مقارنة Honor 20 مع Samsung Galaxy A71 – شاشة السامسونج ولا خامات هواوي و أونر ؟!

بعد ما نزلنا مراجعة Samsung Galaxy A71 .. لاقينا ناس كتيير طالبين مقارنة كاملة بين Galaxy A71 و Honor 20 و Nova 5T .. بص علشان مطولش عليك .. الـHonor 20 هو هو الـNova 5T بالملي في كل حاجة فيما عدا فرق 2 جيجا رام لصالح النوفا .. فاعتبر الاونر 20 هو هو النوفا 5 تي ف المقارنة ديه .. تعالوا نشوف وحش سامسونج الجديد هيقدر يسد مع الاونر 20 ولا لا ؟


التصميم :-

اسوأ حاجة في Galaxy A71 خاماته الخارجية .. علشان كلها بلاستيك .. فا وانا مغمض كدا هدي الأفضلية في خامات التصنيع لموبايل Honor 20 وده لان ظهره من الزجاج والفريم بتاعه معدني قوي.

طبعا عشان فرق حجم الشاشة .. فالـA71 اكبر ف الحجم واطول بفرق ملحوظ عن الـ هونر 20 .. فطبعا هدي افضلية المسكة في الايد لموبايل Honor 20 لان حجمه اصغر وهتقدر تستخدمه بكل سهولة بايد واحدة.

الموبايلين فيهم بروز كاميرات زي بعض تقريبا .. فمفيش هنا افضلية لواحد عن التاني ف حته بروز الكاميرات الأقل.

وعلشان اختصر عليك وقتك .. الاونر 20 قابليته للكسر اسهل لو وقع وقعه كبيرة علشان ازاز .. والايه 71 قابليته للتني والخربشة اكتر علشان من البلاستيك.


الشاشة :-

وهنا بردة الفرق واضح ومحسوم لموبايل Samsung Galaxy A71 .. لان شاشة السامسونج هنا بحجم 6.7 بوصة من نوع Super AMOLED وبدقة FHD+ .. انما شاشة الـHonor 20 او الـ Nova 5T بحجم 6.2 بوصة من نوع IPS LCD وبدقة FHD+ .. واكيد نقطة التفوق هنا واضحه للجالاكسي A71 بسبب الشاشة الاموليد وكعادة مُعظم موبايلات سامسونج.

طبعا الشاشتين فيها ثقب للسيلفي والثقب اد بعض تقريبا .. السامسونج في النص والاونر على الشمال .. مش عارف انت هتفضل انهي مكان للثقب يكون ف النص ولا على الجمب علشان ميضايقكش وانت بتتفرج على فيديوهات .. وكدا كدا الموبايلين فيهم اوبشن انك تقدر تلغي شكل الثقب وتحط مكانه شريطة سودا.

بس طبعا فرق الالوان بتاع الشاشة السوبر الاموليد واضح وصريح وكتجربة فرجة على فيديوهات .. شاشة السامسونج تكتسح بجدارة .. وكمان سطوعها تحت الشمس اعلى بفرق واضح.

الكومنت الوحيد على الشاشة في تكلفة الصيانة بتاعتها .. لو شاشة A71 حصلها حاجة ومكنش معاك ضمان الشاشة الـ6 شهور هتدفع كتير علشان تصلحها .. انما شاشات IPS LCD ارخص بكتير في صيانتها لو حصلها حاجة .. بس يعني ديه نقطة ممكن متبقاش ضرورية مع ناس كتير.

وبرده حابب اوضح ان في السعر ده مُعظم الشاشات بتكون اموليد واللي مش عادي اننا نلاقي موبايلات بشاشات IPS LCD في السعر ده لذلك نقطة تكلفة الصيانة العاليه للشاشة موجوده تقريبًا في كل موبايلات الفئة دي .. بس موبايل هونر 20 ونوفا 5 تي موجوده بقوة ومشاركة في معظم مقارنات الفئة دي عشان المعالج الخرافي اللي بيقدموه والكاميرات المحترمه جدًا .. واللي هنتكلم عنهم فيما بعد.

الموبايلين عليهم سكرينة متركبة لما تطلعهم من العلب بتاعتهم .. والسامسونج عليه حماية جوريلا الجيل التالت .. انما الاونر مفيش اعلان رسمي عن طبقة الحماية.


الاداء :-

وهنا التفوق واضح وصريح للـHonor 20 او الـNova 5T .. لانهم بيجوا بمعالج هواوي Kirin 980 الرائد .. ده معالج شكرت فيه كتير قبل كدا انتوا مش محتاجين تعرفوا رأيي فيه تاني .. الـ هونر 20 بيجي بـ6 جيجا رام والـ نوفا 5 تي بـ8 جيجا رام.

