النهارده هنراجع أقوى موبايل من هواوي في السوق المصري حاليًا .. وهو الـHuawei P40 Pro .. بس للأسف الموبايل ده بيجي من غير خدمات جوجل .. فا هل الموبايل ده فيه مُميزات تخليك تشترية وتستغنى عن خدمات جوجل ؟ خصوصًا ان الموبايل فلاج شيب وسعره حوالي 16 ألف جنية !!
التصميم :-
انا بحب التصميم البسيط الشيك في نفس الوقت .. موبايل P40 Pro جاي بيقدم التصميم ده .. تصميم الظهر زجاجي مع فنش Frosted مط خفيف كده.
وعندك مستطيل الكاميرات اللي بارز شوية عن الظهر .. ده معمول فيه شوية شغل حلوين في الكاميرات .. هنتكلم عنهم كمان شوية.
الفريم بتاع الموبايل بقى .. جاي رفيع من الجوانب علشان الشاشة Curved يمين وشمال .. والفريم بعد كده بيكبر .. وبيبقى كبير عند الـCorners علشان يحمي الموبايل لو وقع على الزوايا بتاعته .. وفي برده Curves كمان فوق وتحت في الموبايل بس طبعًا أقل من الـCurves اللي يمين وشمال الموبايل.
مسكة الموبايل حلوة جدًا ومريحة جدًا .. بس الوزن كبير حوالي 209 جرام بيحسسك إنك ماسك حاجة قيمة في إيدك .. والتخانة كمان 9 ملي .. بس زي ما قولتلك .. الـEdges اللي في كل حته مش هتحسسك أبدًا إنك عندك مشكلة في مسكة الموبايل ده.
الموبايل مُقاوم للماء والأتربة بشهادة IP68 .. وديه شهادة محترمة .. والموبايل اصلًا فيه Option للتصوير تحت المايه في سوفت وير الكاميرا بتاعته .. بس طبعًا على عمق مش هيزيد عن 1 ونص متر ولمدة متزدش عن 30 دقيقة.
الموبايل معاه جراب شفاف في العلبة .. بيغطي بروز الكاميرات وفي نفس الوقت مش بيخبي جمال تصميم الموبايل ده.
الشاشة :-
شاشة بتيجي بحجم 6.58 بوصة من نوع OLED بدقة 1200×2640 .. وهي دقة أعلى من الـFHD+ وأقل من QHD+، حاجه في النص كده .. والشاشة بتدعم معدل تحديث 90 هيرتز علشان يديلك سلاسة إستخدام أكتر بس خلينا نتكلم عليها كمان شوية.
الشاشة كمان زي ما قولتلك في جزء التصميم إنها مُحنية الأطراف ..بس الإنحناء اللي هنا مُستحيل يضايقك وإنت بتكتب على الشاشة .. أو صعب فعلًا تعمل أمر بالغلط.
الشاشة فيها ثقبين على الشمال فوق كده .. وعلى فكرة في مجموعة مستشعرات كمان بين الكاميرتين السيلفي دول .. منهم مستشعر المُقاربة ومستشعر الـIR بتاع الـFace Unlock .. المهم شكل الثُقبين دول هنا كبار شوية علشان العناصر الموجودة في الجزء ده كتيرة.
وحواف الشاشة هنا تكاد تكون معدومة حرفيًا .. فعلًا تحس إن مفيش حواف للشاشة هنا.
تجربة إستخدامي للشاشة .. كشكل وحواف وسطوع وألوان فا هي مُمتازة .. وفي الإستخدام حلوة جدًا .. ولكن ينقصها من ناحية المواصفات إنها تكون QHD+ ومعدل التحديث 120 هيرتز .. الحاجات الموجودة في موبايلات سامسونج.
