لو عايز تشتري موبايل جديد، وأخرك في السعر 3000 جنية مصري .. خلي بالك انه في إحتمالية ان أسعار الموبايلات تزيد لإن في رسوم جمركية جديدة إتضافت على الموبايلات بقيمة 10%، فا احنا النهارده هنقدملك ترشيحات لأفضل 4 موبايلات بسعر تحت الـ3 الاف جنية تقدر تشتريهم في الوقت الحالي قبل ما الأسعار تزيد.
زيادة أسعار الموبايلات في مصر :-
الحكومة المصرية فرضت جمارك 10% على الموبايلات، وبكده الأسعار منطقيًا هتزيد، في منهم اللي عايز يتحمل الـ10% وميزودش في الأسعار لإن المبيعات أصلًا قليلة .. وفي اللي عايز يرفع، ولحد الوقت الحالي في توكيلات وقفت توريد للمحلات وفي توكيلات تانية مكمله في التوريد بالأسعار العادية.
كل اللي عليك في الوقت الحالي انك لو هتشتري تشتري دلوقتي، ولما تيجي تشتري تدور كتير وتشوف أرخص محل لإن الأسعار متفاوته جدًا .. وخلي بالك اننا في الـBlack Friday الفتره دي.
1- Galaxy A22
ده أول موبايل أقدر ارشحه لك في الفئة دي، سعره حاليًا للنسخة الـ64 جيجا مع 4 جيجا رام حوالي 2950 جنية مصري، يا تلحقه بالسعر ده يا متلحقوش.
بيقدم أفضل شاشة Super AMOLED في الفئة دي، دقتها HD+ بس تجربتها ممتازة، هتاخد منها أحلى ألوان وسطوع تحت الشمس، والشاشة 90 هيرتز كمان، والمعالج ميدياتك Helio G80 وواجهة سامسونج لطيفة بس تقيلة شوية، الأداء في المجمل معقول مش وحش ومش سريع أوي.
الكاميرات عظيمه جدًا، كاميرا خلفية 48 ميجا بيكسل فيها مثبت بصري هتكسب أي موبايل تحت سعر 3000 جنية، وبطارية 5000 مللي امبير مع شحن 15 وات، وفوق ده كلو دعم الـNFC.
لكن لو الموبايل بيقع منك كتير، بلاش، لإن الشاشة AMOLED مش بتستحمل وقعات وتكلفة تصليحها غاليه جدًا، وكمان شبكات الـWi Fi والإتصال مش الأقوى، وصوت الموبايل مش الأعلى، ومفيش جراب او سكرينه مع الموبايل في العلبة.
فيديو المراجعة :-
2- Infinix Hot 11S
موبايل محترم جدًا .. سعره منطقي جدًا، نسخة 128 جيجا مع 4 جيجا رام حوالي 2800 جنية مصري.
معالج ميدياتك Helio G88 نشيط مع سوفت وير انفينكس الخفيف، واللي فيه اعلانات مزعجه للأسف .. وكمان الشاشة 90 هيرتز وتجربة الأداء تعتبر هي الأسرع والأفضل تحت سعر الـ3000 جنية مصري.
الشاشة مش وحشه تمامًا، سطوعها في المركز الثاني بعد Galaxy A22 وكمان كبيرة 6.78 بوصة ودقتها FHD+ .. والكاميرا الخلفية مش الأفضل لكن كويسه والـNight Mode بتاعها جامد جدًا، وبطارية كبيرة بحجم 5000 مللي امبير بتدعم الشحن السريع بقوة 18 وات.
في اعلانات في السوفت وير .. الكاميرا الخلفية مش الأفضل وكمان الكاميرا السيلفي ضعيفه جدًا في الفئة السعرية دي، التصميم مطرقع بزيادة ومش هاديء ولا راقي خالص.
فيديو المراجعة :-
3- Realme C25s
ده أفضل موبايل من حيث الإعتمادية وجودة الخامات .. لو بتوقع موبايلك كتير او معاك أطفال بيستخدموا الموبايل كتير، سعر النسخة الـ64 جيجا مع 4 جيجا رام حوالي 2750 جنية والنسخة الـ128 جيجا مع 4 جيجا رام حوالي 3000 جنية.
موبايل متوسط في كل حاجه، شاشة 6.5 بوصة IPS LCD بدقة HD+ ومعدل تحديث 60 هيرتز، ألوانها حلوه، سطوعها مقبول مش الأعلى ولا الأقل، معالج Helio G85 مع سوفت وير ريلمي الخفيف، الأداء مُجملًا سريع، بس يجي في المركز الثاني بعد Infinix Hot 11S.
الكاميرات بتاعته كويسة، تيجي في المركز الثاني بعد Galaxy A22، البطارية ممتازة 6000 مللي امبير والشاحن 18 وات ومُجملًا أداء البطارية ممتاز، والشبكات طبعًا ده أفضل موبايل من حيث الشبكات في الفئة دي.
الموبايل وزنه تقيل جدًا ومحتاج وقت علشان تقدر تتعود عليه .. كمان أداء الشاشة مش أفضل وجودتها متواضعه الى حد كبير ومفيهاش ميزة زي الـ90 هيرتز او انها تكون AMOLED.
4- Redmi 10
موبايل متوازن بيقدم مجموعة مواصفات متوازنه وقوية، لكنه في التجربة الفعلية يعتبر هو الأقل في وسط الموبايلات اللي بنتكلم عليها .. سعر النسخة الـ64 جيجا مع 4 جيجا رام حوالي 2750 جنية مصري.
معالج ميدياتك Helio G88 بيقدم أداء كويس في الألعاب لكن التجربة الفعلية مش الأفضل، الشاشة 90 هيرتز IPS LCD بدقة FHD+ .. ممتازة لكن ألوانها مش الأفضل، الكاميرات في الموبايل هنا متواضعه الى حد كبير جدًا.
البطارية معقولة 5000 مللي امبير بتدعم الشحن السريع بقوة 18 وات، وأحسن حاجه في الموبايل ده هو الصوت الـStereo العالي جدًا، قوي جدًا بفرق كبير عن كل الموبايلات اللي في الفيديو ده .. وكمان هو الوحيد اللي فيه IR Blaster.
فيديو المراجعة :-
Comments