مراجعة Honor 10X Lite – أشيك موبايل ب 3000 جنية !

وصلتنا منتجات جديدة من شركة هونر اللي اتباعت مؤخرا لمجموعة مستثمرين صينين علشان يقدروا يتخطوا موضوع الحظر الأمريكي .. ولكن المنتجات اللي وصلتنا نزلت برا من فتره ولسه نازله عندنا في مصر وبالتالي فهي كانت جاية بسياسة هونر القديمة .. وبالتالي توقع أن مفيش خدمات جوجل.

احنا وصلنا 3 منتجات من هونر .. وهما Honor 10X Lite و Honor Watch GS Pro و Honor Watch ES .. ودول مُوجهين لمُحبين الإعتمادية والخامات والجودة بتاعت شركة هونر، لكن زي ما قولتلكم الموبايل مبيدعمش خدمات جوجل.


محتويات العلبة :-

علبة Honor 10X Lite :-

  • الموبايل موجود في كيس شفاف
  • الجراب الشفاف المُرفق
  • راس الشاحن الـ22.5 واط
  • السماعات الـ3.5 مللي
  • وصلة الـUSB Type C
  • دليل التشغيل السريع
  • كارت الضمان

علبة Honor Watch GS Pro :-

  • الساعة
  • وصلة الشحن الـUSB Type C
  • الـDock بتاع الشحن المغناطيسي
  • كارت الضمان
  • دليل التشغيل السريع

علبة Honor Watch ES :-

  • الساعة او الباند
  • وصلة الشحن
  • دليل التشغيل السريع
  • كارت الضمان

بعد ما عملنا Unboxing للمنتجات دي .. ندخل بقى على تجربة الموبايل.


التصميم :-

تصميم الموبايل شيك .. جاي مايل أكتر لأنه يبقى شبه الهواتف الرائدة برصة الكاميرات في مستطيل كبير بارز شوية عن جسم الموبايل .. والبروز بيتغطى بالجراب المرفق.

طبعا الخامات بالكامل بتيجي من البلاستيك ولكنه بلاستيك نظيف مش هتحسه رخيص اوي .. لدرجة انه ممكن تتخدع فيه وتفتكره زجاج .. والتقفيل محترم جدًا.

الموبايل وزنه تقيل نسبيا .. بيجي بوزن 206 جرام وتخانه كبيره شوية 9.3 ملم .. الموبايل ابعاده كبيرة في الأيد فا لازم تبقى متفهم ان ده موبايل كبير نسبيًا.


الشاشة :-

شاشة كبيرة بتيجي بحجم 6.67 بوصة من نوع IPS LCD بدقة FHD+ وفيها ثقب كبير للسيلفي في نص الشاشة .. والحواف حوالين الشاشة متوسطة .. ولا هي كبيرة أوي ولا هي صغيرة أوي .. معقولة .. ولكن الثقب بتاع السيلفي كبير شوية.

الـQuality بتاعت الشاشة حلوه والألوان مظبوطة والدقة بتاعة الشاشة كويسة جدًا وزيادة على ده سطوع ممتاز تحت الشمس .. الموبايل شاشته مش هتضايقك خالص.

والشاشة مفيش إعلان رسمي على طبقة الحماية اللي موجودة عليها ولكن في سكرينة هتلاقيها متركبة على شاشة الموبايل لما تطلعه من العلبه.


الأداء :-

معالج Kirin 710A بتكنولوجيا 14 نانو ميتر .. معالج ضعيف نسبيًا على الفئة السعرية للموبايل ده .. الأداء معقول ولكنه مش الأسرع .. هو مستقر وثابت على Toon واحدة او درجة واحدة من السرعة.

ربنا يكون في عون هواوي وهونر ويقدروا يطلعوا من مشكلة الحظر بسرعه علشان يقدروا يستخدموا معالجات أفضل من كده .. ولكن مُجملًا بالوضع الحالي ده مش أفضل معالج .. بيناسب اكتر الأستخدام الخفيف والسوشيال.

الأداء الرسومي ببجي بتشتغل على High HD وكول اوف ديوتي بتشتغل على Medium .. الأداء الرسومي معقول ولكنه مش سلس اوي .. معالجات ميدياتيك G70 وG80 بيقدروا يطلعوا اداء رسومي أفضل.


