مراجعة موبايل Honor 9X – سيطرة بجد ولا ميقدرش ينافس ؟!

موبايل Honor 9X النسخة الي وصلت مصر بمعالج كيرن 710 القديم … هل ده معناه أن الموبايل وحش يعني ومش هيقدر ينافس ؟ اومال فين السيطرة ؟

خلينا نشوف في المراجعة مع بعض و نعرف ايه موقف الاونر 9 اكس بالنسبة للمنافسين و هل هو الخليفة المنتظرة لـ Honor 8X اللي كسر الدنيا وقت ما نزل ؟

مواصفات موبايل Honor 9X :-

• أبعاد الهاتف 163.1×77.2×8.8 ملم.
• وزن الهاتف 185 جرام مع خامات من البلاستيك.
• تأتي شاشة الهاتف IPS LCD بقياس 6.59 بوصة و دقة FHD+ بجودة 1080*2340 بيكسل مع كثافة بيكسلات 391 بيكسل لكل بوصة.
• معالج الهاتف هو Hisilicon​ Kirin 710F مع معالج رسوميات Mali G71 MP4.
• يأتي الهاتف بنظام تشغيل اندرويد Pie 9.0 مع واجهة مستخدم EMUI 9.1.
• الهاتف متوفر باصدار ذاكرة داخلية 128 جيجا بايت مع 6 جيجا بايت رام ذاكرة عشوائية.
• كاميرا الهاتف الخلفية تأتي ثلاثية بجودة 48 ميجا بيكسل مع فتحة عدسة f/1.8 و الثانية بجودة 8 ميجا بيكسل ultra wide مع فتحة عدسة f/2.2 فلاش LED و الثالثة 2 ميجا بيكسل للعزل بجودة 4K و بجودة 1080 بيكسل مع 30 لقطة في الثانية.
• كاميرا السيلفي موجودة في موتور تأتي بجودة 16 مع فتحة عدسة F/2.2 و تصوير فيديو بجودة 1080 بيكسل مع 30 لقطة في الثانية.
• بطارية الهاتف تأتي بسعة 4000 مللي أمبير مع USB Type C.
• يدعم الهاتف تشغيل الراديو FM.
• متوفر بالهاتف دعم شبكات الجيل الثاني والثالث والرابع عن طريق شريحتين اتصال من نوع nano.
• الهاتف متاح في الأسواق بألوان الأزرق و الأسود.

مميزات هونر 9X :-

• تصميم متين جدا يتحمل الصدمات لانه من البلاستيك القوي.
• معالج الهاتف يقدم أداء مقبول في المهام اليومية المعتادة من البرامج والمكالمات.
• بطارية الهاتف تقدم أداء قوي و محترم.
• يقدم الهاتف تجربة الشاشة الكاملة بدون حواف و بدون نوتش.
• شبكة الهاتف ممتازة.

عيوب Honor 9X :-

• يجب الاستغناء عن الشريحة الثانية لاستخدام كارت الذاكرة الخارجي.
• الهاتف لا يدعم تقنية الشحن السريع.
• غياب لمبة الاشعارات بالرغم من انها كانت موجودة فى هاتف Honor 8X.
• خامات التصنيع تعتبر أقل جودة من هاتف 8X ولكنها متينة اكثر منه بسبب انها من البلاستيك.
• لا يدعم الهاتف خاصية قفل الوجه Face unlock للحفاظ على عمر موتور الكاميرا السيلفي.
• المعالج الرسومي مقبول ولكن يوجد منافسين اقوى منه في الاداء الرسومي في الالعاب.
• كنا نأمل نزول النسخة الاخرى من الهاتف بمعالج كيرن 810 ولكن بسبب مشاكل هواوي وهونر الهاتف نزل مصر بالمعالج الاقدم كيرن 710.

التصميم :-

خامات الـ Honor 9X من البلاستيك أو البولي كاربونيت بالرغم من إن كنت حابب ف الاونر 8 اكس القديم خاماته الزجاج الي كانت محترمة أوي.

بس عموما البلاستيك زي ما هو ملمسه رخيص فهو بيستحمل جدا في الوقعات الموبايل ده حرفيا هيستحمل معاك وقعات كتير جدا بدون ما يحصله أي حاجة عن تجربة.

والظهر عليه نقشة حرف الـ X كدا بتظهر وتختفي مع الاضاءة كان من المتوقع النقشة تبقي ظاهرة عن كدا شوية هي هادية للي مش حابب شكل الموبايل يبقي مفرقع معاه جامد في التصميم.

الموبايل وزنه 185 جرام و السُمك أقل من 9 ملم والموبايل شاشته كبيرة فطبعا الاستخدام بايد واحدة ممكن يبقي صعب عليك شوية لو ايديك صغيرة.

تحتوي الواجهة الأمامية للهاتف علي شاشة بدقة 6.5 بوصة أعلاها سماعة المكالمات و مستشعر القرب و تقريبا هي شاشة كاملة من غير حواف.

علي الجانب الأيمن للهاتف نجد زر التشغيل لفتح وغلق الهاتف و أزرار التحكم في الصوت.

