افضل موبايلات الفئة المتوسطة من سعر 3000 جنية الى 6000 جنية !

لو بتدور على موبايل متوسط كويس تشتريه بسعر من 3000 جنية لحد 6000 جنية مصري .. فا إنت حاليًا موجود في المقال اللي هيوضحلك أفضل الموبايلات في الفئة دي .. النهارده هقدملك ترشيحات لأفضل الموبايلات اللي ممكن تشتريها من سعر 3000 جنية مصري لحد 6000 جنية مصري ( ممكن تزيد لحد 6500 جنية ) علشان تعرف تشتري موبايلك المناسب.

الموبايلات كتيرة جدًا في الفئة السعرية دي .. ومش شرط الموبايل اللي انت اشتريته يكون مترشح معانا النهارده لإن دي مجرد وجهات نظر مش أكتر.

إقرأ أيضًا أفضل الموبايلات من سعر 1500 جنية حتى 3000 جنية مصري.

من 3500 لـ4500 :-

الفئة دي فيها موبايلات كتير جدًا .. والمنافسة فيها طاحنة .. وشخصيًا شايف 4 موبايلات بس هما اللي نقدر نرشحهم في الفئة دي وإنت تختار حسب أولوياتك وتفضيلاتك.

1- Realme 6

تشتري الريلمي 6 ليه ؟

• بيقدملك شاشة 6.5 بوصة IPS LCD بدقة FHD+ .. كل ده عادي .. اللي مش عادي إنها بتردد 90 هيرتز بتديلك نعومة في الإستخدام والـScroll .. وفكرة التردد العالي هنشوفها كتير .. ده انفينكس وتكنو قرروا يتبنوا ميزة الـ90 هيرتز دي.
• بيقدملك معالج قوي في تشغيل الألعاب ميدياتيك Helio G90T .. بتكنولوجيا 12 نانو .. هيشغلك كل الألعاب اللي إنت عايزها وزيادة .. بس لازم تتقبل فكرة إن بالسعر القليل شوية والمعالج الـ12 نانو هنا أن مع اللعب الكتير الموبايل هيسخن .. وده ناتج من الأداء اللي المعالج بيطلعه.
• بيقدملك بطارية ممكن هي مش الأكبر .. 4300 مللي أمبير بتدليلك 6 ساعات شاشة مفتوحة مع إستخدام متوسط ولكن معاه شاحن 30 واط بيشحن البطارية في ساعة.
• بيقدملك كاميرا خلفية 64 ميجا بيكسل بمستشعر سامسونج GW1 .. ممكن تكون بتلعب في الألوان شوية وبتعمل زي تجميل بسيط كده .. ولكن الصور اللي بتطلع من الكاميرا عينك تحب تشوفها.

ايه الي ممكن ميعجبكيش في الريلمي 6 ؟

• مفهوش مايكروفون ثانوي لعزل الضوضاء .. وده بيقصر شوية على جودة تسجيل صوت الفيديوهات وجودة المكالمات في أماكن زحمه.
• الكاميرا السيلفي بالليل أدائها مش هيعجبك والصور تفاصيلها بتتمسح بشكل كبير.
• صوت Speaker الموبايل متوسط .. هو مش مشكلة .. بس لازم تبقى فاهم إنه مش اعلى او أفضل صوت.
• النسخة الـ4 جيجا رام من الريلمي 6 ممكن تكون متكتفه شويه والواجهة تقيله حاجة بسيطة .. لو معاك فلوس وتقدر تجيب الـ8 رام هتتبسط اكتر.

موبايل Realme 6 بيجي للنسخة الـ128 جيجا مع 4 جيجا رام بسعر حوالي 4100 جنية مصري، والنسخة الـ128 جيجا مع 8 جيجا رام بسعر حوالي 4700 جنية مصري، وبينفع تركب كارت ميموري وشريحتين إتصال مع بعض.