بس الفكرة هل اصلًا الدقة العالية والتردد العالي أوي ده هتستخدمه ولا هتقفله في الأخر علشان إستهلاك البطارية .. ويمكن يكون ديه وجه نظر هواوي .. وشايفين إن التكنولوجيا اللي في الشاشة ديه كفاية لحد دلوقتي .. والموضوع برده نسبي ويختلف من واحد للتاني.
الأداء :-
الموبايل جاي بمعالج هواوي الرائد الكيرين 990 بتكنولوجيا 7 نانو .. المعالج الداعم لشبكات الجيل الخامس .. وحقيقي ده مش أقوى معالج في العالم دلوقتي على مستوى الأندرويد .. الـSnap Dragon 865G أقوى.
ولكن معالج Kirin 990 في وجه نظري المُتواضعة موفرلي تجربة إستخدام سلسة أكتر من الـExynos 990 الموجود في موبايلات سامسونج الرائدة زي Galaxy S20 Plus.
وده راجع للتناغم الرهيب بين السوفت وير والهارد وير في موبايل P40 Pro .. حقيقي الموبايل طيارة .. ومع الـ90 هيرتز المحسسوين أوي هنا هتحس إن الموبايل عاوز يطير منك .. مش بتحس بأي Animation أو تأخير في أي حاجة في الواجهة.
الذاكرة الداخلية اللي هيا بتيجي بمساحة 256 جيجا من النوع السريع UFS 3.0 .. مع 8 جيجا رام .. والحاجات ديه بقت اساسيات أي موبايل Flagship دلوقتي .. مينفعش أقولك إن ديه ميزة.
وبالحديث عن الواجهة .. فالموبايل جاي بخدمات هواوي .. ومفيهوش خدمات جوجل .. وأنا مش حابب أدخل في نقاش وجدال او أقول طرق ملتوية لتشغيل خدمات جوجل على الموبايل ده.
بإختصار رأيي في موضوع جوجل .. لو إنت مستخدم متعلق بتطبيقات أساسية مع جوجل .. ليك إستخدام يومي معاها زي الـYouTube Studio او الـAnalytics او أي من تطبيقات وخدمات جوجل الرئيسية .. فأكيد إختيار خدمات هواوي في التوقيت ده مش صح .. إنما لو إستخدام محصور على يوتيوب وGmail مثلًا فالحاجات ديه تقدر تشغل بدايل ليها على اي موبايل بخدمات هواوي ومش هتحس بأي مشكلة.
وبالنسبة للأداء الرسومي فالموبايل بيشغل لعبة PUBG على Ultra HDR واللعبة بتشتغل كويس جدًا ومفيش اي مشاكل .. ولعبة Call Of Duty بتشتغل برده على Very High وشغاله بدون أي مشاكل .. اما لعبة Fortnite فا هي شغالة على إعدادات جرافيك High وبتشتغل كويس بدون أي مشاكل.
عوامل الأمان وعناصر اخرى :-
البصمة مُدمجة في الشاشة بس مكانها فوق شوية .. بس لما تاخد على مكانها فا هي سريعة جدًا ومستحيل تغلط معاك.
اما بقى الـFace Unlock بقى بيعتمد على مستشعر IR الموجود في ثُقب السيلفي .. وطيارة حرفيًا وكمان الموبايل بيتعرف على وجهك في الظلمة بفضل مستشعر الـIR.
الموبايل ده فيه بعض الـGestures اللذيذة اللي بتعتمد على الـSensors الموجودة في قطع الشاشة .. أهمها إنك من بعيد ممكن تاخد سكرين شوت .. او ممكن تقلب في حاجه إنت فاتحها وتعمل Scroll لتحت ولفوق .. حاجات عظمة جدًا بصراحة.
الموبايل مفيهوش لمبة إشعارات بس فيه Always On Display .. بيعرض الساعة وإشعار المكالمات والمسدجات اللي جاتلك .. مفيش إشعارات من البرامج مش عارف ليه.
الموبايل فيه كل المستشعرات .. ضوء وتقارب وجيروسكوب .. وكمان بيدعم مستشعر IR Blaster تاني في طرف الموبايل من فوق علشان تستخدمه كـ ريموت للأجهزة الكهربائية.
