مقارنة Honor X8 مع Redmi Note 11S – الإعتمادية ولا المواصفات ؟!

النهارده هنقارن بين أهم موبايلين في فئة الـ6 الاف جنية في مصر .. مقارنة Honor X8 مع Redmi Note 11S .. الـX8 اللي بيتميز بالتصميم الشيك والخامات وجودة التقفيل والإستقرار، لكن مش بيقدم أقوى مواصفات .. مع Note 11S اللي بيقدم أفضل مواصفات مُمكنة مقابل السعر ده.


التصميم :-

تصميم X8 شكله مميز ومختلف .. وعاجب ناس كتير، تصميم شبه موبايلات ابل بشكل العدسات بتاعت الكاميرا الخلفية .. اما Note 11S فا تصميمه مش جديد، حلو بس مش حاجه جديدة.

بالنسبة لرأيي في التصميم فا Honor X8 عجبني أكثر .. لكن النقطة دي أذواق بترجع لذوق كل واحد.

كحجم موبايل عند الإستخدام فا X8 أكبر حاجه بسيطة من ناحية الأبعاد .. اما كوزن فا الاتنين نفس الوزن تقريبًا .. وكـ تخانه فا الـX8 أرفع حاجه بسيطة.

بالنسبة للخامات فا الموبايلات بلاستيك كالمعتاد .. لكن كخامات وتقفيل وإعتمادية فا Honor X8 ممكن يتفوق بفارق بسيط عن Redmi Note 11S.


الشاشات :-

هونر X8 شاشته 6.7 بوصة نوعها IPS LCD بدقة FHD+ بتردد 90 هيرتز .. اما ريدمي نوت 11 اس شاشته AMOLED بحجم 6.43 بوصة بدقة FHD+ وبتردد 90 هيرتز.

كجودة ألوان فا Note 11S يكسب، الفرق واضح بينهم لما بتشغل أي محتوى بجودة عالية على الشاشتين .. ألوان مُشبعة أكثر وسطوع أعلى في Note 11S عن هونر X8 وده بيرجع لنوع الشاشة.

اما كشكل وتصميم فا Honor X8 في حته تانيه خالص .. حواف الشاشة أقل بفرق واضح خاصًة الحافة العُلوية .. الموبايل شكله Premium وشكله أغلى.

الشاشات بتاعت الموبايلين بتيجي في العلبة متركب عليها سكرينه.


الأداء :-

نوت 11 اس بمعالج ميدياتك Helio G96 بتكنولوجيا 12 نانو .. اما هونر X8 بمعالج سناب دراجون 680 بتكنولوجيا 6 نانو .. ولازم نبقى عارفين ان الـ سوفت وير بيفرق في الأداء الفعلي للموبايل.

وعلشان كده لاقيت هونر X8 أنشط في فتح بعض البرامج، والـAnimations بتاعت واجهة هونر أخف وأسرع من واجهة شاومي .. وبالتالي الإستخدام اليومي هيكون لصالح هونر X8.

الموبايلين بـ6 جيجا رام .. لكن الفرق ضخم في التنقل بين البرامج المفتوحة في الخلفية، هونر X8 يكتسح بفضل الـRAM Turbo اللي بتخليه يحافظ على البرامج المفتوحة من غير ما يأثر على البطارية.

بالنسبة لجزئية توفير الطاقة والسخونية فا Honor X8 يتفوق لإن المعالج بتكنولوجيا موفرة أكثر وإستهلاكها أقل بفرق كبير عن نوت 11 اس.

بالنسبة للألعاب فا الموضوع محسوم لصالح ريدمي نوت 11 اس .. إعدادات Graphic أعلى وكمان Frame Rate أعلى .. ببجي بتشتغل على High HD في نوت 11 اس وعلى Medium في هونر X8.

بإختصار لو انت محتار بين الموبايلين دول وإستخدامك في الألعاب تقيل فا خليك في ريدمي نوت 11 اس .. اما لو استخدامك عادي والألعاب اللي بتلعبها خفيفه يبقى هونر X8 مناسب ليك.


عوامل الأمان وعناصر اخرى :-

البصمة موجودة على زِر الباور في الموبايلين .. هونر X8 تحسه أسرع بفرق بسيط أوي علشان مش بيعمل تجميع للأيقونات زي نوت 11 اس .. والـFace Unlock سريع وكويس في الموبايلين.

الموبايلين جايين بـAndroid 11 ومفيش واحد فيهم بيقدم Android 12 للأسف .. والموبايلين للأسف مش بيدعموا مستشعر الـNFC .. نوت 11 اس فيه IR Blaster اما هونر X8 لأ.

ريدمي نوت 11 اس كمان بيتفوق في دعم الـAlways On Display بفضل الشاشة الـAMOLED .. اما هونر X8 فا هو مفيهوش حاجه تعرفك إنك جالك إشعار لما الشاشة تكون مقفولة.

صوت ريدمي نوت 11 اس Stereo وعالي وممتاز جدًا .. اما هونر X8 صوته Mono وأقل بفرق واضح من نوت 11 اس.

