شركات الموبايلات بتحاول تقدم منتجات تانية بجانب الموبايلات علشان تحصل على إنتباه العميل بشكل أكبر، وأحيانًا بتقدم منتجات أكبر وأقوى وأساسية أكتر، وده الطريق اللي هواوي اتجهت له مؤخرًا .. وهو إنها تقدم EcoSystem او نظام مُتكامل بيجمع كل أجهزتها مع بعض وبيوصلهم ببعض بمميزات كتير مُنافسة جدًا.
وبالفعل أطلقت أسم Huawei Super Device على النظام الجديد بتاعها .. واللي بيخليك تقدر توصل لاب توب HUAWEI MateBook D15 مع الشاشة HUAWEI MateView مع تابلت HUAWEI MatePad 11 وكمان كيبورد وماوس من هواوي وموبايلات هواوي والسماعة HUAWEI Freebuds 4i.
إستخدام HUAWEI Super Device :-
قدمنا لكم مراجعة Huawei Matebook D15 ووضحنا فيها انك تقدر تظهر شاشة الموبايل على اللاب توب .. دلوقتي انت تقدر تربط اللاب توب بالشاشة الـMateView عن طريق السلك او بدون أسلاك خالص .. وتقدر كمان تعرض شاشة اللاب توب على نصف الشاشة والنصف التاني تشغل عليه برنامج مختلف مثلًا.
وتقدر كمان تعرض شاشة الموبايل على شاشة اللاب توب او الشاشة الكبيرة الـMateView .. وتقدر تختار الصوت يخرج من الشاشة او اللاب توب او الموبايل .. وبعد ما توصل كل الأجهزة دي ببعضها وتعرضها على شاشة منهم، تقدر تتحكم فيهم من خلال كيبورد وماوس واحد فقط.
تقدر كمان تستخدم تابلت Matepad 11 الجديد في انك تعرضه على الشاشة الـMateView وتتنقل بينه وبين اللاب توب بدون أي أسلاك .. وتقدر كمان تتحكم في التابلت على الشاشة من الماوس والكيبورد .. وتقدر تشغل الصوت بتاع التابلت من الشاشة وتقدر كمان تفتح لعبة زي ببجي من التابلت على الشاشة الـMateView.
تقدر تربط الموبايل بالشاشة من خلال انك هتخلي ظهر الموبايل يلمس جسم الشاشة وتلقائي هتلاقي شاشة الموبايل اشتغلت على الشاشة .. وتقدر تفتح فيديوهات من الموبايل وتظهر على الشاشة الكبيرة.
وفي كمان اوبشن لذيذ جدًا وهو انك تقدر تفتح نسخة تانية من الموبايل على الشاشة .. يعني هتكون مشغل الموبايل على الشاشة وفي نفس الوقت ماسك الموبايل بتستخدمه في ايدك وبتعمل حاجه تانيه غير اللي على الشاشة.
وأخيرًا تقدر تستمتع بالنظام ده من غير ما يكون عندك الشاشة الـMateView .. تقدر توصل اللاب توب بالتابلت وتعرض شاشته على التابلت او شاشة التابلت على اللاب توب .. وهتقدر تستخدم الكيبورد والماوس بتوع اللاب توب مع التابلت، وتقدر تنقل ملفات بينهم بسهولة، وتقدر تستخدم القلم واللمس على شاشة التابلت برده.
تقدر كمان تستخدم السماعة الـHUAWEI Freebuds 4i مع الأجهزة من خلال انك تخليها تقرب من الجهاز اللي عايز توصلها بيه وهي هتتوصل عليه بشكل تلقائي بدون أي مشاكل.
الشاشة الـMateView عليها Mini Hardware وعليها Software علشان يقدروا ينقلوا لك التجربة بشكل سلس من غير أي تقصير في السرعة .. والنظام كله بيحتاج WiFi قوي علشان الربط بين الأجهزة يكون سريع ومتواجهش أي مشاكل زي ان الفريمات تكون قليلة وده ظهر معانا.
فكرة الـSuper Device من هواوي هي فكرة مُستقبلية، بتقدملك حرية رهيبة في الربط بين الأجهزة وبعضها .. وهواوي اشتغلت على النظام وصرفت عليه مبالغ ضخمة بهدف تطوير الـSoftware والـHardware علشان يبقى متناعم بشكل أفضل .. وبالفعل اتقدم بمميزات قوية وبتسعير رخيص بالمقارنة بمنتجات شركة Apple.
لاب توب HUAWEI MateBook D15 :-
اللاب توب ده خفيف ورفيع، وزنه حوالي 1.5 كيلو جرام، خاماته الخارجية من الألومنيوم، خامات محترمة جدًا بتتقدم من هواوي بجودة تقفيل متميزة .. وشكل تصميم عصري ممتاز، الشاشة بحواف صغيرة وحجمها 15.6 بوصة بدقة FHD+ .. سطوعها 250 شمعة بس، والكاميرا موجودة في الكيبورد وجودتها 720p.
بيتم شحن اللاب توب من خلال منفذ USB Type C .. وبيدعم الشحن بسرعه تصل الى 65 وات والشاحن موجود في العلبة .. وفي بصمة على زر الباور بتاع اللاب توب .. وبيشتغل بـWindows 10 وبيدعم Huawei Share و Huawei PC Manager.