مراجعة Realme 6 :-

2- Redmi Note 9 Pro

انا هنا مرشحتش الـRedmi Note 9S لسببين، أولًا توكيل شاومي في مصر مبقاش بيجيب منه كميات تاني وإعتمادة حاليًا على Note 9 Pro .. ثانيًا نوت 9 برو أحسن في الكاميرا وسرعة الشحن وفرق السعر بينهم بسيط.

ولو إنت بتسأل على مشكلة التراب .. فا إحنا في موبيزل متابعين حركة وكيل شاومي في مصر وهو الى حدٍ ما بيتعامل كويس ولو حصلت مشكلة التراب بيبدلك الموبايل .. والـPatch الجديد اللي وصل مصر مفيهوش المشكلة ديه لإنها إتصلحت في خط الإنتاج.

تشتري النوت 9 برو ليه ؟

• علشان هو ممكن يكون Premium شوية .. يعني ايه بريميم ؟ تصميم زجاج وشكل كاميرا خلفية مُختلف وفيه لمعة وإنعكاسات حلوة .. موبايل فعلًا شكله شيك .. بس وزنه وحجمه أكبر بفرق ملحوظ عن Realme 6.
• لو إنت مش حابب معالجات ميدياتك 12 نانو اللي بتسخن .. فا هنا شاومي بتقدم Snapdragon 720G بتكنولوجيا 8 نانو .. أدائه أقل حاجة بسيطة وسخونيته أقل وإستهلاكه للبطارية أقل.
• بيقدملك بطارية عملاقة 5000 مللي أمبير بتستحمل لحد 9 ساعات شاشة مفتوحة .. وكمان معاك شاحن سريع بيشحن بقوة 30 واط بيشحن البطارية في ساعة وربع.
• فيه شوية حاجات المُستخدم بيحبها .. وانت هتحبها برده
  – الـNFC
  – لمبة الإشعارات
  – مايكروفون إضافي لعزل الضوضاء
  – مستشعر IR للتحكم في الأجهزة الكهربائية
• كاميرا خلفية 64 ميجا بيكسل بنفس المستشعر الـGW1 .. ولكن أدائها أفضل بفرق واضح وعملنا مقارنة وضحنا فيها إن النوت 9 برو هو فعلًا فتوة الكاميرات في فئته السعريه.

ايه الي ممكن يضايقك في النوت 9 برو ؟

• استقرار واجهة شاومي مش عاجبني اوي .. الواجهة محتاجه شغل كتير علشان تبقى مستقره أكتر وأقدر اتطمن لها أكتر .. وانا هنا بقارن واجهات ببعضها مش بعيب في الواجهة وخلاص.
• الشاشة مش 90 هيرتز ومش AMOLED .. ولكن مازالت بتقدم أداء مُرضي ومحدش إشتكى منها.
• وزن الموبايل تقيل شوية وحجمه كبير شوية .. لازم تبقى متقبل ده.
• بروز الكاميرات هنا كبير شوية .. ويمكن يكون ده أكبر بروز شوفته في الفئة السعريه دي.

موبايل Redmi Note 9 Pro بيجي للنسخة الـ64 جيجا مع 6 جيجا رام بسعر 3900 جنية مصري، والنسخة الـ128 جيجا مع 6 جيجا رام بتيجي بسعر 4500 جنية، وبينفع تركب كارت ميموري وشريحتين إتصال مع بعض.

مراجعة Redmi Note 9 Pro :-

3- Galaxy M31

ايه اللي يخليك تشتري M31 ؟

• بيقدم أفضل تجربة شاشة أموليد 6.4 بوصة بدقة FHD+ .. هي واخدة شكل النوتش مش الثقب زي ريلمي وشاومي .. ولكنها بتقدم أفضل تجربة سطوع وألوان عنهم .. وهتخسر ميزة الـ90 هيرتز اللي في ريلمي 6 في مقابل الشاشة الـAMOLED اللي هنا.
• بيقدم كاميرا خلفية وكاميرا سيلفي مُمتازة .. مش عارف في بعض الناس مش عاجبهم الكاميرات اللي هنا .. أعتقد هما مش بيقارنوا .. بيصوروا ويقولوا وحش .. ولكن شايف Galaxy M31 ميقلش حاجة عن النوت 9 برو في الكاميرات علشان معالجة سامسونج للألوان حلوة أوي والكاميرا الخلفية اللي هنا برده 64 ميجا بيكسل بنفس المسستشعر الـGW1.