انما الـGalaxy A71 جاي بمعالج كوالكوم سناب دراجون 730G .. وده معالج كويس في الفئة المتوسطة وشوفناه في موبايلات كتير زي Mi 9T .. بس طبعا ميقدرش ينافس ويسد مع الاداء اللي هيقدمه Kirin 980.

بشكل عام .. لو استخدامك بسيط مش بتلعب العاب كتير فرق المعالج مش هيبان معاك اوي.

انما لو بتلعب العاب تقيلة .. فالفرق واضح هنا لان الـ Honor 20 بيشغل ببجي على Ultra HDR .. انما في Galaxy A71 بتشتغل على High HD .. هو اينعم تجربة الشاشة الاموليد في الالعاب احسن من الشاشات الـ IPS LCD .. بس في ناس عمومًا بتحب فريم ريت عالي وجرافيك اعلى .. وبالتالي الاونر 20 هيكون افضل.

لعبة كول اوف ديوتي شغالة على نفس اعدادات الجرافيك Very High في الموبايلين مفيش اي اختلافات.

الاختلاف بيبان مع اتقل لعبة اكشن ممكن تلعبها وهي فورت نايت والي شغالة على اعلى اعدادات جرافيك على Honor 20 واللعبة شغالة بكفاءة .. انما بتشتغل على اعدادات جرافيك متوسطة في Galaxy A71.


عوامل الامان :-

بصمة الهونر 20 او النوفا 5 تي مدمجة في زر الباور زي مُعظم موبايلات هونر .. بصمة عملية ومن لمسة بتفتح .. انما في السامسونج Galaxy A71 مدمجه بالشاشة وكمان مش اسرع بصمة .. فبصراحة انا هنا افضل بصمة الاونر 20 .. وبردة الـFaceunlock اسرع في الهونر 20 عن السامسونج جالاكسي A71.

الـ اونر 20 فيه لمبة اشعارات صغيرة بتنور باكتر من لون .. انما الـ A71 موجود فيه Always On Display لعرض ايقونات الاشعارات الي جاتلك علشان يعوض غياب لمبة الاشعارات، والمستشعرات كلها شغالة وموجودة في الموبايلين بدون اي مشاكل.

بالنسبة للصوت .. السامسونج Galaxy A71 اعلى من الـHonor 20 في صوت الاسبيكر الخارجي .. وكمان اعلى في صوت سماعة المكالمات.

انما بالنسبة لصوت سماعات الاذن .. الاونر 20 مفيهوش مدخل 3.5 مللي ومعاه سماعة Type C و وصلة تحويل .. انما الـGalaxy A71 محافظ على المدخل ده .. وبالتالي هنا في افضلية للـA71.

بالنسبة بقا لقوة الشبكة .. شبكة الاتصال او بتاعت الخط ادتني نفس الاداء الممتاز في الموبايلين .. معالجات سناب دراجون وكيرن ممتازة ف الشبكة .. انما من ناحية قوة اتصال الواي فاي .. فهنلاقي ان الـHonor 20 او الـ Nova 5T افضل شوية.


البطارية :-

سامسونج Galaxy A71 بيجي ببطارية بحجم 4500 مللي أمبير .. والـ Honor 20 او الـNova 5T ببطارية 3750 مللي أمبير .. الفرق الفعلي ف الاداء حوالي نص ساعة أو ساعة بالكتير شاشة مفتوحة مش اكتر لصالح الـA71 .. فتقدر تقول الـGalaxy A71 افضل بفرق بسيط اوي برغم البطارية الاكبر .. بس تنظيم هونر افضل لاستهلاك الطاقة بشكل ملحوظ.

وبالنسبة لقوة الشاحن .. الـA71 معاه شاحن 25 وات والاونر 20 شاحن 22.5 وات .. والاتنين بيشحنوا تقريبا في ساعة و تلت.


الكاميرات :-

الموبايلات فيها 4 كاميرات في الخلف، الاساسية في الـGalaxy A71 بدقة 64 ميجا بيكسل فتحة عدسة F/1.8 والاساسية في الـHonor 20 بدقة 48 ميجا بيكسل فتحة عدسة F/1.8 .. وطبعا في عدسات Ultra Wide Anlge و Macro وعزل في الموبايلات.

السيلفي في الموبايلين بدقة 32 ميجا بيكسل .. في الـHonor 20 بفتحة عدسة F/2.0 .. والسامسونج بفتحة عدسة F/2.2.

