أفضل الموبايلات من سعر 1500 جنية لحد 3000 جنية – تشتري مين و ليه ؟

بما إن الموبايلات الجديدة اللي كل شوية تنزل هديت شوية .. وأسعار الموبايلات إبتدت تستقر .. ايه المانع نعمل ترشيحات كويسة كده .. في الترشيحات دي أنا هقولك إيه الموبايلات اللي إحنا في موبيزل شايفنها تستحق الشراء في كل الفئات السعرية من أول 1500 جنية لحد 3000 جنية.

ومش معنى إن موبايلك الشخصي مش موجود في الترشيحات او موبايل تاني إنت شايفه كويس مش موجود، إنه وحش .. لا خالص .. بس هي في الأول وفي الأخر وجهات نظر.

فيديو الترشيحات على اليوتيوب :-

من 1500 لـ2000 :-

الفئة ديه حاليا الـStanderd بتاعها 32 جيجا مساحة و2 جيجا رام .. ومتسألش على الكاميرات خالص ولا تسأل على تشغيل ألعاب أندرويد تقيلة .. ولازم تبقى فاهم إن كل 100 جنية في الفئة دي بتفرق.

Redmi 9A

1- Redmi 9A

ايه اللي ممكن يخليك تشتريه ؟

  • الموبايل جاي بمعالج كويس .. ميدياتيك Helio G25 ثماني النواة .. أفضل معالج اقتصادي موجود حاليًا
  • شاشة كبيرة 6.5 بوصة بدقة HD+ سطوعها مقبول جدًا وبشكل النوتش يعني شكلها مقبول في 2020
  • بطارية قوية 5000 مللي أمبير .. بس طبعًا شحن بطيء 10 واط بمنفذ Micro USB 2.0 هتشحن معاك في 3 ساعات
  • جاي بأحدث نظام تشغيل من شاومي MIUI 12 على اندرويد 10

عيوب الموبايل اللي ممكن تضايقك ؟

  • ان مفيش بصمة في الظهر
  • السوفت وير الجديد اللي هنا تقيل شوية على موبايل اقتصادي
  • مفيش جراب ولا سكرينة .. متنساش تشتريهم وإنت بتشتري الموبايل علشان تحافظ عليه

سعر Redmi 9A هو 1600 جنية للنسخة 32 جيجا مع 2 جيجا رام و ينفع تركب شريحتين اتصال وكارت ميموري مع بعض في نفس الوقت.

مراجعة Redmi 9A :-


Realme C2

2- Realme C2

ايه اللي ممكن يخليك تشتريه ؟

  • معالج ميدياتيك Helio P22 ثماني النواة .. مش بطال خالص بالسعر ده وأدائه هو اللي بعد G25 اللي قولت عليه في Redmi 9A
  • شاشة ملمومة في الإيد .. 6.1 بوصة بدقة HD+ وواخده شكل النوتش وكمان عليها حماية Gorilla Glass 3 وكمان عليها سكرينة
  • الموبايل جاي بتصميم شيك .. واحد من أشيك تصاميم الفئة السعرية ديه .. وكمان تقفيل الموبايل ومتانته محترمه جدًا لو الموبايل بيوقع من إيدك كتير وكدا أنصحك جدًا بالموبايل ده ويمكن هي دي الميزة الوحيدة أو نقطة التفوق الوحيدة للـRealme C2 على Redmi 9A
  • بطارية معقولة 4000 مللي امبير .. علشان الموبايل نازل من فتره كان ساعتها الـ4000 رقم كبير .. ولكن مازالت بتقدم أداء مرضي

عيوب الموبايل من وجهة نظري ؟

  • برده مفهوش بصمة
  • الموبايل نازل بقاله فتره في السوق يعني قديم نسبيًا وديه حاجة البعض مش بيحبها .. بس أنا معنديش مشاكل طول ما المواصفات لسه قادره تواكب والسعر منطقي
  • وبرده الموبايل جاي من غير جراب في العلبة

سعر Realme C2 دلوقتي 1850 جنية للنسخة الوحيدة اللي متاحة للبيع بمساحة 32 جيجا مع 2 جيجا رام و ينفع تركب كارت ميموري وشريحتين اتصال مع بعض في نفس الوقت.

