غياب هواوي عن السوق المصري واضح جدًا للجميع، ومؤثر جدًا، ولكن هواوي هترجع تاني في 2022 في فئات سعرية كتير، وإستعدادًا لـ ده الشركة أعلنت عن Huawei Nova 9 الموبايل اللي جاي ينافس في الفئة المتوسطة العُليا، وده يعتبر البداية الجديدة لـ هواوي .. بداية نظام الـHarmonyOS الجديد.
ومن خلال الموبايل ده هواوي بتقولك انك لما تيجي تشتري موبايل جديد هتلاقي أنظمة iOS و Android والـHarmonyOS الجديد بتاعهم .. والنهارده هنقدم مراجعة HUAWEI Nova 9 الجديد بعد إستخدامه لفتره، وهنركز في المراجعة على السوفت وير بشكل أكبر والتجربة الجديدة اللي هواوي بتقدمهالنا.
التصميم :-
بالنسبة لتصميم الموبايل فا هو شكله لطيف .. الفريم بتاع الكاميرات حجمه كبير شوية وضخم لكنه كويس .. والموبايل بيكون مصنفر ولامع.
يهمنا سُمك ووزن الموبايل ده طبعًا .. واللي الشركات بقت بتركز عليهم جدًا، الموبايل وزنه 175 جرام وتخانته 7.5 مللي، ودي أرقام ممتازه جدًا لموبايل في الفئة المتوسطة العُليا.
ظهر الموبايل بيجي من الزجاج، بيقدملك تجربة Premium الى حد كبير، وكده كده انت هتحطه في الجراب اللي معاك فا مش هيكون عندك مشكلة انه يتكسر او يتخدش منك.
الشاشة :-
شاشة OLED بحجم 6.57 بوصة بدقة FHD+ بثقب كبير شوية للسيلفي وبتيجي بتردد 120 هيرتز وبتدعم الـHDR10 بأكثر من مليار لون، والشاشة فيها Edges يمين وشمال.
الشاشة ممتازة كألوان وتفاصيل، وسطوعها ممتاز، وزوايا الرؤية فيها ممتازة مفيهاش أي مشاكل .. الشاشة فعلًا راقية جدًا وهتعجبك وهترتاح في إستخدامها بمعدل التحديث العالي.
الأداء :-
هواوي استخدمت معالج كويس في الفئة المتوسطة العُليا، سناب دراجون 778G بتكنولوجيا 6 نانو ميتر، معالج شوفناه كتير مؤخرًا، لكنه بيختلف هنا انه 4G بس مش 5G .. حاجه سلبية لكن مش فارقة معانا حاليًا.
المهم ان المعالج يقدر يخلي النظام ماشي كويس وسريع وميواجهكش فيه أي مشاكل .. وده اللي بيحصل فعلًا، وهكمل الكلام عن الأداء مع السوفت وير في الفقرة اللي جايه!
نظام HarmonyOS الجديد :-
النظام معمول بشكل تقليدي الى حد كبير وشبيه للـAndroid بشكل كبير .. لان هواوي كانت أجهزتها في الأساس Android فا بالتالي هي بتقدم شكل مش مختلف اوي للـUSER بتاعها .. شكل هو متعود عليه.
لما بتسحب يمين من جنب السيلفي من فوق هتلاقي الـControl Center بتاعك اللي فيه كل الإختصارات اللي انت عايزها بشكل مُنظم وراقي وأكيد تقدر تتحكم في اللي يظهرلك واللي ميظهرلكش .. لكن لما بتسحب من الناحية الشمال هتلاقي الإشعارات ظهرتلك.
فتح التطبيقات والتنقل بين الـApplication سلس جدًا وبيحصل مع Animations لطيفة مستقرة مفيهاش اي مشاكل.
لما نيجي نتكلم عن التطبيقات اللي في الموبايل .. الموبايل بيتقدم بخدمات هواوي مفيهوش جوجل، معظم الـApplications الكبيرة موجودة على الـApp Gallery بتاع هواوي .. وأهمها بالنسبالنا تطبيقات البنوك اللي كانت مش موجودة علشان محمية وكده، حاليًا هي موجودة على الـApp Gallery بتاع هواوي بدون مشاكل.
ولو في تطبيق انت محتاجه ومش لاقيه على App Gallery تقدر تبحث عنه من Petal Search الخاص بهواوي وتدور على التطبيق وتحمله بكل سهولة، وكمان هواوي اشتغلت على الـPetal Maps وبقى شغال ممتاز جدًا.