اسوأ حاجة في الموبايل ده الصوتيات .. الموبايل جاي بسماعة واحدة تحت على اليمين .. صوتها عالي بس بصراحة مُقارنتا بالـFlagships التانية فا الصوت مش عالي ( لأنه مش ستريو ).. وكمان مفيش مدخل السماعات الـ3.5 مللي.
ومفيش سماعة مكالمات .. الصوت بيطلع بموجات من تحت الشاشة .. كنت حاسس إن الصوت هيبقى واطي .. بس بصراحة الصوت كان ممتاز وسامع اللي بكلمه كويس جدًا.
شبكات الموبايل ده مُمتازة .. الـWiFi والمكالمات زي الفل .. شبكات هواوي عموما ممتازة.
البطارية :-
بطارية مش ضخمة .. بتيجي بحجم 4200 مللي أمبير .. بتديلك إستخدام متوسط 6 ساعات بس .. كان نفسي في رقم أكبر من كده .. وبصراحة أنا كنت عامل نص الوقت الشاشة 90 هيرتز والنص التاني الشاشة 60 هيرتز وملعبتش كتير .. بس صورت كتير والكاميرا هنا بتشفط البطارية .. تقييمي للبطارية هنا متوسط .. يدوبك هتكمل اليوم لو إستخدامك معقول.
معاك شاحن 40 واط هيشحن البطارية في حوالي ساعة وربع .. وانا غير راضي عن زمن الشحن ده لإن نفس قوة الشحن ديه عند هواوي في موبايلات بربع التمن زي Nova 7i .. فكنت أتمنى شاحن أسرع من كده.
بس المُميز هنا الشحن الـWireless .. وبيدعم كمان الشاحن اللاسلكي العكسي .. يعني بيشحن موبايل تاني يكون داعم شحن لاسلكي برده بقوة 27 واط .. ومفيش حد بصراحة بيطلع قوة الشحن ديه .. بس تبقى تستخدمها بحساب لإن اصلًا البطارية هنا مش ضخمة اوي.
الكاميرات :-
الكاميرا الرئيسية 50 ميجا بيكسل بفتحة عدسة F/1.9 .. المُستشعر نفسه حجمه كبير أوي .. 1.28 وحجم المُستشعر فعلًا مهول وعامل طفرة في الأداء .. وطبعًا بيدعم مثبت بصري حقيقي.
الكاميرا التانية Periscope للزوم 12 ميجا بيكسل بفتحة عدسة F/3.4 بتدعم مثبت بصري برده وبتعمل زوم حقيقي 5X وبيوصل لحد 50X بـDigital.
الكاميرا التالتة أحسن عدسة Ultra Wide Angle من ناحية التفاصيل بقوة 40 ميجا بيكسل بفتحة عدسة واسعة كمان F/1.8 .. والكاميرا الرابعة TOF للمساعدة في حسابات العزل والعمق.
اما السيلفي بيجي بعدستين .. الرئيسية بدقة 32 ميجا بيكسل بفتحة عدسة F/2.2 والعدسة التانية TOF برده.
سوفت وير الكاميرا فيه Dual View تقدر تصور بعدستين سوا مع بعض .. يعني أنا جربت أصور بالعدسة الرئيسية والـZoom مع بعض في نفس الوقت .. ومش عارف بصراحة هتستخدم الـOption ده في ايه.
انا بصراحة شايف الصور اللي الموبايل ده بيقدر بطلعها عظيمة .. عظيمة حرفيًا من ناحية الألوان والـDinamic Range الرهيب والتفاصيل الكتيرة .. معنديش أي ذرة شك أني بجرب فعلًا واحد من أفضل الكاميرات اللي في العالم.