مستشعر التقارب مش موجود في الموبايلين .. وأداءه سوفت وير مش لطيف في الموبايلين، مفيش واحد أحسن من التاني.

بالنسبة لشبكات الـWi Fi والمكالمات فا هونر X8 شبكاته قوية جدًا جدًا .. اما ريدمي نوت 11 اس فا شبكاته قوية برده لكن أقل بفرق بسيط عن هونر X8.


البطارية :-

بطارية هونر X8 سعتها 4000 مللي امبير .. اما ريدمي نوت 11 اس فا البطارية 5000 مللي امبير .. وبسبب ان هونر X8 يتفوق في سوفت وير مُنظم أكثر في إستهلاك البطارية ومعالج موفر أكثر في الإستهلاك ومعدل تحديث مُتغير مش ثابت .. ده يخلي أداء البطاريتين متقارب جدًا، نقدر نقول ان الاتنين نفس الإستهلاك.

ريدمي نوت 11 اس معاه شاحن 33 وات اما هونر X8 معاه شاحن 22.5 وات .. لكن زمن الشحن الفعلي مُتقارب .. الشحن بيتم بالكامل في حوالي ساعة .. وده علشان بطارية هونر X8 أصغر.


الكاميرات :-

بالنسبة للعدسات الأساسية فا ريدمي نوت 11 اس بعدسة 108 ميجا بيكسل بفتحة عدسة F/1.9 بمستشعر سامسونج HM2 .. هونر X8 بعدسة 64 ميجا بيكسل بفتحة عدسة F/1.8 .. وبالنسبة للسيلفي فا هو بدقة 16 ميجا بيكسل في الموبايلين لكن بإختلاف في المستشعر المُستخدم وفتحة العدسة.

شاومي ريدمي نوت 11 اس تفاصيله أحسن في الإضاءات العالية .. والمعالجة بتاعته طبيعية أكثر، اما هونر X8 فا هو بيفتح الصور كلها ولون البشرة والألوان بشكل مش طبيعي .. نوت 11 اس بيقدم ألوان أحلى وتفاصيل الصور عمومًا احسن بفرق واضح .. والفرق بيزيد لصالح نوت 11 اس في الإضاءه الداخلية.

اما لما تشغل الـNight Mode هتلاقي الفرق بيقل بين الموبايلين .. الاتنين متوسطين وأداءهم متقارب من ناحية كم التفاصيل الظاهرة والمعالجة.

بالنسبة للكاميرا السيلفي فا هونر X8 متفوق بفرق واضح في معالجة ألوان الصور والتفاصيل في الإضاءات العالية .. عجبني سيلفي X8 في الشمس جدًا .. ولما الإضاءه بتقل الفرق بيبقى مش كبير بين الموبايلين بس مازال سيلفي هونر X8 أحلى .. وللأسف مفيش Night Mode للسيلفي في الموبايلين.

بالنسبة لتصوير الفيديوهات فا الموبايلين بيدعموا التصوير بجودة 1080p مع 30 فريم في الثانية .. مفيش دعم للـ4K .. ريدمي نوت 11 اس فيه مثبت إلكتروني اما هونر X8 مفيهوش .. والموبايلين فيهم ميكروفون اضافي لعزل الضوضاء.


أسعار الهواتف :-

سعر Honor X8 :-

  • نسخة 128 جيجا مع 6 جيجا رام بسعر 6000 جنية

سعر Redmi Note 11S :-

  • نسخة 64 جيجا مع 6 جيجا رام بسعر 5650 جنية
  • نسخة 128 جيجا مع 6 جيجا رام بسعر 6300 جنية
  • نسخة 128 جيجا مع 8 جيجا رام بسعر 6700 جنية

نوت 11 اس تقدر تركب شريحتين إتصال من الجيل الرابع مع كارت ميموري .. اما هونر X8 بيدعم تركيب شريحتين إتصال من الجيل الرابع برده لكن مش بيدعم تركيب كارت ميموري.


الرأي النهائي :-

نقاط تفوق Redmi Note 11S :-

  • شاشة AMOLED أفضل بفرق واضح
  • بيشغل ألعاب بجودة أعلى
  • صوت Stereo أقوى بفرق واضح
  • مستشعر IR Blaster
  • كاميرا خلفية أقوى بفرق كبير
  • مثبت إلكتروني في تصوير الفيديوهات
  • دعم تركيب كارت ميموري

نقاط تفوق Honor X8 :-

  • تصميم أشيك بفرق كبير
  • شاشة حوافها أقل وتصميمها أفضل
  • أداء فتح البرامج والإحتفاظ بها في الخلفية ممتاز
  • شبكات قوية جدًا
  • كاميرا سيلفي ممتازة
  • في سماعة في علبة الموبايل
  • سعر أرخص

لو محتار بين الموبايلين دول هات ريدمي نوت 11 اس لو استخدامك ألعاب وإستخدام تقيل .. وممكن تشوف موبايلات تانية زي Poco X3 Pro .. اما لو استخدامك سوشيال ميديا ومكالمات فا هات Honor X8.

قد يعجبك أيضا...

Comments

جاري التحميل...