ايه اللي ممكن ميعجبكش في M31 ؟

• الخامات البلاستيك رديئه شوية والموبايل بيتخدش من الهوا حرفيًا .. والموبايل ولا بيجي معاه جراب ولا سكرينه .. في إسترخاص كده من سامسونج .. وكمان شكل التصميم مش حديث هو أقل موبايل من ناحية شكل التصميم في فئته السعريه من وجه نظري .. لو عاوز خامات أحسن شوية وتصميم افضل شوية هات Galaxy A51.
• المعالج الـExynos 9611 اللي بمعمارية 10 نانو هو أقل وأضعف من المعالجات اللي قولت عليها فوق .. وهو مُجملًا مقبول في الإستخدام اليومي لو إنت ميفرقش معاك إنك تحس شوية بالـAnimations وتحس شوية بتقطيع فريمات .. وغالبًا لو إنت جاي من موبايل قديم شوية مش هتحس باللي أنا بقوله ده اصلًا .. إنما الأداء في الألعاب .. على الورق كمواصفات كويس وبيشغل على إعدادات جرافيك عالية ولكن مفيش إستمرارية في الأداء الكويس .. شوية وهتلاقي الموبايل بيسخن جامد من عند الكاميرات والموبايل إبتدأ يسقط فريمات ويهنج شوية في الألعاب بعد فترة من اللعب عليه.
• بيقدم بطارية على الورق ضخمة 6000 مللي أمبير .. ولكن أدائها الفعلي مع الوقت زيها زي بطارية 4500 مثلًا من البراندات التانية .. وأدائها مش بطال خالص ومش ديه مشكلتي .. المشكلة الشاحن المرفق بطيء شوية 15 واط وكمان فيه شكاوي من بطأ زمن الشحن بعد فتره من الإستخدام وبتوصل لـ3 ساعات مثلا.

سعر موبايل Galaxy M31 حوالي 4300 جنية للنسخة 128 جيجا مع 6 جيجا رام وينفع تركب كارت ميموري وشريحتين اتصال مع بعض.

مراجعة Galaxy M31 :-

4- Huawei Nova 7i

الموبايل ده في المركز الرابع بسبب عدم دعمة لخدمات جوجل .. ولو إنت مش متقبل فكرة غياب خدمات جوجل فا بلاش تفكر في الموبايل ده وإعتبره مش موجود.

لو إنت عندك القابلية في إنك تشتري هواوي لإنك ليك تجارب معاها فأنصحك قبل ما تشتري تدور كويس على كل طرق التعامل مع الموبايل ده علشان تقدر تنقل الـData بتاعتك وتبدأ من جديد مع هواوي نوفا 7i وتعرف كل سلبيات الموضوع علشان متحسش إنك مش مرتاح في يوم من الأيام.

