مراجعة Huawei Nova Y70 – عودة هواوي للفئة الإقتصادية !

بقالنا فترة كبيرة مش بنراجع موبايلات إقتصادية من هواوي .. لكن دلوقتي هواوي راجعة تاني للمنافسة بموبايل Huawei Nova Y70 الإقتصادي الجديد، وده أول موبايل من هواوي بعد دمج سلسلة Y مع Nova .. وحاولت هواوي انها تركز على مميزات قوية في الموبايل الجديد، وده اللي هنعرفه النهارده في المراجعة.

التصميم :-

الموبايل بيجي بخامات خارجية من البلاستيك اللامع .. بيعمل إنعكاسات كتير مع الإضاءه .. وطبعًا بيظهر فيه البصمات والخدوش بسهولة وهتحتاج تنظفه أول بأول.

الكاميرا الخلفية موجودة في فريم أسود بيضاوي شوية .. شكله عادي مش مُبهر .. لو كان عرض الفريم أقل شوية كان هيبقى شكله أحلى.

وزن الموبايل 200 جرام وتخانه 9 مللي ودي حاجه كويسة.

الشاشة :-

شاشة من نوع IPS LCD بحجم 6.75 بوصة بدقة HD+ مع نوتش صغير للسيلفي وبتشتغل بتردد 60 هيرتز .. مع حواف صغيرة معقولة جدًا على الفئة الإقتصادية.

هواوي بتقدملك شاشة كبيرة بتقدر تظهرلك ألوان معقولة جدًا على نوع الشاشة الـIPS LCD .. مش حاسس بأي تقصير او علطات في الألوان اللي الشاشة بتعرضها.

بالنسبة للسطوع فا الشاشة معقولة .. مش أفضل سطوع لكن مش عيب .. سطوع الشاشة هنا زي Honor X8 بالظبط.

بالنسبة لدقة الشاشة فا هي مش الأفضل لإنها HD+ .. لكن لو انت مش بتدقق في التفاصيل وتركز في البيكسلات بتاعت الشاشة وتقرب منها مش هتاخد بالك أوي من موضوع الدقة.

الأداء :-

معالج Kirin 710 المعروف .. والذاكرة نوعها UFS.

أداء المعالج معقول في الفئة الإقتصادية .. لو بتقارن فا أداءه أحسن من Exynos 850 الموجود في Galaxy A13 وأقل شوية من سناب دراجون 680 الموجود في Redmi 10C.

الأداء الفعلي لـ Nova Y70 مش وحش .. مش هيهنج، الموبايل مستقر بفضل سوفت وير هواوي اللي معروف بثباته وإستقراره بشكل كبير.

اللي ممكن تحسه هو ان في تقطيع خفيف في Animation الواجهة .. الكلام ده هتحسه لو جاي من موبايل أغلى او بتردد 90 هيرتز .. لكن لو طالع من موبايل إقتصادي مش هتاخد بالك.

الأداء الرسومي للموبايل كويس جدًا .. بيشغل ببجي على High HD بدون مشاكل .. وبيوصل لحوالي 30 فريم .. والموبايل مش بيسخن بسهولة ودي حاجه لطيفة جدًا.

عوامل الأمان وعناصر اخرى :-

بصمة الإصبع موجودة على زِر الباور وأداءها سريع جدًا وممتاز .. مع Face Unlock أداءه معقول جدًا برده.

الموبايل فيه ميكروفون اضافي لعزل الضوضاء لكن مفيهوش NFC .. السوفت وير EMUI 12 مع خدمات هواوي فقط.

مستشعر التقارب موجود وبيقفل الشاشة في الوقت الصح بدون أخطاء وانت بتعمل مكالمة .. اما مستشعر الجيروسكوب فا هو مش موجود للأسف.

صوت الموبايل Mono مش Stereo .. والصوت متوسط مش أعلى حاجه .. مدخل السماعات الـ3.5 مللي موجود.

بالنسبة للشبكات فا هي ممتازة جدًا .. موبايلات هواوي دائمًا مميزة جدًا في جزئية الشبكات دي.

البطارية :-

بطارية الموبايل 6000 مللي امبير .. أداءها مبهر الحقيقة .. المعالج مش موفر أوي في الإستهلاك لكن مع سوفت وير هواوي الموضوع كويس جدًا .. البطارية بتوصل لـ10 ساعات شاشة مفتوحة.

لو عايز تشحن الموبايل فا هو بيجي بشاحن سريع معقول على الفئة الإقتصادية بقدرة 22.5 وات وبيتم الشحن من خلال منفذ USB Type C .. بيشحن البطارية في أقل من ساعتين.

الكاميرات :-

كاميرا خلفية رئيسية 48 ميجا بيكسل بفتحة عدسة F/1.8 .. الثانية 5 ميجا بيكسل بفتحة عدسة F/2.2 للتصوير الواسع .. الأخيرة 2 ميجا بيكسل مخصصة للعزل .. والسيلفي 8 ميجا بيكسل بفتحة عدسة F/2.0.

الكاميرا الخلفية الرئيسية في الموبايل هنا بتطلع صور معقولة على الفئة الإقتصادية .. ممكن بتعديل بسيط تزود تشبع الألوان شوية علشان تبقى أحلى .. كمية التفاصيل متوسطة مش كتير ومش قليلة.

التصوير في إضاءه داخلية هتلاقي التفاصيل قلت شوية .. لازم تشغل الـNight Mode علشان تلاقي تفاصيل في الصورة .. الكاميرا الخلفية معقولة على الفئة الإقتصادية.

بالنسبة للسيلفي فا هو متواضع شوية .. الألوان مظبوطة بس الفكرة في التفاصيل قليلة شوية والـHDR مش لطيف أوي .. وعمومًا ده الطبيعي في الفئة الإقتصادية من ناحية التصوير السيلفي.

بالنسبة لتصوير الفيديوهات فالموبايل بيدعم تصوير بجودة 1080p مع 30 فريم في الثانية .. ودي أعلى جودة بيدعمها الموبايل .. وطبعًا مفيش مثبت بصري ولا إلكتروني .. لكن في ميكروفون اضافي لعزل الضوضاء.

سعر Huawei Nova Y70 :-

• نسخة 128 جيجا مع 4 جيجا رام بسعر 4900 جنية

تقدر تركيب شريحتين إتصال او شريحة واحدة مع كارت ميموري بحجم 512 جيجا.

الرأي النهائي :-

مميزات Huawei Nova Y70 :

• تصميم معقول
• أداء كويس في الإستخدام اليومي
• بطارية ضخمة جدًا
• شحن سريع وعملي
• بصمة سريعة
• شبكات قوية

عيوب Huawei Nova Y70 :

• دقة الشاشة مش الأفضل
• الصوت مش أعلى حاجه
• الكاميرا السيلفي أداءها متواضع