من فترة بسيطة .. شركة هونر نزلت موبايل اسمه Honor 9X .. وبصراحة ده مكنش اصلا هونر 9X .. ده كان تحايل من شركة هونر علشان تقدر تنزل موبايل بخدمات جوجل .. بس بعد ما هونر فهمت انكم بقيتوا فاهمين في المواصفات وتقدروا تحددوا فعلا الموبايل يستاهل ولا لأ .. قررت انها تنزل Honor 9X Pro النسخة الحقيقية بقى اللي كنا مستنينها بس من غير خدمات جوجل !
موبايل Honor 9X Pro بيجي بالمعالج الجديد الكيرن 810 اخيرا .. الي هو غير من روح الموبايل وعمل نقله كبيرة في الاداء بس طبعا بدون خدمات جوجل واللي هنوضحلك ازاي تحملها بسهولة .. ومن الأخر كدا الموبايل ده فيه 4 مميزات ممكن يخلوك تشتريه .. وفيه 5 عيوب ممكن يخلوك تبعد عنه.
التصميم :-
ديه اول ميزة في الموبايل ده .. تصميم فخم من الزجاج والفريم من المعدن .. خامات محترمه جدا .. اول ما تمسك الموبايل في ايديك هتحس قد ايه التقفيل نظيف والخامات نظيفة .. وهتحس بروح كدا الـHonor 8X القديم بتهفهف حواليك .. حقيقي معنديش اي تعليقات على خامات الموبايل ده.
طبعا مش هتكلم عن حرف الـX الي هيعملك روشة في دماغك وكل شوية هتقعد تشوف انعكاس النور على ظهر الموبايل علشان تشوف حرف الـX وهو بيتحرك عليه.
الكاميرا الخلفية البروز بتاعها موجود بس قليل مش مزعج اوي .. وممكن تغطي البروز البسيط ده بالجراب الشفاف الي جاي مع الموبايل.
وبالنسبة للوزن والابعاد .. فالموبايل وزنه تقيل شوية 206 جرام والتخانة 8.8 ملم .. وحجمه كبير وشاشته كبيره .. فيعني هو صعب شوية تستخدمة بايد واحدة.
الشاشة :-
وهنا هونر مضافتش اي جديد عن الشاشة اللي شوفناها 100 مرة قبل كدا .. شاشة بحجم 6.59 بوصة من نوع IPS LCD بدقة FHD+ .. الشاشة كاملة .. مفيهاش نوتش او ثقب للسيلفي لان السيلفي هنا محطوط في موتور.
الشاشة ديه زي ما قولتلك شوفناها قبل كدا في الـHonor 9X القديم والـY9s والـY9 Prime 2019 .. محدش اشتكى منها ولا ظهر فيها عيوب صناعه.
بس هي كشاشة مش احسن الوان ولا احسن سطوع تحت الشمس في الفئة السعرية ديه .. فلازم تكون فاهم ومتقبل النقطة ديه لان في شاشات اموليد بتقدم تجربة افضل في الفئة دي زي الـMi 9 Lite.
مفيش اعلان رسمي عن وجود طبقة حماية على الشاشة او الضهر .. بس الموبايل بيجي في العلبة متركب على الشاشة سكرينه.
ويعني ممكن معتبرش الشاشة عيب .. مقابل بس انها بتقدملك تجربة الشاشة الكاملة والحواف القليلة الي حوالين الشاشة .. فيعني بتاخد حاجة قصاد حاجة.
الأداء :-
دي تاني ميزة في الموبايل .. لإن الموبايل هو اخيرًا اول موبايل في مصر بمعالج كيرن 810 .. المعالج ده بمعمارية 7 نانو وقادر حرفيا على منافسة كوالكوم سناب دراجون 730G و ميدياتيك Helio G90T .. هتعوز ايه اكتر من كدا ؟
ده غير كمان ان التبريد المائي هنا محترم جدا .. حرفيًا الموبايل ده صعب يسخن جامد منك لو هتقرص عليه في الإستخدام.
تجربة الاستخدام اليومية من برامج وتصفح وتنقل بين البرامج المفتوحة مفيهاش اي مشاكل .. مش هتحس بتقل واجهة هواوي او هونر خالص .. هتحس انك بتستخدم المعالج الرائد كيرن 980 اللي في هونر 20 بتاعهم في النقطة ديه.
