا مع 4 جيجا رام بسعر 2400 جنية

بينفع تركب كارت ميموري وشريحتين إتصال من الجيل الرابع في نفس الوقت في كل الموبايلات .. في نسخ 128 جيجا متوفرة من شاومي ومن انفينكس بس احنا بنقارن بين النسخ الـ64 جيجا بما إنها الأقرب في السعر.

الرأي النهائي :-

ليه تشتري Infinix Hot 10S ؟

• موبايل سريع في الأداء اليومي
• بطارية ضخمة ومش فارق معاك مدخل الشحن القديم
• شاشة كبيرة 90 هيرتز وميهمكش الجودة

• ميهمكش الكاميرات لإنك مش بتصور
• عاوز توفر فلوس لأنه أرخصهم

ليه تشتري Realme C25 ؟

• شبكة قوية جدًا
• كاميرات ممتازة وأفضل سيلفي في الفئة دي
• سوفت وير شيك ومنظم ومفيهوش اعلانات
• بطارية قوية ومنفذ الشحن الجديد

ليه تشتري Note 8 2021 ؟

• فخامة وخامات زجاجيه راقيه وبتدي طابع فخم غالي
• ميكروفون اضافي لعزل الضوضاء
• مستشعر IR Blaster للتحكم في الأجهزة الكهربائية
• لمبة إشعارات
• شاشة سطوعها كويس ودقتها قوية جدًا
• صوت عالي جدًا
• كاميرات خلفية Ultra Wide

• مش فارق معاك ان الشبكة تكون أقوى حاجه
• مش فارق معاك انه يكون أسرع وأسلس أداء
• مش فارق معاك موضوع عمل نسختين من برامج التواصل الإجتماعي