مراجعة HONOR X8 الجديد – أحدث هواتف الفئة المتوسطة من هونر !

سوق الموبايلات المصري بيمر بأزمة ركود، ومفيش منتجات جديدة بتنزل بقالنا فتره كبيرة .. وده سبب اننا بقالنا كتير مش بننزل مراجعات موبايلات، لكن أخيرًا نزل موبايل جديد وهو HONOR X8 المُنتظر واللي بيقدم تجربة جديدة بتصميم شيك وتقنية جديدة إسمها RAM Turbo .. ودي المراجعة الكاملة للموبايل!

التصميم :-

أجمل ما في الموبايل ده تصميمه .. تصميم شيك بوزن خفيف 177 جرام وتخانه 7.5 مللي .. فريم مستطيل او FLAT مُسطح مش منحني .. الـTrend اللي عجب ناس كتير وشوفناه في Reno 6 5G وعجبكم.

شكل الكاميرات حلو والعدسات شكلها شيك وكبيرة .. والبروز معقول وفي جراب شفاف في علبة الموبايل بيحافظ على الكاميرات .. عمومًا شكل الموبايل فعلًا لما تشوفه على الطبيعة هيعجبك جدًا.

الشاشة :-

شاشة IPS LCD بحجم 6.7 بوصة بدقة FHD+ مع تردد بيوصل لـ90 هيرتز .. لكن الشاشة تصميمها لطيف جدًا، يمكن ده اللي مخلي هونر تتنازل في نوع الشاشة.

ثقب الكاميرا السيلفي صغير جدًا وحواف الشاشة قليلة جدًا جدًا .. خاصًة الحافة العلوية تعتبر مش موجودة، فا دي تعتبر ميزة كبيرة في الموبايل .. وزي ما وضحتلك ده بيجي على حساب جودة الشاشة.

الشاشة نوعها IPS LCD مش AMOLED .. وبالتالي هتاخد تباين ألوان ضعيف ودرجة سطوع أقل من الموبايلات المُنافسة اللي فيها شاشة AMOLED زي Note 11S.

لو هقيم الشاشة كـIPS LCD فا هي كويسة ألوانها معقولة وسطوعها معقول .. بس طبعًا كنت احب اشوفها شاشة AMOLED كانت هتبقى نقطة قوة كبيرة في صالح الموبايل.

الأداء :-

معالج كوالكوم سناب دراجون 680 ثماني النواة بتكنولوجيا 6 نانو ميتر .. مع معدل التحديث الـ90 هيرتز والـ6 جيجا رام وعليهم 2 جيجا رام Extra بتقنية الـRAM Turbo.

المعالج أداءه اليومي حلو .. نشيط، موفر في الإستهلاك .. مشكلتي معاه انه في الألعاب مش أحسن حاجه، بيشغل ببجي على Medium Graphic .. التجربة بتكون كويسة من غير تقطيع لكن مش هتاخد أفضل جودة.

احنا جربنا أكثر من موبايل بمعالج SD680 .. أسرعهم حتى الأن هو HONOR X8 .. تفوق على Realme 9i وعلى Redmi Note 11 وده بفضل واجهة هونر المُستقرة الخفيفة جدًا.

ايه هي تقنية RAM Turbo ؟

هونر عدلت في السوفت وير بتاعها بحيث تخلي الرامات بتاعت الموبايل تستوعب عدد تطبيقات أكبر من غير ما التطبيقات دي تقفل .. وده عن طريق انها بتعمل ضغط لحجم الرام اللي التطبيق المفتوح في الخلفية بيستخدمه، ولما ترجع تفتح التطبيق ده بيرجع ياخد حجم الرام كامل وبسرعه ومن غير ما يعيد التحميل.

وبصراحة الموضوع فارق جدًا .. قارنت الموبايل بـRealme 9i اللي بيتقدم بنفس المعالج ولاقيت تفوق رهيب لصالح X8 في الإحتفاظ بالبرامج في الخلفية.

وعمومًا بالنسبة للمعالج في الفئة السعرية دي حاليًا مش هتلاقي غير SD680 لو انت عايز سخونه قليلة وتوفير في البطارية وأداء يومي .. وهتلاقي ميدياتك فئة G لو عايز أداء في الألعاب.

عوامل الأمان وعناصر اخرى :-

بصمة الإصبع موجودة على زِر الباور .. سريعة جدًا وعملية ومفيهاش أي تهنيجات .. بالنسبة للـFace Unlock فا هو سرعته معقولة جدًا.

