مراجعة Huawei Y7p – أول موبايل من هواوي في مصر بدون خدمات جوجل !

هواوي في الفترة الأخيرة بقت تستغل المعالجات بتاعتها استغلال كويس .. بمعنى اننا بعد ما شوفنا معالج كيرن 710 في فئات سعرية عالية .. دلوقتي هواوي قررت تستغل نفس المعالج بس في الفئة الاقتصادية .. عشان تقدر تقدم قيمة مميزة مقابل السعر .. بدون رغي كتير .. دلوقتي هتعرف كل حاجة عن موبايل Huawei Y7p الجديد .. امتى تشتريه .. وامتى تبعد عنه .. وكمان هتعرف ايه حكاية خدمات جوجل على الموبايل ده.


التصميم :-

كعادة فئة الـY7 من هواوي .. الموبايل بالكامل من البلاستيك .. بس الحق يتقال .. الموبايل تصميمه شيك وجديد على هواوي .. يعني بصراحة كنا زهقنا من الظهر الي لونه ثابت .. الدنيا دلوقتي احسن كتير وفي تدرجات كبيرة وانعكاسات شيك بتظهر على ظهر الموبايل لما الضوء يجي عليه.

واحد يقولي البلاستيك عيب .. هقلك الفئة السعرية ديه نصها بلاستيك ونصها زجاج .. فمقدرش اقول ان البلاستيك ده عيب بس طبعًا كُنا نتمنى نشوف زجاج.

الوزن خفيف 175 جرام وتخانته مقبولة 8 ملم والموبايل مسكته في الايد كويسة جدا .. مفيش كيرفات في الضهر فالموبايل بيبقى ثابت ف ايديك ومش بيتزحلق، وفي بروز متوسط في ظهر الكاميرات .. تقدر تغطي البروز ده بالجراب المرفق في العلبة.


الشاشة :-

شاشة TFT LCD بحجم 6.39 بوصة .. واخده التريند الجديد بتاع ثقب الشاشة .. والثقب هنا حجمه متوسط مش صغير ولا كبير .. والثقب ده على الشمال.

طبعا كل ده معنديش فيه مشاكل .. المشكلة بس ان الشاشة HD+ .. مش FHD+ وبرده ارجع واقولك ان مش كل الشاشات FHD+ في الفئة السعرية ديه .. بس كنت اتمنى هواوي تكرمنا شوية وتزود دقة الشاشة.

الشاشة سطوعها كويس تحت الشمس مش هيواجهك فيها مشاكل والوانها مقبولة على انها TFT بس نوعها نظيف شوية ومش بيظهر فيها مشاكل بعد الاستخدام لفترة.

عموما الشاشة مقبولة مش وحشة .. وجايز نقطة ترند ثقب السيلفي تعجب ناس كتير فيكم، واخيرا بالنسبة لطبقة الحماية .. مفيش اعلان رسمي بس الموبايل هتلاقيه في العلبة عليه سكرينه.


الأداء :-

طبعا المعالج اللي كلكم عارفينه وزهقتوا من تكراره وهو Kirin 710F .. بس زي ما قولتلك .. معنديش مشاكل في استخدام المعالج ده بسعر اقل من 3000 جنية .. لان المعالج ده بالنسبالي مكافئ لاسناب دراجون 665 الي هو اقوى معالج في السعر ده .. ويمكن يكون الكيرن اقوى في بعض النقط.

اداء الموبايل مستقر مفيهوش مشاكل مفيش تهنجيات او تقطيعات .. التنقل بين البرامج وسرعة فتح البرامج مقبولة جدا في الفئة السعرية دي !

بالنسبة للبرامج بقا .. خدمات جوجل مش موجودة مسبقا على الموبايل .. يعني لما تطلعه من العلبه مش هتلاقي عليه خدمات جوجل .. بس متقلقش كل موظفين المحلات اتضرّبوا على انهم يسطبوا لك خدمات جوجل وانت واقف.

وكمان في تطبيق او برنامج APK بتحمله وتسطبه على الموبايل وبيسطبلك برامج جوجل كلها عادي خالص، وتقدر تحميل الابلكيشن من اللينك ده : اضغط هنا

الموبايل بيشغل ببجي على High HD واللعبة شغالة زي الفل .. وديه النقطة اللي عجبني فيها الكيرين 710 عن الـ سناب 665 الي بيشغلها على Medium Graphic بس، بالنسبة لـ كول اوف ديوتي فاللعبه بتشتغل على اعدادات جرافيك Low و Medium لان مفيش اوبتميشزن بين المعالج ده واللعبة، وطبعًا فورت نايت مبتشتغلش على المعالج ده بشكل رسمي.


عوامل الامان وعناصر اخرى :-

البصمة موجوده في الظهر وسريعة جدا كعادة موبايلات هواوي يمكن من اسرع البصمات بالسعر ده، والـFace Unlock سرعته كويسة بردة .. عوامل الامان عموما في هواوي كويسة جدا.

بالنسبة للسوفت وير الموبايل جاي باندرويد باي 9.0 الي مش هيتحدث لأندرويد 10 علشان مشاكل هواوي مع جوجل، الموبايل مفيهوش لمبة اشعارات .. وديه حاجة كنت متعود عليها في موبايلات هواوي.

