مراجعة Galaxy Watch 4 Classic الجديدة من سامسونج !

النهارده هنقدملكم مراجعة Galaxy Watch 4 Classic الجديدة من سامسونج واللي اتكشف عنها بشكل رسمي بره لأول مره في شهر اغسطس اللي فات، بنستخدمها بقالنا فترة كبيرة .. وهي ساعة ممتازة بتقدم كمية مميزات قوية جدًا ومُفيدة جدًا .. والنهارده هنوضحلكم كل حاجه في الساعة دي.

التصميم :-

الـGalaxy Watch 4 في منها نوعين، العادية والـClassic .. العادية بتيجي بمقاس 40 مم او 44 مم .. اما الـClassic بتيجي بمقاس 42 مم و 46 مم وبتيجي مع الـRotating Bezel.

الساعة كتصميم فا هي فخمة جدًا، خامات محترمة جدًا من الـStainless Steel، مقاومة للصدمات .. وزنها ثقيل شوية في الإيد بس مقبول .. من غير الـStrap حوالي 52 جرام.

فكرة الـBezel او الحلقة اللي على الشاشة فكرة ممتازة، بتحمي شاشة الساعة من أي خبطة كبيرة .. وكده كده شاشة الساعة بتيجي محمية بطبقة حماية Corning Gorilla Glass DX.

الساعه شكلها في الإيد فخمة وحجمها معقول مش كبيرة ولا صغيرة، بالكلام عن النسخة الـ46 مم .. وكمان بتيجي مقاومة للماء لحد عُمق 50 متر بشهادة IP68.

الـStrap حجمه 20 مم وتقدر تغيره وتستخدم واحده مختلف بألوان كتير لكن بحجم 20 مم برده .. وهو بيجي من السيليكون، هو متين وبيستحمل ومش بيبصم ولا بيتبهدل وكمان مُريح في الإيد .. لكن كنت حابب ان الساعة دي يجي معاها Strap من الجلد الطبيعي خاصًة انها ساعه فخمة.

الشاشة :-

شاشة الساعة ممتازة مفيهاش ولا غلطة .. شاشة 1.4 بوصة Super AMOLED بكثافة بيكسلات 321 بيكسل لكل بوصة، شاشة حلوة جدًا هتشوفها تحت الشمس بدون أي مشاكل، ألوانها كويسة جدًا وحجمها معقول جدًا.

المعالج :-

الساعة بتيجي بمعالج Exynos W920 بتكنولوجيا 5 نانو ميتر بتردد 1.5 جيجا هيرتز مع 16 جيجا مساحة تخزين، ولأول مره من سامسونج الساعه بتيجي بنظام WearOS من جوجل مع واجهة One UI علشان يبقى شكلها مُختلف .. نفس فكرة الموبايلات اللي بتيجي بنظام Android لكن بواجهة سامسونج.

أداء الساعه أحسن بفرق ملحوظ عن الجيل اللي فات .. الـWatch 3 اللي كانت بتهنج كتير .. هنا الـWatch 4 أداءها كويس، مش هتهنج خالص معاك غير لو لسه بتفتحها لأول مره.

الواجهة وتجربة الإستخدام :-

في مميزات كتير في الساعة دي، منها انك تقدر تفتح تطبيق Samsung Health والـGalaxy Wearable على موبايلك وتدخل على Sleep وهتلاقي مستشعر Detection شغله وألبس الساعه ونام .. وهتصحى هتلاقي تسجيل ليك وانت نايم لو كنت عملت صوت.

تقدر كمان تتابع نسبة الاكسجين في الدم وانت نايم .. هتدوس على 3 نقط وتدخل على Blood Oxygen وتفعلها والساعه هتقيس نسبة الأكسجين في الدم عندك وانت نايم.

المشكلة في موضوع الـTracking ان الساعه ثقيلة فا ممكن تضايقك وانت نايم .. وكمان البطارية مش أفضل حاجه والاستهلاك بتاعها هيكون عالي جدًا.

وانت بيكون عندك Play Store على الساعه تقدر تحمل منه تطبيقات مُخصصة للـWearOS .. وكمان لو فتحت الـMaps على موبايلك هتلاقيها اتنقلت على الساعه .. تقدر تبص فيها براحتك وانت ماشي على رجلك، وطبعًا لو سايق فا الموضوع صعب شوية هي معمولة علشان لو انت ماشي على رجلك.