الموبايل للأسف مفيهوش NFC .. وكمان مفيهوش صوت Stereo، الموبايل صوته متواضع جدًا .. وللأسف مفيش مستشعر تقارب حقيقي لإن الحافة العلوية للشاشة صغيرة جدًا.

السوفت وير هنا مبني على Android 11 في حين ان كل الموبايلات الجديدة بتنزل بـAndroid 12 .. وبالمناسبة خدمات جوجل شغالة بشكل رسمي مستقر بدون أي مشاكل عالموبايل.

بالنسبة للشبكة سواء مكالمات او Wi Fi فا هي ممتازة لأقصى درجة، لو خايف من شاومي وريلمي علشان الشبكة فا هونر بتقدملك شبكة مفيهاش ولا غلطة حرفيًا.

البطارية :-

بطارية صغيرة 4000 مللي امبير .. لكن أداءها الفعلي ممتاز، هتقدملك أداء قريب من بطارية 4500 مللي امبير في موبايل تاني .. سوفت وير عاقل ومعالج موفر، بطارية أداءها متوسط ومتعتبرش عيب نهائيًا.

الشاحن المرفق بقدرة 22.5 وات، مش أسرع شاحن في الفئة دي لإننا بنشوف شواحن 33 وات عادي في الفئة دي .. ولكن شحن البطارية في ساعة ودقائق بسيطة عشان البطارية أساسًا حجمها مش كبير.

الكاميرات :-

كاميرا خلفية أساسية 64 ميجا بيكسل بفتحة عدسة F/1.8 وعدسة Ultra Wide بدقة 5 ميجا بيكسل بفتحة عدسة F/2.2 وعدسة Macro بدقة 2 ميجا بيكسل وعدسة للعزل 2 ميجا بيكسل .. وكاميرا سيلفي 16 ميجا بيكسل بفتحة عدسة F/2.5.

الكاميرا الخلفية الأساسية بتطلع صور عادية .. متوسطة الجودة، مش مليانة تفاصيل ولا الألوان مُشبعة، صور متوسطة .. وتحديد الأطراف في البورتريه معقول مش وحش ومش بيغلط.

لما الإضاءه تكون عالية بتلاقي الصور ألوانها بتبقى مش مظبوظة .. والتصوير في إضاءه خفيفه الجودة بتقل شويتين .. ولما بتشغل Night Mode بتبقى الصورة مقبولة بس الـExposure بيرفع جدًا.

لما قارنت الموبايل مع Realme 9i في الكاميرا الخلفية لاقيت تفوق واضح لصور الـ9i في معظم السيناريوهات بفرق بسيط .. ماعدا سيناريو الشمس الشديدة لصالح X8 بفرق واضح.

بالنسبة للسيلفي فا هو بيقدم أداء كويس .. عجبني جدًا على عكس المتوقع .. معالجة الألوان حلوة جدًا، والتفاصيل كتير وواضحة، وبتاخد Look ممتاز للصور .. ودي غريبة ان السيلفي يكون أفضل من الكاميرا الخلفية.

الموبايل بيدعم تصوير فيديوهات على 1080p مع 30 فريم في الثانية .. مش بيدعم الـ4K بسبب المعالج المُستخدم .. ومفيش للأسف ثبات إلكتروني في الموبايل .. الموبايل فيه ميكروفون اضافي لعزل الضوضاء.

سعر HONOR X8 :-

• نسخة 128 جيجا مع 6 جيجا رام بسعر 6000 جنية

وبينفع تركب شريحتين إتصال من الجيل الرابع لكن مينفعش تركب كارت ميموري.

الرأي النهائي :-

مميزات HONOR X8 :-

• تصميم شيك جدًا
• شاشة كبيرة بحواف صغيرة ممتازة
• سوفت وير سريع ومستقر جدًا
• شبكات قوية مفيهاش مشاكل
• كاميرا سيلفي ممتازة

عيوب HONOR X8 :-

• كاميرا خلفية أداءها ضعيف
• صوت الموبايل ضعيف ومش Stereo
• الموبايل مفيهوش NFC
• نظام تشغيل Android 11
• مفيش مستشعر تقارب حقيقي
• لا يدعم تركيب كارت ميموري
• شاشة IPS LCD عادية مش AMOLED

والموبايل كان المفروض ينزل بسعر أرخص من كده، بس مع تأخر نزول الموبايل نزل بالأسعار الجديدة .. وده نفس متوسط سعر ريدمي نوت 11 وريلمي 9i وباقي المنافسين .. والـX8 بيتفوق عليهم في الخامات والإستقرار والشبكات القوية.