مراجعة Realme C2 :-


موبايلات مدخلتش الترشيحات :

ديه الموبايلات اللي أنا شايف إنها تستاهل تحت الـ2000 جنية .. في موبايلات تانية كتير موجودة زي Infinix Hot 9 Play اللي مرشحتوش علشان مفيش سماعة سُفلية، الإعتماد فيه على سماعة المكالمات بس وكمان المعالج بتاعه رباعي النواة مش ثماني .. بس هو فيه بصمة وبطارية 6000 مللي امبير.

وعندك Itel P36 Pro برده موبايل فيه بصمة وتصميمه شيك .. بس أضعف في الأداء بشكل عام و قوة الإستحمال من الموبايلين اللي رشحتهم لك.

والـNokia 5.1 Plus لو حد بيسأل عليه مرشحتوش ليه فهو مش موجود جديد خلاص كمياته خلصت .. وعندك Huawei Y5p بس شاشته بالأبعاد القديمة ومفيهوش خدمات جوجل والموضوع ده ممكن يكون صعب على زبون الفئة الإقتصادية اوي .. مش هيعرف يتعامل من غيرها.


من 2000 لـ2500 :-

وهنا في شوية اشتراطات هنمشي عليها .. أولا الموبايل ميقلش عن 3 جيجا رام والبطارية متقلش عن 5000 مللي أمبير وأكيد يكون في بصمة وأكيد نبدأ بقا نشغل العاب تقيلة .. متفقين ؟

Redmi 9

1- Redmi 9

ايه اللي ممكن يخليك تشتريه ؟

  • بيقدملك أفضل معالج في فئته السعريه ميدياتيك Helio G80 .. معالج قوي بيقدر يشغل العاب تقيله زي ببجي مثلًا بتشتغل على High HD واللعبة بتشتغل كويس جدًا
  • بيقدملك شاشة كبيرة 6.5 بوصة ومش بس كده ديه كمان بدقة FHD+ .. ولو إنت مش خبير في الموبايلات .. فاحب اقولك إن الدقة اللي هنا اللي محدش بيقدمها بالسعر ده غير الموبايل ده .. هتخلي عينك هترتاح لجودة الشاشة
  • بيقدملك مستشعر IR Blaster علشان تتحكم في الأجهزة الكهربائية وكمان فيه مايكروفون إضافي علشان تاخد جودة مكالمات أفضل
  • بطارية قوية 5000 مللي أمبير مع منفذ شحن Type C ودعم للشحن السريع الـ18 واط .. ولكن الشاحن المرفق في العلبة 10 واط بس .. بس مش مشكلة
  • أفضل صوت ممكن تاخده من موبايل في الفئة السعرية دي
  • وفي جراب بيجي مع الموبايل في العلبة

عيوب الموبايل اللي ممكن تضايقك ؟

  • سطوع شاشة الموبايل مش عالي اوي .. يعني تمشي بالاسكرينة اللي جايه على الموبايل او لو غيرتها متحطش سكرينة فيها تعتيم لازم تبقى شفافة جدًا علشان متقللش أكتر من درجة سطوع الشاشة .. ولو موضوع السطوع هيضايقك وبتستخدم الموبايل كتير تحت الشمس شوف الموبايل اللي بعده ده
  • الكاميرات اللي في Redmi 9 تقضي الغرض ولكن مش Wow .. ولو إنت يهمك الكاميرات أوي فبرده انصحك تشوف الموبايل اللي جاي

سعر Redmi 9 للنسخة الـ32 جيجا مع 3 جيجا رام هو 2250 جنية .. اما النسخة الـ64 جيجا مع 4 جيجا رام بسعر 2500 جنية مصري، وينفع تركب كارت ميموري وشريحتين إتصال مع بعض في نفس الوقت.

مراجعة Redmi 9 :-


Realme C3

2- Realme C3

ليه Realme C3 جه في المرتبة التانية ؟

  • جاي بشاشة بدقة HD+ فقط .. دقة أقل من Redmi 9
  • جاي بمنفذ شحن Micro USB 2.0 وأخره في قوة الشحن 10 واط .. مش هينفع تشتري شاحن أسرع
  • صوته أضعف من ريدمي 9 بفرق ملحوظ
  • مش بيجي معاه جراب في العلبة
  • بـ3 جيجا رام وده نفس سعر ريدمي 9 اللي بـ4 جيجا رام
  • مفهوش مايكروفون إضافي لعزل الضوضاء

امتى تجيب الـRealme C3 وتسيب Redmi 9 ؟

  • لو موضوع سطوع الشاشة يفرق معاك جامد وبتستخدم الموبايل كتير تحت الشمس
  • لو موضوع الكاميرات بيفرق معاك وبتصور كتير بالرغم إنك لازم تبقى متفهم إن الفئة ديه الكاميرات فيها مش بتبقى Wow ولكن الحقيقة إن Realme C3 كاميراته أحسن شوية من Redmi 9

سعر Realme C3 هو 2500 جنية للنسخة الوحيدة الموجودة 64 جيجا مع 3 جيجا رام وينفع تركب كارت ميوري وشريحتين اتصال مع بعض.