علي الجانب الأيسر للهاتف نجد منفذ دخول شريحتين الاتصال و كارت ذاكرة خارجي.

أسفل الهاتف نجد ميكروفون المكالمات و السماعة الخارجية و منفذ كابل الشحن.

ظهر الهاتف يحتوي على الكاميرات الثلاث فى أعلى يسار الهاتف بجودة 48 ميجا بيكسل مع 8 و 2 ميجا بيكسل و أسفلهم الفلاش LED و فى منتصف ظهر الهاتف مستشعر بصمة الاصبع و بالأسفل شعار الشركة HONOR.

أعلي الهاتف نجد موتور السيلفي بجودة 16 ميجا بيكسل مع فتحة عدسة 2.2.

وبالكلام عن الموتور بقا فهو متين مفيهوش أي مشاكل يمكن ساعات ممكن تحس أنه بيحدف كدا شوية لما بيطلع لفوق زي الـ Y9 Prime بالظبط بس متقلقش هو حركته الطبيعيه كدا مفيهاش مشاكل وطبعا الـ Slider ده كالعادة هيقفل لو حس بأن الموبايل هيقع.

الشاشة والصوت :-

شاشة هاتف Honor 9X تأتي من نوع IPS LCD بقياس 6.5 بوصة تعرض 16 مليون لون بدقة FHD+ بجودة 1080*2340 بيكسل مع كثافة بيكسلات 391 بيكسل لكل بوصة بأبعاد 19.5:9.

والمميز في الشاشة هنا أنها بدون نوتش والحواف قليلة حاجة مميزة في الفئة السعرية دي أنك تجرب الشاشة الكاملة ديه ويمكن ده كان السبب الرئيسي في حب بعض المستخدمين لموبايل Y9 Prime من هواوي واللي احب أقولك إن دي نفس شاشته تقريبا.

الشاشة ألوانها مقبولة جدا مش مشبعة أوي بالألوان ممكن تحس أنها فاتحة شوية وسطوعها تحت الشمس مقبول ومفيهوش مشاكل.

واخيرا مفيش اعلان رسمي عن طبقة الحماية بس الموبايل جاي عليه اسكرينة للحماية.

صوت الموبايل متوسط مش عالي ومش منخفض وصوت سماعة المكالمات عالي وممتاز وصوت سماعات الأذن متوسط وكمان بيدعم ميكروفون اضافي لإزالة الضوضاء مما يُحسن من جودة الصوت في التسجيل و الفيديو.

الأداء :-

قلنا قبل كدا معالج Kirin 710 لو نزل في موبايل تاني متشترهوش الكلام دة كان وقت الاعلان عن Kirin 810 واللي كنت مستنيه في الموبايل ده بس المشاكل اللي حصلت لهواوي مع امريكا وجوجل وبالتبعية هونر خليتهم متعطلين قدام حل من اتنين ياما مينزلوش الموبايل ده خالص ويخسروا جيل كامل ياما يستخدموا معالج قديم علشان يقدروا يستخدموا كامل خدمات جوجل.

مين بقي Kirin 710F ؟هو معالج مش وحش مقبول جدا في المهام اليومية زي المكالمات وبرامج السوشيال ميديا ومعاك 6 جيجا رام هيبقوا كافيين جدا لفتح برامج كتير في الخلفية من غير ما السوفت وير يضطر يقفل منهم برامج.

في الألعاب أدائه معقول بيشغل PUBG على High HD و Call of duty على اعدادات جرافيك medium و fortnite مش بيشغلها اصلا والمميز هنا أن سخونية الموبايل قليلة جدا بالنسبة للمنافسين.

يعني من الاخر هو مش هيديلك أفضل أداء رسومي في الفئة السعرية ديه وفي منافسين أحسن منه بكتير في النقطة ديه لو انت من الاشخاص الي بتدور على أداء رسومي مميز.

يتوافر الهاتف بإصدار بذاكرة داخلية 128 جيجا بايت مع 6 جيجا بايت رام.

يمكنك​ زيادة المساحة الداخلية للهاتف عن طريق إضافة كارت ذاكرة خارجي يصل إلى 512 جيجا بايت لكن مع الاستغناء عن عن شريحة الاتصال الثانية.

عوامل حماية الأمان و الخصوصية :-

الموبايل فيه مستشعر بصمة خلفي سريع زي كل موبايلات Honor وللاسف مفيش Face Unlock للحفاظ على عمر الموتور.

البطارية :-

بطارية 4000 مللي امبير مفيش فيها جديد جربناها قبل كدا وعارفين أدائها وجربناها تاني بتصمد متوسط 7 ساعات شاشة مفتوحة على استخدام شديد وهتكمل يوم من الاستخدام.

و بتستهلك حوالي ساعتين وربع لإعادة الشحن لأن الشاحن الي جاي معاه للأسف 10 واط مع Type C.

يعني بطارية قوية بس الشاحن مش سريع.