بإختصار :-

• الموبايل وزنه خفيف وتخانته رفيعه وتصميمه شيك .. خامات بلاستيك بس أحسن من M31 وتقفيل محترم.
• معالج كيرن 810 تكنولوجيا 7 نانو قوي جدًا في الأداء اليومي العادي .. ممكن ميكنش بيقدم أفضل تجربة العاب بس الموبايل ده حرفيًا مش بيسخن .. أو السخونية بتاعته أقل من كل الموبايلات اللي قولت عليها.
• الكاميرا الخلفية والسيلفي معقولين مش الأفضل ولكن مش الأوحش .. وفي توازن ما بينهم مفيش حد وحش وحد حلو الإتنين وسط .. بس مش بيصور فيديوهات 4K على عكس كل المنافسين.
• بطارية معقولة مش كبيرة 4200 مللي أمبير هتكمل 6 ساعات شاشة مفتوحة بس معاك اسرع شاحن 40 واط بيجي في العلبة .
• الشاشة بتاعته IPS LCD بدقة FHD+ بتردد 60 هيرتز عادي بشكل الثقب .. وهي مش شاشة مُميزة ولا هي AMOLED ولا هي 60 هيرتز ولكنها بتقدم أداء مُرضي وسطوعها أعلى حتى من شاشة النوت 9 برو.

السعر 4500 جنية للنسخة 128 جيجا مع 8 جيجا رام وينفع تركب شريحتين اتصال او شريحة وكارت من نوع Nano مش موجود في السوق فا إعتبر إنك مش معاك كارت في الموبايل ده.

مراجعة Nova 7i :-

من 4500 لـ5500 :-

الفئة ديه فاضية مفيهاش موبايلات كتير فا خلينا ننجز فيها على طول.

1- Realme 6 Pro

بإختصار كده .. Realme 6 Pro احسن من ريلمي 6 العادي في ايه ؟

• في الشاشة أكبر شوية 6.6 بوصة بس فيها ثقبين للسيلفي مش ثقب واحد
• في الخامات الخارجية زجاج مش بلاستيك زي ريلمي 6 العادي
• في الكاميرا السيلفي المُزدوجة اللي هنا بتقدم أداء أفضل وكمان معاك عدسة ثانوية للتصوير السيلفي الواسع
• الكاميرا الخلفية فيها عدسة مُخصصة للزوم بتوصل لـ20 اكس .. مش عارف انت هتستخدمها ولا لأ
• دعم للمايكروفون الإضافي لعزل الضوضاء
• نفس بطارية ريلمي 6 ونفس الشاحن بالظبط
• معالج سناب دراجون 720G نفس الموجود في النوت 9 برو واللي قولت تعليقي عليه بالنسبه للـG90T .. هو اقل في الأداء الرسومي ولكنه افضل في السخونية وإستهلاك البطارية

لو شايف إن الـUpgrades اللي في الـ6 برو تستاهل فا ممكن تشتريه بسعر 5400 جنية للنسخة 128 جيجا مع 8 جيجا رام وينفع تركب كارت ميموري وشريحتين اتصال مع بعض.

مراجعة Realme 6 Pro :-

2- Mi Note 10 Lite

وده موبايل الشياكة والفخامة والعظمة .. وعلى فكرة الموبايل باع كتير في مصر على عكس المتوقع .. وبالمناسبة برده بنسبة كبيرة شاومي مش هتنزل موبايلات جديدة لحد اخر السنة.

ايه اللي بيميز الـMi Note 10 Lite ؟

• شاشة AMOLED بحجم 6.47 بوصة بدقة FHD+ واللي فيها نوتش مش ثقب للشاشة .. والميزة هنا في الـEdges اللي في الشاشة .. وهي ميزة للي عاوز موبايل فخم وعيب للي عاوز موبايل عملي
• معالج سناب دراجون 730G اللي مازال بيقدم أداء معقول في الفئه المتوسطة طول ما مفيش معالجات أقوى من سناب دراجون نزلت في الفئة ديه لحد دلوقتي في مصر
• بطارية ضخمة بحجم 5260 مللي امبير وشاحن سريع 30 واط برده
• تصميم خلفي Premium لأبعد الحدود .. محدش هيشوف الموبايل ده معاك إلا وهيقولك إيه العظمة دي
• بيدعم الـNFC وبيدعم الـIR Blaster
• الكاميرا الخلفية 64 ميجا بيكسل بمستشعر Sony IMX686 قولت عليه في المراجعة بتاعت الموبايل إنه ملك التفاصيل حرفيًا .. بس معالجة الألوان فيه مش قد كده .. هتحتاج Edit بسيط .. بس الكاميرا اللي هنا الماده الخامة للتصوير علشان تعدل براحتك