مراجعة Realme C3 :-


Galaxy M11

3- Galaxy M11

تالت موبايل معانا وده هخليه كدا للناس المُتحفظة اللي خايفين من البراندات الصيني ريلمي وشاومي .. ومبدئيًا أنا بنصحك بالـM11 .. مش الـA11 .. علشان بس متتلخبطش .. متفقين ؟

ليه تجيب M11 ؟

  • الـM11 جاي ببطارية قوية 5000 مللي أمبير مع منفذ شحن Type C والمميز هنا إن الشاحن المرفق 15 واط هيشحن البطارية في ساعتين بس .. وده أسرع شاحن في الفئة السعرية ديه اسرع من ريلمي وشاومي
  • شاشة 6.4 بوصة بدقة عادية HD+ .. المُميز فيها إنها واخدة شكل الثقب بتاع السيلفي على الشمال مش شكل النوتش زي ريلمي وشاومي إنما هي كجودة ألوان فهي أقل من ريلمي وشاومي لإن الشاشة TFT والـQuality بتاعها أقل بفرق ملحوظ وكمان سطوعها مش عالي
  • الكاميرات الخلفية بتاعته مقبولة جدًا وكنت قارنتها مع الC3 وطلعت نتائج كويسة جدًا ويمكن تكون احسن من الـC3.

ولكن الـGalaxy M11 خليته الإختيار التالت علشان المعالج .. المعالج هنا سناب دراجون 450 معالج قديم شويتين تلاته أربعه ميقدرش ينافس معالجات ميدياتيك الجديدة الموجودة في ريلمي وشاومي وأدائه في الألعاب أضعف بكتير يعني ببجي بتشتغل على Medium وهتحتاج تنزلها لأقل إعدادات جرافيك علشان تلعب بشكل سليم.

وبإختصار .. دي الحاجات اللي مش هتخليك تشتريه :

  • اداء اضعف من المنافسين
  • عوامل الأمان بتاعه بصمة وFace Unlock ابطأ بشكل ملحوظ من ريلمي وشاومي
  • وكمان تصميم M11 مش لطيف على الاطلاق
  • وكمان مفهوش جيروسكوب
  • من الأخر .. لو ميهمكش الألعاب أوي .. الـM11 مش هيقصر معاك.

سعر الـGalaxy M11 حوالي 2250 جنية للنسخة الوحيدة الموجودة 32 جيجا مع 3 جيجا رام و ينفع تركب كارت ميموري وشريحتين اتصال مع بعض.

مراجعة Galaxy M11 :-


موبايلات مدخلتش الترشيحات :

وطبعًا في موبايلات سامسونج تانية أنا مرشحتهاش وهما الـA10s و الـA11 واللي أنا شايف بفرق سعر بسيط بتجيب الأحسن منهم وهو الـM11 .. ده لو عايز حاجه من سامسونج.

وغاب عن الترشيحات Realme C11 لإن أنا شايف مواصفاته متقدرش تسد مع الموبايلات الموجودة في الترشيحات اللي هنا .. ولو إنت مصمم عليه فخليك في الـRealme C3i أفضل بـ2200 جنية بس مفهوش بصمة للأسف وديه حاجة مش مقبولة زي ما اتفقنا في الفئة السعرية ديه.