بالنسبة للعدسة الزوم فا هي محترمة جدًا .. لحد 5X بتطلع صورة محترمة جدًا .. ومعاك لحد 50X هتقدر تاخد صورة فيها تفاصيل ولو محتاج تشوف كتابة مثلًا في مكان بعيد هتقدر توصلها .. بس بلاش تستخدم العدسة دي غلط !!
العدسة الـUltra Wide اللي هنا بقى تحفة .. بتطلع كمية تفاصيل غير طبيعية تحس إنك لسه على العدسة الرئيسية .. بس اللي ملاحظه فيها إن الزاوية مش واسعه أوي .. في أوسع من كده بكتير .. بس هي كتفاصيل محترمة بصراحة.
والتصوير في الاضاءة الداخلية لسه مكمل في سيناريو الإحترافية .. صور مُمتازة عينك تحب تشوفها .. معنديش عليها أي تعليقات .. جربت أصور صورة Night Mode بالعدسة الرئيسية والعدسة الـUltra Wide .. ولاقيت ان العدسة الواسعة جابت تفاصيل أقل بفرق بسيط من العدسة الرئيسية لكن مازالت عدسة مُحترمة.
الـNight Mode في الموبايل ده محترم جدًا بصراحة .. بيطلع صور محترمة مليانة تفاصيل .. الـSharpness بتاعها عالي شويتين بس مازالت كويسة جدًا ومنورة جدًا .. تحس إن الكاميرات فتحت فلاش وإنت بتصور.
اما بالنسبة للعدسة السيلفي بقى .. عدسة مُمتازة من الأخر .. تفاصيل رهيبة مش طبيعية .. بتعمل Effect كده بالـHDR اللي من جوجل كاميرا في الصور اللي بيطلعها فا بيخلي شكل الصورة محترمة جدًا.
يمكن بس الوان البشرة مش مُشبعة أوي بس عندك فلاتر في تطبيق الكاميرا تقدر تستخدمها وتخلي الصورة مُشبعة أكتر بالألوان.
التجربة في الإضاءة الضعيفة مقبولة .. فتحه العدسة ضيفة بس السوفت وير بينور الشاشة وبيحاول يطلعلك صور فيها شوية تفاصيل.
بالنسبة لتصوير الفيديوهات .. الموبايل بيصور 4K بكل الكاميرات الخلفية وكمان بالكاميرا السيلفي مع ثبات ممتاز.
ممكن تشوف الصور والفيديوهات المتصورة بالموبايل في فيديو المراجعة في أخر المقالة.
سعر الموبايل :-
سعر الموبايل الرسمي للنسخة الوحيدة المتوفرة منه بمساحة تخزين 256 جيجا مع 8 جيجا رام هو 16 الف جنية مصري.
وطبعًا بينفع تركب شريحتين إتصال من الجيل الخامس اللي لسه مش موجود في مصر .. او ممكن تركب شريحة واحدة مع كارت ميموري Nano اللي هو مش متوفر برده في مصر.
الرأي النهائي :-
مميزات Huawei P40 Pro :-
- كاميرا خلفية قوية جدًا في كل الوظائف والعدسات
- كاميرا سيلفي رهيبة كتفاصيل
- شاشة Curved عملية في الإستخدام مع حواف قليلة وتصميم شيك
- جودة الشاشة مُمتازة مع معدل تحديث ممتاز
- معالج قوي جدًا يُقدم أداء مُمتاز مُستقر بفضل التناغم بين الهاردوير والسوفت وير
- مستشعر IR مُخصص للتعرف على الوجة بيوفرلك أمان وسرعة زي موبايلات ابل
- شحن عكسي 27 وات وهو سريع جدًا
عيوب Huawei P40 Pro :-
- البطارية متوسطة
- سرعة الشحن عادية
- صوت الموبايل أقل من المنافسين ( بدون ستيريو ! )
- عدم وجود خدمات جوجل واللي تعتبر عيب كبير في الموبايل ده
دي النقطة المحورية اللي تخليك تشتريه ولا لا .. على حسب إستخدامك انت.
Comments