تعليقي الوحيد على الموبايل ده :-

• الموبايل بوزن تقيل 204 جرام وزجاج خلفي وإنحناءات في الشاشة .. اقل واقعة هتكسره علطول

الـMi Note 10 Lite موجود بنسختين الـ128 جيجا مع 6 جيجا رام بسعر 5400 جنية والـ128 جيجا مع 8 جيجا رام بسعر 5800 جنية وينفع تركب شريحتين اتصال من غير كارت ميموري.

مراجعة Mi Note 10 Lite :-

من 5500 لـ6500 :-

دي أخر فئة سعرية معانا .. والفئة دي متغيرتش .. نفس الموبايلين اللي برشحهم لسه برشحهم لحد النهاردة.

1- Galaxy A71

وده تقريبًا من أكتر موبايلات سامسونج في الفئة المتوسطة اللي لقيت قبول ورضا المُستخدمين في الفترة الكبيرة الأخيرة .. وتعليقي الوحيد على A71 إن هينزل قريب الـGalaxy M51 بنفس مواصفات A71 مع بطارية أكبر 7000 مللي أمبير.. وممكن كمان ينزل بنفس السعر او أقل.

ليه تشتري A71 ؟

• موبايل محترم موزون متكامل الى حد كبير
• معالج سناب دراجون 730 المُتعارف عليه في الفئة دي
• شاشة كبيرة 6.7 بوصة من نوع Super AMOLED فيها ثقب للسيلفي بدقة FHD+ بتردد 60 هيرتز فقط
• الكاميرا الخلفية 64 ميجا بيكسل نفس الكاميرا الموجودة في الـM31
• الكاميرا السيلفي 32 ميجا بيكسل .. وأداء الكاميرات هنا محترم جدًا .. صور موزوزة وتفاصيل مع معالجة ألوان محترمة
• بطارية 4500 مللي أمبير مع شحن 25 واط مقبولين على فئته السعريه

ايه النقطة السلبية في الموبايل ؟

• الخامات .. الموبايل بيجي بخامات خارجية ضهر وفريم من البلاستيك !

سعر Galaxy A71 هو حوالي 6600 جنية للنسخة 128 جيجا مع 8 جيجا رام وينفع تركب كارت ميموري وشريحتين اتصال مع بعض في نفس الوقت.

مراجعة Galaxy A71 :-

2- Huawei Nova 5T

الموبايل برده بقاله فتره كبيرة في السوق .. ولكن لا يزال بيقدم معالج هو الأقوى في الفئة دي وهو كيرن 980 معالج رائد .. تعليقي الوحيد عليه إنه بيسخن شوية.

إيه اللي يخليك تشتريه ؟

• كاميرا خلفية 48 ميجا بيكسل كويسة جدًا لانه بمستشعر محترم سوني IMX586
• خامات زجاجية راقية جدًا وكمان وزن خفيف وحجم صغير في الإيد
• الموبايل ده تشتريه لو إنت بتدور على أداء قوي .. وكمان الموبايل ده جاي بخدمات جوجل بدون أي مشاكل

ايه اللي ممكن يقفلك من الموبايل ده ؟

• موبايل قديم نسبيًا
• شاشة صغيرة ونوعها IPS LCD وترددها 60 هيرتز
• بطارية صغيرة شوية لكن الشحن السريع موجود
• مفيش مدخل السماعات الـ3.5 مللي

سعر Nova 5T دلوقتي حوالي 6400 جنية للنسخة 128 جيجا مع 8 جيجا رام وينفع تركب شريحتين اتصال ومينفعش تركب كارت ميموري.