من 2500 لـ2800 :-

Nokia 5.3

1- Nokia 5.3

ايه اللي يخليك تشتري الموبايل ده ؟

  • الموبايل ده بخامات محترمة بوليمر وتقفيل كويس جدًا من نوكيا مع ضمان تحديثات مستمرة واندرويد خام بدون أي تعديلات او تهنيجات
  • تجربة الكاميرات بتاعته كويسة خصوصًا إنه بيدعم جوجل كاميرا اللي بيحسن جدًا من تجربة التصوير
  • بيدعم الـNFC
  • بيدعم لمبة الإشعارات على زرار الباور

عيوب الموبايل بإختصار :

  • البطارية هنا عادية 4000 مللي أمبير مع منفذ شحن Type C وكمان الشاحن المرفق 10 واط فقط
  • لو إنت اهتمامك العاب فا يا تنزل للفئة الأقل وتجيب الـRedmi 9 العادي .. أو تطلع للفئة الأعلى اللي هتكلم عنها كمان شوية .. لإن المعالج بتاع Nokia 5.3 هو سناب دراجون 665 أدائه متوسط في الألعاب بيشغل ببجي على Medium وكمان الموبايل بيسخن شوية مع الألعاب وكمان الشاشة هنا برغم ان الوانها حلوة وسطوعها عالي إلا إن دقتها HD+ فقط

من الأخر تجيب Nokia 5.3 لو إنت إهتمامك الأساسي تصوير ومش هتقدر تدفع أكتر من 2800 جنية وبتدور على موبايل مضمون وإهتمامك الرئيسي مش العاب.

سعر Nokia 5.3 للنسخة الوحيدة الموجودة 64 جيجا مع 4 جيجا رام هو 2750 جنية وينفع تركب كارت ميموري وشريحتين اتصال مع بعض.

مراجعة Nokia 5.3 :-


من 2800 لـ3200 :-

دي اخر فئة سعرية في الترشيحات .. وهي من 2800 لـ3200 وانا زودت سقف الترشيحات للـ3200 علشان أقدر أضم أكبر عدد ممكن من الموبايلات اللي بتقدم مواصفات متكاملة بأقل تنازلات مُمكنة.

الفئة ديه بقى فيها 5 موبايلات .. هقولك كدا الموبايلات بالترتيب وهقلك كل واحد أحسن في ايه وتجيبه امتى بكل إختصار.

Redmi Note 9

1- Redmi Note 9

ليه تشتري الموبايل ده ؟

  • موبايل شبه متكامل
  • اداء كويس من معالج ميدياتك Helio G85
  • كاميرا خلفية مُحترمة جدًا
  • بطارية قوية 5000 مللي امبير
  • شاشة ضخمة 6.5 بوصة بدقة محترمة FHD+ بتصميم ثُقب السيلفي

بس ركز معايا .. لو هتجيب الـRedmi Note 9 هات النسخة الكبيرة الـ128 جيجا مع 4 جيجا رام وهي سعرها دلوقتي حوالي 3200 جنية .. بلاش النسخة الصغيرة علشان ادائها مش هيعجبك.

مراجعة Redmi Note 9 :-


Galaxy A21s

 

2- Galaxy A21s

الموبايل ده انت ممكن تستغربه .. بس انا مُقتنع بيه جدًا .. موبايل من سامسونج مضمون مستقر بيبيع كتير في المحلات ومجاش شكوى واحده منه.

ايه الحاجات اللي ممكن تخليك تشتري الموبايل ده ؟

  • بطارية قوية 5000 مللي أمبير مع شحن سريع 15 واط بيشحن البطارية في ساعتين بس اسرع من ريلمي وشاومي وهي حرفيا أفضل اداء بطارية في الفئة السعرية دي لان هنا المعالج موفر جدا بتكنولوجيا 8 نانو وهو معالج اكسينوس 850
  • اداء المعالج ده مقبول ولا هو طيارة ولا هو سلحفة حاجه في النص .. واداءه في الالعاب ميقلش حاجة عن معالجات ميدياتيك الجديدة الموجودة في شاومي وريلمي
  • شاشة 6.5 بوصة كبيرة واخدة تريند الثقب زي بتاع الـRedmi Note 9 بس للأسف الدقة منخفضة HD+ وكمان نوع الشاشة TFT فا مش هتاخد احسن تجربة شاشة هنا
  • الكاميرا الخلفية في الإضاءات العالية والمعتدلة هتديلك افضل تجربة ممكن تاخدها من موبايل بـ3000 جنية
  • خلي بالك .. ولا في جراب ولا سكرينة مع الموبايل ده .. اعمل حسابك عليهم لو هتفكر فيه

سعر موبايل Samsung Galaxy A21s حوالي 3000 جنية للنسخة الوحيدة الموجودة 64 جيجا مع 4 جيجا رام وينفع تركب كارت ميموري وشريحتين اتصال مع بعض.

