مراجعة تابلت Huawei Mediapad T8 – تابلت إقتصادي بـ2000 جنيه !

تفتكر ممكن تاخد ايه من تابلت سعره 2000 جنيه ؟ تلعب لعبة ببجي مثلًا ؟ .. بطارية ضخمة ؟ خامات قوية ؟ النهارده في موبيزل هنراجع تابلت جديد من هواوي وهو الـ Huawei MediaPad T8 واللي يعتبر تابلت إقتصادي.

التصميم :-

التابلت ده تصميمه فيه Finish معدني محترم بصراحة .. وزنه بيجي حوالي 310 جرام، وزن معقول اوي على تابلت 8 بوصة بصراحة .. وكمان تخانته 8.6 مللي.

ابعاده مش ضخمه اوي يعني ممكن تمسكه بايد واحدة .. ” تمسكه مش تستخدمه بإيد واحده ” .. فانا معنديش اي مشاكل مع تصميم التابلت ده .. ومش بيجي معاه جراب وده طبيعي في الفئة السعرية ديه.

الشاشة :-

شاشة التابلت ده بتيجي من نوع IPS LCD بحجم 8 بوصة بدقة HD.

إستحواذ الشاشة حوالي 80% من واجهة التابلت .. وده رقم مقبول على سعره .. الحواف يمين وشمال كويسة جدا .. بس فوق وتحت كبيرة نسبيًا.

جودة او Quality الشاشة نفسها بقى .. طبعا كثافة البيكسلات 189 بيكسل .. وده هيترجم لإنك هتشوف البيكسلات بعينك .. ومش هتاخد Quality ممتازة اما تقرب بعينك من الشاشة ديه .. لازم تكون بعيد شوية .. وده بصراحة منطقي مع تابلت محدش هيقرب عينه فيه على الإطلاق.

الألوان حلوة .. والسطوع مقبول جدا .. بس المشكلة مفيش حساس إضاءة .. لازم كل شوية تغير سطوع الشاشة بإيديك وديه من اكتر الحاجات اللي ضايقتني منه .. بس الحق يتقال، كده كده التابلت معظم الوقت بتستخدمه في البيت .. يعني درجة سطوع ثابته تحت إضاءة الغرفة مش محتاج تغيرها كل شوية.

تقدر تغير درجة حرارة الشاشة لو عاوزها مايلها للأزرق او للأصفر زي ما عينك ترتاح .. وكمان في وضع بيريح العين إسمه Eye Comfort .. وده علشان لما هتقرأ فترة طويلة بيقلل الأشعة الزرقا اللي بتضر العين وبيخلي الشاشة مصفرة شوية.

طبعا مفيش إعلان رسمي عن طبقة الحماية ولا في سكرينة متركبة على الشاشة .. وسهل جدا تفصله سكرينه عند اي حد.

الأداء :-

إفتكر معايا ده تابلت وإقتصادي .. المعالج اللي فيه ميدياتيك MT8768 ثماني النواة .. طبعًا لما اختبرت المعالج ده على انتوتو اداني رقم اقل من الـ100 الف .. وقلت اكيد الأداء هيبقى وحش جدًا.

بس حقيقي الأداء مش وحش اوي .. وده مش معناه انه سريع يعني .. لا هو مقبول جدا .. ومناسب جدًا جدًا للفئة السعرية اللي التابلت ده محطوط فيها.

اه في تاخيرات بسيطة ساعات بس مش مؤثرة ومنطقية .. استجابة اللمس على شاشة التابلت حلوة ومش هتحسسك ابدًا انك بتجرب تابلت رخيص .. عاش يا هواوي بصراحه.

بالنسبة بقى للألعاب فا التابلت ده اصلًا مخصص للأطفال بنسبة كبيرة .. وفيه Kids Corner اول ما بتفتحها علطول بتلاقي الشاشة اشتغلت اوتوماتيك على وضع الـEye Comfort علشان تريح عين طفلك .. وكمان اعدادات الـKids Corner مقفولة بـ باسورد بتقدر تحدده علشان تحدد لطفلك هيعمل ايه بالظبط.

المهم اما تفتح الإعدادات هتلاقي اول حاجة شوية حاجات لطيفة زي الفلتر Blue Light اللي كلمتك عنه متفعل وكمان هتلاقيه بيقولك انه هيبعت Notification لطفلك لو هو قاعد في عربية مثلًا بيلعب والعربية بتتهز علشان ياخد باله .. وكمان هيبعتله تحذير لو هو كان بيلعب وهو نايم على ظهره علشان يقوم ويعدل نفسه .. كل ديه حاجات لطيفة جدًا.

اهم حاجة طبعًا .. الوقت اللي بيقعده طفلك على التابلت .. وديه حاجة الاباء بيعانوا منها .. التابلت ده تقدر تحدد الوقت اليومي اللي ممكن طفلك يقعده على الـKids Corner وكمان المرة الواحدة قد ايه وما بين كل مرة ومرة قد ايه.

وطبعا تقدر تضيف البرامج والألعاب اللي جوا الـKids Corner بنفسك من الاعدادات .. وكمان تقدر تضيفله صور وفيديوهات معينة براحتك برده .. وفي رسام لطيف علشان تستغل مواهب طفلك .. مش كله لعب يعني .. وبرده طفلك يقدر يدخل على الكاميرا ولكن من خلال الـKids Corner.

هتقولي طيب لو الطفل عاوز يخرج من الـKids Corner .. هقولك مش هيعرف لانه بـ باسورد .. فإنت كده متطمن انه مهما قفل او فتح التابلت فهو جوا الـKids Corner وهيعمل اللي انت محدده من الإعدادات اللي مقفولة بباسورد.