عوامل الأمان وعناصر اخرى :-

البصمة على زرار الباور سرعتها معقوله .. والـFace Unlock برده سرعته معقول .. الموبايل فيه خاصية الـNFC كعاده هونر بتحب تضيفها .. وفيه ميكروفون إضافي لعزل الضوضاء.

زي ما قولتلك مفيش خدمات جوجل والإعتماد فقط على خدمات هواوي .. الـApp Gallery والـPetal Search علشان تقدر تحمل تطبيقاتك .. واحب افكرك لازم التطبيق اللي تنزله ميكنش مرتبط بحزمة جوجل الأمنيه علشان يشتغل.

الموبايل مفهوش مستشعر جيروسكوب للأسف .. بس مستشعرات الضوء والتقارب شغالين كويس .. ومفهوش تسجيل مكالمات.

صوت الموبايل متواضع أوي مش عالي .. ياخد تقييم 6 من 10 مثلًا .. والـWiFi وشبكات الأتصال زي الفل وتقدر تعتمد عليهم بدون أي مشاكل.


البطارية :-

البطارية بتيجي بحجم 5000 مللي أمبير بتستحمل حوالي 9 ساعات وشوية شاشة مفتوحة .. وقت معقول جدا.

الشاحن المرفق 22.5 واط شاحن سريع في الفئة دي بيشحن البطارية في ساعتين إلا ربع .. هو بيشحن بسرعة بس بيجي في أخر 10 فلمية وبيتاخر .. تقريباً اخد فيهم نص ساعة للأسف.


الكاميرات :-

الكاميرات رباعية .. الأساسية 48 ميجا بيكسل بفتحة عدسة F/1.8 والتانية 8 ميجا بيكسل فتحة عدسة F/2.4 للتصوير الواسعة والتالته ماكرو والرابعة عزل .. السيلفي 8 ميجا بيكسل فتحة عدسة F/2.0.

أداء الكاميرات متواضع جدا .. المعالجة مش أفضل حاجة .. التفاصيل معقولة لو الإضاءة عالية ولو قلت التفاصيل بتقل كتير .. والألوان بحسها ساعات باهته شوية وهتحتاج تعدل على الصور وتعزز الألوان شوية.

الـNight Mode معقول اوي في الموبايل ده وممكن ينافس عادي .. هونر دايمًا مُميزين في الـNight Mode لو تفتكروا الـHonor 9X Lite كان محترم جدًا.

السيلفي مش حلو إطلاقًا .. ميقدرش ينافس الموبايلات التانية بالسعر ده .. وعمومًا أنا شايف الكاميرات مش قوية في الـHonor 10X Lite.

بالنسبة لتصوير الفيديوهات بالموبايل فا هو بيقدر يصور على 1080p مع 30 فريم في الثانية ودي أعلى جودة بيوصلها .. وطبعًا مفيش مُثبت إلكتروني للأسف .. وفي ميكروفون اضافي لعزل الضوضاء.

ممكن تشوف الصور والفيديوهات في فيديو المراجعة بالأعلى.


سعر الموبايل :-

  • نسخة واحدة بمساحة تخزين 128 جيجا مع 4 جيجا رام بسعر 3333 جنية

وبينفع تركب كارت ميموري بحجم 256 وشريحتين إتصال مع بعض في نفس الوقت.


الرأي النهائي :-

مميزات Honor 10X Lite :-

  • تصميم شيك
  • خامات خارجية محترمة وتقفيل كويس
  • شاشة ممتازة
  • بطارية كويسة
  • شاحن سريع
  • شبكات إتصال قوية

عيوب Honor 10X Lite :-

  • أداء متواضع
  • مفيش خدمات جوجل
  • مفيش مستشعر جيروسكوب
  • صوت واطي نسبيًا
  • كاميرات مش الأفضل

الساعة Watch GS Pro

الساعة رياضية جدًا واللون اللي في الصور ده هو Camo Blue .. اللون ده مش هيليق على كل اللبس .. يعني الـStyle بتاعها مش الجوكر اللي يليق على أي حاجة .. ولكن التصميم نفسه بتاع الساعة جديد وغريب وملفت وانت لابسها في إيدك هتلاقي كل شوية حد يسألك عنها.

في ألوان تانيه زي الاسود ده ممكن يكون كلاسيكي شوية ولكن ستايل الساعة نفسه رياضي شوية .. والـStrap المنقوش ده من القماش.