مراجعة Galaxy A21s :-


Realme 6i

3- Realme 6i

بإختصار Realme 6i مفيهوش حاجه تميزه عن الـRedmi Note 9 غير الكاميرا السيلفي .. في الحالة اللي مقلق منها من شاومي ومش عاوز تجيب سامسونج وعاوز موبايل معقول وإهتمامك الرئيسي كاميرا سيلفي قوية يبقى تجيب Realme 6i.

ايه النقاط القوية اللي فيه ؟

  • معالج Helio G80 محترم جدًا
  • بطارية ضخمة 5000 مللي امبير
  • شحن سريع كويس الى حدٍ ما
  • كاميرا خلفية مُحترمة جدًا بس مش الأفضل
  • شاشة 6.5 بوصة مقبولة . بس مفيهاش ميزة

تشتري Realme 6i النسخة الـ64 جيجا مع 3 جيجا رام بسعر حوالي 2950 جنية وينفع تركب كارت ميموري وشريحتين اتصال مع بعض .. في نسخة اعلى 128 جيجا و 4 جيجا رام ودي بـ 3600 جنية .. ومعرفش مين اللي هيروح يجيبه ويسيب من نفس الشركة Realme 5 Pro اللي أقوى منه في كل حاجه.

مراجعة Realme 6i :-


4- Honor 9x Lite

وده موبايل الفخامة بقا .. تفكر فيه لو عاوز موبايل فخم كدا .

ايه النقاط القوية اللي فيه ؟

  • ده الوحيد الي بتصميم زجاج قوي و شيك
  • شاشة 6.5 بوصة بدقة فول اتش دي بلس واخدة شكل النوتش القديم العريض شوية .. ولو جاي تقولي شاشة النوت 9 احسن هقلك لا .. الوان شاشة الاونر افضل وسطوعها اعلى
  • اداء معقول من الكيرن 710 .. بالسعر ده هو مش معالج ضعيف
  • اقوى نايت مود في كاميرا خلفية موجود في ال9 اكس لايت .. بس الكاميرا الصبح عادية و شاومي وسامسونج يكسبوها بسهولة
  • الاهم من ده كله .. خدمات جوجل موجودة بشكل رسمي على الموبايل
  • الموبايل ده فيه لمبة اشعارات
  • السيلفي متسألش عليه وحش جدا
  • بطارية قديمة عادية 3750 مللي أمبير و شحن 10 واط ومنفذ شحن ميكرو يو اس بي .. حاجات كلها قديمة
  • سوفت وير اندرويد 9 قديم .. معرفش جاله تحديث ولا لسه

سعر الـ Honor 9x Lite هو 3100 جنية للنسخة الوحيدة الموجودة 128 جيجا مع 4 جيجا رام وينفع تركب كارت ميموري وشريحتين اتصال مع بعض .

مراجعة Honor 9x Lite :-


5- Infinix Note 7

مع تجربتي للموبايل ده فهو مش زي اخواته القدام خالص .. الـ Infinix Note 7 ده كويس جدا وتجربتي ليه مكنتش مصدق انه انفنكس .. وبالمناسبة انفنكس زيرو 8 نازل في منتصف شهر سبتمبر و الموبايل ده هيكسر الدنيا حرفيا .

تشتري الانفنكس نوت 7 امتى ؟

  • لو يهمك الشاشة الكبيرة اوي وكمان واخدة شكل الثقب مع العلم ان حجم الشاشة 7 بوصة والدقة منفخضة HD+ فقط
  • أكبر مساحة و رام 128 جيجا مع 6 جيجا رام
  • الصوت عالي جدا لان الصوت هنا ستريو
  • الاداء معقول بميدياتيك جي 70 مع 6 جيجا رام في الموبايل هنا وده اعلى رام في الفئة ديه فبتاخد تجربة كويسة جدا
  • بطاريته 5000 مللي أمبير بشحن سريع 18 واط ولكن منفذ الشحن قديم ميكرو يو اس بي
  • اداء الكاميرا الخلفية الأقل وسط كل المنافسين

سعر الانفنكس نوت 7 3100 جنية للنسخة 128 جيجا مع 6 جيجا رام وينفع تركب كارت ميموري وشريحتين اتصال مع بعض .

مراجعة Infinix Note 7 :-

قد يعجبك أيضا...

Comments

جاري التحميل...