سامسونج ناوية تعمل قلق كبير وتنافس بقوة في سوق الموبايلات في 2020 .. كل شوية هتنزل موبايل جديد ينافس بقوة .. والمرة ديه معانا وحش جديد في الفئة المتوسطة .. او الفوق المتوسطة وهو الـ Samsung Galaxy A71 .. وحقيقي مراجعة الموبايل ده صعبة جدا .. لاننا بنطلب دايما من سامسونج انها تعلي من ارقام المواصفات علشان تقدر تنافس الماركات الصينية .
وحقيقي سامسونج استجابت بشكل كبير في الموبايل ده ومقدمة تركيبة محترمة من المواصفات كأرقام .. بس هل فعلا الارقام ديه صحيحة وبتديك اداء فعلي محترم؟ .. هل في اي تنازلات في الموبايل ده؟ .. كل ده هتعرفه لما تقرأ المراجعة ديه.
التصميم :-
خناقة كبيرة حصلت على نوع خامة الظهر بتاعت الموبايل ده .. بس حقيقي كل الشكوك بتاعتي راحت لما مسكت الموبايل .. الخامة واضحة وصريحة من البولي كربونيت او البلاستيك زي موبايل Galaxy A51 وموبايل Galaxy A70 بتاع السنة الي فاتت.
طيب هل الخامة وحشة او سيئة .. احب اقلك باختصار الموبايل ده حجمه كبير .. وسمكه رفيع .. ووزنه خفيف وده بسبب استخدام الخامات البولي كربونيت .. والخامات لو كانت زجاج الموبايل كان هيبقى اتخن واتقل من كده بفرق ملحوظ.
جربت اتني (اختبار ثني بسيط) الـA71 .. فعلا الموبايل علشان طويل نسبيا وخفيف ورفيع هتحس انه فعلا ممكن يتني منك لو انت من الاشخاص الي استخدامها قاصي جدا وبتحط الموبايل في جيبها الوراني وتقعد وتقف ومرمطين الموبايل معاهم علطول.
بس نفس الخامات مستخدمة في اقدم موبايل من سامسونج في فئة ايه وهو الـGalaxy A50 والي قدامكم اهو عايش معانا وشغال زي الفل لحد دلوقتي بس طبعا قابليته للتني اقل علشان الموبايل اقصر .. ومجاش لينا شكاوي ان الخامة ديه اتكسرت مع حد لحد دلوقتي.
الشكاوي الي جت كلها ان الخامة ديه سهل جدا تتخربش وده حقيقي .. علشان كدا انصحك لازم لما تشتري الموبايل ده اول حاجة متشلوش من الجراب الشفاف الي جاي معاه .. تاني حاجة يفضل تركبله سكين حماية محترم علشان الخامة بتتخربش حتى وهو الجراب .. ممكن تبص على حماية الاسكينات من شركة برو سكينز .. الناس ديه محترمة جدا في تركيب الـSkinz والخامات عندهم محترمة جدًا.
وخلاصة الكلام .. يعيب الـA71 انه من البولي كربونيت او البلاستيك بسبب فئته السعرية مش اكتر .. لان معظم المنافسين او كلهم حقيقي بالسعر ده بيقدموا خامات زجاج محترمة .. انما كاستخدام بقى للبلاستيك ده مع الابعاد الكبيرة ديه .. لو استخدامك مش عنيف مش هيعمل ازمة .. لو عنيف .. فكر كويس قبل ما تشتريه !
بروز الكاميرات هنا كبير شوية .. في فريم معدن حوالين الكاميرات علشان يحميها .. وبعد ما تركب الجراب هتحس ان في ربع ملي بارز بردة من الكاميرات .. بس مش هيعملك ازمة كبيرة.
الشاشة :-
سامسونج كالعادة بحس ان هما بتوع شاشات قبل ما يبقوا بتوع موبايلات .. بيقدموا دايما افضل شاشة .. الشاشة هنا سوبر اموليد بحجم كبير 6.7 بوصة بالابعاد الطويلة 20:9 والدقة هنا FHD+.
الشاشة واخدة التريند الجديد بتاع سامسونج في الفئة المتوسطة الي شوفناه في الـ Galaxy A51 .. وبنشوفه هنا بردة في الـGalaxy A71 .. شاشة كاملة بثقب للسيلفي في النص .. هو اينعم الثقب هنا كبير نسبيا عن بتاع الـA51 .. وده بسبب جودة السيلفي الأفضل الي هنتكلم عنها كمان شوية .. الثقب الكبير ده ممكن يضايقك شوية لو ركزت معاه ومش عارف تنساه وانت بتتفرج على فيديوهات بس ممكن تلغي الثقب ده من سيتنج الشاشة لو حابب وتضيف شريطة سودا فوق.