في دايرة ستانلس ستيل بتحاوط الشاشة علشان تحميها .. ولكن الدايرة دي مش بتلف زي الساعة بتاعت سامسونج اللي جربناها من فترة .. في زراين من الستانلس برده على اليمين علشان تتحكم في الساعة وتحتهم الـSpeaker بتاع الساعة.

جسم الساعة نفسه من البولي كربونيت المقوى علشان يقدر يستحمل أكتر بدون خربشة .. هونر بتقول ان الجسم ده قدر يقاوم ظروف كتير صعبه زي درجة الحرارة العالية والرطوبة العالية ويقدر يقاوم الاتربة بشكل أكبر من اي ساعة منافسة علشان ساعتهم تناسب اكتر المهام الشاقة.

وهي مقاومة للماء لحد عمق 50 متر يعني تنفع في الغطس .. ووزنها تقيل شوية 45 جرام من غير الـStrap وحجمها كبير شوية لان المينا 48 ملم .. فيها Speaker وميكروفون علشان تعمل منها مكالمات وكمان تقدر تحمل عليها أي حاجة تسمعها لأنها فيها مساحة داخليه 4 جيجا بيتبقى ليك منهم حوالي 2 جيجا.

الشاشة بتاعتها AMOLED بحجم 1.39 بوصة بكثافة بيكسلات محترمة 329 بيكسل في البوصة وسطوعها حلو جدا تحت الشمس .. وفي أشكال كتير طبعا للـWatch Face وتقدر تحمل اشكال اكتر من المتجر .. وطبعًا الساعة بتشتغل على اي موبايل مش شرط موبايل اندرويد.

الساعة ديه جاية بنفس خصائص الـHuawei GT2 .. فيها GPS وFitness Tracker محترم واكتر من 100 نظام رياضي علشان تتبع نشاطك الرياضي وقياس مستمر لنبضات القلب وقياس نسبة الأكسجن و بتشوف منها الإشعارات اللي جاتلك وبتدعم اللغة العربية وبدون NFC وكالعاده السوفت وير مقفول مش هينفع تنزل اي تطبيقات خارجية.

الفرق بس أن البطارية هنا أكبر بفرق ملحوظ 790 مللي أمبير وهتستحمل معاك لحد 15 يوم استخدام فعلي بدون شحن .. وده تقريبا احسن حاجة في الساعة دي.

الساعة سعرها 4333 جنية وانا شايف بصراحة السعر كتير خصوصًا ان الساعة مقدمتش مميزات أكتر من الـHuawei Watch GT2 غير بس البطارية الأكبر و الخامات اللي تستحمل أكتر.


الباند Honor Watch ES

الساعة مايلة أكتر تكون باند لإنها صغيرة ووزنها خفيف جدًا في الإيد .. حوالي 21 جرام من غير الـStrap البلاستيك بتاعها .. ومع ذلك شاشتها AMOLED كبيرة 1.64 بوصة وسطوعها ممتازة برده تحت الشمس .. ولكن مفيش أي حاجه تحمي الشاشة لو اتخبطت من إيدك .. مفيش فريم على الشاشة يعني.

فيها نفس الخواص بتاعت ساعات هونر وهواوي .. بس مفيهاش ميكروفون وسماعة يعني مش هتعرف تعمل منها مكالمات .. يادوبك بتشوف منها الإشعارات وبتدعم برده اللغة العربية.

الساعة فيها 95 نظام رياضي لتتبع نشاطك وبرده فيها قياس نبضات القلب وفيها قياس نسبة الأكسجين .. بس هنا مفيش GPS للأسف .. البطارية هتستحمل حوالي 8 أيام إستخدام فعلي وده وقت معقول جدًا.

الباند سعره 1888 جنية .. رأيي انه كان هيبقى صفقة رابحة أكتر لو سعره نزل 300 جنية وأعتقد خلال فترة قليلة السعر بتاعها هيبقى في حدود الـ1500 جنية أو أقل في المحلات وساعتها ممكن فعلًا تبقى قيمة كويس مقابل السعر للي مش غاوي الباندات وشايفها حاجه صغيرة .. وللي مستغلي الساعات الـSmart الكبيرة.

قد يعجبك أيضا...

Comments

جاري التحميل...