الكاميرات :-

الكاميرا الخلفية فى 9X ثلاثية الأساسية 48 ميجا بيكسل مع فتحة عدسة 1.8 والتانية بجودة 8 ميجا بيكسل للتصوير الواسع wide angel و الأخيرة بجودة 2 ميجا بيكسل للعزل مع تصوير فيديو بجودة 1080 بيكسل مع 30 اطار فى الثانية و دعم التصوير بانوراما و HDR.

السيلفي الموجود هنا في موتور بجودة 16 ميجا بيكسل مع فتحة عدسة 2.2 مع تصوير فيديو بجودة 1080 بيكسل مع 30 اطار فى الثانية.

اداء الكاميرات متواضع وقد يكون الاقل وسط المنافسين واداء البورترية في السيلفي سيء جدا ونرى ان الهاتف لا يرقى للمنافسة بكاميراته مع الهواتف المنافسة مثل شاومي نوت 8 برو و ريلمي 5 برو و Samsung A30s.

يمكنك مشاهدة صور متصورة بالموبايل في فيديو المراجعة في أخر المقالة.

الدعم و الاتصال :-

يدعم الهاتف شبكات اتصال الجيل الثاني والثالث والرابع عن طريق شريحتين اتصال من نوع نانو و شبكة الموبايل ممتازة و قوية ومستقرة ومفيش فيها أي مشاكل.

يدعم الهاتفWi-Fi 802.11 a/b/g/n/ ac dual band مع دعم خاصية Wi-Fi direct و امكانية انشاء Hotspot.

يدعم الهاتف بلوتوث الاصدار الخامس A2DP,LE.

يدعم الهاتف GPS مع خواص ,A-GPS GLONASS BDS ,GALILEO.

متوفر بالهاتف دعم مستشعرات الضوء و السرعة و البوصلة و القرب.

يدعم الهاتف تشغيل الراديو FM.

يدعم الهاتف مستشعر الجيروسكوب حيث استخدام نظارات الواقع الافتراضي VR و مشاهدة فيديوهات 360 درجة.

يدعم الهاتف خاصية ال OTG و التى تمكنك من توصيل أى USB device و نقل البيانات من و الى الهاتف.

نظام التشغيل و واجهة المستخدم :-

هاتف Honor 9X يتم اصداره بنظام اندرويد 9.0 Pie و واجهة مستخدم EMUI 9.1.

توفر الواجهة خواص مثل خاصية app lock و التى تمكنك من وضع بصمة أو كلمة سر لأي تطبيق للحفاظ على الخصوصية.

و تتمتع الواجهة بامكانية قسم الشاشة الى نصفين Split screen و فتح تطبيقين فى نفس الوقت مع امكانية اضافة درج التطبيقات و ايضا وضع eye comfort و الذي يحسن من اضاءة الهاتف لتكن مناسبة للعين فى حالة الاضاءة المنخفضة المحيطة لراحة العين.

يمكنك الغاء أزرار التحكم و استبدالها بالايماءات Gestures فقط بلمسة واحدة يقوم بالرجوع للخلف و ضغطة مطولة للصفحة الرئيسية و سحب من اليمين لليسار ليقوم بفتح التطبيقات بالخلفية.

أيقونات الاشعارات بتظهر فوق بس للأسف مفيش لمبة اشعارات.

سعر الهاتف :-

السعر الرسمي 4333 جنية للنسخة الوحيدة 128 جيجا مع 6 جيجا رام.

يأتي الهاتف في العلبة مع جراب شفاف وسماعات اذن وشاحن 10 واط و وصلة Type C والهاتف ملصوق عليه لاصقة حماية.

تقييم الهاتف :-

هو موبايل مضافش جديد عن الـ Y9 Prime 2019 … الـ Honor 9X بيجي برام أعلى منه 6 جيجا رام وبظهر عليه نقشة أفضل وكاميرا خلفية أساسية أحسن بفرق بسيط غير كدا الباقي واحد.

بالنسبة بقا لسعر الـ 9X فكان الأحسن لو الموبايل ده ينزل تحت ال 4000 جنية بس دلوقتي بسعره طبعا في بدائل من شركات تانية بنفس السعر هتديلك أداء أحسن مع كاميرات أحسن خصوصا بليل و شحن أسرع.

وللاسف أنا شايف إن الموبايل ده مش الخليفة المنتظر للـ 8X اللي كسر الدنيا وقت ما نزل.

ويبقا الهونر 9 اكس موبايل مناسب لو حد خايف من أنه ياخد الريسك و المجازفة في أنه يشتري موبايل من شركات تانية فيها عيوب صناعة أو سوفت وير أو أي حاجة تقلق في الموبايل لان زي ما قلنا هو يعتبر متجرب قبل كدا في الواي 9 برايم والي قبله واعتقد هما وصلوا لأحسن حاجة من ناحية الهارد وير والجودة في تقفيله في الموبايل ده و اللي أنا شايف أن 9 اكس مميز في خاماته برغم أنها بلاستيك إلا أنها بتستحمل ومش بتتخربش بسهولة وكمان شبكته محترمة والشاشة بتاعته كاملة مع موتور للسيلفي و اخيرا بطاريته الـ 4000 مللي مع سوفت وير هواوي الموفر أدائهم كويس أوي.

فيديو مراجعة الموبايل على اليوتيوب :-