الشاشة اول ما تطلع الموبايل هتحس انها مصفرة شوية علشان تحافظ على عينك .. ادخل اعدادات الشاشة وخليها مايلة للازرق وهتبقى مش مصفرة خالص.
بالنسبة للالوان بقى .. فمفيش خلاف ان الشاشة ممتازة في عرض الالوان وتشبعها ودرجاتها بدون اي مشاكل .. والسطوع تحت الشمس عالي وممتاز.
وبالنسبة للحماية على الشاشة فهي Corning Gorilla Glass 3 ولما تطلع الموبايل من العلبة بتاعتها هتلاقيه متركب عليها سكرينه.
الاداء :-
وحقيقي هنا سامسونج استجابت لمطالبنا واستخدمت معالج كوالكوم Snap Dragon 730G بتكنولوجيا 8 نانو .. ويعني وجود جي من عدمه مش فارقه في الاداء .. سناب دراجون 730 هو افضل معالج فئة متوسطة في 2019 .. اه في معالجات احسن في الفئة المتوسطة طلعت في 2020 بس لسه فعليا مشوفنهاش في الموبايلات لحد دلوقتي.
المعالج بيقدم اداء كويس جدا .. وده معروف عنه .. بس لما تستخدم واجهة سامسونج معاه الي بالمناسبة هنا بتيجي باندرويد 10 بردة .. هتحس بردة بتقل بسيط جدا بيجي كل فين وفين .. بس يعني الوضع بيتحسن شوية لما بتقفل انيميشن الواجهة .. وده بسبب الواجهة مش بسبب المعالج واتمنى من سامسونج تشتغل شوية على الواجهة بتاعتها .. بس الحق يتقال الاداء هنا احسن من A51 بمراحل .. وده بسبب فرق قوة المعالج الافضل في الـGalaxy A51 .
بالنسبة للاداء الرسومي .. الموبايل بيشغل ببجي على High HD واللعبة بتشتغل زي الفل بدون مشاكل .. كول اوف ديوتي بتشتغل على Very High واللعبة بردة شغالة كويس جدا، واخيرا فورت نايت بتشتغل بشكل رسمي على اعدادات جرافيك متوسطة واللعبة بردة شغالة على اعدادات جرافيك محترمة.
بس حابب افكرك لو انت اهتمامك اداء وبس .. ان في موبايلات تانية زي Nova 5T و Honor 20 بيقدموا معالج رائد كيرن 980 هيديلك اداء افضل خصوصا في الالعاب .. بس طبعا الموبايلات ديه مش بتيجي بتجربة الشاشة السوبر الاموليد الممتازة الموجودة في سامسونج.
عوامل الامان :-
البصمة مدمجة في الشاشة .. احسن من الجيل الي فات اة .. بس بردة مش اسرع حاجة .. وممكن مع السربعة والإستعجال لما بتطلع الموبايل من جيبك متعرفش تعتمد عليها، والـFace Unlock حتى لو سجلته مرتين .. مش اسرع حاجة .. وممكن بردة متعرفش تعتمد عليه .. حقيقي انا مش عارف سامسونج امتى هتحل مشكلة سرعة عوامل الامان بتاعتها دي.
الموبايل كالعادة مفيهوش لمبة اشعارات بس فيه خاصية الـAlways On Display المميزة الي بتعرضلك كل ايقونات الاشعارات الي جاتلك.
الموبايل بيدعم كل المستشعرات وكمان بيدعم الـ NFC.
بالنسبة لصوت الموبايل فهو عالي .. مش اعلى حاجة بس كويس جدا .
وبالنسبة لصوت سماعات المكالمات مفيش اعلى من كدا .. وصوت سماعات الاذن بردة عالي وممتاز.
وبالنسبة لقوة الشبكة .. استخدام سامسونج لمعالج سناب دراجون في الموبايل ده مخلي الشبكة كويسة جدا في استخدامي .. مواجهتش معاه مشاكل .. زي بالظبط شبكة الـ A70 بتاع السنة الي فاتت الي مواجهتش بردة معاه اي مشاكل.
البطارية :-
بطارية 4500 مللي أمبير .. مع الاستخدام الفعلي هتديلك تجربة بطارية 4000 مللي .. بتدي شاشة مفتوحة من 6 لـ7 ساعات في يوم كامل من الاستخدام .. مفيهاش مشاكل.
الموبايل بيجي معاه شاحن سريع 25 واط زي بتاع الـA70 بتاع السنة الي فاتت بالظبظ بيشحن البطارية بالكامل في ساعة وربع .. وديه سرعة شحن محترمة جدا من سامسونج بس متغيرتش كتير عن الـA70 القديم.
الكاميرات :-
الموبايل جاي بـ4 كاميرات في الظهر .. اساسية 64 ميجا بيكسل فتحة عدسة F/1.8 والتانية 12 ميجا بيكسل فتحة عدسة F/2.2 للتصوير الواسع .. والتالتة 5 ميجا بيكسل فتحة عدسة F/2.4 للتصوير الماكرو .. والرابعة والاخيرة 5 ميجا بيكسل للعزل.