الموبايلات للاسف ملاقيتش فيه جيروسكوب .. بس باقي المستشعرات شغالة كويس، الموبايل صوته جاي من سماعة واحدة وصوته كويس وعالي بس مش مجسم.

وصوت سماعات المكالمات عالي بس اعلى حاجة يعني .. وصوت سماعات الاذن مقبول، واخيرا شبكة الموبايل ممتازة .. الكيرين 710 ادائه ممتاز ومتجرب في الشبكات في مصر لفترة واداءه مفيهوش اي مشاكل.


البطارية :-

بطارية كويسة 4000 مللي امبير .. بتستحمل معاك من 5 لـ7 ساعات شاشة مفتوحة على حسب استخدامك، ومشكلتي في منفذ الشحن القديم الـMicroUSB 2.0 وسرعة الشحن الـ10 وات بس.

وشوفنا موبايلات زي Oppo A5 2020 اللي بيجي بمنفذ USB Type C الجديد وشوفنا Samsung A20s اللي بيدعم الشحن بقوة 15 وات في الفئة دي !

وعمومًا زمن الشحن مش وحش هو بياخد حوالي ساعتين علشان يوصل لـ100%.


الكاميرات :-

موبايل Huawei Y7p بيجي بـ كاميرا خلفية ثلاثية بدقة 48 ميجا بيكسل فتحة عدسة F/1.8 والعدسة التانية 8 ميجا بيكسل Ultra Wide للتصوير الواسع فتحة عدسة F/2.2 والاخيرة للعزل 2 ميجا بيكسل فتحة عدسة F/2.4.

والسيلفي الموجود في ثقب في الشاشة بيجي بدقة 8 ميجا بيكسل مع فتحة عدسة F/2.0.

مبدئيًا لازم تبقا عارف ان هواوي خدت نفس مستشعر الكاميرا الـ48 ميجا بيكسل الموجود في الـY9s الي سعره 4000 جنية وحطته في الموبايل ده .. ممكن اكون كنت معترض على جودة الكاميرات الخلفية في الـY9s عشان سعره والمنافسين بتوعه.

انما في الـY7p .. سعره يخليني اقدر اقول على الكاميرات انها مش وحشة خالص .. بتقدم اداء كويس جدا لو الاضاءة حلوة وتقدر تطلع صور كويسة جدا، بس في البورتريه والصور اللي فيها عزل بحسه بيغلط كتير.

وبالنسبة للـNight Mode اداءه كويس في الموبايل ده وبيقدر يطلعلك صور مقبولة جدا .. بس بردة مقدرش اقلك ان ديه احسن كاميرا بالسعر ده.

بالنسبة لتصوير الفيديوهات بالكاميرا الخلفية ممكن تصور لحد 1080p بجودة 60 أو 30 فريم في الثانية بدون مثبت الكتروني .

وبالنسبة للسيلفي فالأداء احسن من المتوقع بتاع الـ8 ميجا بيكسل بصراحة .. بس خلي بالك وامسح العدسة علطول لانها علطول هتلاقيها متوسخة .. الكاميرا بتطلع صور مقبولة لو الاضاءة كويسة بس طبعا الـDinamic Range مش قد كدا .. والوان البشرة في معظم الوقت مش مظبوطة، يعني من الاخر الصورة بتحتاج شوية ايدت بعد ما تصورها علشان تخليها صورة كويسة.

بس طبعا في الاضاءات الضعيفة الصور الي بتطلع من الكاميرا السيلفي بتبقى مش حلوة خالص .. ويعني السيلفي مش احسن حاجة في الموبايل ده.

ممكن تشوف الصور و الفيديوهات المتصورة بالموبايل في فيديو المراجعة في أخر المقالة .


سعر الموبايل :-

السعر الرسمي 2828 جنية للنسخة 64 جيجا مع 4 جيجا رام وينفع تركب كارت ميموري وشريحتين اتصال مع بعض.

كمان الموبايل معاه هدايا في الحجز المسبق بقيمة 600 جنية وهما باند هواوي Huawei Band 4e و كارت ميموري 64 جيجا هدية بحيث يكون اجمالي المساحة 128 جيجا بالسعر ده.


الرأي النهائي :-

لازم يبقا عندك استعداد انك وانت بتشتريه هتفتح الموبايل في المحل وتسطب خدمات جوجل علطول .. هي حاجه عاديه خالص متعتبرش مشكلة كبيرة .. الا لو انت ليك رأي تاني !

وتشتريه طبعا لو بتدور على خامات هواوي الداخلية النظيفة اداء كويس من الـKirin 710F في فئته السعريه الجديدة ديه وبطارية كويسة وكاميرا خلفية كويسة وطبعا شبكة قوية.

وفي النهاية معجبنيش في الموبايل ده .. منفذ الشحن القديم الـMicro USB 2.0 .. معجبنتيش الكاميرا السيلفي .. معجبنيش تصوير الفيديوهات بالكاميرا الخلفية .. ومعجبتنيش دقة الشاشة المنخفضة.


فيديو المراجعة :-

قد يعجبك أيضا...

Comments

جاري التحميل...