بالنسبة للاداء الرسومي .. فـ للأسف المعالج الرسومي قوي .. بس لسه مش معمولة Optimization مع الالعاب .. بمعنى ان ببجي بتشتغل على High HD بس .. اللعبة شغالة زي الفل بدون اي مشاكل والمعالج يقدر يشغلها على اعدادات جرافيك اعلى بس الفكره في المعالج الرسومي.
ولعبة كول اوف ديوتي شغالة على Very High بدون اي مشاكل .. واخيرا فورت نايت لسه مش بتدعم المعالج ده بشكل رسمي .. مع اني متأكد ان المعالج ده يقدر يشغلها بكل سهولة وفي معالجات اضعف منه كتير شغلتها.
يعني من الأخر انت بتاخد معالج جامد جدا .. بس لسه شوية على ما شركات الالعاب تظبط امورها على المعالج ده.
عوامل الامان وعناصر اخرى :-
بصمة مدمجة بزر الباور .. سريعة عملية مفيهاش مشاكل .. وللأسف مفيش Face unlock علشان يحافظوا على عمر السلايدر .. الي محدش اشتكى منه في الهونر 9X والـY9s والـY9 Prime 2019 .. وهو هواه نفس السلايدر بالملي.
بالنسبة للسوفت وير .. الموبايل جاي باندرويد باي 9.0 وموقفه مجهول من ناحية التحديث لاندرويد 10 .. وده اول موبايل من هونر بـHMS او خدمات هواوي .. يعني بدون خدمات جوجل .. وهواوي وهونر شايفين انك ممكن تعيش عادي بدون خدمات جوجل بانك تستخدم المتجر بتاعهم اللي اسمه App Gallery وتلاقي اللي انت عاوزه فيه .. ممكن نبقى نتكلم عن النقطة ديه بعدين.
دلوقتي انا فاهم ان انت يهمك جوجل .. ممكن تحمل الابلكيشن من هنا .. ومن خلال الابلكيشن ده بكل سهولة بتقدر تنزل الـPlay Store ومنه تنزل كل حاجة من Google عادي وبتشتغل بدون اي مشاكل .. وده يعتبر تحايل على جوجل .. بس الحركة ديه شغالة زي الفل لحد دلوقتي .. الله اعلم بعدين .. ويمكن ده اول عيب في الموبايل من وجه نظري.
اقرأ على موبيزل .. مراجعة Huawei Y7p بدون خدمات جوجل .
الموبايل مفيهوش لمبة اشعارات ولا فيه اي حاجة تقولك انك جالك اشعار .. وده تاني عيب بالنسبالي .. وبالنسبة لصوت الموبايل جاي من سماعة واحدة تحت على اليمين صوتها متوسط .. مش عالي ومش مجسم بس مقبول.
صوت سماعة المكالمات عالي وممتاز وصوت سماعات الاذن مش اعلى حاجة بس مقبول .. واخيرا شبكة الموبايل ممتازة مفيهاش اي مشاكل.
البطارية :-
البطارية هنا حرفيًا ميزة وعيب .. يعني تالت ميزة معانا البطارية الـ4000 مللي أمبير الي هتقولي يا عم بطارية عادية .. هقولك المعالج فعلا موفر جدا ده غير سوفت وير هواوي وكمان موضوع الـAuto Select Resolution في الشاشة مخلي موضوع توفير البطارية افضل وافضل .. علشان اخلصها انا طحنتها استخدام تقيل وسطوع شاشة عالي واستحملت 6 ساعات ونص .. ونفس البطارية دي موبايلات تانيه مستحملتش 5 ساعات .. وبالتالي ادي البطارية نقطة الامتياز.
بس العيب بقا ان الشاحن المرفق مع الموبايل 10 واط مع منفذ شحن Type C .. الموبايل بيشحن في ساعتين .. وبصراحة مفيش موبايل بالسعر ده دلوقتي فيه شاحن بطيء 10 واط غير الـ هونر 9 اكس برو.
الكاميرات :-
الكاميرا الخلفية ثلاثية .. الاساسية 48 ميجا بيكسل فتحة عدسة F/1.8 والتانية 8 ميجا بيكسل للتصوير الواسع F/2.4 والاخيرة 2 ميجا بيكسل للعزل .. والسيلفي المعهود الموجود في الـSlider بدقة 16 ميجا بيكسل فتحة عدسة F/2.2.