والسيلفي محطوط في ثقب السيلفي بدقة 32 ميجا بيكسل فتحة عدسة F/2.2 .. والثقب هنا اكبر شوية من بتاع الـA51 .. لان الاداء بتاعها عموما كان افضل من الـA51.
معالجة الصور بتاعت سامسونج بقت جامدة جدا في الواجهة بتاعت اندرويد 10 .. الصور طالعة حلوة جدا والالوان مظبوطة بالشعرة في معظم الصور الي صورناها .. والـHDR جامد جدا .. يمكن بس ساعات العزل كان بيغلط حاجة خفيفة لو الصورة صعبة شوية.
العدسة الوايد انجل كويسة جدا .. الزاوية واسعة والتفاصيل كويسة، والعدسة الماكرو بردة كويسة لو هتستخدمها وتصور بيها عن قرب.
التصوير في الاضاءة الداخلية بقا فاجئني .. التفاصيل طالعة واضحة والالوان مظبوطة وديه حاجة مش متعود عليها من سامسونج، اما الصور بليل بالنايت مود .. الاضاءة مصفرة شوية والمعالجة مغيرتش في الاضاءة .. في مقابل انها تنقلك الواقع زي ما هو .. وحقيقي الموبايل نجح في ده ونقل تفاصيل كتير في ظروف اضاءة صعبة نسبيا.
بالنسبة لتصوير الفيديوهات .. موبايل سامسونج A71 بيقدر يصور 4K@30FPS بالكاميرا الخلفية والامامية .. بس للأسف المثبت الالكتروني مش شغال على جودة 4K في الكاميرات.
بالنسبة للسيلفي .. الاداء بتاعه احسن من المتوقع .. لاني افتكرت انه زي الـA51 .. بس الحقيقي يمكن علشان الثقب اكبر، الصور ممتازة الصبح والـHDR ومعالجة الصورة والوانها ممتازة والبورترية مظبوط جدا، وحتى في الاضاءة الداخلية المعتدلة الاداء يعتمد عليه والتفاصيل كتير.
بليل بقى مع استخدام النايت مود الي شغال بردو في السيلفي .. لو الاضاءة مقبولة الصور بتبقى كويسة .. بس مع الاضاءات الضعيفة اوي .. معالجة الصور ف النايت مود بتفتح الصورة زيادة عن الطبيعي والصورة بتبقا مش اد كدا.
ممكن تشوف الصور و الفيديوهات المتصورة بالموبايل في فيديو المراجعة في أخر المقالة.
سعر الموبايل :-
سعر الموبايل 7000 جنية للنسخة الوحيدة الموجودة 128 جيجا مع 8 جيجا رام وينفع تركب كارت ميموري وشريحتين اتصال مع بعض .. والسعر ده للحجز المسبق.
وهدية الحجز كارت ضمان على الشاشة 6 شهور و سمارت باند Galaxy Fit-A .. وقيمة الهدايا ديه ممكن تبقا في حدود 600 جنية.
الرأي النهائي :-
رأيي النهائي في الـ Samsung Galaxy A71 .. لو مش محتاج الهدايا .. اصبر شوية لما سعره يهدى ويبقا في حدود 6400 جنية زي ما حصل في الـA51 وسعره قل حوالي 650 جنية في وقت قليل جدا.
وبالسعر ده .. الـA71 هيبقى بيديلك شاشة كاملة جامدة جدا بثقب للسيلفي من نوع سوبر أموليد والي مش هتلاقيها غير في سامسونج .. واداء كويس مش وحش لاكنه مش الافضل وسط المنافسين .. كاميرا خلفية كويسة جدا في تصوير الصور وتنافس بقوة .. بطارية وشحن سريع كويسين.
اللي معجبنيش بقى في الـA71 هو السيلفي بليل مش قد كدا .. عوامل الامان بصمة وفيس ان لوك لا يعتمد عليهم بشكل كبير في سنة 2020 .. والخامات الخارجية البلاستيك لان كل المنافسين بيقدموا زجاج حتى لو كان الموبايل هيبقى اتقل من كدا شوية.
ولو انت معاك A70 وعاوز تعرف A71 افضل ف ايه .. الـA71 افضل ف معالج بيقدم اداء افضل بفرق مش كبير وكاميرا خلفية افضل وشكل الشاشة الاموليد الاحدث الي بثقب بدل النوتش مع بصمة اسرع بفرق بسيط.
كدا انا قولتلك كل حاجة انت محتاج تعرفها عن الـA71 .. ناقصك بس تشوف تجارب مستخدمين حقيقين بعد فترة من نزول الموبايل في المحلات.
Comments