مراجعة Nova 5T :-

وشركة هواوي كمان نزلت بديل للنوفا 5 تي وهو الـNova 7 SE .. وده يعتبر تطوير للـNova 5T ولكن فقد خدمات جوجل .. لسه مجربناهوش في موبيزل .. هنجربة قريب وهننزل لكم مراجعته على الموقع والقناة .. ولكن لو موضوع خدمات جوجل فيصلي معاك فالـNova 5T أفضل بدون نقاش.

3- Vivo V19

ده أخر موبايل معانا في الفئة دي وحبيت أضيفة لإنه موبايل مُميز فعلًا لعُشاف التجربة المُختلفة والفريدة من نوعها .. الموبايل المظلوم اللي اتعمل عليه قلبان على اليوتيوب وقت المراجعات بتاعته .. والموضوع مفيهوش أي تطبيل انا بجرب وبنقل لكم وجهة نظري بس مش أكتر.

مميزات الـVivo V19 :

• موبايل مُميز في تصميمه .. شيك وزجاجي وفي نفس الوقت خفيف
• شاشة سوبر اموليد ممتازة بحجم 6.44 بوصة بتقدم تقريبًا اعلى سطوع حاليًا في فئته السعريه وألوان تحفة .. لما تجرب الشاشة هتحكم عليها بنفسك
• معالج مش الأفضل .. سناب دراجون 712 طبعا ضعيف على فئته السعريه وموجود في موبايلات بنص تمنه .. ولكن تجربة الأداء والسوفت وير اللي هنا مخليه الموبايل في حته تانيه خالص وأدائه اليومي ميقلش عن المنافسين .. وكمان في تبريد محترم علشان حتى لما تاخد أعلى أداء من المعالج، الموبايل ميسخنش
• الكاميرات حلوة جدا برغم إنها مش أعلى ارقام ولكن معالجة فيفو هنا للألوان حلوة جدا .. اة ممكن متكونش احلى كاميرا ولكن هي ليها Look مُعين عاجبني بصراحة
• بطارية 4500 مللي أمبير بتقعد وقت محترم وكمان شاحن سريع 33 واط مفيش أي تنازلات من ناحية البطارية

مُجملًا الموبايل ممكن إنه ميكونش بيقدم أفضل معالج ولا أفضل أرقام كاميرات ولكن بيقدملك تجربة مختلفة وهتعجبك لو حابب تجيب موبايل مُميز.

سعر Vivo V19 حوالي 6400 جنية للنسخة 128 جيجا مع 8 جيجا رام وينفع تركب كارت ميموري وشريحتين اتصال مع بعض.

مراجعة Vivo V19 :-

موبايلات مدخلتش الترشيحات :-

في موبايلات غابت عن الترشيحات زي الـGalaxy A51 واللي رشحت مكانة الـM31 .. والـA51 بيكسب في التصميم الأشيك والأحدث .. وكمان الـOppo A52 والـOppo A92 مدخلوش الترشيحات لإنهم مش بيقدموا أي مواصفات قوية تدخلهم في منافسة .. موبايلات عادية جدًا .. والـVivo Y50 كذلك غاب لإنه مش بيقدم أي مواصفات قوية.

الـHuawei Y9s برده مدخلش ترشيحات لإن مفيهوش أي عنصر إبهار غير الشاشة الكاملة بسلايدر السيلفي .. الفكرة اللي خلاص الشركات مبقتش تتوجه لها .. وده بالرغم إنه داعم لخدمات جوجل .. وكمان الـNokia 7.2 غاب بسبب المعالج القديم الـSD660 والبطارية الصغيرة.

وكمان الـOppo Reno 3 مدخلش الترشيحات وأكيد طبيعي .. موبايل مفيهوش أي ميزة حقيقية .. مش بيقدم أرقام ولا حتى تجربة إستخدام مقبولة بالسعر ده .. موبايل خفيف صغير مضمون من شركة اوبو لكنة مش بيقدم أفضل أداء ولا أفضل بطارية ولا أفضل خامات وبالتالي خرج من ترشيحاتنا.

فيديو الترشيحات على يوتيوب :-