لو عايز تطبيقات جوجل فا جوجل كروم تقدر تحمله وهيتسطب ويشتغل بدون أي مشاكل، يوتيوب تقدر تفتحه على جوجل كروم وتعمل Shortcut على الـHome عندك وهيفتح عادي، او ممكن تسطب الـVanced .. وخرائط جوجل برده هتشتغل معاك عادي على المتصفح، والـGmail برده نفس الموضوع.
هواوي كمان بتقدم ميزة قوية وهي الـHUAWEI Super Device اللي عملنا ليها فيديو قبل كده .. واللي بتخليك تقدر توصل لاب توب هواوي بتاعك مع الموبايل بتاعك والشاشة والتابلت.
في مجموعة تطبيقات جديدة في السوفت وير ده، منهم تطبيق الموسيقى بتاع هواوي واللي تقدر تشغل منه اغاني اون لاين عادي وتبحث وتتحكم في جودة الاغنية كمان، وعندك تطبيق Petal Clip اللي تقدر منه تعمل تعديلات سريعة على اي فيديو عندك وتحفظ الفيديو من غير حقوق ملكية.
لو انت بتنقل من موبايل تاني لموبايل من هواوي وعايز تنقك حاجاتك في الموبايل فالـPhone Clone تقدر من خلاله تنقل كل الـData بتاعتك، ولو مش عارف فا ممكن Huawei Care ينقلوا لك كل حاجه وانت بتشتري الموبايل من أي مركز بيع معتمد من هواوي، وبعد كده هيكون عندك حساب Huawei ID عليه كل الـData بتاعتك.
عوامل الأمان وعناصر اخرى :-
بصمة الإصبع في الموبايل موجودة تحت الشاشة، أداءها كويس مفيهوش أي مشاكل .. والـFace Unlock برده سريع ومفيهوش أي مشاكل، الموبايل داعم للـAlways On Display لعرض الإشعارات اللي بتظهرلك على الشاشة وهي مقفولة، وكمان بيدعم الـNFC.
صوت الموبايل Mono والصوت بيطلع من سماعة واحدة .. مستوى الصوت بتاعها كويس جدًا وعالي ولكن التجسيم أكيد أقل من الموبايلات الـStereo، ومفيش مدخل سماعات 3.5 مللي.
كل المستشعرات هنا شغالة كويس جدًا جدًا، انسى أن في مستشعر يعلق معاك .. دي حاجه من اهتمامات هواوي الدائمة.
بالنسبة للـWi Fi وشبكات الإتصال فا أداءهم ممتاز جدًا كالعادة من هواوي.
البطارية :-
بطارية 4300 مللي امبير، أداءها كويس والسوفت وير منظم جدًا في الإستهلاك.
الموبايل معاه شاحن سريع 66 وات بيشحن البطارية بالكامل في أقل من نص ساعه.
الكاميرات :-
الموبايل بيجي بكاميرا خلفية رُباعية، الأساسية 50 ميجا بيكسل بفتحة عدسة F/1.9 بمستشعر محترم جدًا، والسيلفي 32 ميجا بيكسل بفتحة عدسة F/2.0.
مستوى التصوير بالكاميرا الخلفية ممتاز جدًا، المستشعر الـ50 ميجا بيكسل اللي هنا محترم جدًا جدًا وفعلًا أداءه قوي خصوصًا في التصوير الليلي، هتحس ان معظم الصور طالعة مع معالجة كويسة جدًا للصور .. مع ألوان معقولة وكمية تفاصيل كويسة جدًا.
وبرده نفس الكلام في السيلفي، ألوان مظبوطة وتفاصيل معقولة، وحقيقي مستوى الكاميرات أعلى حبه حلوين عن Honor 50.
الكاميرا الخلفية والأمامية بيصوروا فيديوهات 4K .. وعندك وضع مُميز اللي هو الـDual View اللي تقدر تصور بيه بالكاميرا الأمامية والخلفية في نفس الوقت علشان تعمل Vlogs سريعة وشيك من غير ما تتعب في التعديل.
سعر Huawei Nova 9 :-
- نسخة 128 جيجا مع 8 جيجا رام بسعر 9850 جنية مصري
هواوي مُهتمة جدًا بخدمات ما بعد البيع، مهتمة جدًا بـHuawei Care الفترة دي .. واللي من خلالها تقدر تمد فترة ضمان موبايلك سنة أو سنتين بمبلغ رمزي.
الموبايل بيقدم تجربة مستقرة وكاميرات محترمة ولكن السعر مرتفع خصوصا ان الموبايل بمساحة تخزين 128 جيجا فقط.
Comments