طبعا مش هتكلم عن الإشعارات .. اكيد كلها بتوصل على حسب البرامج اللي انت مختار انها توصلك اشعارات على الساعة وتقدر ترد عليها بكيبورد صغيرة بدائيه او انك ترسم حروف على شاشة الساعة.

الأوضاع الرياضية :-

لو انت رياضي فا الـWatch 4 من أحسن الساعات اللي جربتها في التمارين، هي فيها كل التمارين اللي تتخيلها .. وبتحسب صح وسريعة جدًا مش بتتأخر، ده غير أنك لو نسيت تشغل الـWorkout وبدأته بالفعل الساعه هتاخد بالها وهتقولك انك نسيت تشغله .. وهتخليك تبدأه وهتحسبلك اللي انت محسبتوش كمان.

وكمان في الـBody Mass Index اللي بتقيس نسبة الدهون في الجسم .. الموضوع ده مفيد جدًا لمتابعة حالة جسمك .. وأصلًا قبل ما تبدأ أي Diet او نظام غذائي هتلاقي الدكتور بيطلب منك نسبة الدهون والعضلات.

ممكن عن طريق انك تدخل طولك ووزنك وتلبسها بطريقة مُعينه وترفعها شوية في إيدك وتحط صباعين عليها وهي هتقولك أرقام تقريبية لنسبة الدهون والعضلات وهي كده طبيعي ولا لا .. والأرقام قريب جدًا فعلًا من الأرقام اللي الميزان الحقيقي بيطلعهالك.

عناصر اخرى :-

الميكروفون والـSpeaker في الـWatch 4 ممتازين جدًا .. جربتهم كتير ومفيش أي شكوى منهم، الميكروفون ممتازة وكمان السماعات ممتازة وأحيانًا هتحتاج توطي الصوت بتاعها.

الساعة فيها كل المستشعرات اللي تتخيلها .. فيها GPS وفيها قياس نسبة الأكسجين وضربات القلب وضغط الدم والضغط وقياس النوم والـiCG اللي هو رسم كهربائي للقلب .. وقياس الـBody Mass Index وكمان فيها NFC.

التنقل وإستخدام الساعه لطيف جدًا، والـBezel اللي بتلف بتسهل عليك كل حاجه لإنك بتحركها بدال ما تعمل Swipe بإيدك، تقدر تتنقل بين الـWidgets اللي بتظهرلك .. وكمان تقدر تغير الـIcons اللي في الـMenu السريعة اللي بتظهرلك لما تسحب من فوق.

وعندك كمان ظبط سطوع تلقائي للشاشة، وعندك Always On Display علشان تخلي الشاشة منورة في إيدك علطول .. وفي زِر Water Lock علشان لو نازل المياه بتدوس عليه وبيعمل Lock للساعه.

تقدر تتنقل بين البرامج اللي انت فاتحها وتقفلها زي ما تكون بتستخدم الموبايل .. حاجه لطيفة جدًا انك تفضي الـRam وتقفل البرامج أول بأول على الساعه علشان تحافظ على البطارية أكثر وأكثر.

وطبعًا عندك Watch Faces كتير جدًا تقدر تحمل منهم وتستمتع بشكل جديد كل يوم، حتى تقدر تتحكم في كل Watch Face وتغير فيه وتخصص فيه براحتك .. الأول كنت علشان تنزل Watch Face بتنزل تطبيق مُنفصل اما دلوقتي الموضوع أبسط من كده بكتير وكل الـFaces بتظهر جوه تطبيق Galaxy بتاع الساعه.

التطبيق ده فعلًا فيه كل حاجه محتاج تعدلها في الساعه، الأزرار تعمل ايه اللي فوق واللي تحت وتضيف صور وملفات صوت على الساعه وتتحكم في درجة الصوت والـVibration بتوع الساعه .. اعدادات فيها كل حاجه تقريبًا، تحس انك بتتحكم في موبايل مش ساعه.

البطارية :-

البطارية هي أكثر حاجه مش كويسة في الساعه، يادوبك تكفي استخدام يوم واحد .. كل يوم هتشحنها مع إستخدام متوسط مش عنيف .. والبطارية معاها شاحن لطيف مغناطيسي بيشحن في حوالي ساعه ونص.

الساعه فعلًا مليانه Features ومميزات كتير، وكل ده بيستهلك البطارية .. بس برده هل انا هشحنها وانا نايم ولا هستخدمها علشان اتتبع نومي، كان لازم البطارية تكون أقوى من كده.

سعر Galaxy Watch 4 Classic :-

• سعر الساعه للنسخة الكلاسيك الـ46 مم حوالي 6200 جنية مصري.