بالنسبة للتجربة الفعليه للكاميرات .. لما صورت بالهونر 20 والـA71 بالكاميرا الخلفية لاقيت ان معالجة الصور والالوان في جالاكسي A71 افضل بفرق عن الهونر 20 . الالوان واقعيه والصور والمعالجه افضل بكتير وده تقريبًا نفس اللي لاحظناه في مراجعة Galaxy A51 الإصدار الجديد من واجهة سامسونج حسن من معالجة الصور بشكل كبير جدًا .. اما بالنسبة للتفاصيل هي واحده تقريبًا في الموبايلين.

وفي الاضاءه الداخليه بنلاقي ان الهونر 20 مغمق الصورة شوية لكن في الـA71 الصورة كويسه وواضحه .. والوان الصورة بشكل عام كويسه في الاتنين والتفاصيل واضحه وكويسه جدًا ومفيش فيها مشاكل.

التصوير بالليل بإستخدام الـNight Mode هنلاقي ان النوفا او الهونر 20 في النايت مود بيحصل فلتر بسيط على الصورة بحيث يديهالك بشكل احسن والصورة تعجبك اكتر .. تفاصيل اكتر والوان احسن الى حدٍ ما، انما في الـA71 بيحاول يوضحلك الصورة ويبينلك الاماكن الضلمة في الصورة لكن مع الإحتفاظ بالواقعيه بتاعت التصوير ومن غير ما يلعب في الصورة كتير.

بالنسبة للكاميرا السيلفي الـHDR في الـA71 افضل بفرق كبير عن الـHonor 20 او النوفا وكمان الوان الصورة كلها بتكون احسن في الجالاكسي A71 .. وكمان في البورتريه عزل الخلفية في الـA71 بيكون افضل وشكل الخلفية احسن .. وبالنسبة لتحديد الاطراف في البورتريه هيكسب هنا الهونر 20.

بالنسبة للسيلفي في الاضاءه الليليه هنلاقي ان الـA71 بيركز على الشخص وبيحاول يطلعه في افضل شكل وبكل تفاصيله لكن هتلاقي نويز كتير في الخلفية بتاعت الشخص .. اما الهونر 20 فا معالجه الصورة بشكل عام بالليل مش حلوه .. والـA71 فيه Night Mode في السيلفي اما الهونر 20 مفيهوش Night Mode لذلك هيتفوق هنا الـA71 عن الهونر 20.

بالنسبة لتصوير الفيديوهات في الموبايلين، الموبايلين بيصوروا [email protected] والهونر 20 بيدعم المُثبت الإلكتروني في التصوير الـ4K اما الـA71 بيدعم التثبيت في التصوير الـ[email protected] بس.

وكمان تصوير الفيديوهات بالكاميرا السيلفي الـGalaxy A71 بيدعم 4k بدقة [email protected] اما الهونر 20 بيدعم [email protected] بس.


اسعار الموبايلات :-

سامسونج جالاكسي A71 سعره الرسمي مع هدية الحجز 7000 جنية للنسخة 128 جيجا مع 8 جيجا رام .. وسعره هيبقا في حدود 6500 جنية بعد انتهاء فترة الحجز .. وينفع تركب كارت ميموري وشريحتين اتصال مع بعض.

الاونر 20 بيجي بمساحة 128 جيجا و6 جيجا رام بسعر 5600 جنية ومينفعش تركب كارت ميموري.

والنوفا 5 تي سعره حوالي 6100 جنية للنسخة 128 جيجا مع 8 جيجا رام ومينفعش بردة تركب كارت ميموري.


الرأي النهائي :-

موبايل Galaxy A71 سعره دلوقتي عالي شوية .. بس حقيقي هو بيقدملك شاشة اموليد ممتازة في الفئة المتوسطة .. وكمان بيقدملك كاميرات كويسة جدا جدا .. بس طبعا في تنازل واضح من سامسونج في خامات التصنيع وفي عوامل الامان البطيئة.

انما Honor 20 او Nova 5T .. تشتريهم لو همك الاساسي اداء جامد والعاب تقيله لانهم بيجوا بمعالج رائد ادائه افضل بفرق واضح عن A71 .. وكمان خامتهم انظف بشكل ملحوظ .. وعوامل الامان بتاعتهم اسرع .. وكمان سعرهم ارخص دلوقتي من Galaxy A71 الي لسه نازل وغالي شوية .. وطبعا ميكنش فارق معاك موضوع الشاشة الـIPS LCD والسيلفي بليل الي مش قد كدا.


فيديو المقارنة :-

قد يعجبك أيضا...

Comments

جاري التحميل...