سعر HUAWEI MateBook D15 :
- معالج انتل Core i3 الجيل العاشر 8 جيجا رام 256 جيجا SSD بسعر 10 الاف جنية
وفي حالة الحجز المُسبق بيكون في هدية هارد خارجي 1 تيرا وشنطة من هواوي - معالج انتل Core i5 الجيل الـ11 ورامات 8 جيجا رام 512 جيجا SSD بسعر 17 الف جنية
وعند الحجز المُسبق بتاخد هدية هارد 1 تيرا وشنطة هواوي
اللاب توب مش بيقدم أقوى معالج، وكمان المعالج الرسومي ضعيف لإنه من Intel .. لكن هو بيقدم تصميم شيك خفيف وبيخاطب حد محتاج لاب توب للشغل او للدراسة لكن مش لحد بيعمل مونتاج تقيل او بيلعب ألعاب تقيلة.
تابلت HUAWEI MatePad 11 :-
تابلت بخامات محترمة من هواوي بوزن 485 جرام وبسُمك 7.3 مم فقط وده سُمك رفيع جدًا، شاشة 11 بوصة من نوع IPS LCD بدقة FHD+ بتردد بيوصل لـ120 هيرتز .. معالج كوالكوم سناب دراجون 865 من أقوى المعالجات وفعلًا بيقدم أداء سريع جدًا خاصًة مع دعم 120 هيرتز في الشاشة وسوفت وير هواوي المستقر.
صوت Stereo بيطلع من 4 سماعات والصوت عالي ومحترم .. بطارية 7250 مللي امبير بتدعم الشحن السريع 22.5 وات .. نظام HarmonyOS 2.0 بخدمات هواوي مش بيدعم خدمات جوجل .. بيدعم القلم الـmPencil اللي بيتلزق على جسم التابلت المعدني .. وكمان الجراب الـMagnetic اللي فيه كيبورد وبيخلي تجربة التابلت أفضل.
سعر HUAWEI MatePad 11 :-
- نسخة 128 جيجا مع 6 جيجا رام بسعر 8500 جنية مصري
وهدية حجز مُسبق الجراب الـMagnetic اللي فيه كيبورد - القلم بيتباع مُنفصل بقيمة ألف جنية
التابلت بيدعم الـWiFi فقط، مش بيدعم تركيب شريحة اتصال .. والتابلت بيقدم تجربة كويسة ويعتبر قيمة ممتازة مقابل السعر .. ومشكلة خدمات جوجل مش بتأثر اوي في إستخدام التابلت لإنه مختلف عن الموبايل.
تابلت هواوي بيقدم شاشة سريعة بدقة محترمة مع معالج قوي جدًا ونظام سريع جدًا وصوت عالمي وبطارية محترمة مع شحن سريع جدًا .. ده غير القلم والجراب، لو محتاج تابلت احترافي وهتشتغل عليه ومحتاج قلم فا أنصحك تفكر في التابلت ده .. بس قبل ما تشتري لازم تشوف البرامج اللي انت محتاجها هتشتغل على التابلت ولا لأ!
شاشة HUAWEI MateView :-
شاشة IPS LCD حجمها 28.2 بوصة بدقة 4K+ .. والشاشة تدعم HDR وسطوعه بيوصل لـ500 شمعة، وجودة ألوان الشاشة محترمة جدًا ومظبوطة جدًا، تنفع لأي حد بيعمل Editing او مونتاج فيديوهات وعايز ألوان مظبوطة .. والشاشة فيها SmartBar لطيف جدًا علشان تقدر تتنقل في الإعدادات بكل سهولة.
الشاشة فيها مدخل USB C وفيها 2 مداخل USB A وفيها مدخل HDMI ومدخل Mini Display Port .. وكمان فيها منفذ 3.5 مللي .. والشاشة فيها سماعتين صوتهم محترم جدًا وعالي جدًا، وفيها Mini Software علشان لما تربط أي جهاز بالشاشة.
الشاشة تصميمها عصري جديد ومميز، وتقدر تتحكم فيها وفي إرتفاعها بكل سهولة، ووزنها معقول جدًا على الحجم ده، والخامات الخارجية هي أفضل خامات ممكن تجربها.
سعر HUAWEI MateView :-
- سعر شاشة MateView من هواوي حوالي 19500 جنية مصري
شاشة ممتازة وكل حاجه فيها كويسة .. لكن كنت أتمنى ان سعرها يكون أقل شوية، كانت هتبقى منافس أقوى .. وده بالرغم من أنها شاشة ذكية وفيها مميزات مش موجودة في معظم الشاشات التانية.
عرض من هواوي :-
وهواوي عاملة عرض ممتاز، تقدر تاخد المُنتجات دي :-
- شاشة HUAWEI MateView
- تابلت MatePad 11 بالقلم
- لاب توب MateBook D15 نسخة Core i3
بسعر 31 الف جنية مصري فقط، الرقم كبير فعلًا بس المنتجات كتير وفي العرض هتوفر مبلغ 7 الاف جنية.
Comments