بص احساسي الشخصي .. ان ديه نفس سينسورات هواوي وهونر الـ48 ميجا بيكسل عادي جدا بدون اي تطوير .. بس الي فرق معالجة الصور بسبب المعالج الأفضل والاجدد .. ودي الحاجه اللي كانت ناقصه كل الموبايلات اللي نزلت من هواوي وهونر بكاميرا 48 ميجا بيكسل الفتره اللي فاتت !
الصور الى حدٍ ما بتميل جدا الي الواقعية بدون اي محاولة من الموبايل في اللعب في اضاءة الصور او التفاصيل او الالوان .. في منكم الي بيحب الصور الواقعية وفي منكم الي مش بيحبها .. بس بشكل عام هنا هتحس بنقلة نوعية في الكاميرا الخلفية عن الـHonor 8X و الـ9X القديم .. وممكن فعلا تطلع من الموبايل ده صور كويسة.
واللي اتحسن الى حد كبير الـNight Mode .. اتحسن بشكل واضح .. النايت مود كان سيء جدًا في الهونر 9 اكس القديم .. الدنيا هنا احسن كتير.
وعلشان اختبر الكاميرا صح .. حطيت الموبايل جنب الـRealme XT .. واللي لاقيته ان الـ9X Pro بيميل الى الواقعية، بيحاول يعمل اللي عليه ويجبلك التفاصيل الي قدامك حتى لو هيغلط .. انما الـXT بيلعب في الصور بطريقة كبيرة جدا علشان يطلعلك صور كويسة وخلاص .. انت بقا بتفضل انهي صور .. انت الي تحدد.
بالنسبة لنقطة تصوير الفيديوهات فللأسف الموبايل بيصور اعلى جودة 1080P ومفيش جودة 4K.
وبالنسبة للسيلفي .. والي متغيرش نهائي عن الـ9X والـY9s .. نفس العدسة .. وفرق معالجة الصور مش ملحوظ.
الصور الصبح بتطلع ممتازة والبورترية مش قد كدا بس شغال .. بس الوان البشرة تحسها فيها مشكلة والتفاصيل مش قد كدا برده .. وطبعا لما الدنيا بتظلم هتحس انك بتعاني مع الكاميرا السيلفي ديه.
ولما حطيط الـ9X Pro مع الـXT في مقارنة الكاميرا السيلفي، الاكس تي فعلًا افضل في مختلف ظروف التصوير سواء الصبح او بالليل.
ممكن تشوف الصور والفيديوهات المتصورة بالموبايل في فيديو المراجعة في أخر المقالة.
سعر الموبايل :-
سعر الموبايل الرسمي 4499 جنية للنسخة الوحيدة الموجوده وهي بمساحة تخزين 256 جيجا مع 6 جيجا رام وينفع تركب كارت ميموري وشريحة او شريحتين من غير كارت .. وانت اصلًا مش هتحتاج كارت لان رابع واخر ميزة عندنا هي المساحة اللي اول مرة نشوفها في الفئة دي .. 256 جيجا بالسعر ده من هونر.
الموبايل هيتفتح عليه الحجز على موقع هونر الرسمي في مصر من بكرة 25 فبراير لحد يوم 5 مارس .. وبعد كدا الـOpen Sale هيبقا نص شهر مارس باذن الله .. وهيبقى في هدية في الحجز سماعة سبورت قيمتها 1400 جنية وضمان سنتين VIP على الموبايل ومساحة تخزين اون لاين 50 جيجا على HiCloud.
الرأي النهائي :-
الهونر 9 اكس برو نزل متأخر حوالي 7 شهور عن الصين عشان موضوع جوجل .. لو كان نزل وقتها كان هيبقى اكتساح فعلًا .. انما دلوقتي ليه منافسين .. ولكن لسه هينافس بقوة وهونر حبت تميزة بميزة قوية وهي الـ256 جيجا بالسعر ده واللي محدش عملها ولا مره لحد دلوقتي !
- الخامات المحترمه النضيفه جدًا
- المعالج القوي
- البطارية اللي بتقدم اداء ممتاز
- مساحة التخزين الـ256 جيجا بالسعر ده !
- جودة واداء الكاميرا السيلفي
- جودة تصوير الفيديوهات بالكاميرا الخلفيه
- مفيش لمبة اشعارات ومفيش حاجه تعوضها
- مفيش شحن سريع
- خدمات جوجل .. بس تقدر بسهولة تنزلها على الموبايل
Comments