بالنسبة للإستخدام بتاعنا بقى .. انا مرحمتش التابلت ده وحملت ببجي من متجر Apkpure وإتفاجئت إنها إشتغلت على اعدادات جرافيك Medium .. طبعا في تسقيط فريمات كتير.

هتحتاج تنزلها لأقل إعدادات جرافيك وهتلاقيها يعني بقت مقبولة شوية .. وكتر خير تابلت زي ده انه قدر يشغل اللعبة ديه .. وكول اوف ديوتي جربت اشغلها بس للأسف إدتني شاشة سودا ومشتغلتش.

عوامل الأمان وعناصر اخرى :-

مفيش بصمة وده منطقي جدًا .. بس فيه Face Unlock يعني اداءه مش الأفضل ولكن اهو موجود,

وبالنسبة لواجهة التشغيل فهو جاي بـAndroid 10 على واجهة هواوي بدون خدمات جوجل .. طيب هقدر أتاعيش من غير جوجل ؟

بص يا سيدي .. انا فتحت التابلت ده وقابلتني المشاكل دي :-

• أول مشكلة هي اني دورت على جوجل كروم .. دورت في متجر هواوي ملقتوش .. روحت رايح لمتصفح هواوي ودخلت جوجل منه عملت عنه سيرش جوجل كروم APK ودخلت حملته وسطبته وإشتغل زي الفل.
• تاني مشكلة هي الـGmail بتاعي .. دخلت على ايميل من ابلكيشن هواوي وضفته كـ جيميل عادي واشتغل زي الفل.

• تالت مشكلة هو الـYoutube .. وده انا استبدلته بالـYoutube Vanced وقدرت عادي اتصفح اليوتيوب بدون اي مشاكل.
• رابع مشكلة هي الـMaps واللي اصلًا مش هتشتغل هنا كويس علشان مفيش مستشعر بوصلة بس قلت اجرب .. المهم اسلم حل لاقيته انك تعمل ShortCut لـGoogle Maps من الكروم نفسه .. وتتعايش مع الموضوع.

وكده كده ده تابلت ثانوي اصلًا مش محتاج كل ده .. بس انا قلت استغل الموقف واشرح الدنيا أكتر لأي موبايل لـ هواوي بدون جوجل خالص.

والواجهة هنا فيها Dark Mode وديه حاجة كويسة جدا برده .. والتابلت فيه لمبة إشعارات برده .. حلوه جدًا جدًا.

صوت التابلت جاي من سماعة واحدة في الطرف العلوي للتابلت، وصوتها عالي جدا .. كان نفسي في سماعة كمان ويبقى صوت ستريو .. بس علشان السعر الرخيص فالسماعة الواحدة مقبوله جدا.

صوت مخرج الـ3.5 ملم هنا مقبول مش عالي اوي ومش واطي اوي .. حاجة في النص كده.

شبكات الـWiFi التابلت مش هتواجهه معاها مشاكل استقبالها في التابلت ده ممتاز جدا.

البطارية :-

بطارية تابلت هواوي هنا ضخمة .. بتيجي بحجم 5100 مللي أمبير .. وفي الإستخدام إستحملت معايا حوالي 11 ساعة شاشة مفتوحة .. وقت ممتاز جدًا جدًا.

بس الفكرة في زمن الشحن بقى .. الشاحن المرفق 5 واط فقط .. ومنفذ Micro USB 2.0 أكيد .. شحن التابلت في 4 ساعات .. وقت كبير جدا !!

فيها ايه لو كان شاحن 10 واط حتى يا هواوي .. مش للدرجادي احنا في 2020 يعني.

الكاميرات :-

في التابلت .. الكاميرات مش بتبقى حاجة اساسية اصلًا .. ومش بيتم التركيز عليها .. عمومًا التابلت ده بيجي مع كاميرا خلفية 5 ميجا بيكسل وامامية 2 ميجا بيكسل.

طبعا متسألش عن جودة صور من التابلت ده .. الصور بتطلع بهتانة ومفيهاش تفاصيل ومليانة Noise .. وانا اللي يهمني ان لو حد كبير مثلًا بيستخدم التابلت وعاوز يعمل Video Call .. هيبقى ايه الأخبار ؟؟

الجودة في مكالمات الفيديو في الإضاءه الداخليه مقبوله جدًا .. يمكن في الإضاءه الضعيفه مش هتبقى كويسه والـNoise هيسيطر على الفيديو بس بشكل عام وفي إضاءه غرفه مُعتدلة مثلًا الوضع هيكون كويس جدًا مش هيكون في مشاكل.

ولو عايز تشوف مكالمة الفيديو في التابلت ده ,صور متصوره بالكاميرا الخلفيه، شوف الفيديو في اخر المقال.

سعر التابلت :-

التابلت بيجي بمساحة تخزين 16 جيجا مع 2 جيجا رام بسعر رسمي 2049 جنية مع كارت ميموري 16 جيجا بايت هدية.. عشان تكون المساحة الكلية 32 جيجا.

الرأي النهائي :-

التابلت ده حلو جدًا .. بيقدملك خامات معدنية مُمتازه مع شاشة مقبوله جدًا وتجربة صوتيه كويسه .. وكمان الأداء مش وحش هنا .. وموضوع الـKids Corner اللي موجود فيه ده برده حاجه كويسه جدًا.

التابلت هيبقى مناسب جدًا انك انت تجيبه لطفل .. خصوصًا انك انت هتقدر تتحكم في الوقت اللي طفلك بيستخدم التابلت ده فيه.. وخصوصا كمان ان سعر التابلت مقبول جدا جدا.

فيديو المراجعة :-